I Lalte 17

THUTHLUNGHLUI   I Lalte   Bung 17
17:1	Tisbe khua, gilead rama Tisbe khuaa mi Elijan Ahaba hnena chuan, "LALPA, a bula ka awm thinna Israelte Pathian nunna chalin ka sawi e: kum eng emaw i chung chu ka thu lo chuan dai leh ruah reng reng a tla lo vang," a ti a.
17:2	Tin, LALPA thu chu a hnenah a lo thleng a,
17:3	"Heta ta hi chhuak la, khawchhak lam panin kal la, Jordan bula awm Kerith luiah han biru rawh
17:4	Tin, heti hi a ni ang a; chuta a chawm tur che in choakte thu ka pe tawh e," tiin.
17:5	Chutichuan a kal a, LALPA thu ang chuan a ti ta a: Jordan bula awm Kerith luiah chuan a han awm ta a.
17:6	Tin, choakten zing lamah chhang leh sa an rawn putsak thin a, tlai lamah chhang leh sa an rawn putsak leh thin a; tin, lui tui chu a tlan a.
17:7	Tin, nakin deuhvah chuan heti hi a ni a, hung ramah chuan ruah reng reng a sur loh avangin lui chu a lo kang chat ta a.
17:8	Tin, LALPA thu a hnenah a lo thleng a,
17:9	"Tho la, Zidon rama Zarephath khuaah kal la, chuta chuan awm rawh: ngai teh, a chawm tur chein hmeithai pakhat thu ka pe tawh e," tiin.
17:10	chutichuan a tho va, Zarephath khuaah chuan a kal ta a; tin, chu mi khaw kulh kawngka chu a va thlen chuan, ngai teh, hmeithai pakhat thing fawm hi a lo awm a; tin, ani chu a han au va, "Belin ti tlemte mi han lak teh khai, ka lo in ang e," a han ti a.
17:11	Tin, la tura a kal chu a han au va, "Chhang tlemte paw mi han ken te ang che," a ti a.
17:12	Tin, a ni chuan, "LALPA i Pathian nunna chhalin ka sawi e, chhang zawng ka nei lo va, belah chhangphut vei khat lek leh, umah sahriak tlemte chauh ka nei a; tin, ngai teh, ka hawna ka tan leh ka fapa atana siamna turin thingtang pahnih emaw lek ka fawm a ni a, tichuan ka ei ang a, kan ti mai ang," a ti a.
17:13	Tin, Elijan a hnenah, "Hlau suh; i sawi ang chuan va ti ta che: amaherawhchu chu mi chuan chhang te tak te mi han siam phawt la, chu chu mi rawn lak la, chu mi zawhah chuan i tan leh i fapa atan i la siam dawn nia.
17:14	LALPA, Israelte Pathianin heti hia a ti a ni, 'LALPAN lei chungah hian ruah a rawn surtir hma loh chuan chhangphut bel chu a ruang chuang lo ang a, sahriak um pawh a kang lo vang,' tiin," a ti a.
17:15	Tichuan Elija sawi ang chuan a va t a: tin, amah le a chhungte leh Elija nen chuan ni engzat emaw lai an ei a.
17:16	Elija hmanga a sawi LALPA thu ang khan chhangphut bel chu a ruak chuang lova, sahriak um pawh a kang hek lo.
17:17	Tin, chung thil hnua chuan heti hi a ni a, in neitunu, hmeiche fapa chu a lo dam lo ta a; a na chu a na hle mai a, a thaw a tawp ta a.
17:18	Tin, ani chuan Elija hnenah, "Aw nang Pathian mi, nang leh kei hi engnge mawi kan ni? Kan sualna hriatchhuahtir tur leh ka fapa mi thahsak tura lo kal i ni hi le!" a ti a.
17:19	Tin, ani chuan a hnenah, "I fapa chu mi han pe teh," a ti a. Tichuan a pawm lai chu a laksak a, a awmna pindanah chuan a pawm cho va, ama khumah a muttir a.
17:20	Tin, LALPA a au va, "Aw LALPA ka Pathian, ka chenna hmeithainu chungah pawhhian a fapa tihlumsakin thil tha lo i rawn thlentir ta em ni le?" a ti a.
17:21	Tichuan naupang chungah chuan vawi thum a bawk a, LALPA chu a au va, "Aw LALPA ka Pathian, khawngaih takin he naupang nunna hi amahah hian han awmtir leh ang che," a ti a.
17:22	Tin, LALPAN Elija thu chu a lo ngaihthlaksak a; tichuan naupang nunna chu amahah chuan a lo awm leh a, a lo harh leh ta a.
17:23	Tin, Elija chuan naupang chu a hruai a, pindan ata chu in chhungah a chhukpui a, a nu a pe ta a: tin, Elijan, "En teh, i fapa hi a dam leh ta e," a ti a.
17:24	Tin, hmeichhia chuan Elija hnenah, "Tunah zet chuan Pathian mi i ni a, i kaa LALPA thu hi thutak a ni tih ka lo hre ta," a ti a.