Deuteronomy 19

THUTHLUNGHLUI   Deuteronomy   Bung 19
19:1	LALPA in Pathianin an ram a pek che u hnam LALPAN a tihbo va, in luah a, an khuaah te, an inah te in awm hunah chuan,
19:2	LALPA in Pathianin luah tura a pek che u in ramah chuan in tan khaw pathum in ruat tur a ni.
19:3	Tualthat apiang an tlan luhna turin, LALPAN a luahtir tur che u ram chu hmun thumah in then ang a, in ramrite in siam ang a, kawngte in buatsaih tur a ni.
19:4	Tin, tualthatte chuta tlan luta him theite chu hengte hi an ni; miin a thenawm khawveng tun hma lama huatna paw nei lem lova that palh apiangte,
19:5	mi a thenawm khawveng nen thing kit tura ram kala thing kit tura a hrei han chek a, hrei fang thlawnin thenawm khawveng chu vawm hlum ta ang te hi, chu mi zinga khaw pakhatah chuan a tlan ang a, a him ang a,
19:6	thisen phuba latu chuan a thinur lin laia tualthattu chu a um a, kawng a thui avanga umphakin a va vaw hlum hlauh dah ang e: tun hma lama huatna te lo nei lem lo a ni avangin thi awm a ni si lo.
19:7	chuvangin, 'Khaw pathum in tan in ruat tur a ni,' tiin thu ka pe che u a ni.
19:8	Tin, LALPA in Pathianin in pi leh pute hnena chhia a lo chham anga in pi leh pute pek a lo tiam ram chu a pek che u a, LALPA in Pathianchu hmangaih tur leh a kawng zawh fo tura a thupek zawng zawng, tuna thu ka pek che u hi in pawm a, in ram chu a tihzau chuan he mi khaw pathum tiam lovin in tan khaw pathum dang in belhchhah leh ang:
19:9	Tin, LALPA in Pathianin in pi leh pute hnena chhia a lo chham anga in pi leh pute pek a lo tiam ram chu a pek che u a, LALPA in Pathianchu hmangaih tur leh a kawng zawh fo tura a thupek zawng zawng, tuna thu ka pek che u hi in pawm a, in ram chu a tihzau chuan he mi khaw pathum tiam lovin in tan khaw pathum dang in belhchhah leh ang:
19:10	LALPAN luah tura a pek che u in ram chhungah chuan pawi khawih lo thisen chhuah a awm loh va, inchunga thisen a awm loh nan.
19:11	Amaherawhchu miin athenawm khawveng a huat a, a chan a, a beih a, thikhawp hiala a vuak a, chu mi khaw zinga pakhata a tlan chuan,
19:12	an khaw upaten mi tir se la, chuta ta chu va hruai sela, tihhlum turin thisen phuba latu kutah hlan rawh se.
19:13	In khawngaih tur ani lo va, in tana tha turin Israel ram ata pawi khawih lo thisen chuahna chu in tibo tur a ni.
19:14	LALPA in Pathianin luah tura a pek che u ram, in luah tur rama a hmaa an lo phun tawh in thenawm ramri chu in sawn tur a ni lo.
19:15	Mi a khawlohna emaw, a sualna reng reng emaw hretu pakhat chu a tawk lovang; hretu pahnih ka emaw, hretu pathum ka emaw thuin tihngheh tur a ni.
19:16	Hretu fel lo takin mi thil ti dik lova a puh chuan,
19:17	an inkhinnaa an pahnihin LALPA hmaah chu mi huna puithiamte leh roreltute hmaa chuan an ding tur a ni;
19:18	tin, roreltute chuan ngun takin an dap ang a, tin, ngai teh, thu hretu chu hretu der a nih a, a unau chu dawta puh anih chuan,
19:19	a unau chunga tih alo tum ang chuan a chungah in ti tur a ni; chutiang chuan inzinga thil tha lo chu intibo tur a ni.
19:20	A la awmhote chuan an hria ang a, an hlau vang a, tun hnuah chutiang thil tha lo reng reng chu in zingah an ti tawh dawn lo nia.
19:21	In khawngaih tur a ni lo va; nun aiah nun, mit aiah mit, ha aiah ha, kut aiah kut, ke aiah ke a ni ang.