Josua 7

THUTHLUNGHLUI   Josua   Bung 7
7:1	Amaherawhchu Israela thlahte chuan thil hluihlawnah chuan thil an lo tisual ta a: Juda hnama mi Zera fa Zabdia, chu mi fapa Karmia, chu mi fapa Akana chuan thil hluihlawn a lo la ta: tichuan Israela thlahte chungah chuan LALPA thin a lo rim ta a.
7:2	Tin, Josuan Jeriko khua atangin Bethel chhak lam Beth-aven dep Ai khua-ah chuan mi a tir a, an hnenah, "Han, "Han kal ta ula, ram han enthla teh u," tiin a sawi a. Tin, mite chu an han kal a, Ai khua chu a han enthla a.
7:3	Tin, Josua hnenah an kir leh a, a hnenah, "Mi zawng zawng chu han kal kher suh se; mi sanghnih emaw sangthum emaw vel han kal sela, Ai khua bei rawh se; mi zawng zawng han tihhah kher tur a ni lo ve; tlemte chauh an ni si a," an ti a.
7:4	Chutichuan mipui zinga mi, mi sangthum emaw chutah chuan an han kal a: tin, Ai-ho hmaah chuan an lo tlanchhe ta a.
7:5	Tin, Ai-hote chuan mi sawmthum leh paruk emaw lai an lo that a: kulh kawngka bul atangin Sebarim thleng hialin an rawn um a, an liam thlaknaah chuan an that hlawm a: tin, mite thinlung chu a tui zo va, tui ang mai an lo ni ta a.
7:6	Tin, Josua chuan a puante a pawtthler a, LALPA bawm hmaah amah leh Israel-ho upate chu an hmaia lei sin tlai thlengin an bawkkhup a; tin, an luah vaivut an phul a.
7:7	Tin, Josua chuan, "E khai aw, eng atan nge aw LALPA Pathian, keini mipuiho hi tihboral tura Amor-ho kuta pek atan Jordan lui hi min hruaikai tehlul nio? Jordan lui ralah khan lungawi taka awm hle hle tak zawk tur aw!
7:8	Aw Lalpa, hetia hmelmate uma Israel-ho an tlanchhe ta mai hi engtin nge ka tih tak ang le?
7:9	Kanaan-hote leh heng lai rama cheng zawng zawngte hian an hria ang a, min rawn hual ang a, lei ata hi kan hming an tiboral daih dawn a nih hi: i hming ropui tak hi engtin nge i tih tak ang le?" a ti a.
7:10	Tin, LALPA chuan Josua hnenah, "Tho rawh, engati nge khatia i bawhkhuh reng ni?
7:11	Israel-ho hian thil an tisual ani e; a ni, ka thuthlung pawm tura thu ka pek kha an bawhchhia anih hi; a ni, thil hluihlawna mi pawh kha an la bawk a ni; an ru bawk a, an zep ru bawk a, an bungraw zingah ngei an thukru a ni.
7:12	Chuvangin alawm Israela thlahten an hmelmate an ngam theih loh, hluihlawn chu in zing ata in tihboral phawt loh zawngin in hnenah hian ka awm dawn tawh lo a ni.
7:13	Tho la, mipuiho hi tithianghlim phawt mai rawh, tin, an hnenah, 'Naktuk atan intithianghlim rawh u khai: LALPA Israelte Pathian, Aw Israelte u, in zingah hian hluihlawn thil a awm ani e: in zing ata hluihlawn thil hi in lak bo hma loh zawng in hmelmate in hneh thei lo vang.
7:14	Chutichuan zingah a chi chia rawn inlantir tur in ni: tin, heti hi a ni ang a, LALPAN chu mi chi a lo mana chu a hnam hnamin in rawn inlan leh tur a ni; tin, LALPAN chu mi hnam a lo mana chu a chhung chhungin in rawn inlan leh tur a ni; tin, LALPAN chu mi chhung a lo man chu a mal malin in rawn inlan leh tur a ni.
7:15	Tin, heti hi a ni ang a, tupawh hluihlawn thil lo la apiang chu amah leh a neih zawng zawng meiin hal vek tur a ni ang: LALPA thuthlung a bawhchhiat avang leh, Israel-hote zinga thil sual atthlak tak a tih avangin, a ti a ni,' ti ang che" a ti a.
7:16	Chutichuan Josua chu zing takah a tho va, Israel-hote chu a chi chiin a rawn inlantir a; tin, Juda chite chu man an ni ta a:
7:17	tin, Juda hnamte chu a rawn inlantir leh a; tin, Zer hnamte chu a lo man a: tin, Zer-ho chhungte chu a mal malin a rawn inlantir leh a; tin, Zabdia chu man a lo ni a:
7:18	tin, a chhungteho chu a mal malin a rawn inlantir leh a; tichuan Juda chia mi Zera fapa Zabdia chu mi fapa Karmia, chu mi fapa Akana chu man a lo ni ta a.
7:19	Tin, Josuan Akana hnenah chuan, "Ka fapa, LALPA Israelte Pathian chu fak rawh aw; a hnenah chuan inpuang rawh khai; i thil tih zep suh khai," a ti a.
7:20	Tin, Akanan Josua chu a chhang a, a hnenah, "LALPA Israelte Pathian chungah chuan thil ka lo tisual ta ngei mai, hetiang hian ani ka lo tih tak ni:
7:21	Rallak zinga mi Babulon ram puan tha tak leh, tangka sekel zahnih leh, rangkachak tlang sekel sawmnga buk ka hmu a, ka awt ta em a, ka la ta mai a ni; tin, ngai teh, ka puan in chhungah leiah thuhruk a ni a, tangka chu chu mi hnuaiah chuan a awm." a ti a.
7:22	Chutichuan Josuan mite a tir a, puan in chhungah chuan an va tlan a; tin, ngai teh, a puan inah chuan thuh ral a lo ni ngei a, a hnuaiah chuan tangka chu a awm.
7:23	tichuan puan in chhung ata chu an la a, Josua leh Israela thlahteho zawng zawng hnenah chuan an rawn la a; tin, anni chuan LALPA hmaah an dah a.
7:24	Tin, Josua leh Israel-ho zawng zawngte chuan Zera fapa Akana chu tangka te, puan te, rangkachak tlang te, a fapa te, a fanu te, a bawngpa te, a sabengtung te, a beram te, a puan in te leh a neih zawng zawngte nen chuan an hruai a: Akor ruamah an chhohpui a.
7:25	Tin, Josuan, "Engati nge min tihmangan le? LALPAN vawiinah hian nang pawh a timangang ve dawn che a nih hi," a ti a. tichuan Israel-ho zawng zawng chuan ani chu lungin an deng a; tin, anni chu meiin an hal a, lungin an deng a.
7:26	Tin, a chungah chuan lung an tiang vum thur a, tun thhleng hian a la awm; tin, LALPAN a thinrimna nasa tak chu a lamlet ta a. chutichuan chu mi hmun hmingah chuan tun thleng hian Akor ruam an la ti reng a.