Deuteronomy 22

THUTHLUNGHLUI   Deuteronomy   Bung 22
22:1	In unaute bawngpa emaw, an beram emaw bo chu in hmuinin ngawihsan mai tur a ni lo va, in unaute inah in hruaihawsak leh ngei tur a ni.
22:2	Tin, in unaute in kiang hnaia awm an nih loh va, a neitu chu in hriat loh emaw ani chuan, in in lamah in hruai haw ang a, in hnenah a awm reng ang a, in unauvin a rawn zawn hun hunah in lo pek leh tur a ni.
22:3	An sabengtung pawh chutiang bawk chuan in ti tur ani a, chutiang bawk chuan an silhfente pawh in ti tur ani a, chutiang bawk chuan in unau thil hloh in chhar tawh phawt chu in ti tur ani a, in ngawih bopui tur a ni lo.
22:4	In unaute sabengtung emaw, an bawngpa emaw, kawnga tlu in hmuhin in ngawihsan mai tur a ni lo va, in tunthawhpui ngei tur a ni.
22:5	Hmeichhiain mipa thuamhnaw an inbel tur ani lo va, mipain hmeiche silhfen an inbel tur ani hek lo; tupawh chutiang ti apiang chu LALPA in Pathian ngaihin mi tenawm an ni.
22:6	Kalkawnga thingah emaw, leiah emaw, sava bu a puiin a no emaw, a tui emaw awm, a awp lai in inhmuh chuan a no chu a pui chawpin in la tur ani lo va,
22:7	a pui chu chhuah ngei ngei tur ani a, a no erawh chu in la thei ang: chutichuan in tan a tha ang a, in dam rei dawn nia.
22:8	In thar in sak chuan chuta mi an tlaka inin chu thisen chhuahna in a nih loh nan in in chung in hung tur a ni.
22:9	Tin, in grep huanah chuan thil chi hni inching tur ani lo; chutilochuanin chi tuh leh in grep huana thil hawng zawng zawng chu LALPA pual ani mai ang.
22:10	Bawngpa leh sabengtung lei in leh duntir tur a ni lo.
22:11	Sahmul leh la tah pawlh in inbel tur a ni lo.
22:12	In intuamna puan chu a tlang pali-ah fem in neihtir tur a ni.
22:13	Miin a nupui a neih a, a pawl a, a huat leh si a,
22:14	"He hmeichhia hi ka nei a, ka han pawl a, nula thianghlim a nihna ka hmu lo va,' tia mualpho taka a siam a, a hming a tihchhiat chuan,
22:15	nula nu leh pa chuan kulh kawngkaah chu mi khaw upate hnenah nula thianghlim a nihna chu an rawn tilang tur a ni a;
22:16	tin, nula pa chuan upate hnenah, 'He mi hi ka fanu ka neihtir a, a haw leh si a,
22:17	tin, ngai teh u, I fanu hi nula thianghlim a nihna ka hmu lo ve, tiin mualpho takin a siam a, mahse hengte hi ka fanu nula thianghlim a nihna chu ani alawm,' a ti ang a. Tichuan mi khaw upate hmaah chuan puan an phah ang a.
22:18	Tin, chu khaw upate chuan chu mi chu an hrem ang a;
22:19	Israel nula thianghlim a tihhmingchhiat avangin tangka sekel za an chawitir ang a; nula pa chu an pe tur a ni, ani chu a nupui ani ang a, a dam chhungin a then thei lo vang.
22:20	Amaherawhchu chu mi thu chu a lo dik a, nula chu nula thianghlim a nihna a lo lan loh chuan
22:21	nula chu a pa kawngakah an hruai chhuak ang a, a awmna khuaa mite chuan lungin an deng hlum ang, a pa ina nawhchizuara Israelte zinga thil sual atthlak tak a tih avangin; chutiang chuan in zing ata, chu thil tha lo chu in tibo tur a ni.
22:22	Miin palsal nei a mutpui an hmuh chuan an pahnih chuan an thi tur a ni, a mutpuitu mipa leh hmeichhia chu; chutiang chuan Israel zing ata, chu thil tha lo chu in tibo tur a ni.
22:23	Nula thianghlim, mi nupui hual, miin khuaah ahmuh a, a mutpui chuan
22:24	an pahnihin khaw kulh kawngkaah in hruai chhuak ang a, lungin in denghlum tur a ni; hmeichhia chu khuaa awm si a au loh avangin; tin, mipa chu a thenawm nupui a tihhminghliau avangin; chutiang chuan in zing ata, chu thil tha lo chu in tibo tur a ni.
22:25	Amaherawhchu miin ramhnuaiah nula, mi hual a hmuh a, a tihluih a, a mutpui chuan a mutpuitu mipa chauh chu tihhlum tur ani a,
22:26	a nula chu engmah in tih tur a ni lo, nula chungah chuan thihna khawp sual a awm lo; heitang hi chu, mi athenawm beia that ang a ni a;
22:27	ramah a va tawng fu a, mi hual nula chu a au va, chhantu an awm si lo va.
22:28	Miin nula thianghlim hual loh a hmuh a, a man a,a mutpui an hmuh chuan,
22:29	a mutpuitu mipa chuan nula pa chu tangka sekel sawmnag a pe tur ani a, tin, ani chu a nupui a ni ang, a tihhminghliau tawh avangin; a dam chhungin a then thei lovang.
22:30	Tuman mahni pate nupui mutpuiin an pate an timualpho tur a ni lo.