Exodus 40

THUTHLUNGHLUI   Exodus   Bung 40
40:1	,2 Tin, LALPAN Mosia hnenah, "a thla khatna ni khat niah chuan inbiakna puan in biak buk chu i din tur a ni.
40:3	Tin, a chhungah chuan thuhriattirna bawm i dah tur a ni a, tin, bawm chu puanzarin i daidan tur a ni.
40:4	Tin, dawhkan kha la lutin, a chunga thil awmte chu i dah fel tur a ni; khawnvar dahna kha la lutin, a khawnvarte chu i dah tur a ni.
40:5	Tin, hal tur rimtui halna rangkachak maicham kha thuhriattirna bawm hmaa dahin, bia buk kawngka puanzar kha i zar tur a ni.
40:6	Tin, halrala thilhlanna maicham kha inbiakna puan in biak buk kawngka bulah i chhung tur a ni.
40:7	Tin, inbiakna puan in leh maicham inkarah chuan maihun chhungin, chutah chuan tui i dah tur a ni.
40:8	Tin, biak buk vel chuan a hung chhung kawtlai puanzar chu i zar tur a ni.
40:9	Tin, hriak thih mi lain, biak buk leh a chhunga awm zawng zawngte chu hnawihin, i tithianghlim tur a ni, a bungbel zawng zawngte nen: tichuan a lo thianghlim ang.
40:10	Tin, halrala thilhlanna maicham leh a hmanrua zawng zawngte chu hriak hnawihin, maicham chu i tithianghlim tur a ni: tichuan maicham chu thianghlim tak a lo ni ang.
40:11	Tin, maihun leh a hun chhan chu hriak hnawihin i tithianghlim tur a ni.
40:12	Tin, Arona leh a fapate chu inbiakna puan in kawngka bula rawn hruaiin tuiin i sil tur a ni.
40:13	Arona chu silhfen thianghlimte chu i sintir tur a ni. Tichuan puithiam hna thawka ka tan rawng a bawl theina tura hriak thihin i tithianghlim tur a ni.
40:14	Tin, a fapate pawh rawn hruaiin kawr i haktir tur a ni:
40:15	tichuan puithiam hna thawka ka tan rawng an bawl theihna turin an pa hriak i thih ang khan anmahni chu hriak i thih tur a ni: hriak thiha an awm hi an thlahte thleng pawha kumkhuaa puithiam tura ruat an ni reng tawh ang tih an tan chhinchhiahna ani ang," tiin a sawi a.
40:16	Chutiang chan Mosian a ti a: LALPAN tih tura thu a pek ang zawng zawng chuan a ti vek a.
40:17	Tin, heti hi a ni a, a kum hnihna thla tir ber, chu mi thla ni khat ni tak chuan biak buk chu an lo din ta a.
40:18	Tin, Mosia chuan biak buk chu a han din a, a nghah chhan kerkuakte a han rem a, a ban remkhawmte chu a han din a, a nghahchhan kerkuakte a han rem a, a ban remkhawmte chu a han din a, a bangrelte chu a han rawlh a, a bante chu a han tung a.
40:19	Tin, biak buk chuah chuan puan in a zar a, chu mi puan in chu chu a khuhnain a khu leh a; LALPAN Mosia thu a pek ang khan.
40:20	Tin, thuhriattirna chu alaa, bawm chhungah a dah a, bawmah chuan a zawnfungte a rawlh a, bawm chhunga chuan zahngaihna thuphah a dah a:
40:21	tin, bawm chu biak buk chhungah chuan a dah a, a daidanna puanzar chu a zar a, thuhriattirna bawm chu a daidang ta a; LALPAN Mosia thu a pek ang khan.
40:22	Tin, dawhkan chu inbiakna puan in chu, biak buk hmar lampang, puan zar pawn lamah chuan a chhung a,
40:23	Tin, dawhkanah chuan LALPA hmaah chhang chu a dah fel diam a; LALPAN Mosia thu a pek ang khan.
40:24	Tin, khawnvar dahna chu inbiakna puan in chu biak buk chim lampang dawhkan epah chuan a dah a.
40:25	Tin, khawnvarte chu LALPA hmaah chuan a dah a; LALPAN Mosia thu apek ang khan.
40:26	Tin, rangkachak maicham chu inbiakna puan in chu puanzar hmaa chuan a dah a:
40:27	tin, a chhungah chuan englo rimtui tak hal tur rimtui a hal a; LALPAN Mosia thu a pek ang khan.
40:28	Tin, biak buk kawngka puanzar a zar a.
40:29	Tin, inbiakna puan in biak buk kawngka bulah chuan halrala thilhlanna maicham a chhung a, a chhungah chuan halral thilhlan leh ei tur thilhlan a hlan a; LALPAN Mosia thu a pek ang khan.
40:30	Tin, maihun chu inbiakna puan in leh maicham inkarah chuan a chhung a, insilna turin tui a chhung a.
40:31	Tin, Mosia leh Arona leha fapate chuan chutah chuan an kut leh an kete an sil a,
40:32	inbiakna puan ina an luh dawn leh, maicham bula an kal dawnin an insil a ni: LALPAN Mosia thu a pek ang khan
40:33	Tin, biak buk leh maicham vel chuan hung chhung kawtlai chu a siam a, a hung chhung kawtlai kawngka puanzar chu a zar a. Chutichuan Mosian hna chu a zo ta a.
40:34	Tichuan inbiakna puan in chu chhumin a rawn tuam ta mup a, biak buk chu LALPA ropuinain a lo khat ta a.
40:35	Tin, chutia chhum a lo zin tak mup a, LALPA ropuinaa biak buk chu a lo khah tak avangin Mosia chu inbiakna puan in chhungah chuan a lut thei ta lo va.
40:36	Tin, chhum chuan biak buk chu a kian chhohsan veleh Israela thlahte chu an insawn zel a, an kalna tur lama an kal chhung zawng chuan
40:37	chhum chuan a kian chhohsan loh erawh chuan a kian chhohsan hma loh zawng insawn lovin an awm reng thin.
40:38	Chhunah chuan LALPA chhum chu biak buk chungah a zing a, chutah chuan zanah mei a lo awm thin a. Israel-ho zawng zawngte chuan an kalna tur lama an kal chung zawng chuan chu chu an hmu zel thin a ni.