Deuteronomy 23

THUTHLUNGHLUI   Deuteronomy   Bung 23
23:2	Sawn chu LALPA mite pung khawm zingah an tel tur a ni lo; chhuan sawmna thlengin a thlahte chu LALPA mite pung khawm zingah an tel tur a ni lo.
23:3	Amon mite leh Moab mite chu LALPA mite pung khawm zingah an tel tur a ni lo. Chuan sawmna thlengin an zinga mi chu LALPA mite pung khawm zingah an tel hauh lo tur a ni;
23:4	Aigupta ram atanga in lo chhuah laia chhang leh tuia an lo hmuah loh che u avang leh anchhe lawh tur che ua Mesopotamia rama Pethor khuaa Beora fapa Balaama an rawih avang khan.
23:5	Nimahsela LALPA in Pathian chuan a hmangaih che u avangin LALPA in Pathian chuan anchhia chu in tan malsawmnaah a chantir ta zawk a.
23:6	In dam chung zawng anmahni nena inremna leh an hmuingilna engtikah mah in ngaihtuahpui tur a ni lo.
23:7	Edom mite chu in lungten tur a ni lo va, in unaute an ni si a; Aigupta mite chu in lungten tur ani lo, an ramah chuan in va mikhual tawh avangin.
23:8	An thlahte chu chhuan thumna atnagin LALPA mite pungkhawm zingah chuan an tel tur a ni.
23:9	In hmelmate beia in va riahna hmuna chuan thil tha lo tinreng lakah in inthiarfihlim tur a ni.
23:10	In zingah tupawh zana amaha thil chuak avanga bawlhhlawh an awm chuan, riahhmun ata a chhuak ang a, riahhmunah chuan a lut leh tur ani lo va;
23:11	amaherawhchu khua a lo tlai lamin a inbual ang a; tin, ni tlakah riahmunah a lut leh tur a ni.
23:12	Tin, riahhmun pawn lama hmun in ruat ang a, chutah chuan in kal thin tur a ni;
23:13	tin, in hmanraw zinga chuan suahdur in nei ang a; tin, heti hi ani ang a, chuchuan in va thutna tur chu in lai khuar ang a, in zunram thiar chu in vur leh tur a ni;
23:14	LALPA in Pathian chu in riahhmuna nangmahni chhanhim tur leh in hmelmate hlan tur che uin a lo tel zel si thin a; chuvangin riahhmun chu a thianghlim tur a ni; chuti lo chuan in zinga thil bawlhhlawh a hmu ang a, a kal bosan dah ang che u.
23:15	Chhiahhlawh, in hnena an pu rawn tlan chhuahsan chu in pe let leh tur a ni lo:
23:16	in awmnaa an du ber an thlan apianga chuan in zingah an awm ve mai tur a ni; in hnehchhiah turani lo
23:17	Israel fanute zingah nawhchizuar an awm tur ani lo va, Israel fapate zingah mipa inzuar an awm tur a ni hek lo.
23:18	Nawhchi zawrh man emaw, uicho man emaw , thutiam nan LALPA in Pathian ina in keng tur ani lo; a eng ve ve pawh chu LALPA in Pathian ngaihin thil tenawm a ni.
23:19	A pung umin in unaute inpuktir tur a ni lo; tangka lama pung emaw, ei tur lama pung emaw, engpawh a pung uma puktir reng reng chu:
23:20	ram dang mite chu a pung umin in puktir thei ang; nimahsela in unaute chu a pung umin in puktir tur a ni lo; chutichuan in va luah tur rama in kutkawih zawng zawngah LALPA in Pathianin mal a sawm dawn che u nia.
23:21	LALPA in Pathian hnena thu in tiam in rei rial lovin pek nghal tur a ni; LALPA in Pathian chuan a phut dawn ngei si che u a, in tan sual a lo ni mai ang.
23:22	Thutiam kawnga in insum chuan in tan sual a ni lovang.
23:23	In kaa chhuak tawh chu in ti ngei tur a ni; duh thua thilhlan in kaa in tiam, LALPA in Pathian hnena in tiam ang zelin.
23:24	In thenawm grep huana in kalin in duh tawkin in ei thei a, amaherawhchu in emah in khung tur a ni lo.
23:25	In thenawm buh ding lai hmunah in kalin a vui chu in thliak thei a; amaherawhchu in thenawm buh ding laiah chuan favah in ruai tur a ni lo.