Leviticus 9

THUTHLUNGHLUI   Leviticus   Bung 9
9:1	Tin, heti hi a ni a, a ni riat ni chuan Mosian Arona leh a fapate leh Israel upahote chu a ko va;
9:2	tin, Arona hnenah chuan, "Sual thawi nan bawng no a pa leh halral thilhlanah berampa sawisebo ve ve kai la, LALPA hmaah hlan rawh.
9:3	Tin, Israela thlahte hnenah chuan, 'Sual thawi nan kelpa, tin, halral thilhlanah bawng no leh beram no kum khat mi ve ve sawiselbo thiau
9:4	leh bawngpa leh berampa LALPA hmaa remna thilhlana hlanah rawn kai ula: tin, hriaka hmeh chhangphut thilhlan nen: vawiinah hian in hnenah LALPA a lo lang dawn e,' tiin hrilh rawh," a ti a.
9:5	Tin, Mosian thu a pek ang chuan inbiakna puan in kawtah an rawn kai a; tin, mi zawng zawng chuan an va hnaih a, LALPA hmaah chuan an va ding a.
9:6	Tin, Mosia chuan, "Hei hi a ni in tih tura LALPAN thu apek che u kha: tichuan LALPA ropuina chu in zingah a lo lang ang." a ti a.
9:7	Tin, Mosian Arona hnenah, "Maicham chu rawn hnaih la, I sual thawina te, I halral thilhlan te hlan la, nangma tan leh mipuite tan inremna siam rawh: tin, mipuite thilhlan chu hlan la, an tan inremna siam rawh, LALPA thupek angin," a ti a.
9:8	Tin, Arona chuan maicham chu a va hnaih a, ama puala sual thawina bawng no chu a talh a.
9:9	Tin, Arona fapate chuan thisen chu a hnenah an hlan a, thisenah chuan a kut zungtang a chiah a, maicham kiahte chuan a tat a, thisen chu maicham bulah a leih a:
9:10	sual thawina thau te, a kal te, a thin tuamtu rang te erawh chu maicham chungah a hal a, LALPAN Mosia thu a pek ang kha.
9:11	Tin, a sa leh a vun chu daipawnah a hal a.
9:12	Tin, halral thilhlan chu a talh a; Arona fapate chuan thisen chu an pe a, anin maicham chu a theh vel a.
9:13	Halral thilhlan sa hrang chu a mal malin a lu nen an pe a, ani chuan maichamah a lo hal a.
9:14	Tin, a kawchhung te, a kete a sil a, maichamah halral thilhlan chungah chuan a hal a.
9:15	Tin, mipuite thilhlan chu a hlan a, mipuite sual thawina kel chu a kai a, a talh a, a hmaa mi ang bawk khan sual thawinaah a hlan a.
9:16	Tin, halral thilhlan chu a hlan a, a dan ang zelin a hlan a ni.
9:17	Tin, chhangphut thilhlan chu a hlan a, chuta mi chu a vei khatin a la a, zing lam halral thilhlan tih loh pawh chu maichamah huan a hal bawk a.
9:18	tin, mipuite puala remna thilhlan inthawina bawngpa leh berampa chu a talh bawk a; tin, Arona fapaten a thisen chu an pe a, maicham chu a theh vel a;
9:19	tin, bawng pa thau leh berampa thau te, a mei thau tak te, a rilbawh te, a kal te, a thituamtu rang te an pe bawk a;
9:20	a thau chu a ir chungah te chuan an dah a, tin, a ni chuan a thau chu maichamah a lo hal a.
9:21	Tin, a ir leh bawp dinglam chu Aronan LALPA hmaah then thilhlanah a then a; Mosia thupek ang khan.
9:22	Tin, Arona chuan mipuite lamah chuan a ban a phar a, mal a sawm hlawm a; tin, sual thawina leh halral thilhlan leh remna thilhlan a hlan zo chu a lo chhuk a.
9:23	Tin, Mosia leh Arona chu inbiakna puan inah an va lut a, tin, an lo chhuak leh a, mipuite chu mal an sawm a: tin, LALPA ropuina chu mi zawng zawng chungah chuan a lo lang a.
9:24	Tin, LALPA hma atang chuan mei a lo chhuak a, halral thilhlan leh thaute chu maichamah chuan a kangral ta a: tin, chu chu mipui zawng zawngin an hmuh chuan an au dur dur a, an bawkkhup ta thuap a.