Number 28

THUTHLUNGHLUI   Number   Bung 28
28:1	Tin, LALPAN Mosia a bia a,
28:2	"Israela thlahte chu thu pe la, an hnenah, 'Ka chaw ka tana rimtui meia thilhlan, ka hnenah thilhlan chu a hun tak zel theuhvah in hlan tur a ni,' ti la.
28:3	Tin, an hnenah, 'Hei hi meia thilhlan LALPA hnena in hlan tur chu a ni; beram no a pa, kum khat mi, sawisel bo, ni tin, pahnih, halral thilhlan hlan reng atan.
28:4	Beram no pakhat chu zingh in hlan ang a, pakhat chu tlai lamah in hlan ang a,
28:5	chhangphut thilhlan atan chhangphut dip mi epha hmun sawma thena hmun khat, hriak sawr hin hmun lia thena hmun khata chawhpawlh nen.
28:6	LALPA tana meia thilhlan, rimtui atana Sinai tlanga ruat halral thilhlan hlan reng tura kha a ni.
28:7	Tin, beram no pakhat hlannaa in tur thilhlan chu, hin hmun lia thena hmun khat a ni tur a ni: LALPA tana uain i bun chhuak tur a ni.
28:8	Tin, beram no pakhat chu tlai lamah i hlan tur a ni: zing lama chhangphut thilhlan ang leh chu mia in tur thilhlan ang bawk chu LALPA tana rimtui atan meia thilhlan chu i hlan tur a ni.
28:9	Tin, chawlhniin beram ni, a pa kum khat mi sawrselbo pahnih leh chhang phut thilhlan atan chhngphut dip mi epha hmun sawma thena hmun hnih hriaka chawhpawlh leh chu mia in tur thilhlan nen i hlan tur a ni:
28:10	hei hi chawlhni apianga halral thilhlan reng leh chu mia in tur thilhlan tiam lova halral thilhaln hlan tur chu a ni.
28:11	Tin, in thla thar apiangah LALPA tan halral thilhlan in hlan tur a ni; bawngpa tir pahnih leh berampa pakhat leh beram no a pa kum khat mi sawisel bo pasarih:
28:12	tin, bawngpa tinah chhangphut thilhlan atan chhangphut dip mi, hriaka chawhpawlh epha hmun sawma thena hmun thum; tin, beram pakhatah chhangphut thilhlanah chhangphut dip mi hriaka chawhpawlh hmun sawma thena hmun hnih;
28:13	tin, beram no tinah chhang phut thilhlanah chhangphut dip mi, hriaka chawhpawlh hmun sawma thena hmun khat: hei hi halral thilhlan rimtui LALPA tan meia thilhlan a ni.
28:14	Tin, an in tur thilhlan chu bawngpa pakhatah uain hin chanve a ni ang a, berampa pakhatah hin hmun thuma thena hmun khat, beram no pakhatah hin hmun lia thena hmun khat: hei hi kum tluana thla tin, halral thilhlan a ni.
28:15	Tin, LALPA hnena sual thawi nan kelpa pakhat in hlan tur a ni; halral thilhlan hlan reng leh chu mia in tur thilhlan tiam lovin.
28:16	Tin, thla khatna ni sawm leh ni li ni chu LALPA kalhlen kut a ni.
28:17	Tin, chu mi thla ni sawm leh ni nga ni chu ruai ni a ni ang: ni sarih chu chhang dawidim telh loh ei tur ani ang.
28:18	Ni khat ni chuan inkhawmpui thianghlim a awm ang a; eng hna mah in thawk tur ani lo va;
28:19	meia thilhlan halral thilhlan erawh chu LALPA hnenah in hlan tur a ni; bawngpa tir pahhnih leh berampa pakhat leh beram no a pa kum khat mi pasarih: in ngaiha sawiselbo ani tur ani ;
28:20	chhangphut dip mi, hriaka chawhpawlh , an chhangphut thilhlan nen: bawngpa pakhatah hmun sawma thena hmun thum; berampa pakhatah hmun sawma thena hmun hnih;
28:21	beram no pasarih chu beram no pakhatah hmun sawma thena hmun khat a ni tur a ni;
28:22	tin, in tana inremna siamna turin sual thawi nan kelpa pakhat.
28:23	Heng hi zinga thilhlan, halral thilhlan hlan reng tiam lovin in hlan tur a ni.
28:24	Hetiang hian LALPA tana rimtui, meia thilhlan ei tur chu ni tin, ni sarih in hlan tur a ni: halral thilhlan hlan reng leh chu mia in tur thilhlan tiam lovin.
28:25	Tin, a ni sarih ni chuan inkhawmpui thianghlim in nei ang a, eng hna mah in thawk tur ani lo.
28:26	Tin, in chawlhkar kut, in buh thar tirh kut LALPA tana thil thar chhangphut thilhlan in hlan ni pawhin inkhawmpui thianghlim in nei ang a; eng han mah in thawk tur ani lo va:
28:27	LALPA tana rimtui halral thilhlan erawh chu in hlan tur a ni; bawngpa tir pahnih, berampa pakhat, beram no a pa kum khat mi pasarih;
28:28	an chhangphut thilhlan, chhangphut dip mi hriaka chawhpawlh, bawngpa pakhatah hmun sawma thena hmun thum, berampa pakhatah hmun sawma thena hmun hnih,
28:29	beram no pasarih, beram no pakhat theuhvah hmun sawma thena hmun khat:
28:30	in tana inremna siam nan kelpa pakhat nen (inngaiha sawisel bo ani tur ani).
28:31	Halral thilhlan hlan reng leh chu mia chhangphut thilhlan leh in tur thilhlan tiam lovin in hlan tur a ni.