II Lalte 4

THUTHLUNGHLUI   II Lalte   Bung 4
4:1	Zawlneite fapaho nupuite zinga hmeichhe pakhat hian Elisa hnenah, "I chiahhlawh, ka pasal chu a thi ta a; tin, i chiahhlawh khan LALPA chu a tih thin tih i hria : ei a leibatna chu ka fate pahnih bawi atana hruai turin a lo kal a ni," tiin a mangan thu a sawi a.
4:2	Tin, Elisan a hnenah, "Engnge i neih?" a ti a. Tin, ani chuan, "I bawinu sahriak um khat chauh lo chu inah engmah ka nei lo," a ti a.
4:3	Tichuan ani chuan, "Va kal a la, i thenawmteho zawng zawng bel, bel ruak va hawh khawm tawh khai: tlemte mai zawng hawh suh.
4:4	Tin, lut la, nang leh i fapate nen kawng inkhar khum ula, chung bel zawng zawngah chuan thun langin; a khat chu dah hrang zel ang che," a ti a.
4:5	chutichuan a hnen ata chu a kal ta a, ama leh a fapate nen chuan kawng an inkhar khum a; anni chuan belte chu an rawn la a, ani chuan a lo thun zel a.
4:6	Tin, belte chu a khah hnu chuan, heti hi a ni a, a fapaa hnenah, "Bel mi han lak leh rawh," a ti a. Tin, ani chuan, "Bel a awm tawh lo," a ti a. Tin, sahriak chu a kang ta a.
4:7	Tichuan Pathian mi chu a va hrilh a. Tin, ani chuan, "Va kal la, sahriak chu va zuar ta la, i leiba chu va rul langin, a bak chuan i fapate nen va khawsa tawh u," a ti a.
4:8	Tin, ni khat chu Elisa chu Sunem khuaah a va zin a, chutah chuan hmeichhe neinung tak a awm a; ani chuan chaw ei turin a lo kai lut a. Chutichuan a kal apiangin chutah chuan chaw ei turin a lut thin a.
4:9	Tin, ani chuan a pasala hnenah, "Ngai teh hei, he mi mi rawn pal fo thintu hi Pathian mi thianghlim a ni tih ka hria e.
4:10	Hawh teh, in chhawng te i siamsak ang khai, khum te, dawhkan te, thutphah te, khawnvar dahna te i dahsak ang; tichuan kan hnena a lo kal apiang hian alut thin dawn nia," a ti a.
4:11	Tin, ni khat chu a va kal leh a, chu mi in chhawngah chuan a va lut a,a mu a.
4:12	Tin, a chhiahlawh Gehazia hnenah, "He Sunam nu hi han ko teh," a ti a. Tin, a va koh hnu chuan a hmaah a lo ding a.
4:13	Tin, anichuan a hnenah, "Ngai teh, nangin hei theihtawpin min duat a, engnge kan tihsak ve ang che, lal emaw, sipai hotu emaw biaksak che i duh em?' tiin a hnenah hian sawi teh," a ti a.
4:14	Tin, ani chuan, "Eng emaw chu kan tihsak tak ang?" a ti a. Tin, Gehazia huan a chang a, "Gapa chu a nei hauh lo mai ale, a apsal lah chu a tar tawh si a," a ti a.
4:15	Tin, ani chuan, "Va ko teh," a ti a. Tin, a va koh hnu chuan kawngkaah a lo ding a.
4:16	Tin, ani chuan, "Tun ang hun a lo thlen leh tikah chuan fapa i pawm tawh ang," a ti a. Tin, ani chuan, "A, ka pu, nang Pathian mi, i bawihnu lakah hian daw ma ta che," a ti a.
4:17	Tin, hmeichhia chu a rai a. Elisan a hnena a sawi ang ngei khan chu mi hun a lo thlen leh chuan fapa a hring ta a.
4:18	Tin, nausen chu a lo sei lian a, ni khat chu a pa hnenah buh latute hnenan a kal ve a.
4:19	Tin, a pa hnenah chuan, "Ka l? ka l?" a ti a. Tin, a ni chuan a chhiahhlawh hnenah, "A nu hnenah pawm tawh," a ti a.
4:20	Tin, a hruai a, a nu hnen a thlen chuan a mal chungah chuan tlai thlengin a thu a, tichuan a thi ta a.
4:21	Tin, a chho va, Pathian mi khumah chuan a han mut a, kawng a kharkhum a, a chhuak ta a.
4:22	Tin, a pasal chu a au va, "Chhiahhlawh tu emaw leh sabengtung pakhat emaw mi han ngaihtuahsak teh, Pathian mi hnenah ka va tlan ang a, ka lo kir leh ang e," a ti a.
4:23	Tin, ani chuan, Eng atan nge vawin khera a hnena kal i tum? Thla thar pawh a la ni lo va, chawlhni pawh a la ni si lo va," a ti a. Tin, a ni chuan, "A rem mai ang," a ti a.
4:24	Tichuan sabengtung a thuam a, a chhiahhlawh hnenah, "Tlantir la, kal zel rawh khai; thu ka pek loh che chuan mi timuang hauh suh a ti a.
4:25	Chutichuan a kal ta a, Pathian mi hnenah chuan Karmel tlangah a va kal a. Tin, Pathian mi chuan hla tak atanga lo hmuh chuan, heti hi a ni a, a chhiahhlawh Gehazia hnenah, "En teh, sawta saw Sunam nu khaani;
4:26	amah hmuak turin va tlan la, a hnenah, "I dam em le? I pasal a dam em? Naupang kha a dam em? 'lo va ti tawh khai," a ti a. Tin, ani chuan a lo chhang a, "Dam e," a lo ti a.
4:27	Tin, tlanga Pathian mi hnen a han thlen chuan, a ke a han vuan ta tlat a. Tin, amah chu rawn nam kian tumin Gehazia chuan a va pan a; nimahsela Pathian mi chuan, "Engmah tih suh, a rilru a mangang a nih hi; LALPAN ka lakah ala thup rih a, mi la hrilh rih lo ve," a ti a.
4:28	Tichuan ani chuan, "Ka pu hi fapa ka dil che em kha? 'Mi tihder suh ang che,' ka ti lawm ni kha?" a ti a.
4:29	Tichuan Gehazia hnenah, "I puan veng la, ka tiang kengin va kal tawh khai; tupawh va hmu la, chibai buk suh ang che; tin, tupawh in chibai an buk che chuan buk ve kher suh ang che; tin, ka tiang hi naupang hmaiah nghat ang che," a ti a.
4:30	Tin, naupang nu chuan, "LALPA nunna leh i nunna chhalin ka sawi e, ka thlah dawn tawp lo che a ni," a ti a. Tin, a tho va, a zui ta a.
4:31	Tin, Gehazia chuan anni chu a lo hmakhalh a, tiang chu naupang hmaia chuan a han nghat a; nimahsela awka leh hriat theihna reng reng a nei lo va. Chutichuan a be turin a kir leh a,"naupang chu a meng hauh lo mai," tiin a hrilh a.
4:32	Tin, Elisa chu ina a va luh chuan ngai teh, naupang chu a lo thi tawh reng a, a khuma chuan an lo la mut a.
4:33	chutichuan a va lut a, an pahnih chuan kawng a khar hnan a, LALPA hnenah a tawngtai a.
4:34	Tin, a han lawn a, naupang chu a bawhkhuh a, a hmui leh a hmui, a mit leh a mit, a kut leh a kut a chuktuah a; tin, a chungah chuan a kaikun a; tichuan naupang taksa chu a lo lum ta tial tial a.
4:35	Chutichuan a zuk chhuk leh a, in chhungah chuan a han vei a; tin, a han lawn a, a chungah chuan a han kaikun leh a; tichuan naupang chu vawi sarih a han hahchhiau va, naupang chu a lo meng ta a.
4:36	Tin, Gehazia a ko va, "He Sunam nu hi han ko teh," a ti a. Chutichuan a va ko va. Tin, a hnena a va luh chuan, "I fapa hi pawm rawh," a ti a.
4:37	Tichuan a va lut a, a ke bulah a bawkkhup a, a hmaia lei siin chibai a buk a; tin, a fapa chu a pawm a, a chhuak ta a.
4:38	Tin, Elisa chu Gilgal-ah a kal leh a; chu mi rama chuan tam a tla a: tin, zawlneiho fapate a hmaah an thu khawm a; chhiahhlawh hnenah, "Bel lian tak kha chuang langin, zawlneiho fapate hi thil chhumkawi chhumsak rawh khai," a ti a.
4:39	Tin, mi pakhat ram lama chawhmeh zawng turin a va kal a, ram hrui a va hmu a, chuta mi ram awmpawng chu a puan tlin tawkin a rawn fun a, a zai sawm a, bela thil chhumkawia chuan a thlak ta a; eng tih an hre hauh lo mai a.
4:40	Chutichuan chu miteho ei atan chuan an han suak chuak a. Tin, thil chhumkawi chu an han ei chuan, heti hi a ni a, "E khai, Pathian mi, bel chunga ian thihna a awm alawm le," an ti ta chul mai a. Tichuan an ei thei ta lo va.
4:41	Tin, ani chuan, "Chhangphut han la te u," a ti a. Tin, chu chu belah a han thlak a, "He mite eiah hian han suak chhuak te u," a ti a. Tichan bela chuan hlauhawm engmah a awm ta lo va.
4:42	Tin, Baal-salisa atangin mi pakhat a lo kal a, Pathian mi chu buh thar hmasa bera siam busanghar changper sawmhnih leh buh thar vui a ipin a rawn kensak a. Ani chuan, "He miteho ei atan hian pe ta che," a ti a.
4:43	Tin, a chhiahlaw chuan, "Eng a ni; hei hi mi za zet ka hlui ang maw?" a ti a. Ani erawh chuan, "He miteho ei atan hian pe rawh; LALPAN heti hian a ti, 'An ei ang a, an ei bang bawk ang,' tiin," a ti a.
4:44	Chutichuan a han hlui a, an ei a, LALPA tih ang ngeiin an ei bang bawk a.