Genesis 49

THUTHLUNGHLUI   Genesis   Bung 49
49:1	Tin, Jakoban a fapate chu a ko va, heti hian a sawi a, "Ni hnuhnungahte in chunga thil lo thleng tur chu ka hrilh theihna tur che uin rawn in khawm rawh u.
49:2	Nangni Jakoba fapate u, rawn inkhawm ula, ngaithla rawh u; In pa Israela thu hi ngaithla rawh u.
49:3	Reuben, nang hi ka fa tir, ka thiltihtheihna, ka chakna rah hmasa ber i ni; San berna leh thuneih berna chu i ta a ni.
49:4	Nimahsela tui anga nghet lo i ni, chungnun berna chu i nei lo vang; i pa khumpui i kai avangin
49:5	Simeona leh Levia hi unau an ni a; An khandaihte chu thisen chhuahna hriamhrei a ni.
49:6	Aw, ka thlarau, nang zawng an inrawnnaah chuan inrawlh ve suh; Ka ropuina, nang zawng an inkhawmnaah chuan tel ve suh; An thinurin mi an that a, An tihmawhin Bawngpa tha an chhat a.
49:7	An thinurna chuan anchhia dawng rawh se, kawlh tak a ni si a; An thinrimna pawh chuan anchhia dawng rawh se, nun chhe tak a ni si a: Jakob-hovah chuan anni chu ka tithen ang a, Israel-hovah chuan ka tidarh bawk ang.
49:8	Juda, nang zawng i unauten an fak ang che: i kut chu i dote nghawngah i nghat ang a; i pa fapate chu i hmaah an kal ang.
49:9	Juda hi sakeibaknei no a ni; Ka fapa, i sa she chu i chhohsan ta a: A kun a, sakeibakneipa angin a bawk a, Sakeibakneinu ang bawk siin; tuin nge titho ngam ang?
49:10	Lal tiang chu Juda lakah a bo lo vang a, Roreltu tiang chu a ke k鈘 ata a bo hek lo vang a, Silova lo kal hma loh chuan; Hnam tinin ama thu an awih ang.
49:11	A sakawr no chu grep hruiah a thlung a, A sabengtung ni chu grep hrui tha miah a thlung bawk a. A silhfente chu uainah a su a. A puan chu grep thisenah a su bawk a; A mitte chu uain thisenin a awm ang a.
49:12	A hate chu hnute tui tihvarin a awm bawk ang.
49:13	Zebuluna hian tuifinriat kamah awmhmun a khuar ang: Lawng chawlhna vaukam a ni ang; A ramri chu Zidon-ah a ni ang.
49:14	Isakara hi sabengtung chak tak, Beram huang kara bawk a ni:
49:15	Chawlh chu thain a hria a, Ram chu nuamin a hre bawk a; Tichuan englo pu turin a koki chu a tihniam a, Hnathawka rawih luihin chhiahhlawhah a lo awm ta a.
49:16	Dana hian a mite chu, Israel hnam zinga hnam pakhat ni vein, ro a relsak ang.
49:17	Dana hi lamliana r鹟, Kalkawnga r鹟rial, A chunga chuang zangthala tla d阹 khawpa Sakawr kea chu th頽tu hi a ni ang.
49:18	Aw LALPA, i chhandamna chu ka nghak reng e. Gada hi, runin an bei ang a,
49:19	Nimahsela ani chuan an ke artui lamah a bei zawk ang,
49:20	Asera hi, a ei chu a tha ang a, Lal ei mi tui tak takte a tichhuak ang.
49:21	Naphtalia hi zukpui chhuah a ni: Thu tha takte a sawi thin.
49:22	Josefa hi peng rah duh tak a ni, Tuikhur kianga peng rah duh tak chu; A peng lehchhawngte chuan lung bang a zam khuh a.
49:23	Thal kapho chuan ani chu nasa takin an tirethei a, An kir a, an tiduhdah a:
49:24	Nimahsela ani thalngul chu khuah takin a awm reng a, A kut thate chu Jakoba Mi Chaka kuta- (Chuta tang chuan Beram vengtu, Israela lungpui chu a lo awm a;)
49:25	I pa Pathian, nangmah tanpuitu tura- Engkimtitheia. Chung lam van malsawmnate, Hnuai lama bawk reng tui th鹝 tak malsawmnate, Hnute leh chh鹟 malsawmnatea Nangmah malsawmtu tur ngeia Tihchakin a awm a.
49:26	I pa malsawmsaknate hian, Mi thlahtute malsawmsakna te chu Chatuan tlang tawp ret thlengin a khum ta zawk a ni: Chungte chu Josefa luah a awm ang a, A unaute hnen ata tihhrana awma chh頿ah chuan a awm ang.
49:27	Benjamina hi chinghne koham a ni: zingah chuan a sa she chu a ei a ng a, Tlai lamah chuan a rallak chu a sem ang," a ti a.
49:28	Chung zawng zawngte chu Israel hnam sawm leh hnam hnihte chu an ni a: chu thu pawh chu anmahni malsawma an hnena an pa thusawi chu a ni; an malsawm dawn tur tawk ang zelin mal a sawmsak theuh va.
49:29	Tin, anni chu thuro a chhiah a, an hnenah, "Ka chipuite hnenah hruaiin ka awm ve dawn ta a: Hit mi Ephrona lovah puk, Kanaan rama Mamre zawna Makpela lova puk, Abrahaman phumna hmun ro atan, Hit mi Ephrona laka a lo chawpa a leiah khan mi thlahtute hnenah mi phum ve ang che u:
49:30	Tin, anni chu thuro a chhiah a, an hnenah, "Ka chipuite hnenah hruaiin ka awm ve dawn ta a: Hit mi Ephrona lovah puk, Kanaan rama Mamre zawna Makpela lova puk, Abrahaman phumna hmun ro atan, Hit mi Ephrona laka a lo chawpa a leiah khan mi thlahtute hnenah mi phum ve ang che u:
49:31	chutah chuan Abrahama leh a nupui Sari chu an phum a; chutah chuan Isaaka leh a nupui Rebeki chu an phum a; chutah bawk chuan Leaii ka phum a:
49:32	lo leh a chhunga puk awm chu Hetha thlahte laka lei a ni," a ti a.
49:33	Tin, Jakoba chuan a fapate hnena thuro a chhiah zawh chuan a kete chu khumah a hlang kai a, a thlarau a thlah a, a chipuite hnenah chuan hruaiin a awm ve ta a.

Genesis 48

THUTHLUNGHLUI   Genesis   Bung 48
48:1	Tin, chung hnuah chuan heti hi a ni a, Josefa hnenah, "Ngai teh, i pa a dam lo ve," an ti a. Tichuan a fapate pahnih Manasea leh Ephraima chu a hnenah a hruai ve a.
48:2	Tin, Jakoba hnenah "Ngai teh, i fapa Josefa i hnenah a lo kal e," tiin an hrilh a: tichuan Israela chu a intiharh a, khumah chuan a thu ta a.
48:3	Tin, Jakoban Josefa hnenah, "Pathian Engkimtitheia chu Kanaan rama Luz khuaah chuan ka hnenah a inlar a, mal mi sawm a,
48:4	ka hnenah, 'Chi tam tak ka thlahtir ang chia, ka tipung bawk ang chia, chi hrang hrang awm khawmah ka siam ang che; tin, he ram hi i hnua i thlahte hnenah chuan kumkhaw ro atan ka pe ang,' mi ti a.
48:5	Tin, i fapate pahnih, Aigupta rama i hnena ka lo kal hmaa Aigupta rama i neihte hi ka ta an ni; Ephraima leh Mansea hi, Reubena leh Simeona ang bawkin ka ta an ni ang.
48:6	Tin, he mite hnua fa i neihte chu i ta an ni ang, an rochanah chuan an ute hming chu an tawm mai ang.
48:7	Tin, keia thu zawng, Paddan ram atanga ka lo kal lai khan Rakili chu Kanaan ramah kawng lakah, Ephrath khua chu a la hlat fe laiin ka bulah a thi a: chuta Ephrath khaw kawngah chuan ka phum ta a (chu chu Bethlehem khua a ni)," a ti a.
48:8	Tin, Israelan Josefa fapate chu a en a, "Heng hi tute nge ni?" a ti a.
48:9	Tin, Josefa chuan a pa hnenah, "Heng hi ka fapa, Pathianin heta mi pekate chu an ni," a ti a. Tin, ani chuan, "Khawngaih takin ka hnenah hian han hruai rawh, tichuan anmahni mal ka lo sawmsak ang e," a ti a.
48:10	Israela mit chu a upat avangin a fiah lo va, a hmu thei lo a ni. Tin, a han hruai hnai a, tin, ani chuan a lo fawp a, a lo pawm a.
48:11	Tin, Israelan Josefa hnenah, "I hmel hmuh hi ka beisei tawh lo va, nimahsela ngai teh, Pathianin i thlahte hmel lam pawh mi hmuhtir ta a nih hi," a ti a.
48:12	Tin, Josefa chuan anni chu a pa kapkar ata chu a kai chhuak a, a hmaia lei siin chibai a buk a.
48:13	Tin, Josefan an pahnih chuan a kai a, Epraima chu a kut ding lamin Israela kut vei lamin Israela kut ding lam pangah a kai a, a rawn hruai hnai a.
48:14	Tin, Israela chuan a ban kawkalh lui a, a kut ding lam chuan a ban a, Ephraima, a naupang zawk chungah a nghat a; Manasea chu fa tir a ni si a.
48:15	Tin, Josefa chu mal a sawmsak a, "Mi thlahtu Abrahama leh Isaaka, a hmaa an awm thinna Pathian, vawiin thlenga ka damchhung zawng zawnga mi chawmtu Pathian,
48:16	sual zawng zawng laka mi tlantu Vantirhkoh chuan naupangte hi malsawm rawh se, tin, ka hming leh mi thlahtu Abrahama leh Isaaka hming chu anmahni hmingah pu rawh se; tin, khawvel lailiah mipui tam tak ni turin lo pung rawh se," a ti a.
48:17	Tin, Josefan a pain a kut ding lam Ephraima chunga a nghat chu a hmuhin a lung a ni ta lo va; tichuan a pa kut Ephraima chung ata chu Manasea chunga sawn turin a chawi kang a.
48:18	Tin, Josefan a pa hnenah, "Ka pa, hetiang tur a ni lo: hei hi asin fa tir chu ni, i kut dinglam hi a chungah nghat zawk rawh," a ti a.
48:19	Nimahsela a pa chuan a duh lo va, "Ka hria e, ka fapa, ka hria e: ani pawh hnama sawi thamin a awm bawk ang a, ani pawh a ropui bawk ang: amaherawhchu a nau hi a aiin a ropui zawk ang a, a thlahte pawh chi hrang hrang tam tak mai an lo la ni ang," a ti a.
48:20	Tichuan Jakoban, "Israel-ho chuan Ephraima leh Manasea angin Pathianin awmtir che rawh se,' tiin nangmahni hming lamin mal an sawmsak thin ang," tiin chu mi ni chuan anni chu mal a sawmsak a: tichuan Ephraima chu Manasea hmaah a awmtir ta a.
48:21	Tin, Israela vek chuan Josefa hnenah, "Ngai teh, ka thi dawn ta e: nimahsela Pathian chu in hnenah a awm ang a, in thlahtute ramah chuan a hruai leh ang che u.
48:22	Chu mi lo pawh chu, i unaute chanvo aiin chan khatin ka pe chuang a che, ka khandaih leh ka thalngula Amor-ho kut ata ka laksaka kha," a ti a.

Genesis 47

THUTHLUNGHLUI   Genesis   Bung 47
47:1	Tichuan Josefan Pharaoa chu a han hrilh a, a hnenah, "Ka pa te, ka unau te, an Beram rual te, an Bawng rual te, an neih zawng zawngte nen Kanaan ram ata an lo thleng thla ta a: tin, ngai teh, Gosen ramah an awm," a ti a.
47:2	tin, a unaute zinga mi, mi panga a hruai a, Pharaoa chu a hriattir a.
47:3	Tin, Pharaoa chuan a unaute hnenah, "Eng hna nge in thawh thin?" a ti a. Tin, anni chuan Pharaoa hnenah, "I chhiahhlawhte hi kan thlahtute chenin Beram vengtute kan ni," an ti a.
47:4	Tin, anni vek chuan Pharaoa hnenah, "He rama awm rih tur hian kan lo kal a ni; kan ramah i chhiahhlawhteho Beram rualte tan ei tur a awm ta si lo; tam hi Kanaan ramah a tla nasa hle si a; chutichuan khawngaih takin i chhiahhlawhte hi Gosen ramah min awmtir ang che," an ti a.
47:5	Tin, Pharaoa chuan Josefa a bia a, "I pa leh i unaute hi i hnenah an lo kal ta a:
47:6	Aigupta ram chu a awm duai alawm: i pa leh o unaute chu ram tha lai apiangah hian awmhmun khuartir ta che; Gosen ramah awmhmun khuar rawh se: tin an zingah mi thil tithei tak hriat i neih phei chuan ka ran chunga hotuahte siam ang che," a ti a.
47:7	Tin, Josefan a pa Jakoba chu a hruai lut a, Pharaoa hmaah chuan a dintir a: tichuan Jakoba chuan Pharaoa chu mal a sawmsak ta a.
47:8	Tin, Pharaoa chuan Jakoba hnenah, "Kum engzat nge i nih tawh?" a ti a.
47:9	Tin, Jakoba chuan Pharaoa hnenah, "Ka khualzin kum chin chu kum 130 a ni a: ka dam chhung kumte hi a tlemin a hreawm a ni, mi thlahtute an khualzin laia an dam chhung kum pawh a zat ve hek lo," a ti a.
47:10	Tin, Jakoban Pharaoa chu mal a sawmsak leh a, Pharaoa hnen ata chu a chhuak ta a.
47:11	Tichuan Jasefan a pa leh a unaute chu awmhmun a khuartir a, Pharaoa thupek angin Aigupta rama ram tha ber laiah, Rameses ramah chuan ro atan ram a pe ta a.
47:12	Tin, Josefan a pa leh a unaute leh a pa chhungte zawng zawng chu an chhungkua ang zelin ei tur a pe a, a chawm ta a.
47:13	Tin, chu mi ram zawng zawngah chuan ei tur reng reng a awm ta lo va; tam a tla nasa em em si a, chutichuan tam avang chuan Aigupta ram leh Kanaan ram chu a chau ta a.
47:14	Tin, Josefa chuan an buh leina manah, Aigupta ram leh Kanaan rama tangka awm zawng zawng chu a khawmsak ta vek a; tin, Josefan chu tangka chu Pharaoa inah chuan a la ta a.
47:15	Tin, Aigupta mi zawng zawng leh Kanaan rama tangka zawng zawng an deh ram zawh chuan, Aigupta mi zawng zawng chu Josefa hnenah an lo kal a, "Ei tur min pe rawh khai; i hmaah hian kan thi mai dawn em ni ang le? Tangka lah a awm tawh si lo," an ti a.
47:16	Tin, Josefa chuan, "In rante rawn pe mai rawh u; tangka a awm tawh loh chuan in ran manah ei tur ka pe ang che u," a ti a.
47:17	Tichuan an rante chu Josefa hnenah an hruai a: tin, Josefan chung sakawr manah te, Beram rual manah te, Bawng rual manah te, sabengtung manah te chuan ei tur a pe zel a: chu mi kumah chuan an ran zawng zawng manah ei tur a pe a, a chawm ta hlawm a.
47:18	Tin, chu mi kum chu a vei a, kum lo thar lehah chuan a hnenah an lo kal leh a, a hnenah, "Kan tangka zawng zawng kan deh ral tawhzia leh, ka pu, kan ran rualte i ta a nih tawhziate hi, ka pu, i lakah hian kan zel lo vang; ka pu, i mithmuhah hian kan taksa leh kan ramte chauh lo chu engmah a awm tawh hauh lo mai:
47:19	i hmaah hian keini leh kan ram hi kan boral mai dawn em ni ang le? Keimahni hi kan ram chawpin ei turin min lei rawh, tichuan keini leh kan ram hi Pharaoa chhiahhlawhte kan ni mai ang e: tin, thi lova mi nungdama kan awm theihna tur leh ram hi a tiau lohna turin buh chi min pe ang che," an ti a.
47:20	Tichuan Josefa chuan Pharaoa tan Aigupta ram zawng zawng chu a leisak ta a; tam chu an chunga a thlen nasat em avangin Aigupta mite chuan an lo chu an hralh theuh si a: tichuan ram chu Pharaoa ta a ni ta vek a.
47:21	Mihringte chu Aigupta ramri lehlam tawp atanga a lehlam tawp thlengin, khuaahte chuan an insawntir ta hlawm a.
47:22	Puithiamho ram chauh a lei lo va: puithiamhote chuan Pharaoa lakah chanvo an nei a, Pharaoan an chanvo a pek chu an ei tham a ni; chuvangin an ram chu an hralh ve lo va.
47:23	Chu mi hnuah chuan, Josefan mite hnenah chuan, "Ngai teh u, vawiinah hian nangniho hi in ram chawpin Pharaoa tan ka lei ta che u : hei, heta hi in tan buh chi a awm hi, leiah ching ang che u.
47:24	Tin, buh lak hunah te chuan heti hi a ni ang a, Pharaoa tan hmun ngaa thena hmun khat zel in pe ang a, a hmun li chu nangmahni ta a ni ang, chu chu lova chin lehah te, in fanau te eiah te a ni ang," a ti a.
47:25	Tin, anni chuan, "Nangin kan nun hi i chhanhim tawh a: ka puin min khawngaih sela, Pharaoa chhiahhlawhte kan ni mai ang," an ti a.
47:26	Tichuan Josefan Pharaoa hmun ngaa hmun khat a hmuh zel tur thu hi Aigupta ram atan tun thlengin danah a siam ta: puithiamho ram chauh chu a ni, Pharaoa ta ni lo chu.
47:27	Tin, Israel-ho chuan Aigupta rama Gosen ramah chuan awm hmun an khuar ta a; chutah chuan an intimuk a, chi tam tak an thlah a, nasa takin an pung ta a.
47:28	Tin, Jakoba chu Aigupta ramah chuan kum sawm leh kum sarih a awm a: chutichuan Jakoba damchhung chu kum 147 a ni ta a.
47:29	Tin, Israela thih hun tur chu a lo hnai ta a: tichuan a fapa Josefa chu a ko va a hnenah, "I mit ka tlun chuan khawngaih takin i kut kha ka malpui hnuaiah rawlh la, mikhawngaihin ka chungah tih tak zetin ti ang che; khawngaih takin Aigupta ramah hian mi phum lul suh ang che:
47:30	mi thlahtute hnena ka muhilh hunah chuan nangin Aigupta ram ata hi mi zawn chhuakin, anmahni phumna hmunah chuan mi phum zawk tur a ni," a ti a. Tin, ani chuan, "I sawi ang hian ka rawn ti ang e," a ti a.
47:31	Tin, ani chuan, "Ka hnenah chhia chham rawh le," a ti a: tichuan a hnenah chhia a chham ta a. Tin, Israela chu khum lu siin a kin ta a.

Genesis 46

THUTHLUNGHLUI   Genesis   Bung 46
46:1	Tin, Israela chu a neih zawng zawng nen a chhuak a, Beerseba chu a thleng a, a pa Isaaka Pathian hnenah chuan inthawinate a hlan a.
46:2	Tin, Pathianin zana a mumangahte chuan Israela chu a bia a. "Jakob, Jakob," a ti a.Tin, ani chuan, "Heta hi ka awm," a ti a.
46:3	Tin, ani chuan, "Kei Pathian, i pa Pathian chu ka ni: Aigupta rama zuk kal chu hlau suh; chutah chuan chi ropui takah ka siam dawn che a ni:
46:4	Aigupta ramah chuan i hnenah ka zuk kal ve ang a; tin, ka hruai chho leh ngei ngei bawk ang che: tin, Josefa chuan i thih hunah i mit a siamsak dawn che nia," a ti a.
46:5	Tichuan Jakoba chu Beer-seba atang chuan a chhuak a: Israela fapate chuan an pa Jakoba leh an fanau tetete leh a nupuite chu a chuan nana Pharaoa tawlailir thawnahte khan an chuantir a.
46:6	Tichuan Jakoba leh a thlahte zawng zawng chuan Kanaan rama an dehchhuah an rante leh an bungruate chu an chhawm a, Aigupta ram chu an thleng ta a:
46:7	a fapate, a tupate, a fanute, a tunute, a thlahte zawng zaqwng chu Aigupta ramah chuan a luhpui ta hlawm a.
46:8	Tin, heng hi Israela thlah Aigupta rama lut Jakoba leh a fapate hming chu a ni: Reubena Jakoba fa tir chu.
46:9	Tin, Reubena fapate chu Hanoka te, Pallua te, Hezrona te, Karmia te an ni a.
46:10	Tin, Simeona fapate chu Jemuela te, Jamina te, Ohada te, Jakina te, Zohara te, Kanaan hmeichhe laka a fapa Saula te an ni a.
46:11	Tin, Levia fapate hu Gersona te, Kohatha te, Meraria te an ni a.
46:12	Tin, Juda fapate chu Era te, Onana te, Sela te, Pereza te, Zera te an ni a: Era leh Onana erawh chu Kanaan ramah chuan an thi ta a ni. Pereza fapate chu Hezrona leh Hamula an ni a.
46:13	Tin, Isakara fapate chu Tola te, Ouva te, Joba te, Simrona te an ni a.
46:14	Tin, Zebuluna fapate chu Sereda te, Elona te, Jahleela te an ni a.
46:15	Chungho zawng zawng chu Leaii fapa, a fanu Dinaii nen, Paddan-aram rama Jakoba a hrinsakate chu an ni a: a fapate leh a fanute zawng zawng chu sawmthum leh pathum an ni a.
46:16	Tin, Gada fapate chu Ziphiona te, Hagia te, Sunia te, Ezbona te, Eria te, Arodia te, Arelia te an ni a.
46:17	Tin, Asera fapate chu Imna te, Isvaa te, Isvia te, Beria te an ni, an farnu Seri nen: tin, Beria fapate chu Hebera leh Malkiela hi an ni a.
46:18	Chungho chu Zilpaii Labanan a fanu Leaii hnena a peka fapate chu an ni, chungho chu Jakoba a hrinsak a, mi sawm leh parukte chu.
46:19	Tin, Jakoba nupui Rakili fapate chu Josefa leh Benjamina an ni a.
46:20	Tin, Josefan Aigupta ramah fapa Manasea leh Ephriama chu a nei a, chu mite chu On khaw puithiam Potiphera fanu Asenathi chuan amah a hrinsak a ni.
46:21	Tin, Benjamina fapate chu Bela te, Bekera te, Asbela te, Gera te, Naamana te, Ehia te, Rosa te, Mupima te, Hupima te, Arda te an ni a.
46:22	Chungho chu Rakili fapa Jakoba a hrinsakte chu an ni: an za chuan sawm leh pali an ni.
46:23	Tin, Dana fapa chu Husima a ni a.
46:24	Tin, Naphtalia fapate hu Jazeela te, Gunia te, Jezera te, Sillema te an ni a.
46:25	Chungho chu Bilhaii Labanan a fanu Rakiliu hnena a peka fapate chu an ni, chungho chu Jakoba a hrinsak a: an za chuan pasarih an ni.
46:26	Jakoba fapate nupuiho chhiar lovin Jakoba hnena Aigupta rama lut ve, a thalbea chhuak zawng zawngte chu an za chuan sawmruk leh paruk an ni a;
46:27	tin, Josefan Aigupta rama fapa a neihte chu pahnih an ni. Jakoba chhungte zawng zawng Aigupta rama lutte chu sawmsarih an ni.
46:28	Tin, Jakoban Gosen ram lam kawng lo kawhhmuh turin Juda chu Josefa hnenah a kal hmasaktir a: tichuan Gosen ramah chuan an lut ta a.
46:29	Tin, Josefa chuan a tawlailir chu a buatsaih a, Gosen ramah chuan a pa hmuak turin a han kal ta a; tin, a hnenah a inhriattir a, a ir a chuktuah a, rei fe a ir chuktuahin a tap a.
46:30	Tin, Israela chuan Josefa hnenah, "Mi nungdama i lo la awm a, i hmel ka hmuh leh tak avang hian tunah chuan duh leh thi tawh rawh i," a ti a.
46:31	Tin, Josefa chuan a unaute leh a pa chhungte hnenah, "Ka han kal ang a, Pharaoa ka hrilh ang a, a hnenah, 'Ka unaute leh ka pa chhungte, Kanaan rama awmte kha, ka hnenah an lo thleng ta;
46:32	anni chu ran vulhtute an nih avangin Beram vengtute an ni a; an Beram rualte leh an Bawng rualte leh an neih zawng zawng an rawn chhawm vek a ni,' tiin ka han sawi ang.
46:33	Tin, heti hi a ni ang a, Pharaoan a koh che u a, 'Eng hna nge in thawh thin?' a tih hunah chuan,
46:34	nangnin 'I chhiahhlawhte hi kan thlahtute chenin, kan nuapan tet ata tun thlengin ran vulhtute kan ni,' ti ang che u: chutichuan Gosen ramah in awm thei dawn nia," a ti a. Beram vengtute reng reng chu Aigupta mite tenzawng tak an ni si a.

Genesis 45

THUTHLUNGHLUI   Genesis   Bung 45
45:1	Tin, Josefa chu a kianga ding zawng zawngte hmaah chuan a insum zo ta lo va, "Mi zawng zawng ka hnen ata hi kal chhuahtir vek rawh," tiin a au va. Tichuan Josefa a unaute hnenah a inhriattir chhung zawng a kiangah tumah an ding lo va.
45:2	Tin, a tap ta rawih a, tichuan Aigupta-hovin an hria a, Pharaoa chhungte pawhin an hre bawk a.
45:3	Tin, Josefa chuan a unaute hnenah, "Josefa kha ka ni; ka pa chu a la dam maw?' a ti a. Nimahsela a unaute chuan an chhang thei lo va, a hmaah chuan mangang takin an awm ta a ni.
45:4	Tin, Josefa vekin a unaute hnenah, "Khawngaih takin mi rawn hnaih teh u," a ti a. tichuan an va hnaih a. Tin, ani chuan, "In unaupa Josefa, Aigupta rama luhpui tura in hralha kha ka ni.
45:5	Nimahsela heta kal tura mi hralh avang hian lungngai suh ula, mahni inhaw duh hek suh u: mite nunna chhandam turin Pathianin in hmaah mi lo tir hmasa a nih hi.
45:6	He kum hnih chhung hian he ramah hian tam a lo tla ta a: kum nga a la bak a, chu mi chhung zawng leileh hi a awm lo vang a, buh lak pawh a awm hek lo vang.
45:7	Tichuan leiah hian chithlahte zuahsak tur che u leh chhandamna ropui takin nungdama ka awmtirna tur che uin Pathianin in hmaah hian mi lo tir hmasa a ni.
45:8	Chutichuan heta mi kaltirtu hi nangni in ni lo va, Pathian a ni zawk e: ani chuan Pharaoa paah leh a chhungte zawng zawng hotuah leh Aigupta ram zawng zawng roreltuah mi siam ta a.
45:9	Rang takin ka pa hnenah han kal ula, a hnenah, 'I fapa Josefa chuan heti hian a ti a, Pathianin Aigupta ram zawng zawng roreltuah mi siam ta: ka hnenah lo chhuk rawh, rei rawn rial suh:
45:10	tichuan Gosen ramah i awm ang a, ka kiang ngeiah hian i awm dawn nia, nang leh i fate leh i tute leh i beram rualte leh i bawng rualte leh i neih zawng zawng nen:
45:11	chutah chuan keiman ka chawm ang che; tam tur kum nga a la awm si a; chutilochuan i lo rethei dah ang e, nang leh i chhungte leh i neih zawng zawngte nen khan,' han ti ang che u.
45:12	Tin, ngai teh u, nangmahni mit ngei leh ka nau Benjamina mit ngeiin keima ka ngeiin a sawi lai in hmu reng a ni.
45:13	Tin, Aigupta rama ka ropuina zawng zawng thu leh in thil hmuh zawng zawng thu hi ka pa in hrilh ang a; ka pa chu rang takin hetah in rawn hruai thla tur a ni," a ti a.
45:14	Tin, a ir leh a nau Benjamina ir chuktuahin a tap ta a; Berjamina pawh a ir chuktuahin a tap ta bawk a.
45:15	Tin, a unaute zawng zawng chu a fawp a, a tah khum ta theuh va: chu mi hnu-ah chuan a unaute chuan thukhawchang an sawipui ta a.
45:16	Tin, "Josefa unaute an lo kal," tih thu thang chu Pharaoa inah chuan an lo hre ta a: chu chuan Pharaoa leh a chhiahhlawhte chu a tilawm hle a.
45:17	Tin, Pharaoa chuan Josefa hnenah, "I unaute hnenah, 'Heti hian ti rawh u; in sate chu buh phurhtir ula, chhuak ula, Kanaan ramah kal rawh u;
45:18	tin, in pa leh in chhungte chu hruai ula, ka hnenah hian lo kal rawh u; tichuan Aigupta rama thil thate hi ka pe ang che u a, he rama thil awm tha berte hi in ei dawn nia, ti rawh.
45:19	Thu ka pe a che, heti hian ti rawh u; in fanau tetete tan leh in nupuite tan Aigupta ram atang hian tawlailirte la ula, in pa hruaiin lo kal rawh u.
45:20	In bungrua pawh ngaihtuah duh suh u, Aigupta ram zawng zawnga thil tha apiang hi in ta a ni si a," a ti a.
45:21	Tichuan Israela fate chuan chutiang chuan an ti a: tin, Josefan Pharaoa thupek ang chuan tawlailirte an hnenah a pe a, kalkawng atan ei tur a pe bawk a.
45:22	An zaa hnenah silhfen inthlakna te a pe theuh va; Benjamina hnenah phei chuan tangka zathum leh silhfen inthlakna panga a pe a.
45:23	Tin, a pa hnenah chuan hetiang hi a thawn a; sabengtung sawm Aigupta rama thil tha phur leh sabengtungnu sawm kalkawnga a pa tan buh leh chhang leh ei tur phur a thawn a.
45:24	Chutichuan a unaute chu a tir chhuak a, an kal ta a; tin, ani chuan an hnenah, "Kalkawngah inhau lo turin fimkhur rawh u," a ti a.
45:25	Tin, Aigupta ram ata chu an han chho va, Kanaan rama an pa Jakoba hnen chu an han thleng a.
45:26	Tin, a hnenah, "Josefa kha alo la dam a, Aigupta ram zawng zawng roreltu a ni," tiin an hrilh a. tin, a thin a mit sulh a, an thu chu a awih si lo.
45:27	Tin, an hnena Josefa thu sawi zawng zawng chu an hrilh a: tin, a chuanna tur tawlailir Josefan a thawnte chu a han hmuh chuan an pa Jakoba thinlung chu a harh ta huai a:
45:28	tin, Israela chuan, "A tawk ta e; ka fapa Josefa chu mi nungdamin a lo la awm a nih tak hi: ka thih hmain amah ka zuk hmu ang," a ti ta a.

Genesis 44

THUTHLUNGHLUI   Genesis   Bung 44
44:1	Tin, ani chuan a in enkawltu hnenah chuan , "Kha mite ip kha anphurh theih tawkin buhin tikhat la, an tangka theuh chu an ip rawng bulah dah theuh rawh.
44:2	Tin, ka no, tangka no kha, an naupang ber ip rawng bulah dah rawh, a buh man tangka nen khan," tiin thu a pe a. Tichuan ani chuan Josefa thusawi ang chuan a ti ta a.
44:3	Tin, khua a var veleh anni chu an sabengtungte nen chuan an kaltir ta a.
44:4	Tin, khua ata an kal chhuak chu an la thlen hlat hma chuan Josefan a in enkawltu hnenah, "Tho la, mite kha va um rawh, 'Engtizia nge thil tha thil tha lova in rulh ni?
44:5	Kha kha ka pu uain inna leh aienna ngei a ni lo vem ni? Hetiang in tih hi in tisual a ni,' ti rawh," a ti a.
44:6	Tin, a um phak a, chung thu chu an hnenah a sawi a.
44:7	Tin, anni chuan a hnenah, "Ka pu, engtizia nge ni hetiang thu i sawi? i chhiahhlawhte hian chutiang thil kan tih loh turzia mai chu.
44:8	Ngai teh, kan ip rawng bula tangka kan hmuhte pawh kha Kanaan ram atangin i hnenah kan rawn ken leh kha: engtin nge i pu ina mi tangka emaw rangkachak emaw kan ruk theih ang le?
44:9	I chhiahhlawhte zingah hian tupawh i hmuhna apiang chu thi rawh se, keini pawh kan pu bawihah kan awm mai ang e," an ti a.
44:10	Tin, ani chuan, "Aw le, in thu ang zel chuan ni ang hmiang; amaherawhchu tupawh ka hmuhna apiang chu ka bawihah awm rawh se; nangni erawh chu sawiselbovin in awm ang," a ti a.
44:11	Chu veleh chuan hmanhmawh takin mahni ip chu leiah an la thla theuh va, mahni ip chu an hawng theuh bawk a.
44:12	Tin, ani chuan an upa berah a tan a, an naupang ber thlengin a zawng a: tichuan no chu Benjamina ipah chuan a hmu ta a.
44:13	Chu veleh chuan an silhfente chu an pawt thler a, mahni sabengtung chu an phurhtir leh theuh va, khuaah chuan an kir leh ta a.
44:14	Tin, Juda leh a unaute chuan Josefa in chu an va thleng a; ani chu chutah chuan a lo la awm cheu va: tin, a hmaah chuan an bawkkhup ta hlawm a.
44:15	Tin, Josefa chuan an hnenah, "Eng thil nge ni in tih tak ni? Keimah ang mi hian ai an en thiam ngei ang tih in hre lo vem ni?" a ti a.
44:16	Tin, Juda chuan, "Ka pu, i hnenah engnge kan sawi tak ang? Engnge kan hrilh ang? Engtin nge kan insawiven tak ang le? Pathianin i chhiahhlawhte sualna chu a hmu chhuak ta a nih hi: ngai teh, ka pu, i bawihte kan nih tak hi, keimahni leh a kuta no an hmuhna pawh hi," a ti a.
44:17	Tin, ani chuan, "Chutiang chuan ka tih loh turzia mai chu: a kuta no an hmuhna chauh hi ka bawihah a awm ang: nangni erawh zawng thlamuang takin in pa hnenah han kal rawh u," a ti a.
44:18	Chu veleh Juda chuan Josefa chu a va hnaih a, "Aw ka pu, khawngaih takin, ka pu, i chhiahhlawh hi i beng hriatah thu kam khat mi sawitir la, i thinur chu i chhiahhlawh chungah hian alhtir suh ang che: nang zawng Pharaoa ang mai i ni si a.
44:19	Ka pu, nangin, 'Pa emaw unau emaw in nei em?' tiin i chhiahhlawhte hi min zawt a.
44:20	Tin, ka pu, keinin i hnenah hian, 'Pa putar tak leh, a tar lam fa, naupang te ka nei a; chu mi u chu a thi a, a nu hrinah chuan amah chauh chu a la awm a, a pa chuan amah chu a hmangaih hle mai,' kan ti a.
44:21	Tin, nangin i chhiahhlawhte hnenah hian, 'Amah chu ka mita ka hmuh theih nan ka hnenah rawn hruai thla rawh u,' i ti a.
44:22	Tin, ka pu, keinin i hnenah, 'Taitea chuan a pa a kalsan thei lo vang: a pa a kalsan zawngin a pa chu a thi mai dawn si a,' kan ti a.
44:23	Tin, nangin i chhiahhlawhte hnenah hian, 'In tlum ber chu in hnena a lo chhuk ve loh chuan ka hmel in hmu leh tawh lo vang,' i ti a.
44:24	Tin, heti hi a ni a, i chhiahhlawh ka pa hnen kan han thlen chuan, ka pu, i thu chu kan hrilh a.
44:25	Tin, kan pa chuan, 'Kal leh tawh ula, buh tlem tal kan tan zuk lei leh rawh u,' a ti a.
44:26	Tin, keinin, 'Kan zuk kal thei tawh lovang: kan tlum ber hi kan hnena a tel ve erawh chuan kan zuk kal mai ang: kan tlum ber hi kan hnena a tel loh chuan chu mi hmel chu kan hmu thei dawn lo a ni,' kan ti a.
44:27	Tin, i chhiahhlawh ka pa chuan kan hnenah, 'Ka nupui chuan fapa pahnih mi hrinsak tih in hria e:
44:28	tin, a pakhat chu ka hnen ata a kal chhuak a, pawh sawm vekin a awm a ni ngei ang, ka ti a; chu mi achinah chuan amah chu ka hmu ta lo vang vang a:
44:29	tichuan he mi pawh hi ka hnen ata in hruai bo va, tawh sual a zuk tawh chuan ka lu tuak hi lungngaihnain thlanah in liamtir dawn a ni,' a ti a.
44:30	Chutichuan Taitea hi kan hnena tel lova, i chhiahhlawh ka pa hnen ka han thlen chuan a nunna chu Taitea nunna nen a inzawm tlat avangin,
44:31	heti hi a ni ang a, Taitea hi a tel ve lo tih a hriat veleh a thi mai ang: tichuan i chhiahhlawhte hian i chhiahhlawh kan pa lu tuak chu lungngaihnain thlanah kan liamtir dawn a nih hi.
44:32	I chhiahhlawh hian, 'I hnena ka rawn hruai leh loh chuan a mawh chu kumkhuain ka pa lakah ka phur ang,' tiin ka pa lakah chuan Taitea chungchang thuah hian a bul tumtuah ka insiam tawh si a.
44:33	Chutichuan khawngaih takin i chhiahhlawh hi Taitea aiah, ka pu, i bawihah mi awmtir la, Taitea hi a ute hnenah chhohtir ang che.
44:34	Taitea ka hnena tel lovin ka pa hnenah engtin nge ka chhoh theih ang? Ka pa chunga chhiatna thleng tur chu ka hmu ang asin," a ti a.

Genesis 43

THUTHLUNGHLUI   Genesis   Bung 43
43:1	Tin, chu mi ramah chuan tam a tla nasa hle a.
43:2	Tin, heti hi a ni a, Aigupta ram ata buh an phurh chhoh kha an ei zawh chuan an pa chuan an hnenah, "Kal leh tawh ula," buh tlem tal kan tan zuk lei leh rawh u," a ti a.
43:3	Tichuan Juda chuan a hnenah, "Chu mi chuan, 'In nau in hnena a tel loh chuan ka hmel in hmu lo vang,' tiin min tiam tlat a ni.
43:4	Kan nau hi kan hnenah i tirh chuan buh kan zuk leisak ang che;
43:5	i tirh loh erawh chuan kan zuk kal lo vang: chu mi chuan kan hnenah, 'In nau in hnena a tel loh chuan ka hmel in hmu lo vang,' a ti miau si a," tiin a sawi a.
43:6	Tin, Israela chuan, "Eng vangin nge nau dang in la neih thute lam in hrilh kher a, ka tana tha lo tak in tih ni?" a ti a .
43:7	Tin, anni chuan, "Chu mi chuan, 'In pa chu a la dam em? Unau in la nei em?" tiin kan chanchin leh kan laichinte chanchin min zawt tlat si a; tichuan chung a thu min zawh ang zel chu kan hrilh a ni: 'In nau rawn hruai chhuk rawh u,' a ti ang tih tunge hre kher ang i?" an ti a.
43:8	Tin, Juda chuan a pa Israela hnenah, "Taitea chu ka hnenah kaltir rawh, tichuan kan tho vang a, kan kal mai ang e; keini leh nang leh kan fanau tetete pawh hi thi lova kan nun theihna turin.
43:9	A chungchang thuah hian keiman a bul ka tum zel ang; keima lakah ngei amah ph鹴 ang che: ani chu i hnenah ka rawn hruai leh lohva, i hmaah hian ka dintir leh loh chuan a mawh chu kumkhuain ka phur nang e:
43:10	awm rei suh ila chuan tunah pawh kan lo thleng leh tawh ngei tur a ni," a ti a.
43:11	Tin, an pa Israela chuan an hnenah, "Chutiang a nih si chuan heti hian ti rawh u; in bawmahte khan he rama thil tha tha thenkhat-thinghnai damdawi te, khawizu te, englo rimtui te, murra te, theipil sak te, vai umkhal te tlem theuhvin chu mi tan chuan lawmmanah sin thl鈑 rawh u:
43:12	tin, tangka a leh hnihin keng ula, in ip rawng bula tangka a pek kir che u pawh khan keng leh rawh u; a tihpalh a ni mahna:
43:13	in nau pawh chu hruai ula, tho ula, chu mi hnenah chuan kal leh rawh u:
43:14	tichuan in nau pakhat leh Benjamina hi a chhuahsakna tur che uin, Pathian Engkimtitheia chuan chu mi chu khawngaihtir che u rawh se. Tin, ka fate chu chan a nih leh ka chan mai a ni ang chu," a ti a.
43:15	Tichuan anni chuan lawmman chu an keng a, tangka chu as leh hnih an keng bak a, Benjamina pawh an hruai a; tin, an tho va, Aigupta ramah an zuk kal a, Josefa hmaah chuan an ding leh ta a.
43:16	Tin, Josefan Benjamina an hnena awm chu a hmuh veleh, a in enkawltu hnenah chuan, "Saw mite saw in chhungah hruai lut la, sa talh la, buatsaih rawh; saw mite sawn chhunah ka hnenah chaw an ei dawn a ni," a ti a.
43:17	Tichuan ani chuan Josefa thupek angin a ti ta a; Josefa inah chuan a hruai lut a.
43:18	Tin, Josefa inah hruai luha an awm avangin an hlau va, "Kal hmasak tuma kan ipa tangka min pek kirte avang khan a nih hi min hruai luh ni; kan chungah remchang zawnga min beiin, keimahni leh kan sabengtungte nen hian bawih atan min man a tum a nih hi," an ti a.
43:19	Tin, Josefa in enkawltu kiangah chuan an va kal a, kawngka bulah chuan an bia a,
43:20	"Aw ka pu, kan lo kal hmasak tum khan buh lei tur ngawta lo chhuk kan ni a:
43:21	tin, heti hi a ni a, riahbuk kan thlen chuan kan ipte chu kan han hawng a, tin, ngai teh, kan tangka theuh chu kan ip rawng bulah a lo awm ta theuh va, kan tangka chu a bur ngai thenin a lo awm a: tichuan kan rawn keng leh a ni.
43:22	Tin, buh leina turin tangka dang pawh kan rawn keng a: kan tangka chu tuin nge kan ipah dah kan hre si lo," an ti a.
43:23	Tin, ani chuan, "Thlamuang takin awm ula, hlau suh u: in Pathian, in pa Pathian chuan in ipahte chuan ro a pe che u a nih chu: in tangka kha ka hmu si a," a ti a. Tin, Simeona chu an hnenah a rawn hruai chhuahsak ta a.
43:24	Tin, anni chu Josefa in chhungah a hruai lut a, tui a pe a, an ke an sil ta a; an sabengtungte pawh chu chaw a pe bawk a.
43:25	Tin, an lawmman ken chu Josefa, chawfaka a lo kal hmain an lo buatsaih lawk a: chutah chuan chaw an ei dawn tih an hre si a.
43:26	Tin, Josefa chu ina a lo hawn veleh, an kuta lawmman awm chu in chhungah a hnenah an keng lut a, lei siin chibai an buk hlawm a.
43:27	Tin, ani chuan an chanchin a zawt a, "In pa, a chanchin in sawi putar kha, a dam lai em ni? Mi nungdamin a la awm em? a ti a.
43:28	Tin, anni chuan, "Kan pa i chhiahhlawh chu a dam lai a ni a, nungdamin a la awm e," an ti a. Tin, an lu an kun a, chibai an buk leh a.
43:29	Tin, ani chu a dak a, a nau Benjamina, a nu fapa chu a hmu a, "Kha kha in tlum ber, a chanchin mi hrilha kha em ni?" a ti a. Tin, amah vekin, "Ka fapa, Pathianin khawngaih che rawh se," a ti a.
43:30	Tin, Josefa chuan a nau a hmuh chuan a lung a chhiat tak em em avangin hmanhmawh takin tahna hmun a zawng ta thuai a, a pindan chhungah a lut a, chutah chuan a tap chhuak ta a.
43:31	Tin, a hmai a phih a, a va chhuak leh a, a insut hram hram a, "Chaw ei siam rawh u," a ti a.
43:32	Tichuan ama tan ahrangin, anniho tan ahrangin, Aigupta mi a eipuiteho tan ahrangin an siam ta a: (Aigupta-hovin Hebraiho chu an eipui thei si lo; chutiang tih chu Aigupta-ho tan chuan a thiang lo a ni.)
43:33	Tichuan upa ber chu fa tir nihna angin, naupang ber chu a tlum ber nihna angin Josefa hmaah chuan an thu zel a: chutichuan mak an ti hlawm theuh va.
43:34	Tin, Josefa chuan a hnenah a mi chanvote chu an hnenah a hlan chhawntir a, Benjamina chanvo phei chu an chanvo zawng zawng ai chuan aleh ngain a tam bik a ni. Tin, uainte an in a, a hovin an hlim ta hle a.

Genesis 42

THUTHLUNGHLUI   Genesis   Bung 42
42:1	Tin, Jakoban Aigupta ramah buh a awm tih a lo hre ta a, tichuan Jakoba chuan a fapate hnenah, "Engati nge in in阯 mai mai ni?" a ti a.
42:2	Tin, amah vek chuanin, "Ngai teh u, Aigupta ramah buh a awm tih ka lo hre ta: thi lova kan nun chhuah theihna turin chutah chuan zuk kal ula, chuta ta chu kan tan zuk lei rawh u khai," a ti a.
42:3	Tichuan Josefa uteho sawm chu Aigupta ram ata buh lei turin an zuk kal ta a.
42:4	Josefa nau Benjamina erawh chua ute hnenah chuan Jakoban a kaltir ve lo va; "Tawhsual a zuk tawk hlauh dah ang e," a ti a ni.
42:5	Tichuan Israela fapate chu mi kalho zingah chuan buh lei turin an kal ve a: Kanaan ramah pawh tam a tla ve si a.
42:6	Tin, Josefa chu Aigupta ram chungah chuan hotu a ni a; amah chu mi rama mi zawng zawng hnenah a hralhtu a ni: tichuan Josefa uteho chu an lo kal a, lei siin amah chibai an buk hlawm a.
42:7	Tin, Josefa chuan a uteho chu a lo hmu a, anni chu a lo la hre hlawm a, nimahsela an lakah chuan chi dang angin a insiam a, ram takin a bia a; tin, an hnenah, "Khawia lo kal nge in nih?" a ti a. Tin, anni chuan, "Buh lei turin Kanaan ram atanga lo kal kan ni," an ti a.
42:8	Tin, Josefa chuan a uteho chu a lo la hria a, anni erawh chuan ani chu an hre si lo.
42:9	Tin, Josefa chuan anmahni chungchang thu mumanga a hmuhte kha a lo hre chhuak ta a, an hnenah, "Enthlatute in nih hi; ram ruahzia en turin in lo kal a nih hi le," a ti a.
42:10	Tin, anni chuan a hnenah, "Ka pu, ni suh e, i chhiahhlawhte hi buh lei tura lo kal kan ni asin.
42:11	Mi pakhat fa vek kan ni; mi dik tak kan ni a, i chhiahhlawhte hi enthlatute kan ni awzawng lo ve," an ti a.
42:12	Tin, ani chuan an hnenah, "Ka awih lo, ram zuahzia en tura lo kal in nih hi maw," a ti a.
42:13	Tin, anni chuan, "Keini i chhiahhlawhte hi unau sawm leh pahnih, Kanaan rama awm mi pakhat fa kan ni' tin, ngai teh, kan tlum ber chu tunah chuan kan pa hnenah a awm a, pakhat chu a awm ta lo a ni," an ti a.
42:14	Tin, Josefa chuan an hnenah, "Enthlatute in ni,' ka tih che u kha, in nih ngei hi:
42:15	heti hian fiahin in awm ang: in tlum ber chu heta a lo kal loh chuan Pharaoa nunna chhalin heta ta hi in chhuak lo vang ka ti che u a ni.
42:16	Nangmahniah thutak a awm nge awm lo in thu fiah nan in zinga pakhat tir ula, in nau chu rawn hruai rawh se, nangni erawh chu phuarin in lo awm rih ang: chutilochuan Pharaoa nunna chhalin, 'enthlatute in ni ngei mai,' ka ti dawn che u a ni," a ti a.
42:17	Tin, an za chuan ni thum a tanhotir hlawm a.
42:18	Tin, a ni thum ni-ah chuan Josefan an hnenah, "Hei hian ti ula in nung ang, Pathian ka tih si a;
42:19	mi dik tak in nih chuan in unau zingah hian pakhat phuarin awm rawh se; nangni erawh chu kal ta ula, in chhungteho tam tan chuan buh phur rawh u:
42:20	tin, in tlum ber chu ka ka hnenah rawn hruai ang che u; chutichuan in thu chu a fiah ang a, in thi dawn lo nia," a ti a. Tichuan chutiang chuan an ti ta a.
42:21	Tin, anni chuan, "Kan nau chunga kan thiltih kha kan thiam lo tak tak a nih hi, khawngaih tura min ngen tawk tawk laia a thinlung manganzia hmu reng chunga kan ngaihthlaksak duh loh kha; chuvangin he manganna hian min tlakbuak a nih hi," an inti a.
42:22	Tin, Reubena chuan, "'Naupang chungah thil tisual suh u,' tiin in hnenah ka sawi lo vem ni? In ngaithla duh lo a nih kha: chuvangin ngai teh u, a thisen phuba chu an la a nih hi," tiin anni chu a chhang a.
42:23	An karah tawng letlingtu a awm avangin Josefan an thusawi chu a hria tih an hre lo.
42:24	Tin, ani chuan a leh hawisan a, a va tap ta a; tin, an hnenah a kir leh a, anni chu a bia a, an zing ata Simeona chu a hruai hrang a, an mithmuhah chuan a phuar ta a.
42:25	Tin, Josefa chuan an bawmte chu buha tikhat tur leh an tangkate chu an ipa dah leh theuh tur leh kalkawng atan ei tur pe turin thu a pe a: tichuan chutiang chuan an tihsak ta a.
42:26	Tin, an buh chu an sabengtungte chu an phurhtir a, chuta ta chu an chhuak ta a.
42:27	Tin, an zinga mi pakhatin riahbukah a sabengtung chaw pe tura a ip a han hawn chuan a tangka chu a hmu ta mai a; ngai teh, a ip rawng bulah chuan a lo awm ta a.
42:28	Tichuan a unaute hnenah chuan, "Ka tangka kha an lo dah leh a nih hi maw le; ngai teh u, ka ipa hi a lo awm reng mai," a ti a: tin, an thin a thawng zawk a, "Pathianin hetia min tih hi engtizia nge ni aw?" tiin khur chungin an inen ta hlawm a.
42:29	Tin, Kanaan rama an pa Jakoba hnen chu an lo thleng a, an chunga thil thleng zawng zawng chu an hrilh a;
42:30	"Chu mi ram hotu chuan ram takin min bia a, ram enthlatuah min ruat a.
42:31	Tin, keini chuan a hnenah, 'Mi dik tak kan ni; enthlatu kan ni awzawng lo ve:
42:32	unau sawm leh pahnih kan ni, kan pa fapate kan ni vek a; pakhat chu a awm ta lo va, kan tlum ber chu tunah hian Kanaan ramah kan pa hnenah a awm a ni,' kan ti a.
42:33	Tin, chu mi, an ram hotu chuan kan hnenah, 'Heti hian mi dik tak in ni tih ka la hria ang; in unau pakhat ka hnenah hnutchhiah ula, in chhungteho tam tan chuan buh phur ula, kal tawh rawh u:
42:34	tin, in tlum ber chu ka hnenah rawn hruai ang che u: tichuan enthlatu in ni lo va, mi dik tak in ni zawk tih ka hria ang: chutichuan in unaupa hi ka pe leh ang che u a, he ramah hian in sumdawng dawn nia,' min ti a," an ti a.
42:35	Tin, heti hi a ni a, an ipte chu an bun ruah laiin, ngai teh, an tangka fun theuh chu an ipah chuan a lo awm ta theuh va: tin, anniho leh an pa chuan an tangka funte chu an hmuh chuan an hlau hle a.
42:36	Tin, an pa Jakoba chuan an hnenah, "Nangni hian ka fate i chantur a nih hi: Josefa a awm tawh lo va, Simeona pawh a awm tawh hek lo, Benjamina lam pawh hruai bo in tum leh zel a: chung thil zawng zawng chuan mi tlakbuak a nih hi," a ti a.
42:37	Tin, Reubena chuan a pa hnenah, "I hnena ka rawn hruai leh loh chuan ka fapate pahnih hi that mai ang che: ani chu ka kutah mi kawltir la i hnenah ka rawn hruai leh mai ang," tiin a sawi a.
42:38	Tin, ani chuan, "Ka fapa hi in hnenah a chhuk ve lo vang; a u a thi tawh a, amah chauh hi a ni tawh si a: in kalna kawng lakahte tawhsual a zuk tawh chuan ka lu tuak hi lungngaihnain thlanah in liamtir dawn a ni," a ti a.

Genesis 41

THUTHLUNGHLUI   Genesis   Bung 41
41:1	Tin, kum hnih zet hnu-ah chuan heti hi a ni a, Pharaoa chuan mumang a nei a: tin, ngai teh , lui kamah hian a lo ding a.
41:2	Tin, ngai teh, bawngpui pasarih nalh tak tak, thau tak tak hi tui atang chuan an lo chhuak chho va, phairuang zingah hian an lo tl?a.
41:3	Tin, ngai teh, bawngpui dang pasarih pawr tak tak, cher tak tak hi tui atang vek chuan an hnuah an lo chhuak chho leh a, bawngpui dangte kianga lui kamah chuan an lo ding hlawm a.
41:4	Tin, bawngpui pawr tak tak, cher tak tak chuan bawngpui nalh tak tak, thau tak tak chu an ei zo ta mai a. Chutichuan Pharaoa chu a thangharh ta a.
41:5	Tin, a han muhil leh a, mumang a nei leh a: tin, ngai teh, buh kung khatah hian vui sarih lian tak tak, tha tak tak hi an lo chhuak a.
41:6	Tin, ngai teh, chu mi hnuah chuan vui sarih sin tete khawchhak thli chhem ro rim remte hi an lo chhuak leh a.
41:7	Tin, vui sin tetete chuan vui sarih lian tak tak, tha tak takte chu an lem zo ta mai a. Tin, Pharaoa chu a han thangharh a; tin, ngai teh, mumang a lo ni a.
41:8	Tin, atuk zingah heti hi a ni a, a rilru chu a lo mangang ta hle a; tichuan mi a tir a, Aigupta rama mitl鈑 dawithiam zawng zawng leh mi fing zawng zawng chu a ko va: tin, Pharaoa chuan a mumang chu a lo hrilh hlawm a; nimahsela Pharaoa hrilhfiah thei tumah an awm si lo va.
41:9	Chu mi lai chuan uain pe hotu ber chuan Pharaoa hnenah, "Vawiinah hian ka sualziate ka lo hre chhuak ta.
41:10	Pharaoa a chhiahhlawhte chungah a thinur a, tichuan vengtu pawl hotu inah chuan kei leh chhang siam hotu ber chu min tantir a:
41:11	tin, kei leh ani chuan zan khatah mumang kan nei a, mumang awmze hrang ve ve a ni kan neih ni.
41:12	Tin, chutah chuan kan hnenah vengtu pawl hotu chhiahhlawh, Hebrai mi, tlangval pakhat a awm a; tin, ani chu kan hrilh a, ani chuan kan mumangte chu min hrilhfiah ta a; kan mumang angzia zelin a ni min hrilhfiah ve ve ni.
41:13	Tin, heti hi a ni a, min hrilhfiah ang takin a lo awm ta ngei a ni; kei chu ka hnathawh hi mi thawhtir leh a, chhang siamtu chu khaihlum a ni ta a," a ti a.
41:14	Chutichuan Pharaoa chuan Josefa chu a kohtir ta nghal a, tichuan hmanhmawh takin rip ata chu an hruai chhuak ta a: tin, ani chu a inmet fai a, a silhfen chu a thlak a, Pharaoa hnenah a lo lut a.
41:15	Tin, Pharaoa chuan Josefa hnenah, "Mumang ka nei a, a hrilhfiah thei tumah an awm lo va: nangin mumang hi a thu i hriat chuan i hrilhfiah thei tih i chanchin hi mi sawi ka lo hria a," a ti a.
41:16	Tin, Josefa chuan Pharaoa chu a chhang a, "Chu chu keimaha awm a ni lo ve, Pathianin Pharaoa chu thlamuangthl鈑 takin a chhang zawk ang," a ti a.
41:17	Tin, Pharaoa chuan Josefa hnenah, "Ka mumangah chuan, ngai teh, lui kamah hian ka lo ding a:
41:18	tin, ngai teh, bawngpui pasarih thau tak tak, nalh tak tak hi tui atang chuan an lo chhuak chho va, phairuang zingah hian an lo tla a:
41:19	tin, bawngpui dang pasarih berh tak tak, pawr em em, cher tak tak, chutiang reng renga chhia Aigupta ram zawng zawnga ka la hmuh ngai loh hi an hnu-ah an lo chhuak chho leh a:
41:20	tin, bawngpui cher tak tak, pawr tak takte chuan bawngpui pasarih thau tak tak lo chhuak hmasate chu an ei zo ta mai a:
41:21	tin, an ei zawh hnu pawh chuan an ei tih an hriat chuang loh: atir ang bawk khan an la pawr ta reng a. Chutichuan ka han thangharh ta a.
41:22	Tin, ka mumangah chuan, ngei teh, buh kung khatah hian vui sarih lian tak tak, tha tak tak hi a lo chhuak a:
41:23	tin, ngai teh, chu mi hnuah chuan vui sarih vuai sil sel, sin tete khawchhak thli chhem ro rim remte hi an lo chhuak leh a:
41:24	tin, vui sin tetete chuan vui sarih tha tak takte chu an lem zo ta maiin ka hmu a: tin, mit lam dawithiamhote chu ka hrilh a, nimahsela mi hrilhfiah thei tumah an awm si lo va," tiin a sawi a.
41:25	Tin, Josefa chuan Pharaoa hnenah, "Pharaoa mumang hi hmun khat a ni: Pathianin a thiltih tir tur chu Pharaoa a hriattir a nih chu.
41:26	Bawng pasarih tha tak takte chu kum sarih an ni a; vui sarih tha tak takte chu kum sarih an ni bawk: mumang chu hmun khat a ni.
41:27	Tin, an hnua bawng pasarih cher tak tak, pawr tak tak lo chhuak chhote chu kum sarih an ni a, vui sarih s?hl顁 khawchhak thli chhem ro rim remte nen chuan; chung chu tam kum, kum sarih tur a ni.
41:28	Chu chu a ni Pharaoa hnena ka sawi kha: Pathianin a thiltih tih tur chu Pharaoa a hriattir a nih hi.
41:29	Ngai teh, Aigupta ram chhung zawng zawngah hian hausak tawntaw kum, kum sarih a lo thleng dawn:
41:30	chu mi hnu-ah chuan tam kum, kum sarih a lo awm leh ang; tichuan hausakna zawng zawng kha Aigupta ramah hian theihnghilh vek a ni tawh ang; tam chuan ram hi a ei chhe zo vang;
41:31	hausakna kha, a zuitu tam avamg chuan, he ramah hian an hre tawh lo vang; a nasa hle dawn si a.
41:32	Tin, mumang Pharaoa vawihnih a neih nawntirna chu he mi avang hian a ni, thil tih tur chu Pathianin a tihngheh a, Pathian vekin a thlentir lawk dawn avangin.
41:33	Chutichuan tunah hian Pharaoa chuan mi pakhat bengvar tak fing tak mai zawng chhuak sela, Aigupta ram chungah hian hotuah awmtir rawh se.
41:34	Pharaoan chu chu ti sela, tin ram chungah hian hotute ruat sela, hausak kum, kum sarih chhung chuan Aigupta ram buh hi hmun ngaa thena hmun khat zel khawm rawh se.
41:35	Tichuan, anni chuan chung kum that kum lo thleng tura buh zawng zawng chu lawr khawmin Pharaoa hnuaia awm turin khuaahte la ei atan buh chhung khawm sela, vawng tlat rawh se.
41:36	Tichuan, tam avanga ram hi a boral loh nan buh chu tam kum, kum sarih Aigupta rama lo thleng tur atan chuan he ram atan hian inrinlawkna tur a ni ang," a ti a.
41:37	Tin, chu thu chu Pharaoa leh a chhiahhlawhte zawng zawng chuan tha an tihzawng tak a ni a.
41:38	Tin, Pharaoa chuan, a chhiahhlawhte hnenah, "Hetiang, Pathian thlarau awmna mi hi kan hmu zo dawn em ni?" a ti a.
41:39	Tin, Pharaoa vek chuan Josefa hnenah, "Pathianin chung zawng zawng chu a hriattir che avangin, nang anga bengvar leh fing reng reng hi an awm lo ve:
41:40	nang hi ka chhungte chungah hotuah i awm ang a, ka khua leh tui zawng zawng hi i thu ang zelin an awm ang: lalthutphaha thut thu-ah chauh hian i aiin ka lal ang," a ti a.
41:41	Pharaoa vek chuan Josefa hnenah, "Ngai teh, Aigupta ram zawng zawng chungah hian hotuah ka siam a che," a ti a.
41:42	Tin, Pharaoan a kut ata a hming nemna zungbun chu a phawi a, Josefa kutah a buntir a, puan zai sina siam silhfente a bel a, a nghawngah rangkachak thi a awrhtir a;
41:43	tin, a tawlailir neih pahnihnaah chuan a chuantir a; a hmaah chuan, "Thingthi r'u," tiin an au zel a: tichuan Aigupta ram zawng zawng chungah chuan hotuah a siam ta a.
41:44	Tin, Pharaoa chuan Josefa hnenah, "Kei Pharaoa ka ni, nangma thu lo chuan Aigupta ram chhung zawng zawngah hian tuman an kut emaw an ke emaw an lek lo vang," a ti a.
41:45	Tin, Pharaoan Josefa hmingah chuan Zephenathpaneha a vuah a: On khaw puithiam Potiphara fanu Asenathi nupuiah a neihtir bawk a. tin, Josefa chu a chhuak a, Aigupta ram chu a fang ta a.
41:46	Tin, Josefa chu Aigupta ram lal Pharaoa hmaa a din lai chuan kum 30 mi a ni a. Tin, Josefa chu Pharaoa hnen ata a chhuak a, Aigupta ram zawng zawng chu a fang chhuak ta a.
41:47	Tin, kum that kum, kum sarih chhung chuan lei chuan hlawk takin buh a chhuah thin a.
41:48	Tin, Aigupta rama kum that kum, kum sarih lo thlenga buh zawng zawng chu a lawr khawm a, buh chu khuaahte chuan a chhung khawm ta a: khaw tinah a vel lova buh theuh chu a chhung khawm zel a.
41:49	Tichuan Josefa chuan buh chu tam tak tuifinriata tiauvut zat laiin a chhung khawm rui a, a chhiar pawh chu a bang ta hial a; chhiar sen rual a ni ta si lo va.
41:50	Tin, tam lo thlen hma chuan Josefan fapa pahnih a nei a, chu mite chu On khaw puithiam Potiphara fanu Asenathi chuan a hrinsak a ni.
41:51	Tin, Josefan a fa tir hmingah chuan Manasea a sa a: "Pathianin ka thawh rimna zawng zawng leh ka pa chhungte zawng zawng chu mi theihnghilhtir ta si a," a ti a.
41:52	Tin, a fa pahnihna hmingah chuan Ephraima a sa a: "Pathianin ka hreawm tuarna ramah hian chi mi thlahtir ta si a," a ti a.
41:53	Tin, kum that kum, kum sarih, Aigupta rama lo thleng chu a lo vei ta a.
41:54	Tin, tam kum, kum sarih tur chu Josefa sawi ang takin a lo thleng tan ta a. ram tinah tam a lo tla ta a; Aigupta rama chhung zawng zawngah erawh chuan ei tur a awm a.
41:55	Tin, Aigupta rama mi zawng zawng chu an tam veleh Pharaoa hnenah ei tur dilin an au va: tin, Pharaoa chuan Aigupta mi zawng zawng hnenah chuan, "Josefa hnenah kal ula; a hrilh apiang che u chu ti rawh u," a ti a.
41:56	Tin, tam chu lei chung zawng zawngah chuan a lo tla ta a: tichuan Josefa chuan chhun khawmna in zawng zawng chu a hawng a, Aigupta mite hnenah chuan a hralh a; Aigupta ramah chuan tam chu a tla nasa hle a.
41:57	Tin, lei chung zawng zawngah tam chu a tlak nasat avangin ram tina mite chu buh lei turin Aigupta ramah Josefa hnenah chuan an lo kal thin a.

Genesis 40

THUTHLUNGHLUI   Genesis   Bung 40
40:1	Tin, chung thil hnuah chuan heti hi a ni a, Aigupta lal uain petu leh a chhang siamtu te chuan an pu Aigupta lal chu an tivui a.
40:2	Tichuan Pharaoa chu a chhiahhlawh hotu pahnih chungah, a uain pe hotu ber chungah leh a chhang siam hotu ber chungah chuan a thinur ta a.
40:3	Tichuan vengtu pawl hotu inah, tan in, Josefa phuara a awmnaah chuan an tantir ta a.
40:4	Tin, vengtu pawl hotu chuan Josefa chu anmahni a enkawltir a, tichuan ani chuan an rawng a bawl ta a: tin, ni engzat emaw lai an tang rih a.
40:5	Tin, tan ina phuara awm, Aigupta lal uain petu leh chhang siamtu chuan an pahnihin zan khatah mumang awmze hrang ve ve an nei a.
40:6	Tin, atak zingah chuan Josefa chu an hnenah a va lut a, anni chu a va hmu a, tin, ngai teh, an lo lungngai hle a.
40:7	Tichuan ani chuan, "Engtizia nge vawiin chu lungngai hmel in va pu ve?" tiin Pharaoa chhiahhlawh hotu, a pu ina tang vete chu a zawt a.
40:8	Tin, anni chuan a hnenah "Mumang kan nei a, min hrilhfiah thei tumah an awm si lo a ni," an ti a. tin, Josefa chuan an hnenah "Mumang hrilhfiahnate chu Pathian ta a ni vem ni? Khawngaih takin mi han hrilh teh u," a ti a.
40:9	Tichuan uain pe hotu ber chuan a mumang chu Josefa a hrilh a, a hnenah, "Ka mumangah chuan ngai teh, ka hmaah hian grep hrui a lo awm a;
40:10	grep hruiah chuan peng pathum a awm bawk a: tin, chawr chhuak angin a lo awm a a parte a lo chhuak a; a par bawrte chuan grep hminte a rawn chhuah ta a:
40:11	tin, Pharaoa no chu ka kutah hian a lo awm a; tichuan grep rahte chu ka lo va, Pharaoa noah chuan ka sawr a, no chu Pharaoa kutah ka lo pe a," a ti a.
40:12	Tin, Josefa chuan a hnenah, "Hei hi a hrilhfiahna a ni: peng pathum chu ni thum a ni;
40:13	tun a chin ni thumah chuan Pharaoan i lua chawi kang ang a, i hnathawh chu a thawhtir leh ang che: tichuan a uain petu i nih laia i pek dan pangngai ang khan Pharaoa no chu a kutah i pe leh dawn a nih chu.
40:14	Amaherawhchu i chan that leh hunah chuan mi han hre reng la, khawngaih takin khawngaihna ka chungah rawn lantir la, Pharaoa hnenah ka chanchin han sawi la, he in ata hi mi hruai chhuak ang che:
40:15	Hebrai-ho ram ata min ruka mi ruk bo ka ni a: he ramah pawh hian rip chhunga mi khungna khawp engmah ka tisual hek lo," a ti a.
40:16	Chhang siamtu chuan hrilhfiahna chu a tha tih a hriatin Josefa hnenah chuan, "Kei pawh mumang ka nei a, ngai teh, chhang ven fawng pathumin ka lo chherchhuan a:
40:17	tin, fawng chungnung berah chuan Pharaoa chaw, chhang siamtu siam, chi tinreng hi a lo awm a; tin, chung chu savaten ka fawng chherchhuan ata chu an lo ei noh noh va," a ti a.
40:18	Tin, Josefa chuan a chhang a, "Hei hi a hrilhfiahna a ni: fawng pathum chu ni thum a ni;
40:19	tun achin ni thumah chuan Pharaoan i taksa ata i lua chawi kang ang a, thing lerah a khai ang che; tichuan savaten i sa chu an ei noh noh dawn a nih chu," a ti a.
40:20	Tin, heti hi a ni a, a n?thum ni, Pharaoa pian champhaphak niah chuan, ani chuan a chhiahhlawh zawng zawngte tan ruai a theh a: tin, a chhiahhlawhte zinga mi uain pe hotu ber luleh chhang siam hotu ber lua chawi kang ta a.
40:21	Josefan anmahni a hrilhfiah ang takin, uain petuah a tantir leh a; tichuan no chu Pharaoa kutah chuan a pe ta a:
40:22	Chhang siam hotu ber erawh chu a khai hlum ta a.
40:23	Nimahsela uain pe hotu ber chuan Josefa chu a hre reng ta awzawng lo va, a theihngilh ta mai a.

Genesis 39

THUTHLUNGHLUI   Genesis   Bung 39
39:1	Tin, Josefa chu Aigupta ramah an hruai chhuk a; tin, Pharaoa hnuaia hotu pakhat, vengtu pawl hotu, Aigupta mi, Potiphara chuan chuta rawn hruai chhuktu Ismael-hote kut ata chu a lei ta a.
39:2	Tin, LALPA chu Josefa hnenah a awm a, tichuan ani chu mi vannei tak a ni a; tin, a pu Aigupta mi inah chuan a awm a.
39:3	Tin, a pu chuan LALPA chu a hnenah a awm a, a thiltih apiang LALPAN a kutah a hlawhtlintir tih a lo hre ta a.
39:4	Tichuan Josefa chuan a pu mit a tlung a, a rawng a bawl thin a: tin, ani chuan a chhungte chungah chuan hotuah a siam a, a neih zawng zawng a kutah a dah ta vek a.
39:5	Tin, heti hi a ni a, inah chuan hotuah a siam a, a neih zawng zawng chunga hotua a siam a chinah chuan Josefa avangin LALPA chuan Aigupta mi chhungte chu mal a sawm ta a; in lam leh ram lama a neih zawng zawng chu LALPAN mal a sawm thin a.
39:6	Tichuan a neih zawng zawng chu Josefa kutah a dah tlat a, a hnena thil awm reng reng chu a hriatpui hauh lo va, ama chaw ei chauh lo chu a hre lo. Tin, Josefa chu mi tlawntlai tha tak a ni a, a hmel pawh a tha hle a.
39:7	Tin, chung hnuah chuan heti hi a ni a, a pu nupui chuan Josefa chu a ngaihmelh a; tin, "Mi mutpui rawh," a ti a.
39:8	Ani erawh chuan a duh lo va, a pu nupui hnenah chuan, "Ngai teh, ka pu chuan he inah hian ka hnenah eng eng nge awm a hre si lo va, a neih zawng zawng ka kutah hian a dah vek a;
39:9	he inah hian ka aia lian zawk tumah an awm lo va; a nupui i nih avangin nangmah chauh lo chu ka lakah engmah ui a nei hek lo: chutichuan engtin nge he sual lian tak hi tiin Pathian chunga thil ka tihsual theih ang?" a ti a.
39:10	Tin, heti hi a ni a, nitin maiin Josefa chu be thin mah sela, amah mutpui lam thu emaw ama hnena awm lam thu emaw a pawm duh lo va.
39:11	Tin, chu mi lai vek chuan heti hi a ni a, a hna chu thawk turin in chhungah a va lut a; tin, chutah chuan an in awm reng reng tumah an awm lo va.
39:12	Tichuan ani chuan, "Mi mutpui rawh," tiin a silhfenah a lo man a: tin, ani chuan a silhfen chu a kutah chuan a hnutchhiah a tlansan a, a chhuak ta daih a.
39:13	Tin, heti hi a ni a, a silhfen chu a kuta hnutchhiahin a tlan chhuak ta tih a hriat veleh,
39:14	a in awmte chu a ko va, an hnenah, "En teh u, min timualpho turin Hebrai mi pakhat kan hnena a hruai luh tak hi; mi mutpui tumin ka hnenah hian a lo lut a, tichuan aw ring takin ka au ta a ni:
39:15	tin, heti hi a ni a, aw chhuahin ring takin ka au tih a hriat veleh ka kiangah a silhfen hi a tlansan a, a chhuak ta daih a ni," a ti a.
39:16	Tin, Josefa pu a lo hawn hma loh chuan a silhfen chu a kiangah a lo dah reng a.
39:17	Tin, a hnenah hetiang thu hi a lo sawi a, "Hebrai chhiahhlawh kan hnena i rawn hruai kha, mi tihmualpho tumin ka hnenah a lo lut a:
39:18	tin, heti hi a ni a, aw chhuaha ka au veleh ka kiangah a silhfen hi hnutchhiahin a tlan chhuak ta a ni," a ti a.
39:19	Tin, heti hi a ni a, Josefa pu chuan a nupuiin a hnena, "I chhiahhlawh hian heti hian mi ti," tia a thusawi chu a hriat chuan a thin chu a lo ur ta thut a.
39:20	Tichuan Josefa pu chuan ani chu a hruai a, tan in, lal mi tang phuara an awmnaah chuan a khung ta a: tichuan chuta tan inah chuan a awm ta a.
39:21	Nimahsela LALPA chu Josefa hnenah a awm zel a, a chungah ngil a nei a, tan in vengtu pawh a khawngaihtir a.
39:22	Tichuan tan in vengtu chuan tan ina tangho awm zawng zawng chu Josefa kutah a kawltir ta vek a; tichuan chuta an tih apiang chu Josefa chu a titu a ni zel thin a.
39:23	LALPA chu Josefa hnenah a awm a, a thiltih apiang chu LALPA chuan a hlawhtlintir thin avangin tan in vengtu chuan a kuta thil awm reng reng chu a en duh ta lo va.

Genesis 38

THUTHLUNGHLUI   Genesis   Bung 38
38:1	Chu mi lai chuan heti hi a ni a, Juda chu a unaute hnen ata a chhuak a, Adullam mi pakhat a hming Hira chu a zuk bal ta a.
38:2	Tin, Juda chuan chutah chuan Kanaan mi pakhat a hming Sua fanu a hmu a; tin, ani chu a nei a, a pawl ta a.
38:3	Tichuan a rai a, fapa a hring a; tin, Judan a hmingah chuan Era a sa a.
38:4	Tin, a rai leh a, fapa a hring leh a; tin, a nuin a hmingah chuan Onana a sa a.
38:5	Tin, fapa a hring leh pek a, a hmingah chuan Sela a sa a: chu mi chu a hrin lai chuan Juda chu Chezeb khuaah a awm a.
38:6	Tin, Juda chuan a fa tir Era chu nupui a neihsak a, a hming chu Tamari a ni a.
38:7	Tin, Juda fa tir Era chu LALPA mithmuhin mi sual a ni a; tichuan LALPAN ani chu a tihlum ta a.
38:8	Tin, Juda chuan Onana hnenah, "I u nupui chu pawl la, pasalte unau tih tur chu tihsak la, i u tan chuan chi thlahsak rawh," a ti a.
38:9	Tin, Onana chuan chi thlah tur chu ama thlah a ni dawn lo tih a hria a; tichuan heti hi a ni a, a u nupui a pawl apiangin, a u tan chi a thlahsak lohna turin leiah chuan a titla thin a.
38:10	Tin, a thiltih dan chu LALPA mithmuhah chuan sual tak a ni a: tichuan ani pawh chu a tihlum ta a.
38:11	Tin, Juda chuan a monu Tamari hnenah chuan, "Ka fapa Sela hi a puitlin hma loh chuan i pa in lamah pasal nei lovin lo awm rih ang che," a ti a. "Chutilochuan ani pawh hi a ute angin a thi dah ang e," a ti a ni. Tichuan Tamari chu a pa in lamah chuan a va awm ta a.
38:12	Tin, a nakinah chuan Sua fanu Juda nupui chu a thi a; tin, Juda chuan a ngaih a lo reh a, Timna khuaah a beram hmul mettute hnen lamah chuan amah leh a thian Adullam mi Hira chu an chho ta a.
38:13	Tin, miin Tamari chu, "I pu chu a beram hmul met turin Timna khuaah a chho dawn," tiin an hrilh a.
38:14	Tichuan ani chu a pasal sunna silhfente chu a hlim a, inkhuhna puanin a inkhuh a, a intuam tlat a, Timna khaw kawnga Enaim kulh kawngkaah chuan a lo thu a; Sela chu a puitling tawh si a, a pa chuan nupuiah a neihsak lo zo a ni tih a hria a ni.
38:15	Tin, Juda chuan ani chu a hmuh chuan nawhchizuarah a ruat a; a hmai a inkhuh tlat si a.
38:16	Tichuan kawng sira hmeichhe lam chu a va pan a, "Hawh, khawngaih takin i mu dun ang," a ti a: a mo kha a ni tih a hre si lo va. Tin, ani chuan, "Mi mutpui chuan engnge mi pek ang?" a ti a.
38:17	Tin, ani chuan, "Ran rual zinga mi kelno ka thawn ang che," a ti a. Tin, ani chuan, "Chu chu i rawn thawn hmaa lo hren tur eng emaw tal mi pe ang em?" a ti a.
38:18	Tin, ani chuan, "Hren tur engnge ka pek ang che?" a ti a. Tin, ani chuan, "I hming nemna leh i hrui, i tiang ken nen khan," a ti a. Tichuan a pe a, a mutpui ta a, tin a lakah chuan fa a pai ta a.
38:19	Tin, a tho va, a inkhuhna puan chu a hlim a, a hmeithaina silhfente chu a inbel leh ta a.
38:20	Tin, a thil hren chu hmeichhe kut ata la turin a thianpa Adullam mi kutah chuan kel no chu a thawn a: nimahsela ani chuan amah chui a va hmu zo si lo va.
38:21	Chutichuan hmeichhe awmna hmuna mite hnenah chuan, "Khawng sira Enaim nawhchizuar awm kha khawiah nge a awm tak?" tiin a zawt a. Tin, anni chuan, "Nawhchizuar reng reng hetah an awm lo ve," an ti a.
38:22	Tin, Juda hnena chuan a kir leh a, "Amah chu ka hmu zo lo, a hmuna mite pawhin, 'Nawhchizuar reng reng hetah an awm lo,' an ti bawk a," a ti a.
38:23	Tin, Juda chuan, "Nei hlen mai rawh se, chutilochuan kan mualpho dah ang e; ngai teh, he kel no hi ka thawn a, amah i hmu zo si lo va," a ti a.
38:24	Tin, thla thum emaw lai chinah chuan miin Juda chu, "I monu Tamari chuan tlangval a ngai a; chu lo pawh chu, ngai teh, sawn a pai nghe nghe asin," tiin an hrilh a. Tin, Juda chuan, "Hruai chhuak ula, halhlumin awm rawh se," a ti a.
38:25	Tin, an hruai chhuah chuan Tamari chuan, "Heng thil neitupa lakah hian a ni, nau ka pai ni," tiin a pu hnenah chuan mi a tir ta a: amah vekin, "Khawngaih takin heng hming nemna te, hrui te, tiang te hi tu ta nge ni, en chiang teh khai," a ti bawk a.
38:26	Tin, Juda chuan chung thil chu a ta a ni tih a lo hria a, "Ani chu ka aiin a fel zawk a ni; ka fapa Sela ka neihtir ta si lo va," a ti a. Tin, Juda chuan a ni chu a pawl leh ta hauh lo va.
38:27	Tin, nau a vei lai chuan heti hi a ni a, ngai teh, a chhulah chuan phir an lo awm a.
38:28	Tin, heti hi a ni a, nau a vei chuan pakhat chuan a kut a rawn zen chhuak a: tichuan nau chhar mi chuan, "Hei hi a chhuak hmasa zawk a nih hi," tiin a chelh a, a kutah chuan la sen a buntir a.
38:29	Tin, heti hi a ni a, a kut chu a lak luh leh lai chuan, ngai teh, a unau chu a lo chhuak ta a: tichuan nau chhar mi chuan, "Engati nge chhuahna i insiam ni?" a ti a, chuvangin a hmingah chuan Pereza an sa a.
38:30	Tin, chu mi hnuah chuan a unau, a kuta la sen bun kha a lo chhuak leh a: a hmingah chuan Zera an sa a.

Genesis 37

THUTHLUNGHLUI   Genesis   Bung 37
37:1	Tin, Jakoba chu a pa mikhualna ram, Kanaan ramah chuan a awm ta a.
37:2	Heng hi Jakoba thlahte chanchin a ni. Josefa chu kum 17 mi a nihin, a ute nen ran rual an thlah a; ani chu naupang a la ni a, a pa nupuite Bilhaii leh Zilpaii fapate hnenah a awm a: tin, Josefa chuan an sual thuthang an pa hnenah a thlen a.
37:3	Tin, Israela chuan Josefa chu a tar lam fa a nih avangin, a fate zawng zawng ai chuan a hmangaih zawk a: tichuan kawrfual ze hrang hranga zia a siamsak a.
37:4	Tin, an pa chuan ani chu a ute zawng zawng aiin a hmangaih zawk tih a ute chuan an lo hre ta a; tichuan ani chu an haw ta hle a, tawng kam tha reng reng a chungah an rawlh thei ta lo va.
37:5	Tin, Josefa chuan mumang a nei a, a ute hnenah chuan a hrilh a: tichuan ani chu an haw lehzual ta a.
37:6	Tin, ani chuan an hnenah, "Khawngaih takin ka mumang thu hi ngaithla teh u:
37:7	ngai teh u, lovah chuan buhphalte kan lo tel a, tin, ngai teh u, ka buhphal chu a lo tho va, a ding ta luah a; tin, ngai teh u, in buhphalte chuan an rawn hual vel a, ka buhphal chu chibai an buk hlawm a," a ti a.
37:8	Tin, a ute chuan a hnenah, "Nang tehchai hian kan chungah ro i rel tehlul ang maw? Nang tehchai hian kan chungah thu i nei tehlul ang maw?" an ti a. Tichuan a mumang avang leh a thusawi avang chuan amah chu an haw lehzual sauh va.
37:9	Tin, mumang dang a nei leh a, a ute chu a hrilh leh a, "Ngai teh u, mumang ka nei leh ta a; ngai teh u, nite, thla te, arsi sawm leh pakhatte khian chibai mi lo buk zuk nia maw le," a ti a.
37:10	Tin, a pa chu a hrilh a, a uteho pawh; tichuan a pa chuan a zilh a, a hnenah, "Mumang i neih hi eng mumang nge maw ni? Kei leh i nu leh i ute hian lei siin chibai kan rawn buk tehlul dawn che maw?" a ti a.
37:11	Tin, a uten ani chu an itsik a; a pa erawh chuan a thusawi chu a rilruin a vawng reng a.
37:12	Tin, a ute chu Sekem-ah chuan an pa ran rual chu thlahin an kal a.
37:13	Tin, israel chuan Josefa hnenah, "I uten Sekem-ah alawm maw ran rual chu an thlah? Lo kal teh, an hnenah ka tir ang che, a ti a. Tin, ani chuan a hnenah mi tir ta che," a ti a.
37:14	Tin, ani chuan a hnenah, "Va kal ta la, i ute chu an dam emaw, ran rualte pawh an dam emaw va chian ta la, chanchin min rawn hrilh leh ang che," a ` ti a. Chutichuan Hebron ruam ata chu a tir chhuak a, tin, ani chuan Sekem chu a va thleng a.
37:15	Tin, mi tuin emaw amah chu a hmu a, ngai teh, phulah chuan a vak vak a: tichuan mi chuan, "Engnge i zawn le?" tiin a zawt a.
37:16	Tin, ani chuan, "Ka ute ka zawng a ni: khawngaih takin ran rual an thahna chu mi hrilh teh khai," a ti a.
37:17	Tin, mi chuan, "Heta tangin an chhuah tak kha, 'Dothan-ah i kal ang u,' an tih chu ka hria," a ti a. Dothan-ah chuan a va hmu a.
37:18	Tin, anni chuan hla tak atangin an lo hmu a, tichuan an kiang hnai a thlen hmain, amah thah thu an phiar ta a.
37:19	,20 Tin, "En teh u, mang neia chu a lo kal saw. Haw u, that ila, khuarkhurum pakhatah i thlak ang u khai, tin, 'Sakawlhin a seh ta,' kan ti dawn nia; tichuan a mangte chu engtin nge a awm kan la hre mai ang," an inti hlawm a.
37:20	,19 Tin, "En teh u, mang neia chu a lo kal saw. Haw u, that ila, khuarkhurum pakhatah i thlak ang u khai, tin, 'Sakawlhin a seh ta,' kan ti dawn nia; tichuan a mangte chu engtin nge a awm kan la hre mai ang," an inti hlawm a.
37:21	Tin, Reubena chuan chu chu a lo hria a, an kut ata a chhanchhuak a; "A thah em chu i that suh ang u," a ti a.
37:22	Tin, Reubena vek chuan a pa hnena a hruai lehna turin an kut ata chu a chhanchhuah theih nan an hnenah chuan, "Thisen chu chhuah suh u; thlalera khuarkhurumah hian thlak ula, kut zawng a chungah thlak suh u," a ti a.
37:23	Tin, heti hi a ni a, Josefa chuan a ute hnena va thlen chuan, Josefa chu a kawrfual, a kawrfual ze hrang hranga zia a hak chu an lo hlihsak a;
37:24	tin, an hruai a, khuarkhurumah chuan an thlak ta a: khuarkhurum chu a ruak a, tui awm tawh lo a ni a.
37:25	Tin, chaw ei turin an han thu hlawm a: tin, an han dak a, an en a, tin, ngai teh, ismael khualzinho Gilead ram atanga an sanghawngseia englo rimtui leh thing hnai damdawi leh murra phura Aigupta rama zuk kal turte an lo kal a.
37:26	Tin, Juda chuan a unaute hnenah, "Kan nau kan thah a, a thisen chhuak kan zep chuan engnge hnenhnemna awm ang?
37:27	Hawh u, a chunga kut thlak lovin, ismael-ho hnenah sawn i hralh zawk ang u; amah hi kan nau, kan tisa ngei a ni si a," a ti a. Tin, a unaute chuan a thu chu an zawm ta a.
37:28	Tin, Midian-ho sumdawngte an lo kal a; tichuan Josefa chu khuarkhurum ata chu an kai chhuak a, ismael-hote hnenah chuan, Josefa chu tangka sawmhnihah an hralh ta a. Tin, Jasefa chu Aigupta ramah an hruai ta a.
37:29	Tin, Reubena chu khuarkhurumah a lo kal leh a, tin, ngai teh, Josefa chu khuarkhurumah chuan a lo awm ta lo va; tichuan a silhfente a pawt thler ta a.
37:30	Tin, a naute hnenah a kal leh a, "Taitea kha a awm ta lo; kei hi khawiah nge ka kal tir ang le aw?" a ti a.
37:31	Tin, Josefa kawrfual chu an la a, kelpa an talh a, a thi-ah chuan kawrfual chu an hnim a:
37:32	tin, kawrfual ze hrang hranga zia chu an thawn a, an pa hnenah chuan an rawn la a; tin, "Hei hi kan hmu ngawt a, i fapaa kawrfual a ni nge ni lo en teh," an ti a.
37:33	Tin, ani chuan a lo hre mai a, "Ka fapaa kawrfual a nih hi; sakawlhin a seh ta zuk nia le; Josefa chu matheilovin pawh sawm vekin a awm a ni ngei ang," a ti a.
37:34	Tichuan Jakoba chuan a silhfente a pawt thler a, saiip puan a feng a, ni rei tak a fapa chu a sun a.
37:35	Tin, a fapate zawng zawng leh a fanute zawng zawng chu amah thlamuan turin an tho va; nimahsela ani chuan thlamuan a duh lo va; "Lusun chungin thlanah ka fapa hnenah chuan ka liam dawn e," a ti a. tichuan a pa chu amah ngaiin a tap thin a.
37:36	Tin, Midian-ho chuan Josefa chu Aigupta ramah an luhpui a, Pharaoa hnuaia hotu pakhat, vengtu pawl hotu Potiphara hnenah chuan an hralh a.

Genesis 36

THUTHLUNGHLUI   Genesis   Bung 36
36:1	Tin, heng hi Esauva thlahte chu an ni (Esauva chu Edoma a ni).
36:2	Esauva chuan a nupui te chu Kanaan rama nula zinga mi a ni, a neih ni; Hit mi Elona fanu Adai leh,Hiv mi Zibeona tunu, Anaa fanu Oholibani te chu an ni;
36:3	Ismaela fanu, Nebaiotha fanu Basemathi nen chuan.
36:4	Tin, Adai chuan Eliphaza chu Esauva a hrinsak a; Besemathi chuan Reuela a hring a;
36:5	Oholibani chuan Jeusa leh Jalama leh Kora a hring a: chung chu Esauva fapa, Kanaan rama a neihte an ni.
36:6	Tin, Esauva chuan a nupuite leh, a fapate leh, a fanute leh a ina mi zawng zawng leh a rante leh a sa zawng zawng leh, a sum zawng zawng, Kanaan rama a hmuhte chu a chhawm a, a nau Jakoba hnen ata chu ram dangah a kal ta daih a.
36:7	An thil neihte chu a nasa lutuk a, an awm dun thei lo a ni; an rante avangin an mikhualna ram chuan a daih ta si lo va.
36:8	Tichuan Esauva chu Seir tlangah chuan awm ta a: Esauva chu Edoma a ni a.
36:9	Tin, heng hi Seir tlanga Edom-ho thlahtu Esauva thlahte chu an ni:
36:10	heng hi Esauva fapateho hming chu a ni: Eliphaza, Esauva nupui Adai fapa leh Reuela, Esauva nupui Besemathi fa hi.
36:11	Tin, Eliphaza fapate chu Temana te, Omara te, Zephova te, Gatama te, Kenaza te an ni.
36:12	Tin, Timnaii chu Esauva fapa Eliphaza hmei a ni a: ani chuan Eliphaza chu Amaleka a hrinsak a: chung chu Esauva nupui Adai thlahte chu an ni.
36:13	Tin, heng hi Reuela fapate chu an ni; Nahatha leh Zera te, Sama leh Miza te hi: chung chu Esauva nupui Besemathi thlahte chu an ni.
36:14	Tin, heng hi Zibeona tunu Ana fanu Esauva nupui Oholibana fapate chu an ni: ani chuan Esauva chu Jeusa leh Jalama leh Kora chu a hrinsak a.
36:15	Heng hi Esauva fapate zinga a hotute chu an ni: Esauva fa tir Eliphaza fapate hi; hotu Temana te, hotu Omora te, hotu Zephova te, hotu Kenaza te,
36:16	hotu Kora te, hotu Gatama te, hotu Amaleka te hi: chung chu Edom rama Eliphaza laka chhuak hotute chu an ni; chung chu Adai thlahte chu an ni.
36:17	Tin, heng hi Esauva fapa Reuela thlahte chu an ni; hotu Nahatha te, hotu Zera te, hotu Sama te, hotu Miza te hi: chung chu Edom rama Reuela laka chhuak hotute chu an ni; chung chu Esauva nupui Basemathi thlahte chu an ni.
36:18	Tin, heng hi Esauva nupui Oholibani thlahte chu an ni, hotu Jeusa te, hotu Jalam te, hotu Kora te hi: chung hotute chu Ana fanu Esauva nupui Oholibani thlahte chu an ni.
36:19	Chung chu Esauva fapate chu an ni, chung chu an zinga hotute chu an ni: Esauva chu Edoma a ni.
36:20	Heng hi Hor mi Seira fapa, chu rama awmte chu an ni; Lotana te, Sobala te, Zibeona te, Ana te,
36:21	Disona te, Ezera te, Disana te hi: chung chu Edom rama Seira fa Hor-ho laka chhuak hotute chu an ni.
36:22	Tin, Lotana fate chu Hora leh Hemama an ni; Lotana farnu chu Timnai a ni.
36:23	Tin, heng hi Sobala fate chu an ni; tin, Alvana te, Manahatha te, Ebala te, Sephova te, Onama te hi.
36:24	Tin, heng hi Zibeona fate chu an ni; Aia leh Ana hi: he Ana hi a ni, a pa Zibeona sabengtungte a thlah laia thlalera tuilumkhurte hmu chhuaktu kha ni.
36:25	Tin, heng hi Ana fate chu an ni: Disona leh Ana fanu Oholibani hi.
36:26	Tin, heng hi Disona fate chu an ni; Hemdana te, Esbana te, ithrana te, Cherana te hi.
36:27	Heng hi Ezera fate chu an ni; Bilhana te, Zaavana te, Akana te hi.
36:28	Heng hi Disana fate chu an ni; Uza leh Arana hi.
36:29	Heng hi Hor-ho laka chhuak hotute chu an ni; hotu Lotana te, hotu Sobala te, hotu Zibeona te, hotu Ana te,
36:30	hotu Disona te hi: hotu Ezera te, hotu Disana te hi: chung chu Seir rama an hotu der anga Hor-ho laka chhuak hotute chu an ni.
36:31	Heng hi lal reng rengin Israela thlahte chunga ro an rel hmaa, Edom rama roreltu lalte chu an ni.
36:32	Tin, Beora fapa Bela chuan Edom ramah ro a rel a; a khawpui hming chu Dinhaba a ni.
36:33	Tin, Bela chu a thi a, Bozra khuaa mi Zera fapa Jababa chuan a aiawhin ro a rel ta a.
36:34	Tin, Jobaba chu a thi a, timan-ho rama mi Husama chuan a ai awhin ro a rel ta a.
36:35	Tin, Husama chu a thi a, Bedada fapa Hadada, Moab phula Midian-ho thattu khan a aiawhin ro a rel ta a: a khawpui hming hu Avith a ni.
36:36	Tin, Hadada chu a ti a, Masreka mi Samla chuan a aiawhin ro a rel ta a.
36:37	Tin, Samla chu a thi a, Luipui kama Rehoboth khuaa mi Saula chuan a aiawhin ro a rel ta a.
36:38	Tin, Saula chu a thi a, Akbora fapa Baalhanana chuan a aiawhin ro a rel ta a.
36:39	Tin, Akbora fapa Baalhanana chu a thi a, Hadara chuan a aiawhin ra a rel ta a: a khawpui hming chu Pau a ni; a nupui hming chu Mehetabeli a ni a, ani chu Mezahaba fa Matredi fanu chu a ni.
36:40	Tin, heng hi an chhungkua ang zel leh an hmun ang zel leh an hming ang zelin Esauva thlah hotute hming chu a ni; hotu Timna te, hotu Alva te, hotu Jethetha te.
36:42	,43 Hotu Magdiela te, hotu Irama te hi: chung chu an ram neihah chuan an awmna ang zelin Edoma thlah hotute chu an ni: chu Esauva chu Edom-ho thlahtu chu a ni.
36:43	,42 Hotu Magdiela te, hotu Irama te hi: chung chu an ram neihah chuan an awmna ang zelin Edoma thlah hotute chu an ni: chu Esauva chu Edom-ho thlahtu chu a ni.