Josua 1

THUTHLUNGHLUI   Josua   Bung 1
1:1	Tin, heti hi a ni a, LALPA chhiahhlawh Mosia thih hnu chuan Mosia rawngbawltu Nuna fapa Josua hnenah LALPAIN,
1:2	"Ka chhiahhlawh Mosia chu a thi ta a; chutichuan tho la, nang leh heng mipuiho zawng zawngte nen hian Jordan lui hi kan ula, anmahni, Israela thlahte ka pek ramah chuan kal rawh u.
1:3	Mosia hnena ka sawi tawh ang khan in kephaha in rah apiang chu ka pe vek ang che u.
1:4	Thlaler atang leh he Lebanon tlang atanga lui lian pui pui Euphrates lui thlenga Hit-ho ram zawng zawng, ni tlangna lam tuifinriat zau tak thlengin in ramri a ni ang.
1:5	I dam chhung zawng tumah reng rengin an chelh lo vang che: Mosia hnena ka awm ang khan i hnenah pawh ka awm ve dawn e: ka tithlawn lovang chia, kal pawh ka kalsan tawp lo vang che.
1:6	Chak tak leh huai takin awm rawh: an thlahtute chhechham pek ka lo tiam tak ram kha, hengho hi i luahtir dawn si a.
1:7	Ka chhiahhlawh Mosian dan zawng zawng zawm tura thu a pek che kha zawm tlat turin chak tak leh huai takin awm phawt mai rawh: i kalna apianga i lo hmuingil zel theihna turin i ding lamah emaw, i vei lamah emaw pensan hauh suh ang che.
1:8	He dan bu hian i ka chu chhuahsan hlek suh se; chu mi thu ziak zawng zawng chu i zawm tlat theih nan chhun leh zan i ngaihtuah lawk tur a ni: tichuan i kawngte chu i lo titluang zel ang a, i lo hmuingil zel dawn nia.
1:9	Thu ka pe che a ni lawm ni? Chak tak leh huai takin awm rawh; hlau suh la, zam hek suh: LALPA i Pathian chu i kalna apiangan i hnenah a awm zel dawn alawm," tiin a sawi a.
1:10	,11 Chutichuan Josuan mipui hotute hnenah chuan, "Riah hmun va fang ulangin, mipuite hnenah, 'Ei turte buatsaih rawh u khai, ni thum chhungin LALPA in Pathianin ram luah tur a pek che u hi luah turin Jordan lui hi in kan dawn a ni e,' tiin thu pe ang che u," tiin thu a pe a.
1:12	Tin, Reuben-hote, Gad-hote leh Manase hnam zatvete hnenah chuan Josuan,
1:13	"LALPA in Pathianin chawlhna a pe che u a, he ram hi a la pe dawn che u tia LALPA chhiahhlawh Mosian thu a pek che u hi hre reng ang che u.
1:14	In nupui te, in fanau te tete leh in ran rualte hi chu Jordan lui rala Mosian ram a lo pekah che u chuan an awm ang a; nangni mi chak huaisenho zawng erawh chu inralthuamin in lo kai hmasa ang a: in unaute in lo tanpui ang a,
1:15	LALPAN in unaute chu nangmahni ang bawka chawlhna a pek a, LALPA in Pathian ram a pek chu anni pawhin an luah ve hma loh chuan: tichuan LALPA chhihhlawh Mosian Jordan lui ral, ni chhuahna lam ram in puala a lo pek tawh che u lamah chuan in let leh ang a, in la luah dawn nia," tiin a sawi a.
1:16	Tin, anni chuan, "Tih tura i thu min pek zawng zawng chu ka ti zel ang e: tin, i mi tirhna apiangah pawh kan kal zel ang.
1:17	Kawng engkima Mosia thu kan zawm zel thin ang khan, i thu pawh kan zawm zel ang e; LALPA i Pathian chu Mosia hnena a awm thin ang khan i hnenah hian awm ve phawt mai rawh se.
1:18	Tupawh i thupek chunga hel a, thu i pek apiang zawm duh lo chu tihhlum tur an ni ang: chak tak leh huai takin awm phawt mai rawh." tiin Josua chu an chhang a.