Leviticus 5

THUTHLUNGHLUI   Leviticus   Bung 5
5:1	Tupawh a thil hmuh emaw a thil hriat emaw hretu a nih a, rorelna hmaa puang tura tih a nih hnu pawha a sawi duh lova thil a tihsual chuan a khawlohna mawh chu a phur ang:
5:2	tin, tupawhin thil thianghlim lo reng reng, ram sa thianghlim lo ruang emaw, ran thianghlim lo ruang emaw, a vaha vak chi rannung thianghlim lo ruang emaw hre lo pawha a khawih a, a lo thianghlim loh chuan thiam loh a chang ang:
5:3	tin, mihring pawh a thianghlim lohna eng ang pawh ni sela, a thianghlim lohna chu hre lo pawha a khawih chuan a hriat chhuah hun chuan thiam loh a chang ang;
5:4	tin, tupawhin thil tha lo emaw thil tha emaw ti tura a kaa hre lo pawha chhia a chham zung zung chuan, eng pawh ni sela, a chhechham chhuah zung zung mai chu a hriat chhuah hunah chuan thiam loh a chang ang:
5:5	tin, heti hi a ni ang a, heng thil pakhatah pawh hian thiam loh a chan hun chuan a sualna chu a puang ang;
5:6	sual thawi nan beram rual zinga mi a nu, beram no emaw kel emaw a thil tihsual tak man atan LALPA hnena hlan turin a bawhchhiat thawina chu a rawn keng ang a; puithiamin a sualna chungch鈔g thuah chuan inremna a siam sak ang.
5:7	A neihin beram no a tlin loh chuan LALPA hnena hlan turin a sual man atan chuan a bawhchhiat thawinaah thuro pahnih emaw parva no pahnih emaw a rawn keng tur a ni; pakhat chu sual thawi nan pakhat chu halral thilhlan atan
5:8	Puithiam henah a rawn keng ang a, a ni chuan sual thawina tur chu a hlan hmasa ang a, phel lovin a lu chu a nghawngah a thuai bung ang a:
5:9	sual thawina thisen chu maicham pangah chuan tlem a theh ang a; tin, thisen la awm zawng chu maicham bulah chuan an far kangtir tur a ni: chu chu sual thawina a ni.
5:10	Tin, a pa khata chu dan angin halral thilhlanah a hlan ang a: tin, puithiamin a thil tihsual tak chungchang thuah inremna a siamsak ang a, ngaihdam a ni ang.
5:11	Amaherawhchu a neihin thuro pahnih emaw parva no pahnih emaw pawh a tlin loh chuan a sual man atan thil hlanah sual thawi nan chhangphut dik tak, epha hmun sawma thena hmun khat a rawn keng ang a; hriak a leih tur a ni lova, a chungah beraw a dah tur a ni hek lo, sual thawina a nih avangin.
5:12	Puithiam hnenah a rawn keng ang a, a ni chuan sual thawina tur chu a hlan hmasa ang a, phel lovin a lu chu a nghawngah a thuai bung ang a:
5:13	Tin, chung thil zinga a enga pawh a tihsual tak chungchang thuah chuan puithiamin inremna a siamsak ang a, ngaihdam a ni ang: a la awm zawng chu chhangphut thilhlan ang bawkin puithiam chanpual tur a ni ang,' ti rawh," tiin.
5:14	Tin, LALPAN Mosia a bia a,
5:15	"Tupawhin thil a tihsuala, LALPA thil thianghlimte chunga a sual palh chuan a bawhchhiat thawina, beram rual zinga mi berampa sawiselbo, hmun thianghlim sekel ang, tangka sekel eng emaw zat hua i ngaih, bawhchhiat thawinaah LALPA tan a rawn kai tur a ni:
5:16	tin, thil thianghlim chunga a lo tih dik loh takna chu a rul ang a, a hmun ngaa thena hmun khat a belh ang a, puithiam a pe tur a ni; tin, puithiam chuan bawhchhiat thawina berampa chuan inremna a siamsak ang a, ngaihdam a ni ang.
5:17	Tupawhin thil a tihsuala tih loh tura LALPAN thu a pekte a enga pawh a tih chuan, hre lo mah sela thiam loh a chang reng reng ang a, a khawlohna mawh chu a phur ang.
5:18	Tin, beram rual zinga mi berampa sawiselbo, i ngaiha awm tawk, bawhchhiat thawinaah: puithiam hnenah a rawn kai tur a ni; tin, puithiam chuan hre lova a tihsual palh chungchang thuah chuan inremna a siamsak ang a, ngaihdam a ni ang:
5:19	chu chu bawhchhiat thawina a ni: LALPA hmaa thiam loh chang a ni ngei a ni," tiin.