I Samuela 15

THUTHLUNGHLUI   I Samuela   Bung 15
15:1	Tin, Samuela chuan Saula hnenah, "LALPAN a mite chungah, Israel-hote chungah, lal atana hriak thih tur chein min tir a ni; chutichuan LALPA thu sawi aw chu ngaithla teh khai.
15:2	Sipaihote LALPA chuan 'Amalek miten Israel-hote chunga an thiltih, Aigupta ram ata an lo chhuah laia an lo dal dante kha ka chhinchhiah reng a.
15:3	Amalek-hote bei turin kal la, an thil neih zawng zawng zuah reng reng nei lovin tiboral vek rawh; a hmei a pa leh nausen te, hnute hne lai te, bawngpa te, beram te, sanghawngsei te, sabengtung te nen tihlum vek ang che,' a ti a ni," a ti a.
15:4	Chutichuan Saula chuan mipuite a ko khawm a, Telaim khuaah a chhiar a, sipai nuaihnih leh Juda mi singkhat an ni a.
15:5	Tin, Saula chuan Amalek-ho khua chu a zuk thleng a, ruamah chuan a lo lam bun a.
15:6	Tin, Saula chuan Ken-hote hnenah chuan, "Lo chhuak ula, Amalek-hote zing ata hi inthiar fihlim rawh u, chuti lo chuan ka tihlum tel dah ang che u: nangni zawngin Israela thlahte zawng zawng Aigupta ram atanga an lo chhuak kha in lo khawngaih si a," a ti a. Chutichuan Ken-hote chu Amalek mite zing ata an chhuak ta a.
15:7	Chutichuan Saula chuan Amalek mite chu Havila atanga Aigupta ram dep Sur thlengin a bei a.
15:8	Tin, Amalek mite lal Agaga chu a nungin a man a, mipui zawng zawngte chu khandaihin a sat hlum vek a.
15:9	Amaherawhchu Saula leh mipuite chuan Agaga chu an zuah a, beram tha tha te, bawngpa tha tha te, a thau thau te, beram no te, a tha zawng zawngte nen, chungte chu an tihlum duh lova; a tha lo leh an duh loh apiang eawh chu an tihlum vek a.
15:10	Chutichuan LALPA thu chu Samuela hnenah a lo thleng a,
15:11	"Saula lala ka lo ruat ta chu ka inchhir a ni: a mi zui lai chu mi hnuchhawnin ka thupek angin a ti si lo va," a ti a. Tin, Samuela chu a thinur a, zankhuain LALPA chu a au va.
15:12	Tin, Samuela chu Saula hmuak turin zing takah a tho va; tin, "Saula chu Karmel-ah a kal a kal a, ngai teh, chutah chuan hriat rengna lung a phun a, tin, akir leh a, a kal zel a Gilgal-ah a chhuk ta,: tiin Samuela chu an hrilh a.
15:13	Tin, Samuela chu Saula hnen lamah chuan a kal ta a; tin, Saula chuan a hnenah, "LALPAN malsawm che rawh se: LALPA thupek chang chuan ka ti ta e," a ti a.
15:14	Tin, Samuiela chuan, "Chung beram be ka benga lo lut leh bawngpa bu ka han hriatte chu engtizia nge ni si?" a ti a.
15:15	Tin, Saula chuan, "Amalek mite ta an rawn laksak a ni; LALPA i Pathian hnenah inthawi nan mipuiten beram tha tha leh bawngpa tha tha an zuah a ni; tin, a dang zawng zawng chu kan tihlum vek a ni," a ti a.
15:16	Chutichuan Samuela chuan Saula hnenah, "Ngawi rawh, nizana LALPAN ka hnena thu a sawi ka hrilh ang che," a ti a. Ani chuan a hnenah, "Sawi rawh khai," a ti a.
15:17	Tin, Samuela chuan, "Nangma ngaihin mi te tak ni mah la, Israel hnam hotu atana a siam i ni lawm ni? Tin, LALPA chuan Israel-ho lal atan hriak a thih chia;
15:18	Tin, LALPA chuan a ti rchhuak chian, 'Kal la, mi sualho, Amalek mite chu tihlum vek la, an boral der hma loh chuan bei zel rawh, ' a ti chia.
15:19	Engati nge LALPA thu chu zawm lo va, rallak thil chu a bawha i bawh a, LALPA mithmua thil tha lo i tih mai?" a ti a.
15:20	Tin, Saula chuan Samuela hnenah, "E, LALPA thu chu ka zawm alawm, LALPA min tirhna lamah chuan ka kal a, Amalek lal Agaga ka rawn man a, Amalek mite chu ka tihlum vek alawm.
15:21	Amaherwahchu chu mipuite chuan rallak thil beram leh bawngpate tihboral tur zinga a tha thate chu Gilgal khuaah LALPA i Pathian hnenah inthawi nan an rawn la a ni," a ti a.
15:22	Tin, Samuela chuan, "LALPA chuan LALPA thu zawm chu a lawm angin halral thilhlante leh inthawinate hi a lawm em ni? Ngai teh, inthawina aiin thuawih chu a tha zawk a, berampa thau aiin a thu pawm chu a tha zawk a ni.
15:23	Helna hi aienthiamna sualte nen a inang a, luhlulna hi milem biak leh Pathian lem biak tluk a ni. LALPA thu i duh loh avangin ani pahwin lal atan a duh ta bik lo che a ni," a ti a.
15:24	Tin, Saula chuan Samuela hnenah, "Thil ka tisual der mai a ni: LALPA thupek leh i thu chu ka lo bawhchhe reng mai a nih hi; mipuite ka hlauh va, an thu ka lo awihna lamah hian.
15:25	Chutichuan ka sual ngaidam la, LALPA ka biak theih nan min hawpui leh rawh khai," a ti a.
15:26	Tin, Samuela chuan Saula hnenah, "Ka hawpui tawp lo vang che; LALPA thu chu i duh si lo va, tin, LALPA pawhin Israel-hote lal tan a duh ta bik lo che a ni." a ti a.
15:27	Chutichuan Samuela chu kal tura ahan her chuan Saulan a puan fem chu a han chelh a, a thler ta a.
15:28	Tin, Samuela chuan a hnenah, "Vawiin atang hian LALPAN Israel ram hi a chhuhsak ta chia, i aia tha zawk i thenzawm a pe ta a ni.
15:29	Tin, Israelte Thahruia chu a daw lo vang a, a lamlet hek lo vang; mihring anga lamlet leh mai mi ani si lo va," a ti a.
15:30	Chutichuan ani chuan, "Ka lo sual ta a ni: nimahsela ka mite upa leh Israel-hote hmaah hian mi chawimawi turin ka ngen a che; tin, LALPA i Pathian kabiak theih nan min hawpui leh hram ang che," a ti a.
15:31	Chutichuan Samuela chuan Saula chu a hawpui ta a, Saula chuan LALPA chu a be ta a.
15:32	Chutichuan Samuela chuan, "Amalek mite lal Agaga chu ka hnenah han hruai rawh u," a tia . Tichuan Agaga chu a hnenah chuan khur chungin a va kal a. Tin, Agaga chuan, "Thihna kha chu ka pumpelh tawh a ni chawk ang chu maw," a ti a.
15:33	Tin, Samuela chuan, "I khandaihin hmeichhiate fa nei lova a siam angin i nu pawh hmeichhe zinga fa nei lo mi a ni ang," a ti a. Chutichuan Samuela chuan Agaga chu Gilgal khuaah LALPA hmaah chuan a sat sawm ta berh mai a.
15:34	Tin, Samuela chu Rama khuaah a kal a; tin, Saula chu a inah Saula awmna khua Gibea-ah a chho ta a.
15:35	Chutichuan Samuela chuan a thih ni thlengin Saula chu a tlawh leh ta lo va; Samuela chu Saula avangin lungngaih chu a lungngai a ni: tin, LALPA chu, Israelte lal atana Saula a lo siam chu a inchhir a ni.

I Samuela 14

THUTHLUNGHLUI   I Samuela   Bung 14
14:1	Tin, heti hi a ni a, ni khat chu Saula fapa Jonathana chuan a ralthuam kengtu tlangval hnenah chuan, "Hawh teh, lehlam ral Philistia mi ralvengtu sipaiho awmnaah sawn i va kal teh a ng," a ti a. Nimahsela a pa chu a hrilh lo va.
14:2	Tin, Saula chu Gibea ram hmawr lam daiha Migron-a pomgranet thei kung hnuaiah a awm a: tin, a hnena mi awmte chu zaruk emaw lai an ni a.
14:3	Tin, Silo khuaa LALPA puithiam Elia fapa Phinehasa fapa Ikaboda unaupa Ahituba fapa Ahija chu puithiam kawr hain a awm ve a. Tin, Jonathana chu a kal tih mipuite chuan an hre lo va.
14:4	Tin, Jonathana Philistia mi ralvengtu sipaiho awmnaa kal a tumna kawn leh kawn inkarah chuan a lehlam a lehlamah chuan lungpui tohlawt a awm a: a pkhata hming chu Bozez ani a, a pakhat a hming chu Sene a ni a.
14:5	Lung tohlawt pakhat chu Mikmas zawn hmar lampanga awm a ni a, a dang pakhat chu Geba zawn chhim lampanga awm a ni.
14:6	Tin, Jonathana chuan a ralthuam kengtu tlangval hnenah chuan, "Hawh serhtan lohho sipaite awmnaah sawn i kal teh a; LALPA chuan thil min tihsak mial mahna; LALPA tan chuan a tam emaw, a tlem emaw a chhandam chu engmah theih lohna a awm ve chuang si lo va," a ti a.
14:7	Tin, a ralthuam kengtu chuan a hnenah, "I rilrua awm tak chuan ti rawh; ngai teh, i rilru ang chiah chu ka rilru a ni," a ti a.
14:8	Chutichuan Jonathana chuan, "hawh teh, an hneah sawn kan va kal kai ang a, kan va inlan ang a.
14:9	Tin, kan hnena, "In hnenah kan lo kal hma loh chuan lo awm rawh u,' min tih chuan kan hmunah chuan kan ding reng a, an hnenah kan chho lo vang a.
14:10	Kan hnen lamah hian lo chho rawh u,' an tih erawh chuan kan chho vang a: LALPAN kan kutah min pe tawh ani tih kan tan chhinchhiahna ani ang," a ti a.
14:11	Tin, an pahnihin Philistia mi ralvengtu sipaite hmuhah chuan an va inlan a: tin, Philistia- hote chuan, "En teh u, Hebrai mite an bihrukna khuarkhurum ata an lo chhuak ta," an ti a.
14:12	Tin, ralvengtu sipaiho awmnaa mite chuan Jonathana leh a ralthuam kengtu chu, "Lo chho ula, thil engemaw kan lo entir ang che u," tiin an lo au va. Tin, Jonathana chuan a ralthuam kengtu hnenah chuan, "Mi rawn zui chho rawh khai; LALPA chuan anni chu Israelhote kutah a pe ta a ni," a ti a.
14:13	Tichuan Jonathana chu a kut leh ke thawhin a lawn chho va, a ralthuam kengtu chuan a zui a; tin, anni chuan Jonathana hmaah chuan an tlu zawih zawih a, a ralthuam ekngtu chuan a rawn that ve zel a.
14:14	Chutichuan Jonathana leh a ralthuam kengtuin an thah hmasak ber tum chuan tin chanve hmun emaw vel turah hian mi sawmhnih emaw lai an that a ni.
14:15	Tin, an riahhmuna mi te, phula mi te, mipui zawng zawngte chu an khur a; tin, ralvengtu sipaite leh lamthamhote pawh chu an khur ve a; tin, lir a nghing a; chutichuan namen lova khurhna a lo awm a.
14:16	Tin, Benjamin ram Gibea-a Saula ralvengtute chuan an han thlir vel a, ngai teh, mipuite chu an teh darh hum hum a, lehlam lehlamah an chavai nuai nuai mai a.
14:17	Chutichuan Saula chuan a hnena mipui awmte hnenah chuan, "Tunah hian inchhiar ula, tute nge kim lo han en teh u khai," a ti a. Tin, an han inchhiar chuan ngei teh, Jonathana leh a ralthuam kengtu chu an lo awm ve ta lo va.
14:18	Tin, Saula chuan Ahija hnenah chuan, "Pathian bawm chu han la rawh khai," a ti a. Chumi lai chuan Pathian bawm chu Israela thlahte hnena awm ani a.
14:19	Tin, heti hi a ni a, Saulan puithiam abiak lai mekte chuan Philistia mite riahhmun lama buai mur mur chu a zual ta deuh deuh mai a; tin, Saula chuan puithiam hnenah, "I kut la rawh," a ti a.
14:20	Tichuan Saula leh a hnena mipui awm zawng zawngte chu an kal khawm a, indonaah chuan an kal ta a; tin, ngai teh, anmahni leh anmahni khandaihin an inbei ta chiam a, tichuan an buai ta nuai nuai mai a.
14:21	Chutichuan chung lai ram vela mi riahhmuna han kal ve, tun hma lama Philistia-ho ama tang Hebrai mite pawh chu Suala leh Jonathana hnena awm Israel mite lamah chuan an lo pakai leh ta a.
14:22	Chutiang bawkin Ephraim tlang rama Israel mi biru zawng zawngte pawh khan khan Philistia mite an tlanbo tih an lo hria a, anni pawh chuan indonaah tel vein an um zui ve ta ngat ngat a.
14:23	Chutichuan LALPAN chu mi ni chuan Israel-hote chu a chhanhim ta a; tin, Beth-aven thleng rawkin an bei a.
14:24	Tin, chu mi ni chuan Israel mite chu an mangang a; nimahsela Saula chuan, "Kan hmelmate chunga phuba ka lak a, khua a lo tlailam hmaa tupawhin chaw a ei chuan anchhia dawng rawh se," tiin mipuite chu a vau va. Chutichuan tumahin chaw reng reng a tem pawh an tem miah lo va.
14:25	Tin, mipui zawng zawngte chuan ramhnuai an va thleng a, leiah chuan khawizu te a lo awm a.
14:26	Tin, mipuiin ramhnuai an va thlen chuan ngai teh, khawizu te a lo luang a; nimahsela tumahin an pir lo; mipuite chuan chhechham chu an hlau a ni.
14:27	Nimahsela Jonathana chuan a pain mipuite chu chhechhama a vau lai a hre ve lo va; chutichuan a tiang ken hmawr chu khawithlarah chuan a vit lut a, a pir a; tichuan a mit meng a lo fiah ta a.
14:28	Chutichuan mipui zinga mi pakhat chuan a bia a, "I pa chuan mipuiho hi, 'Vawiina chaw ei apiang chu anchhe dawngin awm rawh se,' tiin min vau tlat a, mipuite pawh an chau hle reng mai," a ti a.
14:29	Chutichuan Jonathana chuan, "Ka pa hian mite a timangang mai a nih hi maw; en ta che u, khawizu tlemte ka han tem mai avanga ka mit meng a lo fiah takzia hi.
14:30	Mipui hian an rallak thil hi an hmuh apiang vawiinah hian an duh duhin ei thei phei sela chu a va nasa lehzual dawn em! Chu mi avang chuan Philistia mite chu kan thah nasat theih loh phah a nih hi," a ti a.
14:31	Tichuan chu mi ni chuan Mikmas atangin Aijalon thlengin Philistia mite chu an bei a; tin, mipuite an chau ta hle mai a.
14:32	Chutichuan mipuite chuan an rallak thil chu a bawhin an bawh a, beram te, sebawngpa te, sebawng no te an man a, leiah an tihlum a, mipuite chuan a thisen chawpin an ei ta mai a.
14:33	Chutichuan, "Ngai teh, mipuite chuan thisen chawpa eiin LALPA chungah thil an tisual ta," tiin Saula chu an hrilh a. Tin, ani chuan, "Vervek takin thil in ti a ni vawiinah hian lung lian tak mi rawn lumsak rawh u," a ti a.
14:34	Tin, Saula chuan, "Mipui zingah chuan vakdarh vek ula, an hnenah, 'Mi tinin a sebawng leh a beram ka hnenah rawn la sela, hetah hian rawn talh sela ei rawh se; a thisen chawpa eia LALPA chungah thil tisual lovin, a ti e,' va ti rawh u," a ti a. Tin, chu mi zan chuan mi zawng zawng chuan mahni bawngpa an rawn kai theuh va, chutah chuan an talh a.
14:35	Tin, Saula chuan LALPA tan maicham a siam a: chu chu LALPA tana a maicham siam hmasak ber a ni.
14:36	Tin, Saula chuan, "Zanah Philistia mite zuk bei ila, zing khaw en thlengin i rawk ang u khai, tumah reng reng i zuah suh ang u," a ti a. Tin, anni chuan, "Tha i tih ang apiangin ti rawh," an ti a. Puithiam erawh chuan, "Heti laia h hian Pathian i hnaih teh rih ang u," a ti a.
14:37	Tin, Saula chuan Pathian a rawn a, "Philistia mite chu ka zuk bei ang em? Israel-ho kutah i pe ang em?" a tia . Nimahsela chu mi ni chuan a chhang lo va.
14:38	Tin, Saula chuan "Nangni mipui hotu zawng zawngte chu lo hnai teh u khai: vawiinah hian a eng berah nge kan tihsual hriat chhuah tum teh u.
14:39	Israel-hote chhandam thintu LALPA nunna chhalin ka sawi e, ka fapa Jonathana thiltihah pawh lo ni sela a thi ngei ngei tur a ni," a ti a. Nimahsela mipui zinga mi chuan tumah chhang reng reng an awm lo va.
14:40	Chutichuan Israel-ho zawng zawng hnenah chuan, "Nangniho hi a hrangin awm khawm ula, tin, kei leh ka fapa Jonathana hi a hrangin kan awm ang e," a ti a. Tin, mipuite chuan Saula hnenah, "Tha i tih ang apiangin ti rawh," an ti a.
14:41	Chutichuan Saulan LALPA Israelte Pathian hnenah chuan, "A dik tak chu han tilang ang che," a tia. Tin, thumvawr chu Jonathana leh Saula chungah chuan a tlu a; mipuite erawh chu an fihlim a.
14:42	Tin, Saula chuan, "Kei leh ka fapa Jonathana chungah chuan a tlu a.
14:43	Chutichuan Suala chuan Jonathana hnenah chuan, "Engnge ni i tih min hrilh rawh khai," a ti a. Tin, Jonathana chuan a hrilh a, "Ka tiang ken hmawrin khawizu tlem chu ka tem ngei mai a; ngai teh, ka thi ngei tur a ni," a ti a.
14:44	Tin, Saula chuan, "Pathianin a tih tihin ti mai sela, chu aia nasa pawhin: i thi ngei tur a ni, Jonathan," a ti a.
14:45	Tin, mipuite chuan Saula hnenah chuan, "Israelte zingah he chhandamna ropui tak thawktu Jonathana hi a thi ang maw? Hnai lo ve: LALPA nunna chhalin kan sawi e, a samzai khat pawh hi leiah a tla hlek lo vang; vawiin hian Pathian a thawhpui anih hi," an ti a. Chutichuan mipui chuan Jonathana chu thi lo turin an chhanhim ta a.
14:46	Chutichuan Saulan Philistia mite a um chu a kirsan ta a; tin, Philistia mite chu anmahni awmhmun lamah an kal ta a.
14:47	Chutichuan Saula Israel-ho chunga roreltua a han tan chuan kil tinah a hmelma, Moab-ho te, Amona thlahte, Edom-hote, Zoba lalho te, Philistia mite chu a do va; a thlekna lam apiang maiah chuan a hneh zel mai a.
14:48	Huai takin a bei a, Amelek mite chu a hneh a, Israel-ho chu anmahni rawktute kut ata a chhanchhuak a ni.
14:49	Saula fapate chu Jonathana te, Isvia te, Malkisua te an ni a tin, a fanute pahnih hming chu heng hi a ni; a upa zawk hming chu Merabi a ni a; a naupang zawk hming chu Mikali a ni:
14:50	Tin, Saula nupui hming chu Ahinoami, Ahimaza fanu a ni. Tin, a sipaite hotu hming chu Abnera, Saula pami Nera fapa a ni.
14:51	Tin, Kisa chu Suala pa a ni a; tin, Abnera pa Nera chu Abiela fapa a ni a.
14:52	Chutichuan Saula dam chhung zawng zawng chuan Philistia mite nen nasa tak maiin asn indo thin a: tin, Saula chuan mi chak emaw, mi huai emaw a hmuh apiang chu a la zel thin a ni.

I Samuela 13

THUTHLUNGHLUI   I Samuela   Bung 13
13:1	Saula chu kum sawmthum mi a nihin a lal tan a; tin, Israel-hote chungah kum hnih a lal a.
13:2	Tin, Saula chuan Israel-ho zinga mi sangthum a thlang a; sanghnih chu Mikmas-ah leh Bethel tlangah Saula hnenah an awm a, tin, sangkhat chu Benjamin rama Gibea-ah Jonathana hnenah an awm a: tin, a dang zawng zawng chu anmahni puan inah a hawtir vek a.
13:3	Tin, Jonathana chuan Geba-a Philistia ral vengtu sipaiho a bei a; chu chu Philistia mite chuan an lo hria a. Tichuan Saula chuan "Hebrai mite khan lo hre rawh se," tiin an ram zawng zawngah chuan tawtawrawt a hamtir a.
13:4	Tin, Israel-ho zawng zawngte chuan, Saula chuan Philistia ral vengtu sipaihote a bei tih leh Israel-hote pawh Philistia mite huat an phur ani tih thute an lo hre ta a. Chutichuan mipuite chu Saula hnenah Gilgal-ah an pung khawm ta chiam mai a.
13:5	Tin, Philistia mite chu Israel-ho bei tur chuan an inpun khawm ta chiam a; tawlailir singthum, sakawr chung chuang mi sangruk, mihring tuifinriat kama tiau zat zeta tam an ni: tin, an chho va, Beth-aven chhak lampangah Mikmas-ah chuan tanhmun an khuar a.
13:6	Tin, Israel mite chuan hnawhchepin an awm tih an inhriat chuan (mite chu an mangang ta hle mai a) mite chu pukah te, hnim hnawkah te, lungpui phenah te, kulhah te, khuarkhurumahte an biru a.
13:7	Hebrai mi thenkhatte chu Jorda ralah Gad leh Gilead ramahte an tlan a; Saula erawh chu Gilgal-ah a la awm reng a, mipuite chuan khur zawih zawih chungin an zui a.
13:8	Samuelan ni a ruat angin ni sarih a awm a; nimahsela Samuela chuan Gilgal-ah chuan a la kal ta lo a; tichuan mipuiin an tlan darhsan ta a.
13:9	Tin, Saula chuan, "halral thilhlan tur leh remna thilhlan turte chu hetah ka hnenah han la rawh u," a ti a. Chutichuan halral thilhlan chu a hlan a.
13:10	Tin, heti hi a ni a, halral thilhlan a hlan zo chauh va, Samuela chu a lo thleng ta a; tin, Saula chu chibai buk turin amah hmuakin a lo kal a.
13:11	Tin, Samuela chuan, "Engnge ni i lo tih chu le?" a ti a. Tin, Saula chuan, "Mipuite chuan mi kal bosan tawh a, tin, nang lah chu ni ruat niah chuan i lo thleng ta lo va, tin, Philistia mite lah chu Mikmas0ah an pung khawm luih luih tawh tih ka hre si a.
13:12	Chuvang chuan 'Philistia mite chuan Gilgal-ah min rawn bei dawn tep si a, tin, LALPA khawngaihna ka la dil si lo' ka ti a. Chuvang chuan halral thilhlan chu hlan lo thei ka ni lo a ni," a ti a.
13:13	Tin, Samuela chuan Saula hnenah chuan, "I thiltih dan hi a atthlak hle mai: LALPA i Pathian thu pek, thu a pek che hi i zawm lo a ni: LALPA chuan Israelte chungah hian i lalna hi kumkhuaa tihngheh tum zawng a ni a le
13:14	Nimahsela i lalna chu a kin tawh ang; LALPA thupek che i zawm loh avangin LALPA chuan ama thinlung ang pu mi a zawng a, mite chunga hotu ni turin LALPAN a ruat tawh a ni," a ti a.
13:15	Tin, Samuela chu a tho va, Gilgal ata chu Benjami rama Gibea khuaah chuan ahan kal ta a. Tin, Saula chuan a hnena mi awmte chu a chhiar a, zaruk lai an ni a.
13:16	Tin, Saula leh a fapa Jonathana leh an hnena mi awmte chu Benjamin rama Geba khuaah chuan an awm a; nimahsela Philistia mite chuan Mikmas-ah chuan tanhmun an khuar a.
13:17	Tin, lamththamhote chu Philistia mite tanhmun atangin pawl thumin an lo chhuak a: pawl khatte chu Sual rama Ophra lam pan akwng chu an zawh a:
13:18	tin, pawl khat chu Beth-horon lam pan kawn an zawh a; tin, pawl khat chuan thlaler dep Zeboim ruam lam hawi ramri kawng chu an zawh a.
13:19	Israel-ho ram pum puiah chuan thirdeng reng reng an awm lo va; Philistia mite chuan, "Hebrai mite hian khandaihte emaw, feite emaw an siam dah reu reu ang e," an ti a ni.
13:20	,21 Nimahsela Israel mi zawng zawngte chu bawngtuthlawh te, leilehna thir hriam te, thirkut te, hreipui te, tiang hmawra zum te a bil chuan an leilehna hmawr zum te, an leilehna thir hriam te, an hreipui te, an bawngtuthlawhte tah hriamtir turin Philistia-hote hnenah an zuk chhuk thin a ni.
13:21	,20 Nimahsela Israel mi zawng zawngte chu bawngtuthlawh te, leilehna thir hriam te, thirkut te, hreipui te, tiang hmawra zum te a bil chuan an leilehna hmawr zum te, an leilehna thir hriam te, an hreipui te, an bawngtuthlawhte tah hriamtir turin Philistia-hote hnenah an zuk chhuk thin a ni.
13:22	Chutichuan an indo ni chuan Saula leh Jonathana hena mi awmte chu khandai emaw, fei emaw nei reng reng an awm lo va; Saula leh a fapa Jonahthana erawh chuan an nei a.
13:23	Tin, Philistia ralvengtu sipaiho chu Mikmas kawnah an kal ta a.

I Samuela 12

THUTHLUNGHLUI   I Samuela   Bung 12
12:1	Tin, Samuela chuan Israel mite zawng zawng hnenah chuan, "Ngai teh u, ka hnena in thusawi zawng zawng chu ka pawm a, lal tur ka siamsak ta che u a.
12:2	Tunah hian ngai teh u, lal chuan a lo kaihruai ta che u a: kei chu ka lo tarin ka lutte pawh a lo tuak ta a: tin, ngai teh u, ka fapate chu in hnenah an awm a; ka tleirawl atangin tun thlengin ka kaihruai che u a.
12:3	Heta hi ka awm a: LALPA hma leh a hriak thiha hmaah hian mi sel teh u le; tu bawng pa nge ka chhuhsak ngai? Tu sabengtung nge ka chhuhsak ngai? Tunge ka bum tawh ngai? Tunge ka tihduhdah ngai? Ka mit tidel turin tu lakah nge thamna ka lak ngai? Ka rul leh vek ang che u," a ti a.
12:4	Tin, anni chuan, "Min bum ngai lo va, min tiduhdah ngai hek lo, tuma kut atangin lak awm loh i la ngai hek lo," an ti a.
12:5	Tin, ani chuan an hnenah, "Ka kutah hian engmah awm lo in hmu lo tih vawiinah hian LALPA chu in lakah hretu ani a, a hriak thiha pawh chu hretu a ni," a ti a. Tin, anni chuan, "Amah chu hretu a ni," an ti a.
12:6	Tin, Samuela chuan mpui hnenah chuan, "Mosia leh Arona ruattu leh Aigupta ram ata in pute hruai chhuaktu LALPA chu a ni asin.
12:7	Chutichuan ding thap ula, LALPA hmaah hian LALPAN in chungah leh in pute chunga thil a lo tihfel thin dan ka han chhutpui teh ang che u.
12:8	Aigupta rama Jakoba aluh hnu khan, in pute chuan LALPA an au va, tichuan LALPA chuan Mosia leh Arona a tir a, anni chuan in pute chu Aigupta ram atangin an hruai chhuak a, he hmunah hian an awmtir ta a.
12:9	Nimahsela LALPA an Pathian chu an theihnghilh a; tin, ani chuan Hazor sipai hotu Sisera kutah leh Philistia mite kutah leh Moab lal kutah a hralh a, tin, anni chuan an do va.
12:10	Tin, LALPA chu an au va, 'LALPA chu kan hawisan a, Baal-te leh Astarothi-te rawng kan bawl avangin kan lo sual ta a ni: nimahsela kan hmelmate kut ata hi min chhan chhuak tawh la, tichuan i rawng kan bawl ang e,' an ti a.
12:11	Tin, LALPA chuan Jerubaala te, Bendana te, Jephtha te, Samuela te a tir a, in hmelma lehlam lehlam mite kut ata a chanchhuak che u a, him takin in awm a.
12:12	Tin, Amona thlahte lal Nahasa chu nangmahni do turin a lo kal tih in hriat veleh ka hnenah , 'A ni lo ve, lalin ro min rel rawh se,' in ti a; LALPA Pathian chu in lal ani reng si a.
12:13	Chutichuan in lal in thlan leh dil chu en teh u; en teh u, LALPA chuan lal a siamsak ta che u anih hi.
12:14	LALPA chu in tih a, a rawng in bawl a, a aw in ngaihthlak a, LALPA thupek in helsan loh va, nangmahni leh in chunga roreltu lal nen LALPA in Pathian zuitu in nih chuan a tha ang a;
12:15	amaherawhchu LALPA aw chu ngaithla lo va, LALPA thupek in helsan chuan in puten LALPA kut an tuar ang bawkin nangni pawhin in tuar ang.
12:16	Chutichuan ding thap ula, LALPAN in mithmuha thil ropui tak a tih tur hi lo en rawh u.
12:17	Vawiin hian buh an seng a ni lawm ni? Khawpui rik tir tur leh ruah surtir turin LALPA chu ka au vang a, tichuan lal in dil thu-ah hian LALPA mithmuha thil in tihsual hi a nasatzia in hriain in hmu ang," a ti a.
12:18	Chutichuan Samuela chuan LALPA chu a au va, LALPA chuan chu mi ni chuan khawpui a riktir a, ruah a sirtir a; tichuan mipui chuan LALPA leh Samuela chu an hlau ta em em a.
12:19	Tin, mipui zawng zawng chuan Samuela hnenah chuan, "Kan thih loh nan LALPA i Pathian hnenah chuan i chhiahhlawhte hi min tawngtaisak rawh, he thil tha lo tak lal, kan lo dil hi, kan sual zawng zawng belhchhahtu a nih tak hi," an ti a.
12:20	Tin, Samuela chuan mipuite hnenah chuan, "Hlau suh u, he thil tha lo tak hi tih zawng n ti ngei tak a, mahse LALPA in zui chu pensan chuang lo ula, in thinlung zawng zawngin LALPA rawng chu bawl zawk rawh u;
12:21	engmaha hnemhnang lo tur leh chhanchhuak thei lo che u zuiin pensan suh u, engmahlo an ni si a.
12:22	A hming ropui tak avang hian LALPA chuan a mite chu a hawisan dawn si lo va: a mite atana siam che u chu LALPA lawmzawng tak ani si a.
12:23	Chu chang pawh ani lo va, in tana tawngtai ban a, LALPA chunga sual sual chu kei atan chuan a hnai lo tawp mai a ni; kawng tha leh kawng dik ka kawhhmuh zel zawk ang che u.
12:24	LALPA chu tih phawt mai ula, in thinlung zawng zawngin tih takzetin a rawng bawl ula in tan thil a tih ropuizia hi ngaihtuah rawh u khai.
12:25	Amaherawhchu sual taka thil in la tih cheu chuan in boral ang, nangmahni leh in lal nen," a ti a.

I Samuela 11

THUTHLUNGHLUI   I Samuela   Bung 11
11:1	Chutichuan Amon mi Nahasa chu a lo thawk a, Jabes-Gilead beih tumin a han ep a; tin, Jabes mi zawng zawng chuan Nahasa hnenah chuan, "Kan hnenah thu thlung la, tichuan i rawng kan bawl ang e," an ti a.
11:2	Tin, Amon mi Nahasa chuan an hnenah, "Hetiang hian a ni in hnenah thu ka thlun ang ni: in mit dinglam zawng zawng kher chhuah vek tur ani ang a; chu chu Israel mi zawng zawng tan hmingchhiatna a ni ang," a ti a.
11:3	Tin, Jabes khuaa upate chuan a hnenah, "Israel ram zawng zawngah mi kan han tir rih theih nan ni sarih min ngaichang rih rawh; chuta min chhandam tur tumah an awm loh chuan i h nenah kan lo chhuak mai ang e," an ti a.
11:4	Chutichuan an mi tirhte chuan Saula awmna khua Gibea chu an lo thleng a, mipuite beng hriatah chuan chung thu chu an sawi a; tin, mipuite chuan an aw an chhuah a, an tap a,
11:5	Tin, ngai teh, lo atangin Saula chu sebawng khalhin a lo haw a; tin, Saula chuan, "Eng an ti nge ni mipuite chu an tah?" a ti a. Tin, Jabes khuaa mite thusawi chu an hrilh a.
11:6	Tin, chung thu chu a hriat veleh chuan Saula chungah Pathian thlarau a lo thleng ta chiam mai a, nasa takin a thin chu a ur ta thut a.
11:7	Chutichuan bawng tuak khat a talh a, a sa chu a chan sawm vek a, Israel ram zawng zawngah chuan a semtir a, "Tupawh Saula leh Samuela rawn zui duh lo apiang an sebawng chu hetianga tih ve hi a ni ang," tiin. Chutichuan mipuite chuan LALPA chu an hlau ta a, thukhat vuain an lo thawk chhuak ta a.
11:8	Tin, Bezel hmunah chuan a chhiar a; Israel mite chu nuai thum an ni a, Juda mite chu singthum an ni a.
11:9	Tin, an mi rawn tirhte hnenah chuan, "Jebes mite chu an hrilh a, tichuan an lawm ta hle mai a.
11:10	Chutichuan Jabes mite chuan, "Naktukah hian in hnenah kan lo chhuak ang a, kan chungah in duh duhin ti mai ang che u," an ti a.
11:11	Tin, heti hi a ni a, a tukah chuan Saula chuan mipuite chu pawl thumah a siam a; tin, zing ven hun lai takin an riahhmunah chuan a lut a, Amon mite chu chhun ni sat vang lai tak thlengin an that a; tin, heti hi ani a, an thah bangte chu an darh vek a, pahniha awm dun reng reng pawh an awm lo va.
11:12	Tin, mipuite chuan Samuela hnenah, "Tute nge ni 'Saulan kan chungah ro a rel tehlul ang maw' ti kha? Chung mite chu rawn hruai la kan lo tihlum ang e," an ti a.
11:13	Tin, Saula chuan, "vawiin kher hi chuan tumah tihhlum tur ani lo ve; vawiinah hian LALPA chuan Israelte zingah chhandamna a rawn thawk chhuak ta si a," a ti a.
11:14	Chutichuan mipuite hnenah chuan, "Hawh u, Gilgal-ah i kal ang u khai, chutah chuan ram chu i din thar leh ang u," a tiu a.
11:15	Chutichuan mipui zawng zawng chu Gilgal-ah chuan an kal ta a; Saula chu Gilgal-ah chuan LALPA hmaah lalah an siam ta a; chutah chuan LALPA hmaah remna inthawinate an hlan a; tichuan chutah chuan Saula leh Israel mi zawng zawngte chu an lawm ta em em mai a.

I Samuela 10

THUTHLUNGHLUI   I Samuela   Bung 10
10:1	Chutichuan Samuela chuan hriakbawk chu ahan phawrh a, a lua chuan alei a, a fawp a, "LALPA chuan a rochante chunga hotu ni turin hriak a thih che a ni lawm ni?
10:2	Vawiina mi chhuahsan hnu hian Zelza-ah Benjamin ramria Rakili tlan kiangah mi pahnih i hmu ang a: tin, anni chuan i hnenah, 'Sabengtung i zawnte chu an hmu tawh e: tinngai teh, i pa chuan sabengtung chu a ngaihtuah tawh lo va, nangmah mawlh a ngaihtuah a, ka fapa chu engtin nge ka tih tak ang, a ti a ti mai a,' an ti ang a.
10:3	Tin, chuta tang chuan kal zel la, Tabor sasua chu i va thleng ang a, chutah chuan mi pathum Bethel-a Pathian hnena han kal turten an lo tawk ang chia; pakhat chuan chhangper tlang thum a keng ang a, tin, pakhat chuan uain peng a keng ang.
10:4	Tin, chibai an buk ang chia, changpera tlang nih an pe ang chia; chu chu i lo la ang a.
10:5	Chu mi zawhah chuan Philistia sipaiho awmna Pathian tlang chu i va thleng ang a; tin, heti hi a ni ang a, chuta khua i va thlen chuan zawlneiho, perhkhuang te, khuangte te, phenglawng te, tingtang kengte hruaia hmun sang atanga lo chhuk i tawk ang a: tin, thu an sawi dual dual ang a:
10:6	tin, LALPA thlarau nasa takin i chungah a lo thleng ang a, nang pawh thu an sawi dual dualnaah chuan i tel ve ang a, tin, mi danglam daihah i lo chang mai ang.
10:7	Tin, heng chhinchhiah hi i chunga a lo awm hunah chuan thil lo awmin a zir ang zelin i tih tur a ni: Pathian i hnenah a awm zel si a.
10:8	Tin, ka kal hmain Gilgal-ah lo zukkal la; tin, ngai teh, kei pawh halral thilhlante leh remna inthawinate hlan turin i hnenah ka lo chhuk ang a: i hnena ka lo kal a, i tih tur ka rawn hrilh hma che chuan ni sarih i lo awm tur ani ang," a ti a.
10:9	Tin, chutiang chu a lo ni ta ngei a, Samuela then tura a hnuchawn veleh chuan Pathianin thinlung danglam daih a pe ta a; tin chung chhinchiahna zawng zawngte chu chu mi ni chuan a lo thleng ta vek a.
10:10	Chutichuan tlang hu an han thlen chuan, ngai teh, zawlneihovin an tawk a; tin, LALPA thlarau nasa takin a lo thleng a, thu an sawi dual dualnaah chuan a tel ve ta a.
10:11	Tin, heti hi a ni a, tun hma lama amah lo hre tawhten zawlneite thu sawi dual dualnaah a tel ve tih an hriat chuan, mite chu an inbia a, "Kisa fapa hunga thil lo awm hi engnge ni ta? Saula pawh chu zawlnei zingah a tel ve ta elo maw ni," an ti a.
10:12	Tin, a awmna khuaa mi pakhatin a chang a, "An pate chu tunge maw a nih bik le?" a ti a. Chutichuan, "Saula pawh chu zawlnei a ni ve ta elo maw?" tih chu infiamna takah an hmang ta reng a.
10:13	Tin, an thusawi dual dualnaa a tel zawh chuan hmun sang chu a thleng ta a.
10:14	Tin, Saula pami chuan a hnenah leh a chhiahhlawh hnenah chuan, "Khawiah nge in kal?" a ti a. Tin, ani chuan, "Sabengtung kan zawn a ni: tin, kan hmuh zawh tak loh avangin Samuela hnenah kan kal ta a ni," a ti a.
10:15	Tin, Saula pami chuan, "Samuela chuan i hnenah engnge ni a sawi min hrilh teh khai," a ti a.
10:16	Tin, Saula chuan a pami hnenah chuan, "Sabengtungte chu an hmu tawh tih min hrilh teh meuh mai," a ti a. Amaherawhchu ram chungchang thu Samuelan a sawi chu a hrilh lo.
10:17	Chutichuan Samuela chuan mipuite chu Mizpe-ah LALPA hnenah a ko khawm a;
10:18	tin, Israel thlahte hnenah chuan, "LALPA, Israelte Pathian chuan heti hian a ti a ni," Israel-ho chu Aigupta atangin ka hruai chhuak a, Aigupta mite kuta a ta leh a hnuaichiahtu che u ram zawng zawng ata ka chhan chhuak che u a:
10:19	nimahsela vawiinah hian in manganna zawng zawng leh hreawmna zawng zawng ata chhan himtu che u in Pathian ngei chu in duh lo va, a nenah, A ni lo ve, lal min siamsak rawh in ti a,' tiin. Chuvangin tunah hian a hnama hnam leh a chia chiin LALPA hmaah rawn inlan rawh u," a ti a.
10:20	Chutichuan Samuela chuan Israel chi zawng zawng chu a rawn inlantir a, tin, Benjamin chi chu thlan a lo ni ta a.
10:21	Tin, Benjami chiho chu a chhungkuain a rawn inlantir a. Matri mi chhung chu thlan a lo ni ta a; tin, Kisa fapa Daula chu thlan a lo ni ta: nimahsela amah an han zawng a, an hmu lo va.
10:22	Chutichuan LALPA chu an han nawn leh a, "Mi lo kal tur an la awm em?" an ti a. Tin, LALPA chuan a chhang a, "Ngai teh u, bungraw zinga abiru a ni," a ti a.
10:23	Chutichuan an tlan a, an va hruai chhuak a; tin, mipui zinga a han din chuan mi zingah chuan a sang ber mai a, tuma a koki khum pawh an awm lo.
10:24	Tin, Samuela chuan mi zawng zawng hnena chuan, "LALPA mi ruat hi in hmu em? Mipui zawng zawng zingah amah ang r阯g r阯g an awm lo ve," a ti a. Tin, mipuite chu an au va, "Pathianin lalber humhim rawh se," an ti a.
10:25	Chutichuan Samuela chuan mipuite chu ram awm dan tur chu a hrilh a, lehkhabuah a ziak a, LALPA hmaah chuan a dah a. Tin, Samuela chuan mipuite chu mahni in lam theuhvah a hawtir ta a.
10:26	Tin, Saula pawh chu Gibea khuaah a in lama a haw ve ta a: tin, mi huaisenho an thinlung Pathianin a khawihte chu a hnenah an kal ve a.
10:27	Nimahsela Beliala fapa tute emaw chuan, "He mi hian engtin nge min chandam theih tehlul ang?" an ti a. Tichuan amah chu an ngainep a, lawmman reng reng an pe duh lo va. Nimahsela ani chu a ngawi reng mai a.

I Samuela 9

THUTHLUNGHLUI   I Samuela   Bung 9
9:1	Benjamin rama Benjamina thlah mi pakhat mi chak huaisen tak i a awm a, a hming chu Kisa a ni a, chu mi chu Abiela fapa a ni a, chu mi chu Zeorora fapa a ni a, chu mi chu Bekoratha fapa a ni a, chu mi chu Aphia fapa a ni a.
9:2	Tin, ani chuan fapa a nei a, a hming chu Saula ani a, tlangval tlawntlai tha tak ani a, srael mite zinga chuan a aia tlawntlai tha reng reng an awm lo va; tuma a koki khum pawh an awm lo.
9:3	Tin, Saula pa Kisa sabengtung te a bo hlawm a. Tin, Kisa chuan a fapa Saula hnenah chuan, "Tho la, chhiahhlawh pakhat hruai la, sabengtung va zawng teh khai,"a ti a.
9:4	Tichuan Ephraim tlang ramte chu a fang a, tin, Salisa ramte paw a fang a, nimahsela an hmu lo va: tichuan Saalim ram an vang leh a, chutah pawh chuan an awm lo va: tin, Benjamin mite ram a fang leh a, nimahsela an hmu ta chuang lo va.
9:5	Zuph ram an thlen chuan Saula chuan a hnena awm ve, a chhiahhlawh hnenah chuan, "Hawh teh, i haw leh teh tawh tawh mai ang, chutilochuan ka pain sabengtung ngaihtuah thulhin keimahni minngaihtuah dah ang e," a ti a.
9:6	Tin, ani chuan a hnenah, "Ngai teh, he khuaah hian Pathian mi a awm a, mi zahawm tak a ni a, a sawi apiang chu a lo thleng ngei ngei thin a ni: hawh teh, chutah chuan i kal teh ang, kan kalna turte hi min hrilh thei mial mahna, " a ti a.
9:7	Chutichuan Saula chuan a chhiahhlawh hnenah chuan, "Nimahsela e ngai teh, kal ang ila, chu mi chu engnge kan ken sak ang? Kan bawma chhang lah a awm tawh si lo va, Pathian mi pawmman ken tur a awm hauh lo mai: engnge kan neih saw?" a ti a.
9:8	Tin, chhiahhlawh chuan Saula chu a chhang leh a, "Ngai teh, tangka sekel hmun lia thena hmun khat chu ka la keng a: chu chu, kan kalna tur min hrilh manah Pathian mi chu ka pe ang e," a ti a.
9:9	(Tun hma lam chuan Israel hote zinga miin Pathian rawn an duh hian, "Hawh teh, hmutheitu hnenah i kal teh ang," an ti thin a: tun laia zawlnei an tih thina hi tun hma chuan Hmutheitu an ti thin a ni.)
9:10	Chutichuan Saula chuan a chhiahhlawh hnenah, "A that hlauh chu, i kal teh ang hmiang, " a ti a. Chutichuan Pathian mi awmna khuaah chuan an kal ta a.
9:11	Khaw pan chhohnaa an han chhoh lai chuan nula tui chawi tura lo chhuakte an han hmu a, an hnenah, "Hetah hian hmutheitu chu a awm em?" an ti a.
9:12	Tin, anni chuan an chhang a, "Aw e, in hmaah a lo kal asin, hmanhmawh rawh u khai, vawiinah hian khuaah chuan a lo kal a ni; vawiinah hian hmun sangah mite an inthawi a ni:
9:13	Khua in han luh veleh hmun sanga chaw ei tura a kal hmain in han hmu nghal mai ang; inthawina chu malsawmtu tur anih avangin a thlen hma loh chuanmipui chuan chaw an ei dawn lo a ni;chu mi hnuah chuan an mi sawmte chuan an ei thin a ni. Chuvangin kal chho thuai ula, in han hmu nghal mai ang," an ti a.
9:14	Tichuan khuaa chuan an kal cho ta a; tin, khua an han luh chuan ngai teh, Samuela hmun sanga kal tur chuan a tawk a.
9:15	Tin, Saula lo kal hma ni khatah chuan LALPA chuan Samuela chu a bekbawr a,
9:16	"Naktuk hetih hun lai hian Benjamin ram atangin i hnenah mi pakhat ka rawn kaltir dawn a, ka mi Israelte chunga hotu ni turin hriak i thih ang a, ani chuan Philistia mite kut ata ka mite a chhandam ang; an au thawm chuan ka hnen a lo thlen tak avangin ka mite chu ka ngaihsak a ni." tiin.
9:17	Tin, Samuelan Saula a hmuh chuan LALPAN a hnenah, "En teh, i hnena ka mi sawia kha; ani hian ka mite chunga thu a nei ang, a ti a.
9:18	Chuti chuan Saula chuan kulh kawngkaah Samuela chu a va hnaih a, "Hmutheitu in chu khawiah nge a awm min hrilh teh khai," a ti a.
9:19	Tin, Samuela chuan Saula chu a chhang a, "Keimah hi hmutheitu chu ka ni; kahmaa hian hmun sang lam panin kal la, vawiinah hian ka hnenah chaw i ei dawn a ni; tin, naktuk zingah chuan ka kaltir ang chia, i rilrua awm zawng zawng pawh ka hrilh ang che.
9:20	Tin, i sabengtung, ni thum bo tawhte thu chu lungkham suh, an hmu tawh e. Israelte zinga ropuina zawng zawng chu tu tan nge ni? I tan leh i pa ina mi zawng awng tan ani lawm ni?" a ti a.
9:21	Tin, Saula chuan a chhang a, "Israel hnam zinga te ber, Benjamin hnam ka ni law ni? Tin, kan chhungkua pawh Benjamin hnam chhungkua zawng zawng zinga te ber ani lawm ni? Eng tiziaa hetianga ka hnena sawi nge i nih le?" a ti a.
9:22	Tin, Samuela chuan Saula leh achhiahhlawh chu a hruai a, mikhual pindahna chuan a hruai lut a, an mi sawm, sawmthum lai zingah chuan hmun ropui berah a thuttir a.
9:23	Tin, Samuela chuan chaw chhumtu hnenah chuan, "I hnena dah hran tur ka tih chanvo ka pek che kha han la rawh khai," a ti a.
9:24	Chutichuan chaw chhumtu chuan a bawp leh a chunga awm chu a rawn la a, Saula hmaah chuana va hlui a. Tin, Samuela chuan, "En teh, ka lo dah hrana chu! Kil la, ei rawh; a hun hun atan hei hi ka lo ruatsak reng che a ni, 'Mite ka sawm khawm e' ka ti tawh bawk si a," a ti a. Chutichuan chu mi ni chuanSaula chu Samuela te nen chawhlui an kil za ta a.
9:25	Tin, hmun sang ata khuaa an chhuk chuan, in chunga Saula chu mutna an siamsak a, a mu ta a.
9:26	Tin, zing takah a tho va; ni chhuah dawn lai velin Samuela chuan in chunga awm Saula chu a ko va, "Tho la, ka laltir te teh tawh ang che," a ti a. Chutichuan Saula chu a tho va, an pahnih chuan an kal chhuak a, amah leh Samuela chu an chuak ta a.
9:27	Khaw hmawr lam chu an zuk thlen chuan, Samuela chuan Saula hnenah, "Chhiahlawh hi ka hma lamah kaltir la, (ani chu a kal ta a) nang erawh chu ding rih la, Pathian thu ka han hrilh teh rih ang che," a ti a.