Leviticus 12

THUTHLUNGHLUI   Leviticus   Bung 12
12:1	Tin, LALPAN Mosia a bia a,
12:2	"Israela thlahte hnenah, 'Hmeichhiain nau a paia fapa a hrin chuan ni sarih a bawlhhlawh ang a; hmeichhe dan pangngai hun laia a bawlhhlawh ang chuan a bawlhhlawh ang.
12:3	Tin, a ni riat niin naute serh hmawr vun tan tur a ni.
12:4	Thisen avanga inthianin ni sawmthum leh ni thum a la awm cheu tur a ni; a inthen ni a kim hma loh chuan thil thianghlim reng reng a khawih tur a ni lo va, hmun thianghlimah pawh a lut tur a ni hek lo.
12:5	Hmeichhia a hrin erawh chuan hmeichhe dan pangngai hun laia a bawlhhlawh angin chawlhkar hnih a bawlhhlawh ang; tin, thisen avanga inthianin ni sawmruk leh ni ruk a la awm cheu tur a ni.
12:6	Tin, fapa emaw fanu emaw avanga a inthenna ni a kim veleh halral thilhlanah beram no kum khat mi leh sual thawi nan parva no emaw, thuro emaw inbiakna puan in kawngka bulah puithiam hnenah a rawn keng tur a ni:
12:7	Tin, anin LALPA hmaah a hlan ang a, inremna a siamsak ang a, tichuan a thisen chhuahna ata tihthianghlim a ni ang. Hei hi mipa emaw hmeichhia emaw hringtu tana dan a ni.
12:8	Tin, a neihin beram no a tlin loh chuan thuro tuak khat emaw, parva no tuak khat emaw a keng tur a ni: pakhat chu halral thilhlanah, pakhat chu sual thawi nan: tin, puithiamin inremna a siamsak ang a, tichuan a thianghlim tawh ang,' tiin sawi rawh," tiin.