Genesis 29

THUTHLUNGHLUI   Genesis   Bung 29
29:1	Chu mi hnuah chuan Jakoba chu a kal ta zel a, khaw chhak fate ram chu a thleng ta a.
29:2	Tin, a han en a, ngai teh, phulah hian tuichhunchhuah a lo awm a, a kiangah chuan beram rual thum hi an bawk reng a; chu mi tuichhunchhuah ata chu beram rualte chu tui an intir thin a ni: tuichhunchhuah kawngkaa lung awm chu a lian hle a.
29:3	Tin, chutah chuan beram rual zawng zawng an kal khawm thin a: tin, tuichhunchhuah kawngka ata lung chu an lum sawn a, beramte chu tui an intir a, lung chu tuichhunchhuah kawngkaa a awmna pangngaiah chuan an dah leh thin a.
29:4	Tin, Jakoba chuan an hnenah, "Ka unaute u, khawi lama mi nge in nih?" a ti a. Tin, anni chuan, "Haran khuaa mi kan ni," an ti a.
29:5	Tin, ani chuan an hnenah, "Nahora fapa Labana in hria em?" a ti a. Tin, anni chuan, "Hria e," an ti a.
29:6	Tin, ani chuan an hnenah, "A dam lai em ni? a ti a. Tin, anni chuan, "Dam lai rih e: en teh, a fanu Rakili pawh beram hruaia a lo kal saw," an ti a.
29:7	Tichuan ani chuan, "Ngai teh u, ni a la sang hle a, ran hruai khawm pawh a la hun hek lo. Beramte hi tui intir ula, va thlah rawh u khai," a ti a.
29:8	Tin, anni chuan, "Kan tehi lovang, beram rual zawng zawng an kal khawm a, tuichhunchhuahah kawngka ata lung hi an lum sawn hma loh chuan: chu mi hnuah chuan beramte chu tui kan intir thin a ni," an ti a.
29:9	Tin, anmahni a la biak lai chuan, Rakili chu a pa beramte hruaiin a lo thleng ta a; ani chuan a veng thin a ni.
29:10	Tin, heti hi a ni a, Jakoba chuan a nu nuta Labana fanu Rakili leh, a nu nuta Labana beram rual chu a hmuh chuan Jakoba chuan a va hnaih a, tuichhunchhuah kawngka ata lung chu a lum sawn a, a nu nuta beramte chu tui a intir ta a.
29:11	Tin, Jakoba chuan Rakili chu a fawp a, ring takin a tap ta a.
29:12	Tin, Jakoba chuan a pa tupa a nih leh Rebeki fapa a ni tih Rakili chu a hrilh a: tichuan Rakili chu a tlan a, a pa a va hrilh ta a.
29:13	Tin, heti hi a ni a, Labana chuan a farnua fapa Jakoba chanchin chu a hriat veleh, a hmuak turin a tlan a, a pawm a, a fawp a, a inah a hruai ta a. tin, Jakoba chuan chung thu zawng zawng chu Labana chu a hrilh a.
29:14	Labana chuan a hnenah, "Ka thisenpui i nih chu le," a ti a. Tin, thla khat a hnenah a awm ta a.
29:15	Tin, Labana chuan Jakoba hnenah, "Ka tupa i nih avangin a thlawnin ka rawng i bawl tur em ni? Engnge i hlawh ang? Mi hrilh teh khai," a ti a.
29:16	Tin, Labana chuan fanu pahnih a nei a: a upa zawk hming chu Leaii a ni a, a naupang zawk hming chu Rakili a ni.
29:17	Tin, Leaii mit chu a pawl a, Rakili erawh chu mi tituai tha tak a ni a, a hmel pawh a tha hle a.
29:18	Tin, Jakoba chuan Rakili chu a hmangaih a, tichuan, "I fanu naupang zawk Rakili nei turin kum sarih i rawng ka bawlsak ang che," a ti a.
29:19	Tin, Labana chuan, "Ani chu mi dang ka pek ai chuan ka pek che a tha zawk ang chu: ka hnenah awm reng mai rawh," a ti a.
29:20	Tichuan Jakoba chuan Rakili nei tur chuan kum sarih chu a rawng a bawl ta a: nimahsela a hmangaih hle avangin ni rei lo t?ang chauhvin a hria a.
29:21	Tin, Jakoba chuan Labana hnenah, "Ka pawl theihna turin ka nupui chu mi pe rawh le, ka hun a kim tawh si a," a ti a.
29:22	Tichuan Labana chuan chu mi khuaa mi zawng zawng chu a khawm vek a, ruai a theh a.
29:23	Tin, heti hi a ni a, thim hlimah chuan a fanu Leaii chu a hruai a, Jakoba hnenah a hruai lut a; tin, ani chu a lo pawl a.
29:24	Tin, Labana chuan a bawihnu Zilpaii chu a fanu Leaii hnenah a bawihnu atan a pe a.
29:25	Tin, heti hi a ni a, zing a lo nih chuan, ngai teh, Leaii a lo ni ta a: tichuan Jakoban, Labana hnenah, "Ka chunga i thiltih hi eng tizia nge ni le? Rakili nei turin i rawng ka bawl lo vem ni? Eng vangin nge mi bum mai hi le? A ti a.
29:26	Tin, Labana chuan, "Kan ramah hian chutianga fa u hmaa a naupang zawk kaltir chu dan a ni lo asin.
29:27	He mia ni sarih hi thlingtla rih la, tichuan kum sarih dang ka rawng i bawl leh tur aiah chuan mi dang pawh chu kan pe ang che," a ti a.
29:28	Tichuan Jakoba chuan chutiangin a ti a, a ni sarih chu a tlingtla a: tichuan a fanu Rakili chu a nupuiah a pe ta a.
29:29	Tin, Labana chuan a bawihnu Bilhaii chu a fanu Rakili hnenah a bawihnu atan a pe a.
29:30	Tin, Rakili chu a pawl bawk a, Leaii ai chuan Rakili chu a hmangaih zawk bawk a, Labana rawng chu kum sarih dang a bawl leh ta a.
29:31	Tin, LALPA chuan Leaii chu huatin a awm tih a hria a, tichuan a chhul a hawnsak a: Rakili erawh chu a ching a.
29:32	Tin, Leaii chu a rai a, fapa a hring a, a hmingah chuan Reubena a sa a: "LALPA chuan ka hreawmzia a hmuh avang a nih hi: tunah zawng ka pasalin mi hmangaih tawh ang," a ti a.
29:33	Tin, a rai leh a, fapa a hring leh a; "LALPA chuan huatin ka awm tih a hriat avangin hei pawh hi mi pe a nih hi," a ti a, tichuan a hmingah chuan Simeona a sa a.
29:34	Tin, a rai leh a, fapa a hring leh a; "Tunah zet chuan fapa pathum ka hrinsak tak avangin ka pasalin mi zawm tawh ang," a ti a: chuvangin a hmingah chuan Levia an sa a.
29:35	Tin, a rai leh a, fapa a hring leh a: "Tun tumah hi chuan LALPA ka fak ang," a ti a: chuvangin a hmingah chuan Juda a sa a; tin, fa a hring leh ta rih lo va.