Leviticus 14

THUTHLUNGHLUI   Leviticus   Bung 14
14:1	Tin, LALPA chuan Mosia a bia a,
14:2	\"Hei hi phar inthen nia a tih dan tur chu a ni ang: puithiam hnenah hruai tur a ni a;
14:3	tin, puithiam chu daipawnah a kal chhuak ang a; tin, puithiam chuan a en ang a, tin, ngai teh, phar chu a pharna hri a dam chuan,
14:4	puithiam chuan a inthian tura chu sava nung thiang pahnih leh sidar thing leh la zai sen leh husop kensak turin thu a pe ang a:
14:5	tin, puithiam chuan sava pakhatchu hlum belah lui tui chungah talh turin thu a pe ang a:
14:6	sava nung chu, sidar thing te, la zai sen te, husop te, sava nung nen chuan a keng ang a, lui tui chunga sava talh thisenah chuan a hnim vek ang a:
14:7	tin, pharna laka inthian tura chu vawi sarih a theh ang a, a thianghlim tih a puang ang a, tin, sava nung chu ramah a chhuah ang.
14:8	Tin, a inthIan tura chuan a puante a su ang a, a inmet kawng vek ang a, a inbual tur a ni; tichuan a lo thianghlim ang: tin, chu mi zawhah chuan riah hmunah a kal ang a, amaherawhchu a puan in pawn lamah ni sarih a awm tur a ni.
14:9	Tin, heti hi a ni ang a, a ni sarih ni chuan a sam zawng zawng leh a khabe hmul leh a mit ko hmulte a met kawng ang a, a hmul zawng zawng a met kawng ang; tin, a puante a su ang a, a inbual tur a ni; tichuan a lo thianghlim tawh ang.
14:10	Tin, ni riat ni chuan beram no a pa pahnih sawiselbo leh beram no a nu pakhat sawiselbo, kum khat mi leh chhangphut thilhlan atan chhangphut dip tak epha hmun sawma thena hmun thum hriaka hmeh leh hriak log khat a keng tur a ni.
14:11	Tin, a thiantu puithiam chuan inthian tura leh chung thil chu inbiakna puan in kawngka bulah LALPA hmaah a dah ang a:
14:12	tin, puithiam chuan beram no pakhat chu hriak log khat nen chuan a la ang a, bawhchhiat thawi nan a hlan ang a, LALPA hmaa then thilhlan atan then tur a ni.
14:13	Tin, sual thawina leh halral thilhlan an talh thinna hmun, hmun thianghlimah chuan beram no pa chu a talh tur a ni: sual thawina chu puithiam pual a ni ang bawkin bawhchhiat thawina pawh chu puithiam pual a ni si a: thil thianghlim tak a ni e:
14:14	tin, puithiam chuan bawhchhiat thawina thisen chu a la ang a, inthian tura beng ding lam hmawrah te, a kut ding lam zungpuiah te, a ke ding lam zungpuiah te, puithiam chuan a hnawih ang:
14:15	tin, hriak log khata mi chu puithiam chuan a la ang a, ama vei lam kutphahah a chhung ang a;
14:16	puithiam chuan a kut vei lama hriakah chuan a zungtang ding lam a hnim ang a, hriak chuan LALPA hmaah a kutzungtangin vawi sarih a theh ang a;
14:17	tin, a kuta hriak la awm zawng chuan inthian tura beng ding lam hmawr te, a kut ding lam zungpui te, a ke ding lam zungpui tea bawhchhiat thawina thisen chungah te chuan a hnawih ang a:
14:18	tin, puithiam chuan a kuta hriak la awm zawng chuan inthian tura lu a hnawih ang a; tin, puithiam chuan LALPA hmaah inremna a siamsak tur a ni.
14:19	Tin, puithiam chuan sual thawina chu a hlan ang a, a thianghlim lohna avanga inthian tura chu inremna a siamsak ang a; tin, chu mi zawhah chuan halral thilhlan chu a talh ang;
14:20	Tin, puithiam chuan halral thilhlan leh chhangphut thilhlan chu maichamah chuan a hlan ang a, puithiam chuan inremna a siamsak ang a, tichuan a lo thianghlim tawh ang.
14:21	Tin, mi rethei a niha chutiang chu a tlin loh chuan beram no a pa pakhat bawhchhiat thawina, inremna siamsak nana then tur leh chhangphut thilhlan atan chhangphut dip tak epha hmun sawma thena hmun khat, hriaka chawhpawlh, hriak log khat nen a keng ang a;
14:22	tin, thuro tuak khat emaw, parva no tuak khat emaw, a neih theih zawk zawk apiang; pakhat chu sual thawina, pakhat chu halral thilhlanah a ni ang.
14:23	Ni riat niin a inthen nan puithiam hnenah inbiakna puan in kawngka bulah LALPA hmaah a rawn keng tur a ni.
14:24	Tichuan puithiamin bawhchhiat thawina beram no leh hriak log khat chu a la ang a, tin, then thilhlanah LALPA hmaah puithiam chuan a then ang a;
14:25	tin, bawhchhiat thawina beram no chu a talh ang a; puithiam chuan bawhchhiat thawina thisen chu a la ang a, inthian tura beng ding lam hmawrah te, a kut ding lam zungpuiah te, a ke ding lam zungpuiah te a hnawih ang:
14:26	tin, puithiam chuan hriak chu ama kutpbah vei lamah a bun ang a:
14:27	tin, puithiam chuan a kut vei lama hriak thenkhat chu a kut ding lamin LALPA hmaah vawi sarih a theh ang a;
14:28	tin, puithiam chuan a kuta hriak chuan inthian tura beng ding lam hmawr te, a kut ding lam zungpui te, a ke ding lam zungpui tea bawhchhiat thawina thisen chung takahte chuan a hnawih ang:
14:29	tin, puithiam kuta hriak la awm zawng te chuan LALPA hmaa inremna siamsak turin inthian tura lu chu a hnawih tur a ni.
14:30	Tin, thuro emaw, parva no emaw, a neih theih zawk zawk apiang a pakhat chu a hian ang a;
14:31	a neih theih zawk zawk apiang, sual thawi nan pakhat, halral thilhlanah pakhat, chhangphut thilhlan nen: tin, puithiamin inthlan tura chu LALPA hmaah inremna a siamsak ang.
14:32	Hei hi phar hri vei, inthenna dan ang tlin lote tana dan a ni," tiin.
14:33	Tin, LALPAN Mosia leh Arona a bia a,
14:34	"Luah tura ka pek che u Kanaan ram in luh huna, in luah tur ram khawii inah pawh phar hri ka dah chuan,
14:35	chu mi in neitu chuan, 慔e inah hian hri ni awm tak awm awmin ka hria,?tiin puithiam a rawn hrilh tur a ni:
14:36	tin, puithiam chu hri en tura a luh hma chuan in chhunga thil awm zawng zawng chu bawlhhlawha a chan loh nan in chu tihruah turin puithiam chuan thu a pe ang a; chu mi zawh chuan puithiam chu in en tur chuan a lut ang;
14:37	tin, hri chu a en ang a, tin, ngai teh, hri chuan a hring lam deuh emaw, a sen lam deuh emawa bang a ei khuar tawh a, bang aia phaia a lan chuan,
14:38	puithiam chu in ata kawngkaah a chhuak ang a, in chu ni sarih a khar ang:
14:39	tin, ni sarih niin puithiam chuan a va en leh ang a, tin, ngai teh, hri chu banga a lo kai chuan,
14:40	hri awm na lung chu lak chhuah a, daipawnah hmun bawlhhlawha paih turin puithiam chuan thu a pe ang a;
14:41	tin, inchhung lam chu a ziah vel tir ang a, tin, lung hmun charnaan ziah khawh chu daipawnah hmun bawlhhlawhah an chhung ang a:
14:42	Tin, lung dang an la ang a, chung lung hmunahte chuan an dah ang a; tin, lung charna dang an la ang a, in chu a bel ang.
14:43	Tin, lung a lak chhuaha in chu a ziaha a bel zawh hnua hri chu ina a lo chhuah leh chuan
14:44	puithiam chu a va lut ang a, a va en leh ang; tin, ngai the, hri chu ina alo tai chuan chu ina phar chu a nghet chi a ni a, a bawlhhlawh a ni.
14:45	In chu a thiat ang a,a lung te, a thing te, a lung charna zawng zawngte pawh; tin, daipawna hmun bawlhhlawhah a thiar chhuak ang.
14:46	Tupawh chu in khar chhung reng renga lut chu tlai lam thlengin an bawlhhlawh bawk ang.
14:47	Tin, tupawh chu mi ina mu apiangte chuan an puante an su ang a. Tin, tupawh chu ina chaw ei apiangte chuan an puante an su tur a ni.
14:48	Tin, puithiam chu a luh a, a han en vel a, tin, ngai teh , in chu bel that a nih hnua hri chu a tai loh chuan, in chu a thianghlim tih puithiamin a puang ang, hri chu a kian tawh avangin.
14:49	Tin, in thenna tur chuan sava pahnih leh sidar thing leh la zai sen leh husop a keng ang a;
14:50	tin, sava pakhat chu hlum belah lui tui chunga a talh ang a:
14:51	tin, sidar thing leh husop leh la zai sen leh sava nung chu a la ang a, sava talh tak thisenah leh lui tuiah chuan a hnim ang a, tin, in chu vawi sarih a theh ang:
14:52	tin, in chu, sava thisen te, lui tui te, sava nung te, sidar thing te, husop te, la zai sen te chuan a thian ang:
14:53	Sava nung erawh kha chu khua atangin ramah a thlawh chhuahtir tur a ni: chutichuan in atan chuan inremna a siam ang a, tichuan a lo thianghlim tawh ang.
14:54	Hei hi phar hri chi tinreng leh pupangliah chungchanga dan chu a ni;
14:55	Puana phar awm leh ina mi te,
14:56	pawng te, khir te, bawl chungchangahte pawh;
14:57	a thianghlim loh lai leh a thianghlim lai kawhhmuhna turin hei hi phar chungchanga dan chu a ni," tiin.