Genesis 2

THUTHLUNGHLUI   Genesis   Bung 2
2:1	Tichuan lei leh van chu an chunga awmho zawng zawngte nen chuan siam zawh a ni ta a.
2:2	Tin, Pathianin ni sarih niah chuan a thil siam chu a ti zo va: ni sarih niah chuan a thil siam zawng zawng chu a chawlhsan ta a.
2:3	Tichuan Pathianin ni sarih ni chu mal a sawm a, a serh ta a: chu mi niah chuan Pathianin a thil siam zawng zawng, thu ngawta a siam leh kuta a siamte chu a chawlhsan tak avangin.
2:4	Lei leh van siam lai khan an thlahte chu heng hi an ni, LALPA Pathianin lei leh van a siam ni khan.
2:5	Tin, leia hnim reng reng hi leiah ala awm lo va, leia thlai reng reng pawh hi a Ia to hek lo: LALPA Pathianin lei chungah ruah a la surtir si lo va, lei lettu turin mihring lah an la awm hek lo;
2:6	amaherawhchu lei atangin chhum a lo chhuak a, lei chung zawng zawng chu a tihnawng thin a ni.
2:7	Tin, LALPA Pathianin leia vaivutin mihring a siam a, a hnarah chuan nunna thaw chu a thaw lut a; tichuan mihring chu mi nung a lo ni ta a.
2:8	Tin, LALPA Pathianin chhak lamah, Eden-ah chuan huan a siam a; a mihring siam chu chutah chuan a awm tir ta a.
2:9	Tin, lei atangin LALPA Pathianin thing mit la tak leh ei mi tinreng a to tir a; nunna thing pawh huan lai takah chuan a to tir bawk a, a chhia leh tha hriatna thing pawh.
2:10	Tin, Eden atangin huan tihnawng turin lui a luang chhuak a; chuta tang chuan a peng darh a, peng li a lo ni ta a.
2:11	A pakhatna hming chu Pison a ni a: chu chu Havila ram zawng zawng hualtu chu a ni a, chutah chuan rangkachak a awm a;
2:12	chu mi rama rangkachak chu tha tak a ni: chutah chuan bedolak leh berul lung pawh a awm.
2:13	Tin, lui pahnihna hming chu Gihon a ni a: chu mi ngei chu Kus ram zawng zawng hualtu chu a ni.
2:14	Tin, lui pathumna hming chu Hiddekel a ni a: chu chu Assuria ram chhak lama luang chu a ni. Tin, lui palina chu Euphrates a ni.
2:15	Tin, LALPA Pathian chuan mihring chu a hruaia, Eden huanah chuan a enkawl leh a veng turin a dah ta a.
2:16	Tin, LALPA Pathian chuan mihring hnenah chuan, "Huana thing tinreng rahte hi i duh duhin i ei thei e;
2:17	a chhia leh a tha hriatna thing rah erawh hi chu i ei tur a ni lo: i ei chuan i ei ni la lain i thi ngei tur a ni," tiin thu a pe a.
2:18	Tin, LALPA Pathian chuan, "Mihring amah chauhva awm hi a tha lo ve: a mah tanpuitu tur a kawppui awm mi ka siamsak teh ang," a ti a.
2:19	Tin, LALPA Pathian chuan, leiin ram sa tinreng leh chungleng sava tinreng chu a siam a; tin, an hmingah engnge a vuah dawn tih hriat nan Adama hnenah a hruai hlawm a; tin, thil nung tinrengte chu Adaman an hminga a lo vuah apiang chu an hming a lo ni hlen ta a.
2:20	Tichuan Adama chuan ran zawng zawng te, chungleng sava te, ram sa tinrengte chu hming a vuahsak theuh va; nimahsela Adama tan chuan tanpuitu tur a kawppui awm mi a awm lo va.
2:21	Tichuan LALPA Pathian chuan Adama chu tui takin a muthilhtir a, tichuan a muhil ta a; tin, a nakruh pakhat a la a, chu mi ai chu tisain a awh phuitir ta a;
2:22	tin, LALPA Pathian chuan Adama laka a lak nakruh chu hmeichhiaah a siam a, Adama hnenah a hruai ta a.
2:23	Tin, Adama chuan, "Hei zet chu ka ruh ang ruh neia, ka tisa ang tisa nei ngei chu a ni: Mipa laka lak chhuah a nih avangin 'hmeichhia' tih tur a ni ang", a ti a.
2:24	Chuvangin mipain a nu leh pa a kalsan ang a, a nupui a vuan ang: tichuan tisa pum khat an lo ni tawh ang,
2:25	Tin, Adama leh a nupui chu an pahnihin saruakin an awm a, an zak lem lo va.