Genesis 8

THUTHLUNGHLUI   Genesis   Bung 8
8:1	Tin, Pathianin Nova leh lawnga a hnena thil nung tinreng leh ran zawng zawng awmte chu a hre reng a: tin,Pathianin lei chung lamah hian thli a tlehtir a, tichuan tui chu a lo kam tan ta a;
8:2	tui thuk tak hnate leh van tukverhte pawh chu a lo inkhar a, van atanga ruah lo sur chu tihbovin a awm ta bawk a;
8:3	tichuan tui chu lei chung ata a kam ta deuh deuh va: tichuan ni za leh ni sawmnga chu a ral hnu chuan tui chu a lo tlem ta deuh va,
8:4	Tichuan lawng chu thla sarihna ni sawm leh ni sarih niah chuan Ararat tlangah chuan a lo innghat ta a.
8:5	Tin, tui chu thla sawmna thlengin a tlem ta deuh deuh zel a: tin, thla sawmna ni khat niah chuan tlang chhipte chu a lo lang ta a.
8:6	Tin, ni sawmli hnuah chuan hei hi a ni a, Nova chuan lawng tukverh a siam kha a hawng ta a:
8:7	tin, choak pakhat a thlawh chhuahtir a; chu chu a chhuak a, lei ata tui chu a kang zawh hma loh chuan a thlawk vel a thlawk vel a.
8:8	Tin, lei chungah tui a tlem tawh nge tawh lo tih hriat nan thuro a thlawh chhuahtir leh a;
8:9	nimahsela thuro chuan futna reng reng a hmu lo va, a hnenah lawngah a kir leh ta a, tui chu lei chung zawng zawngah chuan a la awm si a: tichuan a kut a han zen chhuak a, a man a, lawng chhungah a hnenah a la let leh ta a.
8:10	Tin, ni sarih dang a nghak leh rih a; tin thuro chu lawng atangin a thlawh chhuahtir leh a;
8:11	thuro chu tlai lamah chuan a hnenah a lo kir leh a; tin, ngai teh, a hmuiah chuan oliv hnah tihthlawn hlim a rawn pu a: chutichuan Nova chuan leiah tui a tlem ta tih a hre ta a.
8:12	Tin, ni sarih dang a nghak leh pek a; tin, thuro chu a thlawh chhuahtir leh a; tin, a hnenah a lo kir leh ta lo va.
8:13	Tin, heti hi a ni a, a kum 601-na ah, a thla khatna ni khat niah chuan tui chu lei ata a kang zo ta a: tichuan Nova chuan lawng khuhna chu a sawn a, a en a, tin, ngai teh, lei chung chu a lo hil ta tlung a.
8:14	Tin, a thla hnihna ni sawmhnih leh ni sarih niah chuan lei chu a ro zo ta a.
8:15	Tin, Pathianin Nova hnenah chuan,
8:16	"Lawng ata chhuak rawh, nang leh i nupui leh i fapa leh i fapate nupuite pawh i hnenah chhuak ve rawh se.
8:17	Tisa zawng zawng zinga mi thil nung tinreng i awmpuite kha, sava te, ran te, rannung lei chunga bawkvaka kal tinreng te nen khan i hnenah hruai chhuak rawh, leiah hian no nei theuhvin, chi tam tak thlaha an lo punna turin," tiin a sawi a.
8:18	Tichuan Nova chu a chhuak a, a fapate leh a nupui leh a fapate nupuite pawh a hnenah an chhuak ve a:
8:19	sa tinreng te, rannung tinreng te, sava tinreng te, lei chunga che thei apiang te chu anmahni chi awm dan ang theuhvin lawng ata chu an chhuak a.
8:20	Tin, Nova chuan Lalpa tan maicham a siam a; tin, sa thiang tinreng zinga mi leh sava thiang tinreng zinga mi a la a, maichamah chuan halral thilhlante a hlan ta a.
8:21	Tin, LALPAN rimtui chu a hria a; tin, LALPA chuan a rilruin, "Lei chu mihring avangin anchhia ka lawh leh tawh lo vang, mihring rilru ngaihtuahnate chu an naupan tet ata a sual si a; tuna ka hrem ang hian thil nung tinreng ka hrem leh tawh hek lo vang.
8:22	Lei awm chhung zawng buh tuh leh buh lak te, khaw vawt leh khaw lum te, nipui leh thlasik te, chhun leh zan te chu a bo lo vang," a ti a.