Genesis 26

THUTHLUNGHLUI   Genesis   Bung 26
26:1	Tin, chu mi ramah chuan Abrahama dam laia tam lo tla hmasa zawk tih loh kha, tam a lo tla leh a. Tichuan Isaaka chu Philistin-ho lal Abimeleka hnenah Gerar khuaah aaa zuk kal a.
26:2	Tin, LALPA chu a hnenah a rawn inlar a, "Aigupta ramah chuan zuk kal suh; ram ka hrilh turah che chuan awm rawh:
26:3	he ramah hian awm rih la, tichuan i hnenah ka awm ang a, mal ka sawm dawn che nia; heng ram zawng zawng hi nangmah leh i thlahte pein, i pa Abrahama hnena chhia ka chham kha ka tinghet dawn a ni;
26:4	tin, vana arsi zatin i thlahte chu ka la tipung ang a, heng ram zawng zawng hi i thlahte ka la pe bawk ang; tin, i thlahah chuan khawvela chi tin an la thawveng ang;
26:5	Abrahama chuan ka thu a awih a, ka thuhrilhte, ka thupekte, ka thuruatte, ka dante pawh a zawm avang khan," a ti a.
26:6	Tichuan Isaaka chuan Gerar khuaah chuan awm hmun a khuar ta a:
26:7	tin, chu mi khuaa mite chuan a nupui chanhin an zawt a; tin, ani chuan, "Ka farnu a ni," a ti a: a hmel that avangin "He khuaa mite hian Rebeki avangin mi that dah ang e," tiin, "Ka nupui a ni," a ti ngam lo a ni.
26:8	Tin, heti hi a ni a, chutah chuan rei tak a awm hnuin, Philistin-ho lal Abimeleka chuan tukverh atangin a han thlir a, tin, ngai teh, Isaaka chuan a nupui Rebeki a chhaih lai a han hmu a.
26:9	Tichuan Abimelekan Isaaka chu a ko va, "Ngai teh, i nupui a nih ngei hi le: engati nge 'Ka farnu a ni' i tih mai le?" a ti a. Tin, Isaaka chuan a hnenah, "Amah avangin ka thi dah ang e,' ka tih avang a ni," a ti a.
26:10	Tin, Abimeleka chuan, "Kan chunga i thiltih hi engtizia nge ni le? Mite zinga mi tupawh hian i nupui hi an lo mutpui mai thei asin, tichuan kan chungah hian thiam lohna i rawn thlentir a ni dawn a," a ti a.
26:11	Tin, Abimeleka vek chuan, "Tupawh he mi hi emaw a nupui hi emaw khawih apiang chu tihhlum ngei ngei tur a ni," tiin mi zawng zawng chu thu a pe a.
26:12	Tin, Isaaka chuan chu mi ramah chuan buh a ching ve a, chu mi ramah chuan buh za a hmu a: LALPAN mal a sawm bawk a.
26:13	Tichuan ani chu a lo ropui ta hle a, nasa taka mi ropui lo ni khawpin a lo lian ta tulh tulh a:
26:14	beram rualte leh bawng rualte a nei a, chhungte tam tak a nei bawk a: tichuan Philistin-ho chuan an insem ta a.
26:15	Tin, a pa Abrahama dam laia a pa chhiahhlawhten tuichhunchhuah an laih zawng zawngte chu Philistin-hoten an hnawh a, leiin an lo tikhat ta vek mai a.
26:16	Tin, Abimeleka chuan Isaaka hnenah, "Kan hnena ata kal bo daih rawh, kan aiin i chak zawk si a," a ti a.
26:17	Tichuan Isaaka chu chuta ta chu a chhuak a, Gerar ruamah chuan a puan in a zar a, chutah chuan awm hmun a khuar ta a.
26:18	Tin, Isaaka chuan a pa Abrahama dam laia an tuichhunchhuah laihte chu a lai leh a; Abrahama thih hnu khan Philistin-ho chuan an lo hnawh khat vek tawh si a: tin, a pain a hming a lo vuah ang zel khan a hming a vuah hlawm a.
26:19	Tin, Isaaka chhiahhlawhten ruamah chuan an lai a, chutah chuan tuichhunchhuah hna nei an hmu ta hlauh va.
26:20	Tichuan Gerar khuaa ranpute chuan, "Tui hi kan ta a ni," tiin Isaaka ranpute nen chuan an inhnial a: tichuan amah nen an inhnial avangin tuichhunchhuah hmingah chuan "Esek" a vuah ta a.
26:21	Tin, tuichhunchhuah dang an lai leh a, chu mi pawh chu chuh tumin an inhnial leh a: tichuan a hmingah chuan "Sina" a vuah leh a.
26:22	Tin, chuta ta chu a insawn a, tuichhunchhuah dang a lai leh a; chu chu chuh tumin an inhnial ta lo va: tichuan "Tunah zawng LALPAN hmun zau tak mi siamsak ta a, he ramah hian chi tam tak kan thlah tawh ang," tiin a hmingah chuan "Rehoboth" a vuah ta a.
26:23	Tin, chuta tang chuan Beer-seba-ah a han chho va.
26:24	Chu mi zan ngei chuan LALPA chu a hnenah a rawn inlar a, "Kei hi i pa Abrahama Pathian chu ka ni: hlau suh, i hnenah ka awm alawm, mal ka sawm ang chia, ka chhiahhlawh Abrahama avangin i thlahte chu ka la ti pung dawn asin," a ti a.
26:25	Tichuan chutah chuan maicham a siam a, LALPA hming chu a lam a, chutah chuan a puan in a zar bawk a: tin, Isaaka chhiahhlawhte chuan chutah chuan tuichhunchhuah an lai leh a.
26:26	Tin, Gerar khua atangin Abimeleka chu a thian Ahuzzatha nen, a sipai pawl hotu Phikola nen, a hnenah an kal a.
26:27	Tin, Isaaka chuan an hnenah, "Mi hua a, in hnena ata mi kal botir si a, eng vangin nge ka hnenah in lo kal le?" a ti a.
26:28	,29 Tin, anni chuan, LALPA chu i hnenah a awm tih chiang takin kan hria a, tichuan, 'I pawi kan khawih ngai loh ang leh thil tha chauh lo chu i chungah engmah reng reng kan tih loh va tlang taka kan kal botir ta che ang khan, keini pawh kan chhiatna tur reng reng i tih lohna turin kan karah, keini leh nangma kar ngeiah hian chhechhamna lo awm tawh sela, i hnenah thu min thluntir rawh,' kan ti: tunah chuan nang zawnh LALPA malsawm dawngtu i nih tawh hi," an ti a.
26:29	,28 Tin, anni chuan, LALPA chu i hnenah a awm tih chiang takin kan hria a, tichuan, 'I pawi kan khawih ngai loh ang leh thil tha chauh lo chu i chungah engmah reng reng kan tih loh va tlang taka kan kal botir ta che ang khan, keini pawh kan chhiatna tur reng reng i tih lohna turin kan karah, keini leh nangma kar ngeiah hian chhechhamna lo awm tawh sela, i hnenah thu min thluntir rawh,' kan ti: tunah chuan nang zawnh LALPA malsawm dawngtu i nih tawh hi," an ti a.
26:30	Tin, ani chuan an tan ruai a theh sak a, tichuan an eiin an in ta a.
26:31	Tin, zing lamah chuan zing takah an tho va, chhia an chham tawn a: tin, Isaakan anni chu a kaltir a, tichuan a hnen atang chuan tlang takin an chhuak ta a.
26:32	Tin, heti hi a ni a, chu mi nivek chuan Isaaka chhiahhlawhte chu an lo kal a, an tuichhunchhuah laih chanchin an rawn hrilh a, a hnenah, "Tui kan hmu ta," an ti a.
26:33	Tichuan chu tuichhunchhuah chu "Siba" a vuah a; chuvangin chu mi khaw hming chu tun thlengin "Beer-seba" a la ni a.
26:34	Tin, Esauva chu kum 40 mi a nihin, Hit mi Beeria fanu Judithi leh, Hit mi Elona fanu Basemathi nupuiah a nei a:
26:35	chungte chu Isaaka leh Rebeki thinlung tiretheitute an ni a.