Contract

Your Name :
Your Email :
Subject :
Message :
Image (case-sensitive):

Exodus 20

THUTHLUNGHLUI   Exodus   Bung 20
20:1	Pathianin heng thu zawng zawng hi a hrilh a,
20:2	"Kei, LALPA i Pathian, Aigupta ram ata, bawih ata hruai chhuak tu che u ka ni.
20:3	Keimah lo chu Pathian dang reng reng i nei tur a ni lo.
20:4	Milem siam chawp leh thil, a anpui reng reng - chung lam vana mi emaw, hnuai lam leia mi emaw, lei hnuai lama tuia mi emaw - i tan i siam tur a ni lo:
20:5	chung chu chibai i buk tuk a ni lo va, an rawng i bawl tur a ni hek lo; kei, LALPA i Pathian hi, Pathian thikthuchhia, pate khawlohna avanga fate hrem thin, mi hawtute chu chhuan thumna leh chhuan lina thlenga hrem thin leh,
20:6	mi hmangaia ka thupekte pawmtu sang tam takte chunga khawngaihna lantir thin ka nih hi.
20:7	LALPA i Pathian hming chu i lam mai mai tur a ni lo; LALPA chuan a hming lam mai mai chu thiam loh chantir lohvin a chhuah dawn si lo va.
20:8	Chawlhni hi thianghlim taka serh tur a ni tih hre reng rawh.
20:9	Ni ruk chhungin i thawk tur a ni a, i hna zawng zawng chu i thawk tur a ni:
20:10	a ni sarih ni erawh chu LALPA i Pathian tan chawlhni a ni e: chu mi ni chuan hna reng reng i thawk tur a ni lo, nang pawhin, i fapa pawhin, i fanu pawhin, i bawihpa pawhin, i bawihnu pawhin, i ran pawhin, i ina hnam dang pawhin:
20:11	ni ruk chhungin LALPAN lei leh van te, tuifinriat leh a chhunga awm zawng zawngte chu a siam a, tin, a ni sarih ni chuan a lo chawl ta si a: chuvangin LALPAN chawlhni chu mal a sawm a, a tithianghlim ta a ni.
20:12	I nu leh i pa chawimawi rawh; tichuan LALPA i Pathianin ram a pekah che hian i dam rei dawn nia.
20:13	Tual i that tur a ni lo
20:14	I uire tur a ni lo.
20:15	I ru tur a ni lo.
20:16	I vengte chungah hretu derah i insiam tur a ni lo.
20:17	I vengte chhungte chu i awt tur a ni lo va, i vengte nupui chu i awt tur a ni lo, a bawihpa emaw, a bawihnu emaw, a bawngpa emaw, a sabengtung emaw, i vengte ta reng reng chu engmah i awt tur a ni lo," tiin.
20:18	Tin, mipui zawng zawngte chuan khawpuirite, kawlphe te, tawtawrawt rite, tlang khute chu an hmu a: tin, mipuiin an han hmuh chuan an khur a, hla takah an ding ta a.
20:19	Tichuan Mosia hnenah, "Nangman kan hnenah hian thu sawi teh zawk khai, kan lo la ang e: amaherawhchu Pathian zawngin kan hnenah thu sawi teh tawh suh se, chutilozawng kan thi mai dah ang e," an ti a.
20:20	Tin, Mosia chuan mipuite hnenah chuan, "Hlau suh u: Pathianin a rawn fiah che u a nih hi, in mithmuhah tihbaia a awmna hi, in sual lohna turin a ni e," a ti a.
20:21	Tin, mipuite chu hla takah an la ding reng a, Mosia chuan Pathian awmna thim chhah mup kiang chu a va pan a.
20:22	Chutichuan LALPAN Mosia hnenah, "Israela thlahte hnenah hian hetiangin va sawi rawh; 'Nangmahni ngeiin hei van atanga ka rawn biakzia che u in hre tawh a.
20:23	Pathian dang reng reng chu ka kiangah chuan in rawn nei tur a ni lo; tangkaraw pathiante emaw, rangrachak pathiante emaw in tan in siam tur a ni lo.
20:24	ka tan lei maicham i siam tur a ni, chutah chuan i beramte leh i sebawngte chu i halral thilhlanahte leh i remna inthawi nante i hlan thin tur a ni: hmun tinah ka hming ka hriattirna apiangah chuan i hnenah ka lo kal thin ang a, mal ka rawn sawm thin ang che.
20:25	Tin, lung maicham mi siamsak dawn chuan lung chherin i siam tur a ni lo ve: i hriamhrei chu chu i hman hlauh zawngin i tibawlhhlawh a ni dawn si a.
20:26	Ka maicham lawn chhohna rahkaahte chuan lawn pawh i lawn chho tur a ni lo ve saruak a i awm a lan lohna turin.

Exodus 19

THUTHLUNGHLUI   Exodus   Bung 19
19:1	Israela thlahte Aigupta ram ata an chhuah achin a thla thumna, chu mi ni tak chuan Sinai thlaler an thleng a.
19:2	Rephidim hmun ata an chhuah a, Sinai thlaler an va thlen chuan thlalerah chuan an riak a; chutah chuan Israel-hote chu tlang bulah chuan an riak a.
19:3	Tin, Mosia chu Pathian hnenah a han chho va, tichuan LALPA chuan tlang atangin a bia a, a hnenah, "Jakoba chhungte hnenah hetiang hian ti la; tin, Israela thlahte hnenah pawh,
19:4	'Aigupta-hote chunga ka tiziate leh, mupui thlaa ka put che u a, ka hnena ka hruai thlenzia che u hi in hmu a.
19:5	Chuvangin ka thu in ngaihthlak tak zet a, ka thuthlung hi in pawm chuan khawvel hnam zawng zawng zingah hian ka tan ro thlan bik in ni ang: khawvel pum pui hi ka ta a ni si a:
19:6	tichuan ka tan puithiam chi, hnam thianghlim in ni ang,' tiin hrilh ang che. Heng thu hi Israela thlahte hnena i sawi tur chu a ni," a ti a.
19:7	Tin, Mosian mipui zinga upahote chu a rawn ko khawm a, LALPA thupek zawng zawngte chu a hrilh vek a.
19:8	Tin, mipuiteho zawng zawng chuan, "LALPA sawi ang zawng zawngte chu kan ti zel ang e," tiin, arualin an chhung dual dual a. Tichuan Mosian mipuite thusawi chu LALPA a hrilh leh chhawng a.
19:9	Tin, LALPA chuan Mosia hnenah, "Ngai teh, ka biak lai tak che mipuiin an hriat ve theih a, kumkhuaa i thu chu an awih fona turin chhum chhah mupah i hnenah ka lo kal dawn e," a ti a. Tichuan Mosian mipuite thusawi chu LALPA a hrilh leh chhawng a.
19:10	Tin, LALPAN Mosia hnenah, "Mipuiho hnenah va kal la, vawiin leh naktuk hian anmahni chu tithianghlim ang che, an puante sufai sela,
19:11	a ni thum ni atan inpuahchah rawh se: a ni thum ni chuan mipuiho zawng zawng mithmuhah Sinai tlangah chuan LALPA a lo chhuk dawn e.
19:12	An hnenah, 'Fimkhur ula, tlangah khian han lawn hauh suh ula, tlang hmawr pawh han dek hlek suh ang che u: tupawh tlang han dek apiang chu tihhlum ngei ngei tur a ni ang:
19:13	kut reng rengin deh tur a ni lo a, lunga denhlum ngei ngei tur a ni, a nih loh leh, kah tlang tur a ni ang; sa pawh mihring pawh a nung lo vang: tawtawrawt a rik ruai ruai hunah chuan tlangah khian an lawn chho tur a ni, a ti,' tiin mipuiho tan ri khamsak ang che," a ti a.
19:14	Chutichuan Mosia chu tlang ata mipuiho zingah chuan a lo chhuk a, mipuite chu a tithianghlim a; tin, an puante an su fai a.
19:15	Tin, mipuihote hnenah chuan, "A ni thum ni atan chuan inpuahchah rawh u: hmeichhe kiangah reng reng kal suh u," a ti a.
19:16	Tin, heti hi a ni a, a ni thum ni zingah chuan khawpuite a lo ri a, kawlte a lo phe a, tlang chhipah chuan chhum a lo zing chhah mup a, tawtawrawt ring em em maiin a lo ri a; tichuan mipui riahhmuna awmho zawng zawng chu an khur a.
19:17	Tichuan Mosian mipuiho chu Pathian han be turin riahhmun ata chu a hruai chhuak hlawm a; tlang bulah chuan an ding a.
19:18	Tin, Sinai tlangah chuan LALPA chu meia a lo chhuk avangin a khu phui ta mup a: tin, chu mi meikhu chu rawhtuina meikhu ang maiin a khu chho ngut ngut a, tichuan tlang pum pui chu a nghing dur dur a.
19:19	Tin, tawtawrawt ri chu a ring telh telh a, Mosia chuan thu a han sawi a, Pathian awin a lo chhang a.
19:20	Tichuan LALPA chu Sinai tlang, tlang chhipah chuan a lo chhuk a: tin, LALPA chuan Mosia chu tlang chhipah a ko chho va; tichuan Mosia chu a han chho va.
19:21	Tin, LALPA chuan Mosia hnenah, "Zuk chhuk langin, mipuite khu zuk zilh rawh, chutilozawng LALPA hmel hmuh tumin an lo lut tlang mai ang e, mi tam tak an boral mai tur a nia.
19:22	Tin, Puithiamho, LALPA kianga lo kal vete pawh chu intithianghlim ve rawh se, chutilo zawng an chungah LALPA chu a tuan mai ang," a ti a.
19:23	Tin, Mosian LALPA hnenah, "Mipuiho hi Sinai tlangah hian an lo chho thei hlei nem: nangin, 'Tlang velah hian ri khamsak ula, tithianghlim ang che u,' tiin, nangmah ngeiin thu min tiam alawm," a ti a.
19:24	Tin, LALPAN a hnenah, "Kal la, zuk chhuk tawh; tin, Arona nen lo chho leh ang che u: amaherawhchu puithiamho leh mipuiho chu LALPA hnena lo kal tumin lo lut tlang mai suh se chutilozawng an chungah a tuan mai tur a nia," a ti a.
19:25	Chutichuan Mosia chu mipuite hnenah chuan a zuk kal a, chung thu chu a zuk hrilh a.

Exodus 18

THUTHLUNGHLUI   Exodus   Bung 18
18:1	Tin, Jetroa, Midian rama puithiam, Mosia puzawn chuan Pathianin Mosia leh a mi Israel-hote thil a tihsakzia zawng zawngte leh, LALPAN Israel-hote chu Aigupta ram ata a hruai chhuahzia te chu chu a lo hria a:
18:2	,3 tin, Mosia puzawn Jetroa chuan Mosia nupui Zipori, Mosian a hawn tir kha, a fapate pahnih nen a hruai a; chu mi pakhat hming chu Gersoma a ni a; "mi rama awm ka nih avangin," a ti a;
18:3	,2 tin, Mosia puzawn Jetroa chuan Mosia nupui Zipori, Mosian a hawn tir kha, a fapate pahnih nen a hruai a; chu mi pakhat hming chu Gersoma a ni a; "mi rama awm ka nih avangin," a ti a;
18:4	tin, pakhata hming chu Eliazara a ni; "Ka pa Pathian chu mi tanpuitu a ni a, Pharaoa khandaih lak ata chu mi chhanhim tir avangin," a ti a:
18:5	tin, Mosia puzawn Jethroa chu Mosia fapate leh a nupui nen Mosia hnenah thlalera a riahna Pathian tlangah chuan an va kal a:
18:6	tin, ani chuan Mosia hnenah, "Kei i puzawn Jethroa, i nupui nen i fa pahnih nen kan lo kal e," a ti a.
18:7	Tin, Mosia chu a puzawn hmuak turin a va chhuak a, chibai a va buk a; chanchinte an inzawt a; tichuan puan inah an lut ta a.
18:8	Tin, LALPAN Israel-ho avanga Pharaoa leh Aiguptate chunga a tihzia zawng zawngte leh kawng laia hrehawm an tuarzia zawng zawngte leh LALPAN anmahni a chhanhimzia te chu Mosia chuan a puzawn a hrilh a.
18:9	Tin, LALPAN Israel-hote chu Aigupta-ho lak ata a chhanhim a, anmahni thil a lo tihsak turzia leh an chunga a thatna zawng zawng avangte chuan Jethroa chu a lawm em em mai a.
18:10	Tin, Jethroa chuan, "LALPA, Aigupta-ho lak ata leh Pharaoa lak ata chhanhimtu che u chu fakin awm rawh se; ani chuan Aigupat-ho thu hnuaia awm mipuite chu a chhanhim tur hi.
18:11	Tunah chuan LALPA chu pathian zawng zawngte ai chuan a ropui zawk tih ka hre ta: a ni, chapo taka an beihnaah tak chuan a lo lang a ni," a ti a.
18:12	Tin, Mosia puzawn Jethroa chuan halral thilhlan leh Pathian tana inthawina turte a va la a: tin, Arona leh Israel upaho zawng zawngte chu Mosia puzawn hnenah chuan Pathian hmaah chhang ei turin an kal a.
18:13	Tin, heti hi a ni a, atukah chuan Mosia chu mipuite ro rel turin a thu a: tin, mipuite chu zing ata tlai thlengin Mosia kiang velah chuan an ding reng a.
18:14	Tin, Mosia puzawnin chutia mipuite tana thil a tih zawng zawng chu a han hmuh chuan, "Mipuite hi thil engnge maw i tihsak chu le? Engtizia nge nangmah chauh hi i thut rang a, zing ata tawh tlai thlenga mipui zawng zawngte hi i kiang vela an din rang?" a ti a.
18:15	Tin, Mosian a puzawn hnenah, "Mipuite hi Pathian rawn turin ka hnenah an lo kal a ni ber e:
18:16	thu eng emaw an neih chuan ka hnenah hian an lo kal thin a: tichuan keiin a thenawmpa nena an thu chu ka lo relsak a, tin, Pathian remruat leh a dante chu ka lo hriattir thin a ni," a ti a.
18:17	Tin, Mosia puzawn chuan a hnenah, "I thiltih dan chu a tha lo ve a.
18:18	Nang leh heng i hnena mipui awmte hi in intichau zo ngei ang maw le: he hna hi i tan a hautak lutuk a ni: nangmah chauhva han tlin mi a ni hlei nem.
18:19	Ka thu hi ngaithla teh khai, rem ka han ruatpui ang chia, i hnenah Pathian awm rawh se: nang hi Pathian lama mipui aiawhin awm langin, an thubuaite chu Pathian hnenah thlen ang che:
18:20	tin, thu ruatte leh dan chu i zirtir ang a, an awmdan tur leh an tih dan turte chu i kawhhmuh zel tur a ni.
18:21	Chu chang ni lovin, mipui zing ata mi hmantlak deuh deuh Pathian tih mite, mi dik takte, hlawkna dik lo tak haw mite-thlang chhuak langin: chutiang mite chu sang pawl chunga hotuah te, za pawl chunga hotuah te, sawmnga pawl chunga hotuah te, sawm pawl chunga otuah te ruat langin:
18:22	chungte chuan eng lai pawhin mite ro relsak rawh se: tin heti hi a ni ang a, thu lian deuh apiangte chu i hnenah an rawn thlen thin ang a, thu tetham erawh chu anmahniin rel rawh se: chutichuan i tan a lo awlsam zawk ang a, tin, anni chuan an chhawk zang hle dawn che nia.
18:23	Chutianga i tih a, Pathian pawhin thu a pek che chuan i tlin thei ang a, tichuan heng mipuiho zawng zawngte pawh hi lungawi takin mahni awmna lamah chuan an tir thei dawn nia," a ti a.
18:24	Chutichuan Mosia chuan a puzawn thu sawi chu a pawm a, a sawi ang zawng zawng chuan a ti ta a.
18:25	Tin, Mosia chuan Israel-ho zawng zawng zing ata chu mi hmantlak deuh deuh a thlang chhuak a, mipui chunga hotuah a siam a, sang pawl chunga hotuah te, za pawl chunga hotuah te, sawmnga pawl chunga hotuah te, sawm pawl chunga hotuah te a ruat ta a.
18:26	Chungte chuan eng lai pawhin mite ro an relsak thin a: thu lian deuh apiangte chu Mosia hnenah an thlen thin a, thu t?tham erawh chu anmahnihovin an rel thin.
18:27	Tichuan Mosia chuan a puzawn chu a kaltir ta a; tin, a awmna ram lamah chuan a haw leh ta a.

Exodus 17

THUTHLUNGHLUI   Exodus   Bung 17
17:1	Tin, Isaela thlahte pung khawmho zawng zawng chu Sin thlaler ata an chhuak leh a, LALPA thupek angin riah bi nei thliah thliaha riakin, Rephidim-ah an inkhuar a: tin, chutah chuan mipuite in tur tui a awm ta lo va.
17:2	Chuvangin mipuite chuan Mosia chu an bei ta a, "Tui in tur min pe rawh," an ti a. Tin, Mosian an hnenah, "Engati nge mi bei mai? Eng vangin nge LALPA in fiah ni?" a ti a.
17:3	Chutah chuan mipuite chu tuihalin an awm a ni a; tichuan mipuite chu Mosia chungah an phunnawi a, "Eng vangin nge kan fanaute leh kan rante nen hian tuihala min tihhlum turin Aigupta ram ata min hruai chhuah ni?" an ti a.
17:4	Tin, Mosian, "Heng mipuihote hi engtin nge ka tih ang? Lunga min denhlum hial pawh an duh awm hi," tiin LALPA a au va.
17:5	Tin, LALPAN Mosia hnenah, "Mipuiho hma lamah kal langin, Israela thlahte upaho thenkhat hruai ve ang che; tin, i tiang, hmana lui i vuakna kha keng langin kal rawh.
17:6	Ngai teh, Horeb-a lungpui chungah sawn i hmaah ka lo ding ang a; tin, lungpui chu i han vua ang a, tichuan mipuite in tur tui chu a lo luang chhuak mai ang," a ti a. Tin, Mosian Israela thlahte upaho mithmuhah chuan chutiang chuan a han ti a.
17:7	Chu mi hmun hmingah chuan Massa leh Meriba a vuah a, Israela thlahten an bei avang leh, "Kan zingah hian LALPA chu a awm nge maw awm lo le?" tia LALPA chu an fiah avangin.
17:8	Tin, Rephidim hmunah chuan Amalek-hovin Israel-ho chu an rawn bei ta a.
17:10	Tichuan Mosian a hnena a sawi ang chuan Josua chuan a ti a, Amalek-ho chu a va bei ta a: tin, Mosia leh Arona leh Hura chu tlang chhipah an han lawn a.
17:11	Tin, heti hi a ni a, Mosian a kut a phar veleh Israel-hote chuan an hneh thin a.
17:12	Nimahsela Mosia bante chu a lo kham ta a; tichuan lung an han la a, a bulah chuan an dah a, chutah chuan a thu ta a; tin, Arona leh Hura chuan a kut chu an dawmsak ta a, pakhatin lehlam a dawm a, pakhatin a lehlam a dawm a, chutichuan ni tlak thlengin a kutte chu a awm ngaiin a awm ta tlat a.
17:13	Tin, Josua chuan Amaleka leh a hote chu khandaih hriamin a tudawl ta a.
17:14	Tin, LALPAN Mosia hnenah, "He mi thu hi hriat reng atan lehkhabuah ziak la, Josua hriatah sawi chhuak thin ang che: van hnuaiah hian Amalekho hi an awm tih pawh hriat loh khawpin ka tichimit hlauh dawn e," a ti a.
17:16	"LALPAN chhia a chham ta; LALPAN chhuan awm chhung zawng zawng chuan Amalek-ho chu a do vang," a ti a.

Exodus 16

THUTHLUNGHLUI   Exodus   Bung 16
16:1	Tin, Elim hmun ata chu an chhuak a, tin, Israela thlahte pung khawmho zawng zawng chuan Aigupta ram ata an chhuah achin thla hnihna, ni sawm leh ni nga niin Elim hmun leh Sinai tlarg inkara Sin thlaler an va thleng a.
16:2	Tin, thlalerah chuan Israela thlahte pung khawmho zawng zawng chu Mosia chungah leh Arona chungah an lo phunnawi ta a:
16:3	tin, Israela thlahte chuan an hnenah, "Aigupta rama sa bel bula kan thut lai te khan LALPA kutah lo thi ta zawk mai ila aw! Mipui pungkhawmho zawng zawngte hi thlalerah hian riltama tihhlum turin min hruai chhuak a nih hi le," an ti a.
16:4	Chutichuan LALPAN Mosia hnenah, "Ngai rawh, van atangin in tan chhang ka rawn surtir ang e; tichuan mipuiten ni tin ni khat atana chanvo tawk chauh zel chu va chhar thin rawh se, ka dan an zawm nge zawm lo ka fiah theih nan.
16:5	Tin, heti hi a ni ang a, a ni ruk n?chuan an va chhara chu an buatsaih ang a; tin, ni tina an chhar lehhnih zel a ni ang," a ti a.
16:6	Tin, Mosia leh Aronan Israela thlahte zawng zawng hnenah chuan, "Tlai lamah chuan LALPA chu Aigupta ram ata hruai chhuaktu ngei che u a ni tih in hre dawn e:
16:7	tin, zingah pawh LALPA ropuina chu in hmu dawn e; LALPA chunga in phunnawina kha a lo hriat tak hi: keinite chu engnge kan nih a, kan chunga in phunnawi mai ni;" an ti a.
16:8	Tin, Mosian, "Chung chu in la hria ang, LALPAN tlai lama sa ei tur a pek che u a, zing lama chhang kham khawp a pek hunah che u chuan, LALPA chuan a Chunga in phunnawina kha a hre reng si a: keinite chu engnge kan nih ni? Kan chunga phunnawi in ni hlei nem, LALPA chunga phunnawi asin in nih ni," a ti a.
16:9	Tin, Mosian Arona hnenah, "Israela thlahte pung khawmho zawng zawngte hnenah hian, 'LALPA kiang hnaiah lo kal rawh u: in phunnawinate kha a lo hriat tak hi,' ti ang che," a ti a.
16:10	Tin, heti hi a ni a, Israela thlahte pung khawmho zawng zawngte hnena Aronan thu a sawi lai tak chuan thlaler lam chu an han thlir a; tin, ngai teh, LALPA ropuina chu chhumah a lang ta a.
16:11	Tin, LALPAN Mosia a bia a,
16:12	"Israela thlahte phunnawinate kha ka lo hria a; an hnenah, 'Tlai lamah chuan sa in ei ang a, tin, atukah chuan chhang kham khawp zetin in ei tawh ang; tichuan kei hi LALPA in Pathian chu ka ni tih in hria ang, a ti e,' ti ang che," tiin.
16:13	Tin, heti hi a ni a, tlai lamah chuan vahmim an lo thlawk chho chiam a, an riahhmun chu a d鈖 ta dul a: tin, atirah chuan an riahhmun velah chuan dai a lo tla dup a.
16:14	Tin, dai tla chu a han hul veleh chuan, ngai teh, thlaler lei chungah chuan thil par tete vur thal tiat lek lek te hi a lo awm tuar mai a.
16:15	Chu chu Israela thlahten an han hmuh chuan, "Engnge maw ni chu le?" an inti hlawm a; engnge ni tih an hre si lo va. Tin, Mosian an hnenah, "LALPAN chhang in ei atana a pek che u a nih hi.
16:16	Hei hi a ni LALPAN, 'Mi tinin mahni kham khawp theuh chhar ulangin; mi pakhat tan omer khat zel, in chhungkaw mihring awm zat ang zelin in chhar tur a ni, mi tinin in puan in chhunga awmte tan chuan in chhar tur a ni,' tia thu a pek chu ni," a ti a.
16:17	Tin, Israela thlahte chuan chutiang chuan an ti a, thenkhatin an chhar tam a, thenkhatin an chhar tlem a.
16:18	Tin, omerin an han teh a, a chhar tam chuan a chuangin a nei lo va, a chhar tlem chuan a tlachham hek lo; mi tinin mahni kham tawk theuh chu an chhar theuh va.
16:19	Tin, Mosian an hnenah, "Tumahin atuk lam atan chuan khek suh ang che u," a ti a.
16:20	Nimahsela Mosia thu chu an pawm duh lo va; thenkhat chuan atuk lam atan an khek a; tichuan a lo lung a, a lo rimchhe ta a; chuvangin Mosia chu anchungah a thinrim ta hle a.
16:21	Chutichuan tuk tin mi tinin mahni kham khawp lek zelin an chhar thin a: ni a lo tlangsan veleh a tuiral vek thin a.
16:22	Tin, heti hi a ni a, a ni ruk n?chuan chhang chu a leh hnih - mi pakhat tan omer hnih zel an chhar a: tin, chung pung khawmho roreltu zawng zawngte chuan Mosia an va hrilh a.
16:23	Tin, ani chuan an hnenah, "Chu chu alawm LALPAN, 'Naktuk hi chawlh der ni, LALPA tana chawlhni thianghlim a ni e,' a tih chu: chuvangin a awma awm in duh leh awm ulangin, a chhuma chhum in duh leh chhum rawh u; chu mi bang chu atuk lam atan in dah dawn nia," a ti a.
16:24	Tin, Mosia hrilh ang chuan atuk lam atan an dah hrang ta a: chu chu a rimchhe lo va, a lung hek lo.
16:25	Tichuan Mosian, "Vawiin chuan hei hi ei rawh u; vawiin hi LALPA tan chawlhni a nih hi: vawiinah zawng leia tla in hmu lo vang.
16:26	Ni ruk chhung chuan in va chhar thin ang a; a ni sarih ni erawh chu chawlhni a ni a, chhar tur reng reng a awm lo vang," a ti a.
16:27	Tin, heti hi a ni a, a ni sarih ni chuan mi thenkhat chu chhar turin an va chhuak a, chhar tur reng reng an hmu zo ta lo va.
16:28	Tichuan LALPAN Mosia hnenah, "Ka thupekte leh ka dante hi eng chen nge maw pawm duh loh in tum ni aw!
16:29	LALPAN chawlhni a pek che u hi hre ta che u maw le, chuvangin ni ruk niin ni hnih tla tawk tur chhang a pe che u a nih hi; mi tin mahni hmun theuhvah awm hle hle mai rawh u, ni sarih n?chuan tumah a awmna hmun ata chhuak hauh suh se," a ti a.
16:30	Chutichuan mite chu ni sarih ni chuan an chawl ta a.
16:31	Tin, Israela chhungte chuan chu mi hmingah chuan Manna an vuah a: koriender mu ang maia var ser a ni a; han ei chuan chhangper khawizu nena siam ang a ni.
16:32	Tin, Mosian, "Hei hi alawm LALPAN, 'Hei hi in thlahte thlengin omer khat vawng tha rawh u: Aigupta ram ata ka hruai chhuah lai che u a, thlalera ka chawm thinna che u chhang chu an rawn hmuh theih nan,' tia thu a pek chu," a ti a.
16:33	Chutichuan Mosian Arona hnenah, "Bel va la langin, omer khat manna hi khung rawh, in thlahte thlenga vawn reng turin LALPA hmaah dah ang che," a ti a.
16:34	LALPAN Mosia thu a pek ang chuan Arona chuan vawn reng turin Thuhriattirna hmaah chuan a dah a.
16:35	Israela thlahte chuan mihring chenna ram an thlen hma loh chuan kum sawmli chhung chu manna an ei thin a; Kanaan ramri dep an thlen hma loh chuan manna an ei thin.
16:36	Omer khat hi epha hmun sawma thena hmun khat hu a ni.

Exodus 15

THUTHLUNGHLUI   Exodus   Bung 15
15:1	Chutichuan Mosia leh Israela thlahte chuan LALPA chawimawiin he hla hi an sa a, an sawi dual dual a, "LALPA chawimawiin hla ka sa ang, ropui takin a hneh tak hi: Sakawr leh a chunga chuang chu tuipuiah a paih thla ta a.
15:2	LALPA chu ka chakna leh ka hla a ni, Ani chu ka chhandamna a lo ni ta bawk a: Ka Pathian a ni a, amah chu ka fak ang; Ka pa Pathian a ni a, amah chu ka chawimawiang.
15:3	LALPA chu indo mi a ni: A hming pawh LALPA a ni.
15:4	Pharaoa tawlailirte leh a sipaihote chu tuipuiah a paih thla ta a: Tin, a sipai hotu thlante pawh Tuifinriat Senah an tlahlum zo ta.
15:5	Tui thuk takin a chim zo ta: Lung angin tui thuk takah an pil ta.
15:6	I kut ding lam chu, aw LALPA, thiltihtheihnain a ropui a, i kut ding lam chuan, aw LALPA, hmelma chu a tisawm ta dep a.
15:7	I ropuina nasa tak chuan nangmah dotute chu i tiboral vek a: i thinrim i rawn hrithla a, buhpawl ang maiin an kangral zo ta a.
15:8	I hnena thawin tuite chu a lo in tiang a, Tuite chu englo dah khawm th鹯 angin a ding luah a: Tuifinriat chhung daiha tui thuk takte chu a lo khal zo ta a,
15:9	Hmelma chuan, 'Ka 没m ang a, ka umphak ngei ang, rallak sum chu ka sem ang: Anmahniah chuan ka chak daih ka hmu tawh ang: Ka khandaih ka phawi ang a, ka kutin anmahni chu ka tiboral ang,' a ti a.
15:10	I thli chu i han tlehtir ta mai a, tuifinriatin a chim pil ta vek a: Tui thuk takahte chuan suan angin an pil ta vang vang a.
15:11	Aw LALPA, pathiante zingah hian nang ang hi tunge awm le? Thianghlimna lama ropui leh, Fak tlak nihna lama zahawm leh, thilmakte ti thin hi nang ang tunge awm le?
15:12	Nangin i kut ding lam i han phar a, Leiin anmahni chu a lem zo ta a.
15:13	Nangin i khawngaihnain mipui i tlante kha i hruai a: I chenna thianghlimah chuan i chaknain i hruai ta a.
15:14	Mi tinrengin an hria a, an khur thlu zo va, Philistia rama chengte chu thlaphannain a man ta.
15:15	Tichuan Edom rama hotute chuan mak an ti hle a; Moab mi chakte chu khurhnain a rawn man a: Kanaan rama awm zawng zawngte chu an tui zo ta a.
15:16	Tihna leh hlauhnain a tlakbuak a; I ban chaknain lung ang maiin a tingawi hle hle a; Aw LALPA, i mite an kai vek hma loh chuan, Mi i leite an kai vek hma loh chuan.
15:17	Nangin anmahni chu i hruai lut ang a, i roluahtu tlangah chuan i phun ang, Aw LALPA, nangin i awmna tura hmun i buatsaihah chuan, Aw LALPA, hmun thianghlim i kut ngeiin a lo dinnaah chuan,
15:18	LALPA chuan chatuanin ro a rel tawh ang," tiin.
15:19	Pharaoa sakawrte chu a tawlailirte chawpin a sakawr chung chuang mite nen chuan tuipuiah an lut thla a, tin, LALPAN tuifinriat tuite chuan a rawn vur leh ta a; Israela thlahte erawh chu tuipui chhung leicharah chuan an kal vek a.
15:20	Tin, zawlnei Miriami, Arona farnuin khuangte a keng a; tin, hmeichhia zawng zawngin khuangte kenga lamin an zui chhuak ve ta hlawm a.
15:21	Tin, Miriami chuan "LALPA chawimawiin hla sa rawh u, ropui takin a hneh tir hi; Sakawr leh a chunga chuang chawpin tuipuiah a paih thla ta a," tiin hlain a hruai a.
15:22	Tichuan Mosian Israel-hote chu Tuifinriat Sen ata a hruai chhuak a, S鹯 thlaler lam panin an chhuak ta a; tin, thlalerah chuan ni thum zet an kal a, tui an hmu zo ta lo va.
15:23	Tin, Mara hmun an va thleng a, Mara hmuna tuite chu a lo khak avang chuan an in thei lo va: chuvang chuan a hmingah Mara vuah a ni.
15:24	Tichuan, mipuite chuan, "Engnge ni kan in dawn le?" tiin Mosia chungah an phunnawi ta a.
15:25	Tin, ani chuan LALPA chu a au va; tin, LALPA chuan thing pakhat hi a han kawhhmuh a, chu chu tuiah chuan a zuk paih lut a, tichuan tui chu a lo tui ta a. Chutah chuan chuan thuruat leh rorelna a siamsak a; chutah chuan anmahni fiahna a siam a;
15:26	"LALPA i Pathian aw hi ngun taka i ngaihthlak a, a mithmuha tha a tih zawngte i tih a, a thupekte i ngaihsan a, a thuruat zawng zawngte i pawm chuan Aigupta mite chunga hri ka lentir tak angte kha i chungah reng reng ka lentir ve lo vang: LALPA a tidamtu che ka nih hi," a ti a.
15:27	Tin, Elim hmun an va thleng a, chutah chuan tuihna nei sawm leh pahnih leh tum thing sawmsarih a awm a; tin, chuta tui kamahte chuan an riak ta a.

Exodus 14

THUTHLUNGHLUI   Exodus   Bung 14
14:1	Tin, LALPAN Mosia a bia a,
14:2	"Israela thlahte hnenah hian thu sawi rawh khai, kir leh sela, Migdol hmun leh tuipui inkar Pi-hahiroth hmun bul, Baal-Zephon hmun bulah chuan riak rawh se: chu mi dep tuipui kamah chuan riak rawh u.
14:3	Tichuan Pharaoan Israela thlahte chungchang thu-ah, 'Ram lakah an mangang ta zet le, thlalerah an tang ta,' a ti ang a.
14:4	Tin, keiin Pharaoa thinlung chu ka tihkhauhsak ang a, tichuan anmahni chu a um ang a; tin, keiin Pharaoa lakah leh a sipaiho zawng zawng lakah chuan chawimawina chu ka hlawh ang; tichuan Aigupta miten kei hi LALPA chu ka ni tih an hria ang," tiin. Tin, chutiang chuang an ti a.
14:5	Tin, mite chu an tlan bo zo ta tih Aigupta lal chu an hrilh a: tin, Pharaoa thinlung leh a chhiahhlawhte thinlung chu a lamlet leh ta a, tichuan, "Israel mite kan rawngbawl lai kan chhuahtir ta ngawt mai hi engtiziaa hetianga ti ta nge maw kan nih chu le?" an ti ta a.
14:6	Tin, an tawlailir an buatsaih a, tin, mite chu a hnenah a hruai a:
14:7	tin, tawlailir zaruk tha thiau leh Aigupta rama tawlailir zawng zawng, an zaa chunga hotute nen a hruai ta a.
14:8	Tin, LALPAN Aigupta ram lal Pharaoa thinlung chu a tihkhauhsak a, tin, Israela thlahte chu a um ta a: Israel thlahte lah chu induh takin an chhuak a ni si a.
14:9	Tin, Aigupta mite chuan sakawr zawng zawng leh Pharaoa tawlailir leh a sakawr chung chuang mite leh a sipaihote nen chuan an um a, tin, Pi-hahiroth hmun bul, Baal-Zephon hmun depa tuipui kama an riak chu an va umpha ta a.
14:10	Tin, Pharaoan a va pan hnaih chuan Israela thlahte chu an han dak a, tin, ngai teh, Aigupta mite chuan an lam chu an pan phei ta a: tichuan an lo hlau ta em em mai a: tin, Israela thlahte chuan LALPA chu an au ta a.
14:11	Tin, Mosia hnenah, "Aigupta ramah khan thlan a awm loh avangin em ni thlalerah hian thi tura min hruai chhuah ni? eng vangin nge ni hetianga min ti tura Aigupta tam ata min hruai chhuah ni?
14:12	Aigupta ramah pawh khan, 'Aigupta mite rawngbawl hian kan awm mai ang,' tiin i hnenah khan kan sawi reng lo vem ni? thlalera thih tlaw ngawt mai te ai chuan Aigupta mite rawng kha lo bawl ta ila a that zawk dawn hi," an ti a.
14:13	Tin, Mosian mipuite hnenah chuan, "Hlau suh u, awm hle hle mai ula, LALPA chhandamna, vawiina a thawhsak tur che u hi en ngawt mai rawh u, vawiina Aigupta mi in hmuhate hi kumkhuain in hmu leh dawn tawh lo ve.
14:14	LALPAN a dosak ang che u a, nangni chu in awm hle hle mai ang," a ti a.
14:15	Tin, LALPAN Mosia hnenah chuan, "eng vangin nge maw mi auh le? Israela thlahte hi kal zel turin hrilh ta che.
14:16	Tin, nang pawhin i tiang kha han la la, tin, tuipui chungah khan lek la, tui chu lo inthen rawh se: tichuan tuipui chhung lei charah Israela thlahte chu an kal ang.
14:17	Tin, keiin, ngai teh, Aigupta mite thinlung chu ka tihkhauhsak ang a, tichuan an um zel ang: tin, Pharaoa lakah leh a sipaiteho zawng zawng lakah leh a tawlailirte lakah a sakawr chung chuang mite lakah chuan chawimawina chu ka hlawh ang.
14:18	Tin, Pharaoa lakah leh, a tawlailirte lakah leh a sakawr chung chuang mite laka chawimawina ka hlawh hunah chuan Aigupta miten kei hi LALPA chu ka ni tih an hria ang," a ti a.
14:19	Tin, Pathian vantirhkoh, Israela mite hma hruai thin kha an hnung lamah a insawn ta a; tin, chhum ding kha an hma lam ata a insawn a, an hnung lamah a ding ta a:
14:20	tin, Aigupta mite leh Israel mite inkarah a lo tla ta a, tichuan chhum chu a lo awm a, a thim bawk a, amaherawhchu chhum chuan zan chu a tieng a: tin, zankhuain a tu lam mah mah an inpan lo va.
14:21	Tin, Mosian tuipui chungah a kut a han phar a: tin, LALPAN zankhuain khawchhak thli na takin a rawn tlehtir a, tuipui chu a nem kantir a, tin, tuipui chu lei charah a chantir a, tin, tuite chu a lo inthen ta a.
14:22	Tin, Israela thlahte chu tuipui chhung lei charah chuan an kal ta a: tin, tuite chu an ding lampangah leh an vei lampangah chuan an tan bang a lo ni ta mai a.
14:23	Tin, Aigupta mite chuan an um a, Pharaoa sakawr zawng zawngte leh a tawlailirte leh a sakawr chung chuang mite chuan tuipui chhungah chuan an um lut ta a.
14:24	Tin, heti hi a ni a, khawfing chah veleh, LALPAN Aigupta mite chu meialh ding leh chhum dingah chuan a zuk timangang ta a.
14:25	An tawlailir kete chu a thlawnsak a, an khalh chak thei ta l o va; chutichuan Aigupta mite chuan, "Israel-hote hi i tlansan ang u; LALPAN an lama tangin he mite hi Aigupta mite a dopui a nih hi," an ti ta a.
14:26	Tin, LALPAN Mosia hnenah, "Aigupta mite, an tawlailirte, an sakawr chung chuang mite chu tuiin a rawn chim leh theihna turin i kut kha tuipui chungah han phar rawh khai," a ti a.
14:27	Tin, Mosian tuipui chungah chuan a kut chu a han phar a, tin, khua a var veleh chuan tuipui chu a luan pangngaiin a luang leh ta a; tin, Aigupta mite chu an tlan kir leh a; tin, LALPAN Aigupta mite chu tuipui chhungah chuan a paih thla ta a.
14:28	Tin, tuite chu a luang leh ta a, tichuan tawlailirte leh sakawr chung chuang mite, tuipuia um luttu, Pharaoa sipaiho zawng zawngte lam chuan tuiin a chim pil ta vek a; pakhat mah chhuak reng reng an awm hauh lo mai a.
14:29	Israela thlahte erawh chu tuipui chhung lei charah chuan an kal vek a; tin, tuite chu an ding lampangah leh an vei lampangah chuan an tan bang a lo ni ta mai a.
14:30	Chutiang chuan a ni, LALPAN Israel-hote chu, chu mi n?chuan Aigupta mite kut ata a chhanchhuah ni; tin, Israel-hote chuan Aigupta mi thite chu tuipui kamah chuan an hmu a.
14:31	Tin, Israel-hote chuan LALPAN Aigupta mite chunga thil ropui tak a tih chu an hmu a, tin, mipuite chuan LALPA chu an tih a: tichuan LALPA leh a chhiahhlawh Mosia chu an ring ta a.

Exodus 13

THUTHLUNGHLUI   Exodus   Bung 13
13:1	Tin, LALPAN Mosia a bia a,
13:2	"Israela thlahte zinga fa tir zawng chhul keu hmasa ber apiang, mihring pawh sa pawh ka tan serhah in ruat tur a ni; ka ta a ni e," tiin.
13:3	Tin, Mosian mipuite hnenah chuan, "Vawiin ni Aigupta ram ata, bawih ata in chhuah ni hi hre reng ang che u; kut chak takin LALPAN he mi hmun ata hi a hruai chhuah che u hi: chhang dawidim telh reng reng chu ei tur a ni lo ve.
13:4	Abib thla, vawiin ni hian in chhuak a ni.
13:5	Tin, heti hi a ni ang a, LALPAN Kanaan-hote, Hit-hote, Amor-hote, Hiv-hote,Jebus-hote ram, khawizu leh hnutetuia luanna ram, in thlahtute chhechhama pek a tiamah khan a hruai thlen hunah che u chuan, he mi thla hian he rawngbawlna hi in zawm tur a ni.
13:6	Ni sarih chhung chu chhang dawidim telh loh in ei tur a ni a, tin, a ni sarih ni chu LALPA tan kut ni a ni ang.
13:7	Ni sarih chhung chuan chhang dawidim telh reng reng chu a awmin awm hlek suh se, in awmna hmunah reng reng dawidim pawh a awmin awm hlek suh se.
13:8	Chu mi niah chuan in fate hnenah, 'Aigupta ram ata kan lo chhuah lai khan LALPAN thil min lo tihsak vang a ni e,' tiin in hrilh tur a ni e.
13:9	LALPA dan chu in kaa a awm reng theih nan, in kutah in tan chhinchhiahna leh in mit inkarah hian hriat rengna tur a ni ang: Kut chak takin LALPAN Aigupta ram ata a hruai chhuah che u hi.
13:10	Chutichuan he thuruat hi kum tin a hun takah chuan in rawn zawm thin tur a ni.
13:11	Tin, heti hi a ni ang a, LALPAN in hnenah leh in thlahtute hnena chhechhama pek a tiam tawh che u anga, Kanaan-hote rama a hruai thlen che u a, a pek hun che u chuan,
13:12	chhul keu hmasa ber apiang leh in ran piang thla hmasa ber apiang chu LALPA tan in dah hrang zel tur a ni; a pate chu LALPA ta tur a ni ang.
13:13	Sabengtung piang hmasa ber apiang chu beram novin in tlan tur a ni ang. In tlan duh loh erawh chuan a nghawng chu in titliak tur a ni: tin, in fate zinga mipa piang hmasa ber apiang chu in tlan tur a ni.
13:14	Tin, heti hi a ni ang a, nakin lamah te in faten, "Hei engtizia nge ni le?' tia an la rawn zawh hun che u chuan nangnin an hnenah, 'Kut chak takin LALPAN Aigupta ram ata bawiha kan awm kha min hruai chhuak a ni:
13:15	tin, heti hi a ni a, Pharaoan kan chhuah thu a tihkhirh em avangin, LALPAN Aigupta rama fa tir zawng zawng, mihring fa tir apiang leh ran piang hmasa ber apiang chu, a tihlum vek a: chuvangin a pa, chhul keu hmasa ber apiang hian LALPA hnenah kan inthawi a nih hi: amaherawhchu kan fapate zinga fa tir zawng zawngte chu kan tlan a ni,'ti ang che u.
13:16	Tin, in kutah in tan chhinchhiahna a ni ang: in mit leh mit inkara chalhrennate nen: kut chak takin LALPAN Aigupta ram ata min hruai chhuak ta si a," a ti a.
13:17	Tin, heti hi a ni a, Pharaoa mite chu a chhuahtir phal veleh chuan, Pathianin Philistia-ho ram lamah chuan a hnai zawk nain a hruai lo va; Pathianin, "Indonate an hmuhin an inchhir ang a, Aigupta ramah an kir leh hlauh dah ang e," a ti si a:
13:18	amaherawhchu Pathianin mite chu Tuifinriat Sen lam panin thlaler lamah a hruai kikawi ta zawk a: tin, Israela thlahte chu Aigupta ram ata chu inralring rengin an chhuak ta a.
13:19	Tin, Mosian Josefa ruhte chu a chhawm a: Israelaa thlahte khka, "Pathianin a la rawn kan ngei ngei ang che u a; tin, ka ruhte hi heta ta in zawn chho tur a ni," tiin chhia a lo chhamtir tlat si a.
13:20	Tin, Sukoth hmun ata chu an chhuak a, thlaler tawntirh Etham hmunah an riak a;
13:21	Tin, LALPAN chhun laiah chuan chhum dingin an hma a hruai a; tin, zanah chuan anmahni en turin meialh dingin an hma a hruai a; chhun leh zan an kal theih zelna turin:
13:22	chhuna chhum ding leh zana meialh ding chuan mipui chu a kalsan ngai hauh lo a ni.

Exodus 12

THUTHLUNGHLUI   Exodus   Bung 12
12:1	Tin, LALPAN Mosia leh Arona chu Aigupta ramah chuan a bia a:
12:2	"Tun thla hi in tan thla chhiar tanna a ni ang a: in tan kum khat chhunga thla chhiar tanna a ni ang.
12:3	Israel-ho pung khawm zawng zawngte hnenah hian, 'Tun thla ni sawm ni takah hian mi tinin an chhungkaw khawsa ang zelin an chhungkua atan beram no pakhat la theuh sela:
12:4	tin, an chhungkua chu beram no talhna tham ni lo khawpa tlem lutuk an nih chuan, a thenawm nen an chhungkaw mihring zir zelin beram no pakhat intawm sela; mi tin ei tawk tur ang zel ngaihruatin beram no chu in ruat tur a ni.
12:5	In beram no chu a pa, kum khat hnuai lam, hmelhem lo a ni tur a ni: beram zinga mi emaw kel zinga mi emaw a ni tur a ni a:
12:6	tin, chu mi thla ni sawm leh ni li ni thlengin in dah tur a ni a: tichuan Israel-ho pung khawm zawng zawng chuan tlai lamah an talh tur a ni.
12:7	Tin, a thisen chu an la ang a, an eina tur in kawngka biang pahnihah leh kawngka lu chungah an tat tur a ni.
12:8	Tin, chu mi zan chuan a sa chu rawh sela, chhang dawidim telh loh nen ei rawh se; hnim kh?nen an ei tur a a ni.
12:9	Tin, a helin ei suh sela, tui pawhin chhum hauh suh sela, a rawhin rawh zawk rawh se, a lu leh a ke chawpin, a kawchhung nen.
12:10	Tin, atuk atan chuan engmah in dah tur a ni lo va; atuk thlenga a bang la awm chu meiah in rawh ral tur a ni.
12:11	Tin, hetiangin in ei tur a ni; in puan vengin, pheikhawk bunin, tiang kengin; tin, hmanhmawh takin in ei tur a ni; LALPA kalhlen a ni dawn si a.
12:12	Chu mi zan chuan Aigupta ram chhung chu ka fang dawn si a, Aigupta rama fa tir zawng zawng, mi leh sa chu ka tihlum ang a; Aigupta rama pathian zawng zawngte chu an ro ka relsak ang: LALPA ka nih hi.
12:13	Tin, thisen chu un tan in awmna inchhinchhiahna a ni anfg a; tin, thisen chu ka hmuh chuan ka kal hlen ang che u a, tichuan Aigupta ram ka hrem hunah chuan nangmahni tiboraltu tur inchungah hri reng reng a lo leng lo vang.
12:14	Tin, he mi ni hi in tan hriat rengna ni a ni ang a, LALPA tan kut niah in ruat tur a ni: in thlahte thlengin kumkhaw thuruat atana awm reng turin kut niah in hmang tur a ni.
12:15	Ni sarih chhung chu chhang dawidim telh loh in ei tur a ni a: ni khat ni atang reng chuan in in chhung ata dawidim chu in thian fai vek tur a ni: tupawh ni khat ni thlenga chhang dawidim telh ei apiang chu, chu mi chu Israel-ho zing ata tihboral a ni ang.
12:16	Tin, ni khat niah chuan inkohkhawmna thianghlim in nei ang a, tin, a ni sarih niin inkohkhawmna thianghlim a awm leh ang; mi tinin an mamawh ei tur buatsaih tih loh chu chu mi chhung chuan hna reng reng thawh hlek tur a ni lo, ei tur buatsaih chauh tihthian a ni ang.
12:17	Tin, chhang dawidim telh loh kut ni chu in serh tur a ni, chu mi ni ngei chuan Aigupta ram ata in mipuihote chu ka hruai chhuak si che u a: chuvangin in thlahte thlengin kumkhaw thuruat atana awm reng turin chu mi ni chu in serh tur a ni.
12:18	Thla khatna, chu mi thla ni sawm leh ni li ni tlai lamah chuan chhang dawidim telh loh chu in ei ang a, chu mi thla ni sawmhnih leh ni khat ni tlai thlengin.
12:19	Ni sarih chhung chu in in chhungah reng reng dawidim a awm tur a ni lo va; tupawh dawidim telh ei apiang chu, chu mi chu hnam dang pawh, in rama piang pawh ni sela, Israel-ho pung khawm zing ata hi tihboral tur a ni ang.
12:20	Dawidim telh reng reng chu in ei tur a ni lo va: in chenna hmun apiangah chuan chhang dawidim telh loh in ei tur a ni,' tiin sawi ang che," tiin.
12:21	Tin, Mosian Israel upaho zawng zawng chu a koh khawmtir a, tin, an hnenah, "chhungkaw tinin beram notete chu va la chhuak ta ula, kalhlunna tur talh rawh u.
12:22	Tin, husop kau in la ang a, tin, maih鹡a thisenah chuan in zu hnim ang a, tin, kawngka luchungah leh kawngka biang pahnihah chuan maih鹡a thisen chu tat ang che u; tin, khawvar hma loh chuan tumah mahni in ata in chhuak tur a ni lo va.
12:23	LALPA chu Aigupta mite tihlum turin a lo kal tlang dawn si a; tichuan kawngka lu Chung leh kawngka biang pahniha thisen kai a hmuh chuan LALPA chuan kawngka chu a kal hlan ang a, in in chhungah chuan nangmahni tihlum turin tiboraltu chu a rawn luhtir lo vang.
12:24	Tin, hetiang hian nangmah leh i fate tana kumkhuaa thuruat awm reng turin in rawn ti thin tur a ni.
12:25	Tin, heti hi a ni ang a, LALPAN pek a lo tiam tawh anga a pek che u ram chu in thlen hunin he rawngbawlna hi in zawm tur a ni.
12:26	Tin, heti hi a ni ang a, in faten in hnena, 'He rawngbawlna awmzia hi eng tihna nge ni ngai le?' an rawn tih chuan,
12:27	nangnin, 'Hei hi LALPA kalhlen inthawina a nih, ani chuna Aigupta mite a tihhlum lai khan kan inte chu a rawn zuah a, Aigupta rama Israela thlahte in chu a rawn kal hlen a ni,' in la ti dawn nia," a ti a. Tin, mipuite chu an lu an kun a, chibai an buk ta a.
12:28	Tin, Israela thlahte chu an kal a, chutiang chuan an ti a; LALPAN Mosia leh Arona thu a pek ang chuan an ti ta a.
12:29	Tin, heti hi a ni a, zan laiah chuan LALPA chuan Aigupta rama fa tir zawng zawng lalthutphaha thu Pharaoa fa tir atanga rip chhunga tang fa tir lamin a zuk tihlum ta vek a, ran piang hmasa ber zawng zawngte nen.
12:30	Tin, Pharaoa chu amah leh a chhiahhlawh zawng zawngte leh Aigupta mi zawng zawngte nen zingah chuan an tho ta a; tin, Aigupta ramah chuan tahna nasa tak a awm a; mitthi awm lohna in reng reng pakhat mah a awm si lo va.
12:31	Tin, Mosia leh Arona chu a zan a zanin a kohtir a, "Tho ula, ka miteho zing ata hi chhuak rawh u, nangmahni leh Israela thlahteho nen hian; tin, kal ula, in sawi ang khan LALPA rawng chu va bawl tawh u.
12:32	In sawi ang khan in beram rualte leh in sebawng rualte pawh chu kalpui rawh u; kal tawh u; tin, kei pawh mal mi sawm ve bawk rawh u," a ti a.
12:33	Tin, Aigupta mite chuan zan chu mi ram ata chu hmanhmawh taka tir chhuak turin mite chu an tur ta chhen a; "Kan thi vek a ni ta mai," an ti a.
12:34	Tin, mite chuan an chhang hmehte chu dawidim an telh hmain an la a, an chhang hmehna thlengte chu an puanin an tuam a, an kokiah an bat ta mai a.
12:35	Tin, Israela thlahte chuan Mosia thu ang chuan an ti a; tin, Aigupta mite chu tangkaraw incheinate leh rangkachak incheinate leh, puante an d頻 a:
12:36	tin, LALPA chuan mite chu Aigupta mite a khawngaihtir a, chutichuan an dil apiang an neihtir zel a. Tin, Aigupta mite thil chu an rawksak ta a.
12:37	Tin, Israela thlahte chu Rameses khua ata an chhuak a, Sukoth hmun thlengin an kal ta a, naupangte tiam lovin, mipa puitling hlir nuairuk lai kein an kal a.
12:38	Tin, an hnenah chuan mipui inpawlhsawp tam tak an kal ve bawk a; tin, ran rual tam tak, beram leh bawngte an chhawm bawk a.
12:39	Tin, Aigupta ram ata an ken chhuah chhang hmeh hmangin chhang, dawidim telh lohte chu an ur a, dawidim telh loh a ni si a; Aigupta ram chu hnawh chhuaha an awm avang leh, an awm rei theih tak lohva, ei tur takngial pawh an inbuatsaih hman tak loh avangin.
12:40	Tichuan Israela thlahte Aigupta rama an awm chhung chu, kum 430 a ni.
12:41	Tin, heti hi a ni a, kum 430 a lo ral chuan, chu mi ni ngei chuan heti hi a ni a, LALPA mipuiho zawng zawngte chu Aigupta ram ata an chhuak ta a.
12:42	Chu mi zan chuan Aigupta ram ata anmahni a hruai chhuah avangin LALPA tana zan serh tak ni tur a ni a: Israela thlahte zawng zawngin chhuan zawng zawng thlengin chu zan chu LALPA zan atan serh hle tur a ni.
12:43	Tin, LALPAN Mosia leh Arona hnenah, "Hei hi kalhlan thuruat dan tur a ni ang: hnam dang chuan an ei ve tur a ni lo va:
12:44	amaherawhchu miin a chhiahhlawh, tangkaa a lei tawhate chu a serh i tansak tawh phawt chuan a ei ve thei ang.
12:45	Hnam dang leh chhiahhlawh rawihte erawh chuan an ei tur a ni lo va.
12:46	In khatah ei tur a ni; pawn lamah a sa reng reng ken chhuah tur a ni lo; a ruh reng reng pawh in titliak tur a ni lo ve.
12:47	Israel-ho zawng zawngin an zawm tur a ni.
12:48	Tin, hnam dang in hnena awm hian LALPA kalhlen hi tih ve a duh chuan, a mipa zawng zawngte serh tan ni sela, tichuan rawn ti ve rawh se; ani chu chu mi rama piang anga ngaih a ni ang: amaherawhchu serhtan loh mi chuan a ei hauh tur a ni lo.
12:49	Chu mi rama piang leh, hnam dang in zinga awmte tan hian dan angkhat a awm tur a ni," a ti a.
12:50	Israela thlahte zawng zawng chuan chutiang chuan an ti a, LALPAN Mosia leh Arona thu a pek ang ngei chuan an ti ta a.
12:51	Tin, heti hi a ni a, chu mi n?ngei chuan LALPAN Israela thlahte chu Aigupta ram ata mipuiho chu a hruai chhuak ta a ni.

Exodus 11

THUTHLUNGHLUI   Exodus   Bung 11
11:1	Tin, LALPAN Mosia hnenah chuan, "Pharaoa chungah leh Aigupta ram chungah hian vawi khat chu hri ka han lentir leh ang e; chu mi hnuah zawng a chhuahtir tawh ang che u: a chhuahtir vek vek che u zawngin heta ta hi a hnawt chhuak daih mai ang che u.
11:2	Chutichuan mipuite bengah hian thu va sawi rawh, mipa leh hmeichhe tinin an vengte chu tangkaraw incheina leh rangkachak incheinate chu dah rawh se," a ti a.
11:3	Tin, LALPAN mite chu Aigupta mite a khawngaihtir ta a. Chu chang a ni lo va, Mosia chu Aigupta ramah chuan Pharaoa chhiahhlawhteho ngaihah leh mipuite ngaihah chuan mi ropui tak a ni a.
11:4	Tin, Mosia chuan, "LALPAN heti hian a ti, 'Zan lai velah chuan Aigupta ram chhungah hian ka lo kal tlang ang a:
11:5	tichuan Aigupta rama fa tir zawng zawng lalthutphaha thu Pharaoa fa tir atanga buh rawt sawmna bula awm bawihnu fa tir lam pawhin an thi ang, ran piang hmasa ber zawng zawngte nen.
11:6	Tin, Aigupta ram chhung zawng zawngah chuan tahna nasa tak a awm ang a, chutianga nasa reng reng a la awm ngai lo va, chutiang reng reng chu a awm leh tawh hek lo vang.
11:7	Nimahsela Israela thlahteho zawng mihring leh sa lamah reng reng ui pawhin a lei a phum lo vang: LALPA chuan Aigupta mite leh Israela mite hi a thliar ngei a ni tih in hria ang.
11:8	Tin, heng i chhiahhlawh zawng zawngte hi ka hnenah an lo chhuak ang a. Chhuak rawh, i hnung zuitute zawng zawng nen hian, tiin ka hmaah an kun ang: tin, chu mi hnuah chuan ka chhuak ang,' tiin," a ti a. Pharaoa hnen ata chu thinrim zet maiin a chhuak ta a.
11:9	Tin, LALPAN Mosia hnenah chuan, "Pharaoan in thu a pawm lo vang: ka thil makte Aigupta ramah hian tihpuna a awm theih nen," a ti a.
11:10	Tin, Mosia leh Arona chuan Pharaoa hmaah chuan chung thilmak zawng zawngte chu an ti a: tin, LALPAN Pharaoa thinlung chu a tihkhauhsak a, tichuan Israela thlahte chu a ram ata a chhuahtir phal lo va.

Exodus 10

THUTHLUNGHLUI   Exodus   Bung 10
10:1	Tin, LALPAN Mosia hnenah, "Pharaoa hnenah va lut rawh: a thinlung leh a chhiahhlawh thinlung chu ka tihkhauhsak tawh e, heng ka chhinchhiahnate hi an zingah ka entir theihna turin;
10:2	tin, nang pawhin i fa leh i fa fate benga Aigupta ram chunga thil ka tihzia leh, an zinga ka chhinchhiahnate ka tihzia hi i hrilh theihna turin; kei LALPA chu ka tih in hriat theih nan," a ti a.
10:3	Tin, Mosia leh Arona chu Pharaoa hnenah an va lut a, a hnenah, "LALPA, Hebraite Pathianin, 'Ka hmaah eng chen nge inngaithlawm duh lova awm i tum ni? Ka mite hian ka rawng an bawl theih nan chhuahtir rawh.
10:4	Chutia ka mite i chhuahtir phal loh zawngin, ngai teh, nak tunah i ram chhungah hian khaukhuapte ka rawn lentir ang a:
10:5	tin, lei chung hi an d鈖 vek ang a, tumahin lei reng reng hi an hmu thei lo vang: tin, rialin a tihchhiat bak, in hnena la awmate hi an ei ang a, phula in thing to apiangte chu an ei vek ang:
10:6	tin, i inte leh I chhiahhlawh zawng zawng inte leh Aigupta mi zawng zawng inte chu a khat vek ang; i thlahtute leh i thlahtute thlahtute pawhin khawvela an lo awm achin tun thleng pawhin chutiang chu an la hmu ngai lo a ni,' a ti e," an ti a. Tin, a lehhawi a, Pharaoa hnen ata chu a chhuak ta a.
10:7	Tin, Pharaoa chhiahhlawhte chuan a hnenah, "Hei hi kan tan eng chen nge maw thanga a awm dawn le? Hengho hian LALPA an Pathian rawng an bawl theih nan kaltir ta mai che maw le: Aigupta ram hi tihchhiat a nih tawh hi i la hre lo vem ni?" an ti a.
10:8	Tin, Mosia leh Arona chu Pharaoa hnenah an hruai leh a; tin, an hnenah, "Kal ula, LALPA in Pathian rawng chu va bawl tawh u: amaherawhchu tute nge ni kal tur chu?" a ti a.
10:9	Tin, Mosian, "Apui apangin kan kal ang, kan fapate leh kan fanute nen, kan beram rualte leh kan bawng rualte nen kan kal ang: LALPA hnenah kan kun ngei tur a ni si a," a ti a.
10:10	Tin, ani chuan an hnenah, "LALPA chu in hnenah awm ang hmiang! In fanu tetete nen chuan ka kaltir mawlh ang che u le; inngaihtuah rawh u khai, thil sual tih in tum a nih hi le.
10:11	Hnai lo ve! nangi mipaho erawh chu kal ula, LALPA rawng chu bawl rawh u' chu chu alawm in duh," a ti a. Tin, Pharaoa hnen ata chu an hnawt chhuak ta a.
10:12	Tin, LALPAN Mosia hnenah, "Aigupta ramchungah hian khaukhuapte rawn lentir turin i kut phar rawh, Aigupta ramah hian an lo chhohva, he rama thlai tinreng, rial den chhiat bak zawng zawngte nen lam pawha an ei theihna turin," a ti a.
10:13	Tin, Mosian Aigupta ramchungah chuan a tiang chu a han lek a, tin, LALPAN chu mi n? nileng leh zankhuain chu mi ramah chuankhawchhak thli a rawn tlehtir a; tin, atukah chuan khawchhak thli chuan khaukhuap a rawn len a.
10:14	Tin, khaukhuapte chu Aigupta ram zawng zawng chungah chuan an leng a, tin, Aigupta ram chhung zawng zawngah chuan an fu a; an tam em em mai a; tun hmain khaukhuap chutiang reng reng a la awm ngai lo va, tun hnuah pawh chutiang reng reng chu a awm leh tawh lo vang.
10:15	Lei chung zawng zawng hi an d鈖 vek mai si a, tichuan ram chu a thimin a thim mup mai a ni; tin, rial den chhiat bak, chu mi rama thlai tinreng leh theirah zawng zawngte chu an ei vek a: tichuan Aigupta ram chhung zawng zawngah chuan lovah thil hring reng reng, thing pawh thlai pawh a awm ta hauh lo mai a.
10:16	Tin, Pharaoa chuan Mosia leh Arona chu hmanhmawh takin a kohtir a, an hnenah. "LALPA in Pathian chungah leh nangmahni chungah thil ka lo tisual ta e.
10:17	Chutichuan ka sual hi tun tumah chauh hian ngaidam ang che, ka ngen a che, he thihna hi mi lut bosak phawt mai turin, LALPA in Pathian hnenah ngen ang che," a ti a.
10:18	Tin, Pharaoa hnen ata chu a kal chhuak a, LALPA hnenah chuan a ngen ta a.
10:19	Tin, LALPA chuan khawthlang thli na tak mai a rawn tlehtir a, chu chuan khaukhuapte chu a len a, Tuifinriat Senah a len thla ta vek a; Aigupta ramri chhung zawng zawngah chuan khuakhuap pakhat mah a awm ta lo va.
10:20	Nimahsela LALPAN Pharaoa thinlung chu a tihkhauhsak a, tichuan Israela thlahte chu a chhuahtir phal ta lova.
10:21	Tin, LALPAN Mosia hnenah, "Van lamah i kut han lek rawh, Aiguptachungah hian a lo thim khup a, ai mit thlawn ang maia a lo thimna turin," a ti a.
10:22	Tin, Mosia chuan a kut chu van lamah an han lek a; tin, Aigupta ram chhung zawng zawng chu ni thum chhung zet a thim mup a;
10:23	tumah reng reng an inhmu thei ta lo va, tumah mahni hmun ata ni thum chhung zet chu an tawlhsawn thei lo bawk a: Israela thlahte zawng zawng awmna erawh chu a eng vek a.
10:24	Tin, Pharaoan Mosia a kohtir a, a hnenah, "Kal ta ula, LALPA rawng chu va bawl tawh u; in beram rualte leh in bawng rualte erawh chu awm sela: in fanau tetete pawh in hnenah kal ve rawh se," a ti a.
10:25	Tin, Mosian, "LALPA kan Pathian hnena kan inthawi theihna turin inthawina turte leh halral thilhlan turte chu nangin kan kutah min pe tel ve bawk tur a ni.
10:26	Kan rante chu kan hnenah an kal ve bawk tur a ni; ran reng reng chu pakhat mah kan hnutchhiah lo vang; chung zinga mi chu LALPA kan Pathian rawng kan bawl nan kan hman ngei ngei tur a ni si a; chu mi hmun kan va thlen hma loh chuan engin nge LALPA rawng kan bawl ang tih kan la inhre lo a ni," a ti a.
10:27	Nimahsela LALPAN Pharaoa thinlung chu a tihkhauhsak a, tichuan a chhuahtir phal ta lo va.
10:28	Tin, Pharaoan a hnenah, "Ka hnen ata hi chhuak daih la, fimkhur rawh khai, ka hmel reng reng rawn hmu tawh hlek suh; ka hmel i hmuh ni la la chuan i thi ngei tur a ni," a ti a.
10:29	Tin, Mosia chuan, "I sawi dik zet mai; i hmel zawng hmuh ni ka nei leh tawh lo vang e," a ti a.

Exodus 9

THUTHLUNGHLUI   Exodus   Bung 9
9:1	Chutichuan LALPAN Mosia hnenah, "Pharaoa hnenah va lut la, 'LALPA, Hebraite Pathianin, ka mite hian ka rawng an bawl theih nan chhuahtir rawh.
9:2	I chhuahtir phal loh va, i la hren reng zawngin,
9:3	ngai teh, phula i rante chungah chuan LALPA kut a awm dawn a ni, sakawr chungah te, sabengtung chungah te, sanghawngsei chungah te, bawng rualchungah te, beram tualchungah te chuan: hri nasa tak mai a lo leng ang.
9:4	Tin, LALPAN Israel-ho ran leh Aigupta mite ran chu a tihrang ang a; tichuan Israela thlahte ta chu pakhat mah a thi lo vang, a ti e,' tiin hrilh rawh," a ti a.
9:5	Tin, LALPA chuan "Naktukah LALPAN he ramah hian chutiang chu a ti dawn e," tiin hun a ruat ta a.
9:6	Tin, LALPA chuan atukah chutiangin a ti ta a, tichuan Aigupta mite ran zawng zawng chu a thi ta vek a; nimahsela Israela thlahte ran chu pakhat mah a thi ve lo va.
9:7	Tin, Pharaoa chuan mi a tir a, tin, ngai teh, Israel mite ran chu pakhat mah a lo thi ve ta lo va. Nimahsela Pharaoa thinlung chu tiluhlulin a awm a, mite chu a chhuahtir phal ta lo va.
9:8	Tin, LALPAN Mosia leh Arona hnenah, "Rawhtuina meia mi vut va thum ula Pharaoa mithmuhah Mosian van lamah teh chiam rawh se.
9:9	Tin, Aigupta ram zawng zawng chungah hian vut dip takah a lo chang ang a, tin, chu chuan Aigupta ram chhung zawng zawnga mi leh sa chu khawihli a veitir theuh ang a, a durh leu chiam ang," a ti a.
9:10	Tin, rawhtuina meia vut chu an la a, Pharaoa hmaah chuan an va ding a; tin, Mosia chuan van lamah a han teh chiam a; tichuan mi tin leh sa tinin khawihli durh leu an lo vei ta vek a.
9:11	Tin, khawihli avang chuan mitlak dawithiamte chuan Mosia chu an chelh ta lo va; mitlak dawithiamte leh Aigupta mi zawng zawngte chuan khawihli chu an vei vek si a.
9:12	Tin, LALPAN Pharaoa thinlulng chu a tihkhauhsak a; tichuan an thu chu a ngaithla duh ta lo va; LALPAN Mosia hnena a sawi tawh ang khan.
9:13	Tin, LALPAN Mosia hnenah, "zing takah tho la, Pharaoa hmaah va ding la, tin, a hnenah, 'LALPA, Hebraite Pathianin, ka miten ka rawng an bawl theih nan chhuahtir rawh.
9:14	Tun tumah zawng i chungah leh i chhiahhlawhte chungah leh, i mite chungah hian ka hril zawng zawngte hi ka lentir dawn e; tichuan khawvel zawng zawngah hian keimah ang reng reng hi tumah an awm lo tih i hria ang.
9:15	Chuti ni suh sela, ka kut ka thawh ang a, nang leh i mite hi hriin ka hrem ang a, khawvel ata hi ka tiboral daih tawh tur che a ni:
9:16	nimahsela he mi avang ngawt hian ka tungding chia, ka thiltihtheihna entir tur che leh khawvel zawng zawnga ka hming a lo than theih nan.
9:17	Ka mite lakah hian i la induh cheuvin, i la chhuahtir lo vang maw?
9:18	ngai teh, naktuk hetih hunah hian rial tam pui, Aigupta ram a lo awm tirh ata, tun thleng pawha la tla ngai lo chu ka tlaktir ang.
9:19	Chutichuan phula i rante leh i neih apiangte chu khungtir thuai rawh khai; mi tin leh sa tin phula awm, ina khung loh tawh phawt chu, rialin a deng ang a, an thi ang, a ti e,' ti rawh," a ti a.
9:20	Pharaoa chhiahhlawhte zinga LALPA thu pawisa apiang chuan an chhiahhlawhte leh an rante chu in chhungah an tlan luhtir a:
9:21	tin, LALPA thu ngaisang lo apiang chuan an chhiahhlawhte leh an rante chu phulah chuan an awmtir mai a.
9:22	Tin, LALPA chuan Mosia hnenah, "van lamah i kut han lek rawh, Aigupta ram zawng zawngah hian mihring chungah te, sa chungah te, Aigupta ram chhunga lova thlai tinreng chungah te chuan rial a lo tlak nan," a ti a.
9:23	Tin, Mosia chuan a tiang chu van lamah a han lek a: tin, LALPA chuan khawpui ri leh rial a zuk tir a, tin, leiah chuan mei te a lo tla a; tichuan LALPAN Aigupta ramchungah chuan rial a tlaktir chiam a.
9:24	Chutichuan rial, mei leh riala inpawlh, nasa em em mai, Aigupta ram zawng zawngah chuan, Aigupta hnam lo awm a chin, chutiang reng reng la awm ngai lo chu a lo awm ta a.
9:25	Tin, rial chuan Aigupta ram zawng zawnga phula awm zawng zawng, mihringte leh sate chu a deng a; tin, rial chuan lova thlai tinrengte chu a deng a, phula thing tinrengte chu a titliak vek a.
9:26	Gosen ram, Israela thlahte awmnaah chauh chuan rial a tla ve lo va.
9:27	Tin, Pharaoa chuan Mosia leh Arona chu a kohtir a, an hnenah, "Tun tum zawng thil ka tisual ta a ni e: LALPA chu mi fel a ni a, kei leh ka mite hi kan sual a ni e.
9:28	LALPA hnenah ngen rawh u; heng khawpui ri dur durte leh rialte hi a tawk tawh e; tichuan ka chhuahtir ang che u a, in awm tawh lo vang e," a ti a.
9:29	Tin, Mosian a hnenah, "Khua ata hi ka chhuah veleh, LALPA lamah ka kut ka phar ang a, khawpui rite chu a reh ang a, rial pawh a awm tawh hek lo vang; tichuan lei hi LALPA ta a ni tih i hria ang.
9:30	Nimahsela nang leh i chhiahhlawhteho hi zawngin LALPA Pathian hi in la tih chuang lo tih ka hria a ni," a ti a.
9:32	Nimahsela buh leh vai buhtun chu a deng chhe lo, a la to rih loh avangin.
9:33	Tin, Mosia chu Pharaoa hnen atangin khua ata chu a chhuak a, tin, LALPA lamah a kut a phar a: tichuan khawpui rite leh rial tla chu a lo bang ta a, tin, leichungah ruah pawh chu a baw tlawrh tlawrh ta lo va.
9:34	Tin, Pharaoan ruah leh rial leh khawpui rite chu a bang ta tih a hriat veleh, a sual leh ta sauh va, amah leh a chhiahhlawhte nen an thinlung an tikhauh ta a.
9:35	Tin, Pharaoa thinlung chu tihkhauhvin a awm a, tichuan Israela thlahte chu a chhuahtir phal ta lo va; LALPAN Mosia hmanga a lo sawi tawh ang khan.

Exodus 8

THUTHLUNGHLUI   Exodus   Bung 8
8:1	Tin, LALPAN Mosia chu a bia a, a hnenah, "Pharaoa hnenah va lut la, a hnenah, 'LALPAN, ka mite hian ka rawng an bawl theih nan chhuahtir rawh.
8:2	Tin, i chhuahtir phal loh zawngin, ngai teh, i ram chin zawng zawng hi chunguin ka hrem ang:
8:3	tin, lui chu chunguin a khat mur mur ang a, chungute chu i inah hian an lo lut chho vang a, i mutna pindanah te, i khumah te, i chhiahhlawhte in chhungah te, i mite zingah te, i thukah te, i chhang hmehna thleng chhungah te an awm noh noh vang:
8:4	tichuan chungute chu nangmah leh i mite leh i chhiahhlawhtechungah chuan an vak noh noh mai ang, a ti e,' ti ang che," a ti a.
8:5	Tin, LALPAN Mosia hnenah; "Arona hnenah, 'I tiang kha i kutin luichungah te, luitechungah te leh tui tlinnachungah te lek langin, Aigupta ramah hian Chungu rawn lentir chiam ang che,' ti rawh," a ti a.
8:6	Tin, Arona chuan Aigupta ram luichungahte chuan a kut a han phar a; tichuan chunguchu an lo chhuak a, Aigupta ram khahin a khat zo ta a.
8:7	Tin, mitlak dawithiamte pawh chuan an dawi hmangin chutiang bawk chuan an han ti ve a, Aigupta ramah chuan chungute chu an han tichhuak ve a.
8:8	Chutichuan Pharaoa chuan Mosia leh Arona chu a kohtir a, an hnenah, "Ka hnen atang leh ka mite hnen atanga Chungu hi la bo turin LALPA hnenah ngen teh u; tichuan LALPA hnena an inthawi theihna turin mite hi ka chhuahtir ang e," a ti a.
8:9	Tin, Mosia chuan Pharaoa hnenah, "nangin he chawimawina hi hlawh zawk ang che hmiang: i hnen atang leh i in atangtea chungute chu tihborala a awm a, lui chauhva a awmna turin, nangmah leh i chhiahhlawhte leh i mite tan chuan engtik atan nge ka ngen ang?" a ti a.
8:10	Tin, ani chuan, "Naktuk atan le," a ti a. Tin, ani chuan, "I thu ang chuan ni ang hmiang: tichuan LALPA, kan Pathian ang reng reng hi tumah an awm lo tih i hria ang.
8:11	Tin, chungute chuan nangmah leh i inte leh i chhiahhlawhte leh i mite chu an chhuahsan vek ang che u a; luiah chauh an awm tawh ang," a ti a.
8:12	Tin, Mosia leh Arona chu Pharaoa chunga chungu a rawn lentir chungchang thu-ah chuan LALPA hnenah a ngen a.
8:13	Tin, LALPA chuan Mosia thu ang chuan a ti a; tin, in chhunga mi te, in hung chhung kawtlaia mi te leh lova mi chungute chu an thi fai ta vek a.
8:14	Tin, an chhar khawm a, an dah vum thur mai a: tichuan a ram uihin a lo uih ta a.
8:15	Nimahsela Pharaoa chuan engthawlna a lo awm ta tih a hriat veleh, a thinlung a tikhauh va, tichuan an thu chu a ngaithla duh ta lo va; LALPAN a lo sawi tawh ang khan.
8:16	Tin, LALPAN Mosia hnenah, "Arona hnenah, 'I tiang kha lek la, leia vaivut hi vaw rawh, Aigupta ram zawng zawnga vaivut hi thosia a lo chan theih nan,' ti ang che," a ti a.
8:17	Tin, chutiang chuan an han ti a; Arona chuan a tiang chu a kutin a han lek a, tin, leia vaivut chu a han vua a, tin, mihring chungah leh sa chungah chuan thosi chu a awm ta mur mur a; Aigupta ram chhung zawng zawnga leia vaivut zawng zawng chu thosiah a chang zo ta vek a.
8:18	Tin, mitlak dawithiamte pawhin an dawi hmangin thosi tihchhuah an han tum a, nimahsela an thei lo: tin, mihring chungah leh sa chungah chuan thosi chu a awm ta mur mur a.
8:19	Chutichuan mitlak dawithiamte chuan Pharaoa hnenah, "Hei hi Pathian kut zungtang a nih hi," an ti a: tichuan Pharaoa thinlung chu tihkhauhvin a awm a, an thu chu a ngaithla duh lo va; LALPAN a lo sawi ang khan.
8:20	Tin, LALPAN Mosia hnenah, "zing takah tho la, Pharaoa hmaah va ding ang che; ngai teh, tuiah a lo kal thin a, tin, a hnenah, 'LALPAN, ka mite hian ka rawng an bawl theih nan chhuahtir rawh.
8:21	Chutilozawng, ka mite i chhuahtir phal loh zawngin, ngai teh, ichungah leh i chhiahhlawhte chungah leh i mite chungah leh, i in chhungahte chuan tho tam tak ka rawn tir chiam ang a: tichuan Aigupta mite inte leh an chenna lei zawng zawngte pawh chu tho hlirin a khat ang.
8:22	Tin, chu mi n?chuan ka mite awmna Gosen ram chu ka tihrang ang, chutah chuan tho reng reng a awm ve loh nan; tichuan leichungah hian kei hi LALPA chu ka ni tih in lo hre thei ang.
8:23	Tin, ka mite leh i mite chu ka thliar ang a: naktukah he chhinchhiahna hi a lo awm ang, a ti e,' ti ang che," a ti a.
8:24	Tin, LALPAN chutiang chuan a ti a; tichuan Pharaoa inah leh a chhiahhlawhte inah te leh Aigupta ram zawng zawngah te chuan tho tam pui mai chu an lut ta chiam a: tho tam tak chuan ram chu a tichhe chiam a.
8:25	Tin, Pharaoa chuan Mosia leh Arona a kohtir a, an hnenah, "Kal ta ula, he ramah hian in Pathian hnenah chuan va inthawi mai tawh u," a ti a.
8:26	Tin, Mosia chuan, "Chutiang tih chu a fel hlei nem! Aigupta miten thiang lo an tihte chuan LALPA kan Pathian hnenah kan inthawi dawn zuk nia: ngai teh, Aigupta mite mithmuhah hian thiang lo an tihte chuan kan inthawi dawn em ni ang? Lungin min dang mai dawn lawm ni?
8:27	thlaler ni thum kalah chuan kan va kal ang a, LALPA kan Pathianin tih tuna min pek ang angin a hnenah kan va inthawi ang e," a ti a.
8:28	Tin, Pharaoa chuan, "thlalera LALPA in Pathian hnena in inthawi theihna turin ka kaltir ang che u chu; amaherawhchu in kal hla vak tur a ni lo ve: mi ngensak ang che," a ti a.
8:29	Tin, Mosia chuan, "Ngai teh, i hnen atang chuan ka chhuak dawn a ni a, naktukah hian Pharaoa leh a chhiahhlawhte leh amite chu tho tam pui hian a chhuahsan theihna turin LALPA hnenah ka ngen ang e: amaherawhchu mite LALPA hnena an inthawi chu Pharaoa hian phal lovin, tihder leh tawh lul suh se," a ti a.
8:30	Tin, Mosia chu Pharaoa hnen ata a chhuak a, tichuan LALPA hnenah a ngen ta a.
8:31	Tin, LALPAN Mosia thu ang chuan a ti a; tichuan Pharaoa hnen ata leh a chhiahhlawhte hnen ata leh a mite hnen ata tho tam pui chu a tikiang ta a; pakhat mah a awm ta lo va.
8:32	Tin, Pharaoa chuan chu mi tum pawh chuan a thinlung a tikhauh leh a, tichuan mite chu a chhuahtir phal ta lo va.

Exodus 7

THUTHLUNGHLUI   Exodus   Bung 7
7:1	Tin, LALPA chuan Mosia hnenah, "Ngai teh, Pharaoa tan pathianah ka siam tawh che alawm: tin, i unau Arona chu i zawlnei a ni ang.
7:2	Thu ka pek apiang che chu i sawi chhuak zel ang a; tin, i unau Aronan Pharaoa a ram ata Israela thlahte chhuahtir turin a hrilh ang.
7:3	Tin, Pharaoa thinlung chu ka tikhauh ang a, tin, ka chhinchhiahna leh ka thilmakte chu Aigupta ramah hian ka tipung ang.
7:4	Nimahsela Pharaoan in thu a pawm duh lo vang, tin, Aigupta ram chhungah hian ka kut ka nghat ang a, anmahni chu nasa taka ngaihtuahin ka mi Israela thlahte, ka pawlhote hi Aigupta ram ata chu ka hruai chhuak ang.
7:5	Tin, Aigupta mite chuan, Aigupta ram chhungah hian ka kut ka nghat ang a, anmahni chu nasa taka ngaihtuahin ka mi Israela thlahte, ka pawlhote hi Aigupta ram chunga ka kut ka han phar a, an zing ata Israela thlahte ka hruai chhuah hunah zet chuan kei hi LALPA chu ka ni tih an la hria ang," a ti a.
7:6	Tin, Mosia leh Aronan chutiang chuan an ti a; LALPAN anmahni thu a pek ang ngei chuan an ti ta a.
7:7	Tin, Pharaoa an va biak lai khan Mosia chu kum 80 mi a ni a, tin, Arona chu kum 83 mi a ni.
7:8	Tin, LALPAN Mosia leh Arona hnenah, "Pharaoan, 'Thil mak han ti teh u,' a lo tih che u chuan nangin Arona hnenah, 'I tiang kha la la, Pharaoa hmaah paih ang che, tichuan rulah a lo chang dawn nia,' ti ang che," tiin a sawi a.
7:9	Tin, LALPAN Mosia leh Arona hnenah, "Pharaoan, 'Thil mak han ti teh u,' a lo tih che u chuan nangin Arona hnenah, 'I tiang kha la la, Pharaoa hmaah paih ang che, tichuan rulah a lo chang dawn nia,' ti ang che," tiin a sawi a.
7:10	Tin, Mosia leh Arona chu Pharaoa hnenah an va lut a, tin, LALPA thupek ang chuan an han ti a: tin, Arona chuan a tiang chu Pharaoa leh a chhiahhlawhte hmaah chuan a han paih a, tin, rulah a chang ta a.
7:11	Chutichuan Pharaoa pawh chuan mi fingte leh dawithiamte chu a ko ve a: tin, anni, Aigupta rama mitlak dawithiamte pawh chuan chutiang bawkin an dawina chuan an han ti ve a.
7:12	An tiang chu an han paih theuh va, rulah a chang theuh a ni: amaherawhchu Arona tiang chuan an tiangte chu a lem zo ta vek a.
7:13	Tin, Pharaoa thinlung chu tihkhauhvin a awm a, tichuan an thu chu a ngaithla duh ta lo va; LALPAN a lo sawi tawh ang khan.
7:14	Tin, LALPA chuan Mosia hnenah, "Pharaoa thinlung hi tihluhlulin a lo awm ta a, mite chu a chhuahtir phal lo va.
7:15	Pharaoa hnenah chuan zingah va kal ang che; ngai teh, tuiah a kal thin a, tin, amah hmuh tumin lui kamah ding ang che; tin, i tiang rula chang kha keng ang che.
7:16	Tin, a hnenah, 'LALPA, Hebraite Pathianin, ka mite hian thlalerah ka rawng an bawl theihna turin rawn kaltir rawh, tiin i hnenah mi a tir a ni e: tin, ngai teh, tun thlengin i la ngaithla duh lo va.
7:17	chuvangin LALPAN, he miah hian kei LALPA chu ka ni tih i hria ang: ngai teh, he mi ka tiang ken hian luia tuite hi ka han vua ang a, tichuan thisenah a lo chang mai ang.
7:18	Tin, luia sanghate chu an thi ang a, tin, lui chu a uih hluah hluah ang; tichuan Aigupta miten luia tui chu an in lo vang, a ti e,' ti ang che," a ti a.
7:19	Tin, LALPAN Mosia hnenah, "Arona hnenah, 'I tiang keng la, Aigupta ram tui chungah te, an dil chungah te chuan thisena a lo chan vekna turin phar rawh, tichuan Aigupta ram chhung zawng zawngah, thing kuangahte leh lung kuangahte chuan thisen a awm vek mai ang,' ti ang che," a ti a.
7:20	Tin, Mosia leh Arona chuan LALPA thupek ang chuan an han ti a; tin, tiang chu a han lek a, Pharaoa mithmuhah leh a chhiahhlawhte mithmuhah chuan luia tui chu a han vua a; tichuan luia tui zawng zawngte chu thisenah a chang ta vek a.
7:21	Tin, luia sanghate chu an thi ta vek a; tin, lui chu a uih ta hluah hluah a, tichuan Aigupta mite chuan luia tui chu an in thei ta lo va; tin, thisen chu Aigupta ram chhung zawng zawngah chuan a awm zo ta vek a.
7:22	Tin, Aigupta rama mitlak dawithiamte pawh chuan an dawi hmangin chutiang bawk chuan an han ti ve a: tin, Pharaoa thinlung chu tihkhauhvin a awm a, tichuan an thu chu a ngaithla duh ta lo va; LALPAN a sawi tawh ang khan.
7:23	Tin, Pharaoa chu a in lamah chuan a hawng ta a, chung pawh chu a thinlungah a lungkham chuang hauh lo mai a.
7:24	Tin, Aigupta mi zawng zawngte chuan tui in atan lui kam velte chu an lai chiam a; lui tui chu an in thei si lo va.
7:25	Tin, LALPAN lui a vuak achin chu ni sarih zet a tling a ni.

Exodus 6

THUTHLUNGHLUI   Exodus   Bung 6
6:1	Tin, LALPA chuan Mosia hnenah, "Tunah zawng Pharaoa chunga ka tih dan tur chu i hmu tawh ang: kut chak tak avang chuan anmahni a chhuahtir ang a, tin, kut chak tak avang chuan a ram ata chu anmahni a hnawt chhuak ang," a ti a.
6:2	Tichuan Pathianin Mosia a bia a, a hnenah, "Kei JEHOVA ka ni:
6:3	Abrahama hnenah te, Isaaka hnenah te leh Jakoba hnenah te khan Pathian Engkimtitheiain ka lo inlar ta a, ka hming JEHOVA-in erawh chuan an hnenah ka la inhriattir lo va.
6:4	Tin, anmahni hnenah chuan, Kanaan ram, an mikhualna ram, rei lo tean lo awm tawhna kha pek tumin ka thinlung chu ka lo tinghet ta bawk a.
6:5	Tin, Israela thlahte Aigupta-hoten an bawiha te r鹠 kha ka lo hre bawk a; tichuan ka thuthlung chu ka hre reng a ni.
6:6	chuvangin Israla thlahte hnenah chuan, 'Kei Jehova ka ni a, Aigupta-hote phurrit lak ata hi ka hruai chhuak ang che u a, an bawiha in awm hi ka chhuahtir ang che u; tin, nasa taka ngaihtuah che uin ban phar meuhvin ka tlan ang che u:
6:7	tin, ka mi atan ka nei ang che u a, tin, kei in tan Pathian ka ni ang a; tichuan kei hi Jehova, in Pathian, Aigupta-ho phurrit lak ata hruaichhuaktu che u ka ni tih in hria ang a.
6:8	Abrahama te, Isaaka te leh Jakoba te hnena ka ban meuhva pek ka tumna ramah khan ka hruai lut ang che u a; tichuan in rochanah ka pe ang che u: kei Jehova ka nih hi,' tiin hrilh ang che u," a ti a.
6:9	Tin, Mosian Israela thlahte hnenah chuan chung thu chu a va sawi a: nimahsela rilru nguina avang leh nasa taka tihretheihna avang chuan Mosia thu chu an ngaithla duh lova.
6:10	Tin, LALPA chuan Mosia hnenah,
6:11	"Va kal la, Aigupta lal Pharaoa hnenah Israela thlahte hi a ram ata chhuahtir turin va sawi rawh," tiin a sawi a.
6:12	Tin, Mosia chuan LALPA hmaah, "Ngai teh, Israela thlahten ka thusawi an ngaithla duh si lo va; kei mi tawng mawh thusawi tehlul hi Pharaoan engtin nge a ngaihthlak ang ni?" tiin a sawi a.
6:13	Tin, LALPA chuan Mosia leh Arona chu a bia a, "Aigupta ram ata Israelte hruai chhuak turin thu ka pe tawh che u a ni tih Israelte leh Aigupta lal chu hrilh rawh u," a ti a.
6:14	Tin, heng hi an pate hnam bulpui berte chu an ni: Israela fa tir Reubena fapa te chu; Hanoka te, Pallua te, Hezrona te, Karmia te an ni a: hengte hi Reubena hnamte chu an ni.
6:15	Tin, Simeona fapate chu Jemuela te, Jamina te, Obada te, Jakina te, Zohara te, Kanaan hmeichhe laka a fapa Saula te an ni: hengte hi Simeona hnamte chu an ni.
6:16	Tin, hengte hi an thlahte ang zelin Levia fapate hming chu a ni: Gersona te, Kohatha te, Meraria te an ni a; tin, Levia dam chhung kum chu kum 137 a ni.
6:17	Tin, an hnam ang zelin Gersona fapate chu Libnia leh Simeia te hi an ni.
6:18	Tin, Kohatha fapate chu Amrama te, Izhara te, Hebrona te, Uziela te an ni a; tin Kohatha dam chhung chu kum 133 a ni.
6:19	Tin, Meraria fapate chu Mahalia leh Musia an ni. hengte hi an thlahte ang zela Levia hnamte chu an ni.
6:20	Tin, Amrama chuan a pa farnu Jokebedi nupuiah a nei a; tin, Arona leh Mosia a hrinsak a: tin, Amrama dam chhung kum chu kum 137 a ni.
6:21	Tin, Izhara fapate chu Kora te, Nephega te, Zikria te an ni.
6:22	Tin, Uziela fapate chu Misaela te, Elzaphana te, Sithria te an ni.
6:23	Tin, Arona chuan Aminadaba fanu, Nasona, farnu Elisebi chu nupuiah a nei a; tin, Nadaba te, Abihua te, Eleazara te, Ithamara te a hrinsak a.
6:24	Tin, Kora fapate chu Asira te, Elkana te, Abiasapha te an ni; hengte hi Kora ho hnamte chu an ni.
6:25	Tin, Arona fapa Eleazara chuan Putiela fanute zinga mi pakhat chu nupuiah a nei a; tin, Phinehasa a hrinsak a. Tin, hengte hi an hnam ang zela Levia thlah bulpui berte chu an ni.
6:26	Chu mi Arona leh Mosia te chu an ni LALPAN, "Aigupta ram ata Israela thlahte hi an pawlho ang zelin hruai chhuak rawh u," tia a hrilh ni.
6:27	Chu mite chu an ni Aigupta lal Pharaoa va biaa, Israela thlahte chu Aigupta ram ata chhuahtir tura va betute chu: chu mite chu Mosia leh Arona chu an ni.
6:28	Tin, heti hi a ni a, Aigupta rama LALPAN Mosia a biak ni chuan,
6:29	LALPA chuan, "Kei LALPA chu ka ni: Aigupta ram lal Pharaoa hnenah chuan i hnena ka sawi zawng zawng hi sawi rawh," tiin Mosia chu a bia a.
6:30	Tin, Mosia chuan LALPA hmaah, "Ngai teh, kei mi tawng mawh ka ni si a, tichuan keia thusawi tehlul hi Pharaoan engtin nge a ngaihthlak ang ni?" a ti a.