Genesis 12

THUTHLUNGHLUI   Genesis   Bung 12
12:1	Tin, LALPAN Abrama hnenah chuan, "I khaw lam ata leh i laichinteho zing ata leh i pa in ata chhuak la, ram ka la entir tur che lamah kal rawh:
12:2	tichuan chi ropui takah ka siam ang chia, mal pawh ka siam ang chia, i hming ka tiropui bawk ang; tin, nang malsawmna ni ang che:
12:3	tin, malsawmsaktu apiang che chu mal ka sawm ang a, anchhe lawhtu che chu anchhia ka lawh ang: nangmahah chuan leia hnam tin an la thawveng ang," a ti a.
12:4	Chutichuan Abrama chu LALPAN a hnena a sawi angin a kal ta a; Lota chu a hnenah a kal ve a: tin, Abrama chu Haran khua ata a chhuah lai chuan kum 75 mi a ni a.
12:5	Tin, Abraman a nupui Saraii leh, a nau fapa Lota leh an sum deh chhuah zawng zawng leh Haran khuaa an mi neih turte chu a hruai a; Kanaan rama kal turin an chhuak a; tin, Kanaan ram chu an thleng ta a.
12:6	Tin, Abrama chu, chu mi ramah chuan Sekem hmun thlengin, More sasua thleng chuan a kal zel a. Chung lai chuan Kanaanhote chu chu mi ramah chuan an awm a.
12:7	Tin, LALPA chu Abrama hnenah a inlar a, "He ram hi i thlahte hnenah ka la pe ang," a ti a: tichuan chutah chuan a hnena inlar LALPA tan chuan maicham a siam a.
12:8	Tin, chuta tang chuan Bethel chhak lama tlangah chuan a insawn a, a chutah chuan a puan in a zar a, a thlang lamah chuan Bethel chu a awm a, a chhak lamah Ai khua a awm a: chutah chuan LALPA tan maicham a siam leh a, LALPA hming chu a lam a.
12:9	Tin, Abrama chu chhim ram lam pan cheuvin a insawn ta zel a.
12:10	Tin, chu mi ramah chuan tam a lo tla a: tin, chu mi ramah chuan tam chu a nasat em avangin Abrama chu Aigupta rama awm rih turin a chhuk ta a.
12:11	Tin, heti hi a ni a, Aigupta rama an luh dawn lai chuan a nupui Saraii hnenah chuan, "Ngai teh, hmeichhe hmel tha tak i ni tih ka hria:
12:12	tichuan hetiang hi a ni ang, Aigupta-hovin an hmuh hunah che chuan, 'Hei hi a nupui a nih hi,' an ti ang a: tin, kei chu mi that mai ang, nang erawh chu an zuah ang che.
12:13	I zara tha taka ka awm theih nan leh nangmah avanga ka nun theih nan, 'A farnu ka ni,' khawngaih takin ti zel ang che," a ti a.
12:14	Tin, heti hi a ni a, Abrama chu Aigupta rama a luh chuan, Aiguptaho chuan hmeichhia chu an hmu a, a hmel chu tha an ti em em a.
12:15	Pharaoa mi liante pawhin an hmu a. Pharaoa inah an hruai lut ta a.
12:16	Tin, ani chuan Saraii avangin Abrama chu tha takin a ti a: tichuan beram te, bawng te, sabengtungpa te, bawihpa te, bawihnu te, sabengtungnu te, sanghawngsei te a neih phah ta a.
12:17	Tin, LALPA chuan Abrama nupui Saraii avangin Pharaoa leh a chhungte chu sawisakna namenin a sawisa ta lo va.
12:18	Tichuan Pharaoa chuan Abrama chu a ko va, "Ka chunga i thiltih hi eng tizia nge ni le? I nupui a ni tih engati nge mi hrilh loh?
12:19	Ka farnu a ni,' engati nge i tih? Chu mi avang chuan alawm ka nupuia ka lo neih tak hial ni: aw le, tunah en rawh i nupui hi, hruai la, kal daih rawh," a ti a.
12:20	Tin, Pharaoa chuan a chungchang thuah chuan mi hnenah thu a pe a, tichuan amah an han thlah ta a, a nupui nen a neih zawng nen.