Deuteronomy 3

THUTHLUNGHLUI   Deuteronomy   Bung 3
3:1	Chutichuan kan insuan a, Basan kawngah kan chho va: Basan lal Oga leh a mite zawng zawng chu Edrei-a min bei turin an lo thawk a.
3:2	Tin, LALPAN ka hnenah, 'Amah chu hlau suh, amah leh a mite zawng zawng leh a ram chu i kutah ka pe tawh diam a ni; Hesbon-a awm Amor-ho lal Sihona chunga i tih ang khan a chungah i ti dawn nia,' a ti a.
3:3	Chutichuan LALPA kan Pathian chuan Basan lal Oga pawh a mite zawng zawng nen kan kutah a pe a: tichuan pakhat te mah zuahsak lovin kan that vek a.
3:4	chu mi tum chuan a khua zawng zawng khaw sawmruk, Basan-a Oga ram, Argob ram zawng zawng chu kan la vek a; kan laksak loh khaw pakhat te mah a awm lo.
3:5	Heng khua zawng zawng hi kulh sang tak tak, kawngkhar leh kalhna nei vek a ni a, kulh nei lo khaw tam tak tiam lo pawhin.
3:6	Hesbon leh Sihona chunga kan tih ang khan kan tiboral vek a, khuaa mihring zawng zawng chu kan tiboral vek a, hmeichhia leh an fanaute tete nen lam.
3:7	Amaherawhchu ran zawng zawng leh khuaa rallaka kan lak thilte chu kan pualah kan la a.
3:8	Chumi tum chuan Jordan rala awm Amor ho lal pahnih kut ata chu Arnon ruam atanga Hermon tlang thlenga ram chu kan la a;
3:9	(chu Hermon chu Zodon-ho chuan Sirion an ti a, Amor-ho chuan Senir an ti a ni);
3:10	phai ram khua zawng zawng leh Gilead ram zawng zawng leh Basan ram zawng zawng nen, Basan rama Oga ram khua, Saleka leh Edrei thlengin.
3:11	(Basan lal Oga chauh a ni, Rephaho zinga la awm chhun chu; ngai teh, a khum chu thir a ni; Amona thlaler khua Raba-ah chuan a la awm reng a ni lawm ni? Mihring tawnga tehin a dung lam tawng kua, a vang lam tawng li a ni.)
3:12	Chu mi tum chuan chu mi ram chu kan luah a; Arnon ruam kanga Arorer atangin Gilead tlang ram zatve thlengin, chuta khaw awmte nen Reuben-ho leh Gad-ho ka pe a;
3:13	tin, Gilead ram la awm zawng leh Oga ram Basan zawng zawng chu Manase hnam zatvete ka pe a; Argob ram zawng zawng leh Basan ram zawng zawng chu. (Hei hi Rephaim-ho ram an ti bawk thin a.
3:14	Manasea fapa Jaira chuan Argob ram zawng zawng Basan ram an tih chu Gesur-ho leh Maakat-ho ram thlengin a la a, chung chu ama hming chawiin Havot-Jaira a ti a, tun thlengin a la ti reng).
3:15	Tin, Gilead chu Makira ka pe a.
3:16	Tin, Reuben-ho leh Gad-ho chu Gilead atanga Arnon ruam, ruam lai tak thlengin an ram chin atan ka pe a; Amona thlahho ramri, Jakob lui thlengin;
3:17	tin, Araba leh Jordan pawh ramri atan Kineret atanga Pisga chhak lam pangper hnuaia Tuifinriat Al, Araba tuifinriat thlengin.
3:18	Tin, chu mi lai chuan, 'LALPA in Pathianin he ram hi in pualah a pe che u a ni, Israela thlah, in unaute hmaah in mi huaisen zawng zawngte chu inralthuamin han kal ve rawh se.
3:19	,20 Amaherawhchu nangmahni anga in unaute chu LALPAN ralmuanga a siam hma leh LALPA in Pathianin Jordan rala ram a pek chu an luah ve hma loh chuan in nupuite leh in fanaute tete leh in ramte chu (ran in ngah tih ka hria a) in khua ka pek tak che u ah hian lo awm sela; tichuan in pual theuh tura ka pek che uah hian in lo haw leh theuh dawn nia,' tiin thu ka pe a che u a.
3:20	,19 Amaherawhchu nangmahni anga in unaute chu LALPAN ralmuanga a siam hma leh LALPA in Pathianin Jordan rala ram a pek chu an luah ve hma loh chuan in nupuite leh in fanaute tete leh in ramte chu (ran in ngah tih ka hria a) in khua ka pek tak che u ah hian lo awm sela; tichuan in pual theuh tura ka pek che uah hian in lo haw leh theuh dawn nia,' tiin thu ka pe a che u a.
3:21	Tin, chu mi lai bawk chuan Josua chu, 'LALPA in Pathianin chung lal pahnihte chunga thil a tih zawng zawng chu i mitin a hmu vek a; chutiang tak bawk chuan in luhna tur ram zawng zawngte chungah LALPAN a ti ang.
3:22	Anmahni chu hlau suh ang che u; a beihpuitu che u chu LALPA in Pathian a ni si a,' tiin thu a pe a.
3:23	Tin, chu mi lai vek bawk chuan, 'Aw Lalpa, PATHIAN, i chhiahhlawh hnenah hian i ropuizia leh i kut chak tak chu i lantir ta phawt chu a ni a; vanah emaw, leiah emaw hian i thiltih ang leh i thiltih ropui tak ang ti thei Pathian hi tunge awm?
3:24	Tin, chu mi lai vek bawk chuan, 'Aw Lalpa, PATHIAN, i chhiahhlawh hnenah hian i ropuizia leh i kut chak tak chu i lantir ta phawt chu a ni a; vanah emaw, leiah emaw hian i thiltih ang leh i thiltih ropui tak ang ti thei Pathian hi tunge awm?
3:25	Mi kaitir la, Jordan rala ram tha tak, chu tlang mawi tak leh Lebanon chu mi hmuhtir teh khai,' tiin LALPA chu ka ngen chiam a.
3:26	Nimahsela nangmahni avangin ka chungah LALPA chu a thinur hle a, ka thu chu a pawm lo va; tichuan LALPA chuan, 'Tawk tawh rawh se, he thuah hian mi be leh tawh suh;
3:27	Pisga tlang chhipah han chuang la, thlang lamah te, hmar lamah te, chhim lamah te, chhak lamah te, i mit han len la, han thlir rawh; Jordan hi i kan dawn lo a ni.
3:28	Amaherawhchu Josua hi thu pe la, fuih tha la, tichak rawh; heng mipuite hi a hruai kai dawn a, i han hmuh tur ram chu a luahtir dawn a ni,' mi ti a.
3:29	Chutichuan Bethpeor ep ruamah chuan kan awm ta a nih kha.