Exodus 36

THUTHLUNGHLUI   Exodus   Bung 36
36:1	Tin, Bezalela leh Oholiaba mi leh themthiam tupawh LALPAN thu a pek ang zela hmun thianghlima rawngbawlna hna tinreng thawk thei tura finna leh hriatthiamna a pek apiangte chuan an bei tur a ni," a ti a.
36:2	Tin, Mosian Bezalela leh Oliaba leh mi themthiamho, LALPAN an thinlunga finna a pek a, chu mi hna bei peih tura thinlung taka phur sarh apiang chu a ko va:
36:3	tin, Israela thlahten hmun thianghlima rawngbawl nana thil siam tura an rawn thawh zawng zawng chu Mosia hnen atangin an la zel a. Tin, tuk tin, duh thua thilhlante chu a hnenah an rawn hlen zel bawk a.
36:4	Tin, mi themthiamho zawng zawng, hmun thianghlim atana hna tinreng thawkte chuan an hnathawh lai chu antlansan theuh va,
36:5	Mosia hnenah, "LALPAN siam tura thu a pek siam nan mite chuan a chuang aliamin thil an rawn la e," tiin an thlen a.
36:6	Tin, Mosia chuan thu a lo pe a, tichuan, "Hmun thianghlim atana thil pek tur chu a hmei apa, tumahin rawn buatsaih tawh suh se," tiin an riahhmunah c chuan an tlangautir ta a. Chuti chuan mite chuan an rawn lak phal a ni ta lo va.
36:7	An neih sa chu siam tul apiang siamna tur chuan a tawk hle mai a, a tam lutuk mah a ni.
36:8	Tin, an zinga mi themthiam hna thawkho zawng zawngte chuan biak buk chu puanzar sawm neiin an siam a; chu puanzarte chu la zai sin tak kawp te, dum pawl te, sen duk te, sen lar te hmangin cherub lemte mi thiam tak siam chuantirin a siam a.
36:9	Puanzar hu a sei lam tawng sawmhnih leh tawng riat theuh a ni a, puanzar chu a hlai lam tawng li theuh a ni: puanzar zawng zawng chu a inchen vek a.
36:10	Tin, puanzar pangate chu a zawm vek a; tin, puanzar panga dangte pawh chu a zawm bawk a.
36:11	Tin, puanzar zawm khat hmawrtawng ber tlangah chuan a beng a dum pawlin a siam a: chutiang bawkin puanzar zawm lehlam hmawrtawng ber tlangah chuan a siam bawk a.
36:12	Puanzar pakhatah chuan beng sawmnga a siam a, tin, zawm khat puan zar tlangah pawh chuan beng sawmnga a siam bawk a: chung bengte chu a inep thliah a.
36:13	Tin, rangkachak chilhbehna sawmnga a siam a, a chilhbehnate chuan puanzarte chu a chilh bet a: tichuan biak buk chu pindan pakhat a lo ni t a.
36:14	Tin, biak buk chu khuh nan kel hmun puanzarte a siam a: puanzar sawm leh pakhat a siam a.
36:15	Puanzar chu a sei lam tawng sawmthum theuh a ni a, tin, puanzar chu a hlai lam tawng li theuh a ni: puanzar sawm leh pakhatte chu a inchen vek a.
36:16	Tin, puanzar pangate chu athui zawm vek a, tin, puanzar paruk pawh chu a thui zawm vek a.
36:17	Tin, puanzar zawm khat hmawrtawng ber tlangah chuan beng sawmnga a siam a, tin, puanzar zawm lehlam tlangah chuan beng sawmnga a siam bawk a.
36:18	Tin, puan in chu pindan pakhat a lo ni theih nan a chilh zawna turin dar chilhbehna sawmnga a siam a.
36:19	Tin, berampa vun chhum senin puan in chu khuhna te, savun tha miin a chua khu lehnate a siam a.
36:20	Tin, biak buk ban rem khawm turte chu ngil taka dingin thingri thingin a siam a.
36:21	ban rem khawm sei lam chu tawng sawm a ni a, tin, a vang lam chu tawng khat leh a chanve theuh a ni a.
36:22	Ban rem khawm tinah chuan ke pahnih inzawmin a zawm a: chutiang chuan biak buk ban rem khawm zawng zawng chu a siam a.
36:23	Tin, biak buk atan chuan ban rem khawmte a siam a; chhim chhawng chhim lampang atan chuan ban rem khawm sawmhnih a siam a:
36:24	tin, chu mi ban rem khawm sawmhnih nghah chhan atan chuan tangkaraw tlang kerkuak sawmli a siam a; a ke pahnih atan ban rem khawm pakhat nghah chhan kerkuak pahnih leh a ke pahnih atan ban rem khawm dang pakhat nghah chhan kerkuak pahnih a siam a.
36:25	Tin, biak buk sir lehlam hmar chhawng lam atan chuan ban rem khawm sawmhnih a siam a, tin, chhung atan chuan ban rem khawmsawmhnih a siam a.
36:26	tin, chu atan chaun tangkaraw tlang kekuak sawmli nen, ban rem khawm pakhat atan nghahchhan kerkuak pahnih nen, ban rem khawm dang pakhat atan nghah chhan kerkuak pahnih a siam a.
36:27	Tin, biak buk kawmchar khawthlang chhawng lam atan chaun ban rem khawm paruk a siam a,
36:28	Tin, biak buk kawmchar kil ve ve atan chuan chuan ban remkhawm pahnih a siam a.
36:29	Tin, a hnuai lamah chuan thlawp a ni a, chutiang bawkin a chhip lam kang hmasa ber thlengin thlawp a ni a, a kil pahnihah chuan chutiangin a ti ve ve a.
36:30	Tin, ban rem khawm pariat, a nghah chhan tur tangkaraw tlang kerkuak sawm leh paruk nen a awm a, ban remkhawm tin, innghah nan kerkuak pahnih zel a awm a ni.
36:31	Tin, thingri thingin bangrel, biak bung ban nglehlam ban rem khawm atan panga,
36:32	biak buk bang leh lam ban rem khawm atan panga, tin, biak buk kawmchar khawthlang chhawng lam ban rem khawm atan pawh panga a siam a,
36:33	Tin, bangrel laita, ban rem khawm lai taka mi chu ban rem khawm h mawrtawng ber atangin a lehlam hmawrtawng ber atangin a lehlam hmawrtawng ber thlenga thil tlang turin a siam a.
36:34	Tin, ban rem khawmte chu rangkachak tiin a luan a, tin, bangrelte thil nan rang kachak khangte a siam a, tin, chung bangrelte chu rangkachak tiin a luan a.
36:35	Tin, puanzar tur chu la zai sin tak kawp te, a dum pawl te, a sen duk te, sen lar te hmangin cherub lemte mi thiam tak siam chuantirin a siam a.
36:36	Tin, chu mi atan chuan thingri ban pali a siam a, chu chu rangkachak tiin a luan a: a bannate chu rangkachak a ni: tin, chu nghah chhan atan chuan tangkaraw tlang kerkuak pali a chhung a.
36:37	Tin, Puan in kawngkaa zar tur la zai sin tak kawp te, a dum pawl te, a sen duk te, a sen larte hmangin, puan zeh mawi thiam tak zeh nen a siam a:
36:38	tin, chu mi zarna tur ban panga a bannate nen a siam a: tin, ban lubawkte leh a zarfungte chu rangkachak tiin a luan a: tin, chu nghahchhan kerkuak pangate chu dar a ni a.