Josua 3

THUTHLUNGHLUI   Josua   Bung 3
3:1	Tin, Josua chu zing takah a tho va, Israel thlahte zawng zawng nen chuan Sitim hmun ata chu an insuan a, Jordan lui an va thleng a: an kai hmain chutah chuan an riak a.
3:2	Tin, heti hi a ni a, ni thum chinah hotute chuan riahhmun chu an va fang vel a,
3:3	" LALPA in Pathian thuthlung bawm leh puithiamho Levi chiten an zawn lai in hmuh hunah chuan in awmna hmun ata hi insuan ula, zui ang che u.
3:4	Amaherawhchu nangmahni nena a inkar chu teha tawng sanghnih emaw a ni tur a ni: hnaih suh ang che u, tichuan in kalna tur kawng chu in hre thei dawn nia; tun hmain he mi kawng hi zawng in la zawh ngai si lo va," tiin mipuite chu thu a pe a.
3:5	Tichuan Josuan mipuite hnenah, "Intithianghlim rawh u: naktukah LALPAN in zingah thil mak takte a ti dawn e," a ti a.
3:6	Tin, Josuan puithiamte hnenah chuan, "Thuthlung bawm hi zawn ula, mipuite hmaah kai ang che u," tiin a sawi a. Chutichuan thuthlung bawm chu an zawn a, mipuite hma chu an hruai ta a.
3:7	Tin, LALPAN Josua hnenah, "Mosia hnena ka awm ang khan i hnenah pawh ka awm dawn e tih an hriat theih nan vawiinah hian Israel-ho zawng zawng mithmuhah ka chawimawi tan dawn a che.
3:8	Tin, thuthlung bawm zawntu puithiamhote chu, 'Jordan lui in thlen chuan tui chu dai ula, vaukam bulah ding reng rawh u,' tiin thu a pe ang che," a ti a.
3:9	Tin, Josuan Israela thlahte hnenah chuan, "Lo kal ula, LALPAN in Pathian thu hi rawn ngaithla teh u khai," a ti a.
3:10	Tin, Josua chuan, "Hemiah hian Pathian nung chu in zingah a awm a, in hmaah hian Kanaan-hote, Hit-hote, Periz-ho te, Girgas-ho te, Amor-ho te, Jebus-hote hi a hnawtchhuak ngei gnei dawn a ni tih in hria ang.
3:11	Ngai teh u, leilung pumpui Lalpa thuthlung bawm chuan in hmaah Jordan lui a kan e.
3:12	Chutichuan Israel hnamte zinga mi hi sawm leh pahnih hnam tin, aiah mi pakhat zel thlang chhuak ang che u.
3:13	Tin, heti hi a ni ang a, Lalpa leilung pum pui Lalpa bawm zawntu puithiamte kephah chu Jordan tuia a innghah veleh chuan Jordan tui, chhak lam atanga tui lo luangte chu a chat hlauh ang a tichuan a lo inhlawm ding luah mai ang," a ti a.
3:14	Tin, heti hi a ni a; mipuite chu Jordan lui kai tura an puan in ata an chhuah chuan, thuthlung bawm zawntu puithiamhote chu mipuite hmaah chuan an kal a;
3:15	bawm zawntu puithiam ke chuan vaukam tui a han rah veleh, (buh seng chhung zawng hi chuan Jordan lui hi a kuang zawng zawngah aliam reng thin a,)
3:16	chhak lam atanga tui lo luang thla la chu a ding ta a, hla feah Zarethan ram bula Adam khuaah chuan a lo inhlawm ding ta luah a: tin, Araba tuifinriat, Tuifinriat Al lama luang chhuk lai chu a chat ta hlauh va: tichuan mipuite chu Jeriko khaw zawn takah chuan an kai ta a.
3:17	Tin, LALPA thuthlung bawm zawntu puithiamte chu Jordan lui laiah lei charah an ding reng mai a, tin, mipuiho zawng zawngte chuan Jordan lui an kai fai vek thlengin Israel-ho zawng zawngte chu lei charah an kal kai ta vek a.