Deuteronomy 8

THUTHLUNGHLUI   Deuteronomy   Bung 8
8:1	Nung dama in awm a, in lo pun zel a, pek tur che ua in pi leh pute hnena LALPAN chhia a chham ram chu in va luah theih nan thupek vawiina ka pek che u hi zawm turin in fimkhur tur a ni.
8:2	Tin, a thupekte chu in zawm dawn nge dawn lo, in rilru hriat nan fiah tur leh tihrehawm tur che ua thlalera kum sawmli a hruaina zawng zawng che u kawng chu hre reng rawh u.
8:3	Mihring hi chhang chauhin an nung lo va, LALPA kaa thu tin chhuakin an nung zawk a ni tih a hriattir theih nan che u a tihrehawm che u a, in tamte a phal a, in hriat ngai loh, in pi leh pute pawhin an hriat ngai bik loh manna chuan a chawm che u a.
8:4	Heng kum sawmli chhung hian in silhfente chu in sin chul lo va, in kete pawh a vang lo va.
8:5	Tin, miin a fa a thunun thin angin LALPA in Pathian chuan a thunun thin che u a ni ti hi in rilruin hre ran rawh u.
8:6	Tin, a kawng zawh tur leh amah chu tih turin LALPA in Pathian thupekte chu in zawm tur a ni.
8:7	LALPA in Pathian chuan ruam leh tlang atanga lo chhuak lui tui te, tuikhur leh tui thuk tak awmna ram,
8:8	buh te, barli te, grep te, theipi te, pawmgranet te awmna ram, hriak nei oliv leh khawizu awmna ram,
8:9	chham lova chhang in ei thinna tur ram, engmah in tlakchhak lohna tur, a lung te chu thir, a tlangte chu dar laih chhuah theihna ram tha takah chuan a hruai lut dawn si che u a.
8:10	In ei a, in tlai hle hun chuan, ram tha tak a pek che u avang chuan LALPA in Pathian chu in fak ang.
8:11	A thupek te, a rorel te, a dan te, vawiina ka pek che u hi zawm lohvin LALPA in Pathian chu in theihnghilh dah rual ang e, fimkhur rawh u;
8:12	chutilo chuan in ei a, in tlai a, in tha takte in sak a, in luah hun leh
8:13	in ran rual te, in beram rual te a lo pun a, in tangka te, in rangkachak te a lo pun a, in thil neih zawng zawngte a lo pun hun chuan,
8:14	in rilrute a lo chapo vang a, bawih ata Aigupta ram atanga hruai chhuaktu che u LALPA in Pathian chu in theihnghilh mai ang.
8:15	Ani chuan thlaler zau tak leh rapthlak tak, rul chuk na mite leh khawmual kaikuangte awmna, tui awm lohna, ram rovah a hruai tlang che ua; meilung lungpui atangin tui an tihchhuahsak che u a,
8:16	in pi leh pute hriat ngai loh manna chuan a chawm che u a, tun hnu lam thua in that theih nan a tihrehawm che u a, a fiah theihna tur che uin,
8:17	Tin, Heng kan sum leh paite hi keimahni chakna leh kan kutkawih a ni,' in tirilru dah ang e, fimkhur bawk rawh u.
8:18	Tuna a ngheh anga in pi leh pute hnena chhechhama thu thlun chu a tihnghehna turin LALPA in Pathian chu hre reng rawh u, sum leh pai deh chhuah theihna petu che u chu amah chu a ni zawk asin.
8:19	Tin, heti hi ani ang a, LALPA in Pathian chu in teihnghilh a, pathian dangte in zui a, an rawngte in bawl a, in biak vaih chuan in boral ngei ngei ang tih vawiinah hian ka hraittir a che u.
8:20	In hmaa hnam dangte a tihboral angin nangni pawh in boral ang, LALPA in Pathian aw chu ngaithla duh lo in nih dawn avangin.