I Samuela 3

THUTHLUNGHLUI   I Samuela   Bung 3
3:1	Tin, naupang Samuela chuan Elia hmaa uan LALPA rawng a bawl a, chung lai chuan LALPA thu chu a hlu hle mai a; a langa inlarnate a awm lo va,
3:2	Tin, heti hi a ni a, chung lai chuan Elia chu ama hmuna a mut laiin, (a mit a thim tawh deuh va. Khua a hmu tha thei tawh mang lo va,)
3:3	Pathian khawnvar pawh a la mit hmain, Pathian bawm awmna Lalpa biak inah chuan Samuela chu a han mu a;
3:4	LALPA chuan Samuela a ko va; ani chuan, "Heta hi ka awm," a ti a.
3:5	TinElia hnenah chuan a va tlan a, a hnenah, "Heta hi ka awm e, min vo va," a ti a. Tin, ani chuan, "Ka ko lo va che; va mu leh tawh," a ti a. Tichuan a kal a, a va mu leh ta a.
3:6	Tin, LALPA chuan Samuela chu ako leh a. Tin, Samuela chu a tho va, Elia hnenah chuan a kal a, "Heta hi ka awm e; min vo va," a ti a. Tin, ani chuan a chhang a, "Ka ko lo va che, ka fapa, va mu le tawh," a ti a.
3:7	Chung lai chuan Samuela chuan LALPA chu a hre lo va, LALPA thu a hnena puan a la ni bawk lova.
3:8	Tin, LALPA chuan Samuela chu ako leh a. Tin, Samuela chu a tho va, Elia hnenah chuan a kal a, "Heta hi ka awm e; min vo va," a ti a. Tin, ani chuan a chhang a, "Ka ko lo va che, ka fapa, va mu le tawh," a ti a.
3:9	Chuvangin Elia chuan Samuela hnenah, "Kal la, va mu leh ta la, a kohleh che chuan, 'LALPA thu sawi rawh, i chhiahhlawhin a ngaithla e,' i ti a ni ang chu," a ti a. Tichuan Samuela chu a hmunah chuan a va mu leh ta a.
3:10	Tin, LALPA chu a lo kal a, a ding a, a hmaa a koh ang kha, "Samuel, Samuel," tiin a ko leh a. Chutichuan Samuela chuan, "Thu sawi rawh, i chhiahhlawhin a ngaithla e," a ti a.
3:11	Tin, LALPA chuan Samuela hnenah, "Ngai teh, Israel rama hian a hria apiangte beng a khing hnih hniha thawng zawng takin thil ka ti dawn a ni.
3:12	Chu mi ni chuan a chhungkaw chungchang thu ka sawi zawng zawng chu a bul atangin a tawp thlengin Elia chungah ka ti dawn a ni.
3:13	A faten Pathian an sawichiatna sual chu hre reng pawha a khap loh avangin a chhungkua chu kumkhua atan ka ngaihtuah dawn ani tih ka hrilh tawh si a.
3:14	Chuvangin Elia chhungkaw hnenah chuan Elia chhungte bawhchhiatna chu inthawinain emaw, thilhlanin emaw, engtikahmah tihkian theih ani lo vang tiin chhia ka cham tawh a ni," a ti a.
3:15	Tin, Samuela chu zing tlengin a mu a, tin, LALPA in kawngkharte chu a hawng a. chutichuan Samuela chuan chu mi inlarna chu Elia hriattir chu a hlauthawng a.
3:16	Chutichuan Elia chuan Samuela chu a ko va, "Samuel, ka fapa," a ti a. Tin, ani chuan, "Heta hi ka awm e," a ti a.
3:17	Tin, ani chuan, "Eng thil nge LALPA chuan i hnenah a sawi le? Ka lakah engma zep suh aw; i nena a sawi zawng zawng chu ka lakah zep i neih chuan i chunga Pathianin a tih tihin ti sela, chu aia nasa pawhin," a ti a.
3:18	Tin, Samuela chuan engkim a hrilh fai ta vek a, a lakah chuan engmah zep a nei lo va. Tichuan ani chuan, "LALPA a ni lawm, tha a tih ang zelin ti rawh se," a tia.
3:19	Tin, Samuela chu a lo thang lian deuh deuh va, a hnenah LALPA a awm zel a, a thu reng reng chu leilungah a luan raltir lo va.
3:20	Tichuan Dan atanga Beer-seba thleng raka Israel mite zawng zawng chuan Samuela chu LALPA zawlnei atan tihngheh a ni tih an lo hre ta a.
3:21	Tin, LALPA chu Silo-ah chuan a inlar leh a: LALPA chu thuin Samuela hnenah chuan Silo-ah a inlar a ni si a.