Genesis 15

THUTHLUNGHLUI   Genesis   Bung 15
15:1	Chung thil hnuah chuan, "Abram, hlau suh , kei hi i phaw leh i lawmman nasa tak mai ka ni asin," tiin LALPA thu chu Abrama hnenah mumang angin a lo thleng a.
15:2	Tin, Abrama chuan, "Aw Lalpa PATHIAN, engnge mi pek ang, fa nei lovin ka awm hlen dawn a, ka ro khawmtu tur chu Damaska khuaa mi Eliezera hi a ni si a?" a ti a.
15:3	Tin, Abrama vekin, "Ngai teh, chi reng reng mi thlahtir si lo va: en teh, ka ina piang hi ka ro luahtu tur a ni," a ti a.
15:4	Tin, ngai teh, "Kha mi kha i ro luahtu tur a ni lo vang; nangma rila lo la rah tur ngei chu i ro luahtu tur a ni zawk ang," tiin LALPA thu chu a hnenah a lo thleng a.
15:5	Tin, ani chu pawnah a hruai chhuak a, "Van lam khi en la, arsite khi i chhiar theih chuan chhiar teh khai." a ti a. Tin, amah vekin a hnenah, "I thlahte chu khiti zel khi an la ni ang," a ti a.
15:6	Tin, ani chuan LALPA chu a ring a; tichuan ani chuan chu chu a felnaah a ruatsak ta a.
15:7	Tin, a hnenah, "He ram hi luah tira pe tur chea Kaldai-ho khua Ur ata hruai chhuaktu che LALPA kha ka ni," a ti a.
15:8	Tin, ani chuan, "Aw Lalpa PATHIAN, ka luah ang tih engtin nge ka hriat ang?" a ti a.
15:9	Tin, ani chuan a hnenah, "Bawngla kum thum mi leh kelpui kum thum mi leh berampa kum thum mi leh thuro leh parva no mi rawn lak rawh," a ti a.
15:10	Tichuan chung zawng zawng chu a rawn laksak a, a lai takah a phel theuh va, a phel pakhat chu a phel leh lam zawnah chuan a dah theuh zel a: savate erawh chu a phel ve lo va.
15:11	Tin, sava sa hel ei mite chu saruangahte chuan an zuk fu thin a, Abrama chuan a lo hnawt kiang zel a.
15:12	Tin, nia tlak dawn sur sur lai chuan Abrama chu a lo muhil ta daih mai a; tin, ngai teh, thim nasa tak, thil rapthlak zet hian amah a rawn khuh a.
15:13	Tin, Pathian chuan Abrama hnenah, "I thlahte chu anmahni ram lovah chuan mikhualin an la awm ang a, an rawng an la bawlsak ang tih chiang takin hre rawh khai; tin, kum 400 an tirethei ang a;
15:14	tin, an rawng an bawlsakate chi pawh chu ka la ngaihtuah ang: tin, chu mi hnuah chuan sum tam tak neiin an lo la chhuak ang.
15:15	Nang erawh chu i thlahtute hnenah thlamuang takin i kal ang a; i lua kelsam to vekin an phum ang che.
15:16	Tin, chhuan linaah chuan hetah hian an lo kal leh ang; Amor-ho sualnate hi a la kim rih si lo," a ti a.
15:17	Tin, heti hi a ni a, ni a tlaka khua a lo thim chuan, ngai teh, rawhtuina mei khu mup mup leh chung sa phel karah chuan meichher alh hluah hluah kal kal a lo awm a.
15:18	Chu mi nichuan LALPA chuan, "He ram hi, Aigupta lui atanga lui lian pui (Euphrates lui) thlengin i thlahte ka pe tawh;
15:19	Ken-ho te, Keniz-ho te, Kadmon-ho te,
15:20	Hit-ho te, Periz-ho te, Rephaim-ho te,
15:21	Amor-ho te, Kanaan-ho te, Girgas-ho te nen hian ka pe bawk a," tiin Abrama hnenah chuan thu a thlung ta a.