Genesis 17

THUTHLUNGHLUI   Genesis   Bung 17
17:1	Tin, Abrama chu kum 99 mi a nihin, LALPA chu Abrama hnenah chuan a rawn inlar a, a hnenah, "Kei, Pathian Engkimtitheia ka ni; ka hmaah awm la, thafamkimin awm rawh.
17:2	Tichuan nangmah nena kan inkarah thu ka thlung ang a, nasa takin ka tipung ang che," a ti a.
17:3	Tin, Abrama chu a bawkkhup ta a: tin, Pathianin ani chu a bia a,
17:4	"Ngai teh, kei zawngin, ka thuthlung chu i hnenah a ni ka thlun ni, tichuan chi hrang hrang tam tak thlahtu i ni tawh ang.
17:5	I hming pawh Abrama a ni tawh lo vang a, i hming hi Abrahama a ni tawh zawk ang; chi hrang hrang tam tak thlahtu tura ka siam tak che hi.
17:6	Tin, nasa takin chi ka thlahtir ang chia, nangmahah chuan chi tih tham zet zette ka siam ang a, nangmah atang chuan lalte an lo chhuak bawk ang.
17:7	Tin, kei leh nang leh i hnua i thlahte, an thlah chhawng zelte thleng pawhin ka thuthlung hi, i tan leh i hnua i thlahte, tana an Pathian ni turin, kumkhaw thuthlung atan ka tinghet ang.
17:8	Tin, i hnenah leh i hnua i thlahte hnenah chuan i mikhualna ram, Kanaan ram zawng zawng hi kumkhaw ro atan ka pe dawn che u a ni; tin, kei hi an Pathian ka ni ang," a ti a.
17:9	Tin, Pathian vekin Abrahama hnenah chuan, "Tin, nang zawngin ka thuthlung hi i zawm tur a ni; nangin i zawm tur a ni a, i hnua i thlahte, an thlah chhawng zelte thleng pawhin an zawm ve tur a ni.
17:10	Hei hi kei leh nang leh i hnua i thlahte kara ka thuthlung i zawm tur chu a ni; in zinga mipa tawh phawt chu serh tan tur a ni.
17:11	Tichuan in serhvun tisaah chuan serhtanin in awm tur a ni; chu chu nangmah nena kan inkara thuthlung chhinchhiahna a ni ang.
17:12	Tichuan in zinga ni riat mi chu, in thlah chhawng zelte thleng pawhin, i thlah ni kher lo pawh i ina piang emaw mikhual tu lak pawha tangka suma i lei emaw pawh, mipa tawh phawt chu serh tan tur a ni.
17:13	I ina piang leh i tangka suma i lei pawh serh tan ngei tur a ni: tichuan ka thuthlung chu kumkhaw thuthlung atan in tisaah a awm tawh ang.
17:14	Tin, mipa serh tan loh, a serh vun tisa serh tana awm lo chu, chu mi ngei chu a chipui zing ata tihboral a ni ang; ani chuan ka thuthlung chu a bawhchhia a ni," a ti leh a.
17:15	Tin, Pathian vekin Abrahama hnenah, "I nupui Saraii zawng, a hmingah chuan Saraii i ti tawh lo vang a, a hming chu Sari a ni tawh zawk ang.
17:16	Tin, ani chu mal ka sawm ang a, chu lo pawh chu ama lakah chuan fapa ka pe ang che:a ni, amah chu mal ka sawm ang a, chi hrang hrang thlahtunu a ni tawh ang; hnam hrang hrang lalte ama lakah chuan an lo la chhuak ang," a ti leh pek a.
17:17	Chutichuan Abrahama chu a bawkkhup a, a nui a, a rilruin, "Kum za mi hian fa a nei dawn em ni ang? Sari, kum sawmkaw mi chuan fa a hring dawn em ni ang?" a ti a.
17:18	Tin, Abrahama vek chuan Pathian hnenah, "Ismaela hi i hmaah awm thei sela aw!" a ti a.
17:19	Tin, Pathianin, "Nilo ve, i nupui Sarin fapa a hrinsak zawk ang che; a hmingah chuan Isaaka i sa tur a ni: tin, ka thuthlug chu ama hnua a thlahte tan kumkhaw thuthlung atan a hnenah chuan ka tinghet ang.
17:20	Ismaela chung thu pawh hi ka ngaihthlaksak che a ni: Ngai teh, amah chu mal ka sawm tawh a, chi tam tak ka thlahtir ang a, nasa takin ka tipung bawk ang; ani chuan lal sawm leh pahnih a hring ang a, amah chu chi ropui takah ka la siam ang
17:21	Ka thuthlung erawh chu Isaaka, Sarin nakkum hetih hun taka a hrinsak tur che hnenah chuan a ni ka tihngheh zawk dawn ni," a ti a.
17:22	Tichuan a hnena a thusawi chu a bang a, tin, Pathian chuan Abrahama chu a chhohsan ta a.
17:23	Tin, Abrahama chuan a fapa Ismaela leh, a ina piang zawng zawngte leh a tangka suma a lei zawng zawng, Abrahama chhungte zinga mi mipa tawh phawt chu a hruai a, Pathianin a hnena a sawi tawh angin, chu mi ni ngei chuan an serh vun tisa chu a tansak ta a.
17:24	Tin, Abrahama chu a serh vun tisaa a serh an tan lai chuan kum 99 mi a ni a.
17:25	Tin, a fapa Ismaela chu a serhvun tisaa a serh an tan lai chuan kum 13 mi a ni a.
17:26	Chu mi ningei chuan Abrahama leh a fapa Ismaela chu serhtan an lo ni ta a.
17:27	A chhungte zinga mipa zawng zawng, a ina piangte leh mikhual laka tangka suma a leite pawh ama rual chuan serhtan an lo ni ta vek a.