Deuteronomy 5

THUTHLUNGHLUI   Deuteronomy   Bung 5
5:1	Tin, Mosian Israel-ho zawng zawng chu a ko khawm a, an hnenah, "Aw Israel mite u, in zira in pawm tura dan te, rorel te in benghriata vawina ka sawi hi ngaithla rawh u.
5:2	LALPA kan Pathianin Horeb-ah chuan kan hnenah thu a thlung a.
5:3	LALPA chuan he thu kan pi leh pute hnenah khan a thlung lo va, keiniho, tun thlenga mi nungdama la awm zawng zawngte hnenah ngei hian a ni, a thlun zawk ni.
5:4	LALPA chuan tlangah mei atangin inhmatawnin a bia he u a,
5:5	(chu mi lai chuan LALPA thu kawhmuh tur che uin LALPA nena in inkarah ka ding a; mei avang chuan in hlau si a, tlangah chuan in han chho lo ve).
5:6	Kei hi LALPA i Pathian, Aigupta ram ata, bawih ata hruai chhuaktu che ka ni.
5:7	Keimah lo chu pathian dang reng reng i nei tur a ni lo.
5:8	Milem siam chawp chung lam vana mi emaw, hnuai lam leia mi emaw, lei hnuai lama tuia mi emaw, a eng anpui mah i insiam tur a ni lo;
5:9	chung chu chibai i buk tur a ni lo va, an rawng i bawl tur a ni hek lo. Kei LALPA i Pathian hi Pathian thikthuchhia, pate khawlohna avanga fate hrem thin, mi hawtute chu chhuan thumna leh chhuan lina thlenga hrem thin leh,
5:10	mi hmangaiha ka thupekte pawmtu sang tam takte chunga khawngaihna lantir thin ka nih hi.
5:11	LALPA i Pathian hming chu i lam mai mai tur a ni lo. LALPA chuan a hming lam mai maitu chu thiam loh chantir lohvin a chhuah dawn si lo va.
5:12	LALPA i Pathianin thu a pek che angin chawlhni chu thianghlim reng turin serh rawh.
5:13	Ni ruk chhungin i thawk ang a, i hna zawng zawng chu i thawk tur a ni;
5:14	a ni sarih ni erawh chu LALPA i Pathian tan chawlhni a ni e; chu mi ni chuan hna reng reng i thawk tur a ni lo, nang pawhin, i fapa pawhin, i fanu pawhin, i bawihpa pawhin, i bawihnu pawhin, i bawngpa pawhin, i sabengtung pawhin, i ran a enga pawhin, i ina ramdang mite pawhin; nangmah ang bawka i bawihpa te, i bawihnute pawh an chawlh thei nan.
5:15	Nang pawh Aigupta ramah khan bawi i ni tawh a, LALPA i Pathianin chuta ta chu kut chak tak leh ban phara a hruai chhuah che i ni tih hre reng rawh; chuvang chuan a ni, LALPA i Pathianin chawlhni serh tur thu a pek che ni.
5:16	LALPA i Pathianin thu a pek che angin i nu leh i pa chawimawi rawh; tichuan LALPAN ram a pekah che hian i hmuingil ang a, i dam rei dawn nia.
5:17	Tual i that tur a ni lo.
5:18	I uire tur a ni lo.
5:19	I ru tur a ni lo.
5:20	I vengte chungah hretu derah i insiam tur a ni lo.
5:21	I vengte nupui i awt tur ani lo va, i vengte in emaw, a lo emaw, a bawihpa emaw, a bawihnu emaw, a bawngpa emaw, a sabengtung emaw, i vengte thil a engmah i awt tur a ni lo' tiin.
5:22	Heng thute hi tlangah mei te, chhum te, thim chhah mup atangtein LALPAN aw ring takin in zavaia pungkhawmho hnenah a sawi a, a belhchhah leh chuang lo va. chung chu lungphek pahnihah a ziak a, mi pe a.
5:23	Tin, tlang chu a kan laia, thim atanga aw chu in han hriat chuan heti hi a ni a, min rawn hnaih a, in hnam puipa zawng zawng leh in upate chuan;
5:24	Tin, 'ngai teh, LALPA kan Pathian chuan kan hnenah a ropuizia leh a lenzia a lantir a, mei atanga a awm chu ka hria a; Pathianin mihring a biak pawha thihna a ni chuan lohna chu vawiinah kan lo hre ta a.
5:25	Chuvangin engah nge kan thih ang? He mi mei nasa tak hian min kangral mai ang asin; LALPA kan Pathian aw chu kan hriat leh chuan ka thi mai ang.
5:26	Mei atanga Pathian nung aw kan hriat anga hre vea dam si tisa pu zawng zawng zingah tunge awm?
5:27	Nangin va hnaih la, LALPA kan Pathianin a sawi tur zawng zawng chu va ngaithla teh khai; tin, LALPA kan Pathianin i hnena a sawi zawng zawng chu nangin kan hnena i sawi ang a; tichuan kan lo ngaithla ang a, kan zawm dawn nia,' in ti a.
5:28	Tin, mi biak laia in thusawi chu LALPAN a lo hria a; tichuan LALPAN ka hnenah, 'Heng mipuiten i hnena thu an sawi chu ka lo hria a; an thusawi zawng zawng chu a tha hle mai.
5:29	Chutiang rilru chu pu thin sela aw, mi tih ang a, ka thupekte chu an zawm fo vang a, anmahni leh an fate pawh kumkhuain an hmungil hle tur!
5:30	An hnenah, in puan inah te va haw rawh u, ti rawh.
5:31	Nang erawh chu ka kiangah ding la, luah tura ram ka peka an pawm tura i zirtir tur thupek zawng zawng te, dan te, rorel te chu ka hrilh ang che,' a ti a.
5:32	Chuvangin LALPA in Pathianin thu a pek che u anga ti turin fimkhur rawh u; ding lamah emaw, vei lamah emaw in peng tur a ni lo.
5:33	In va luah tur ramah in awm a, in hmuingilna tur leh in chen rei thei nan LALPA in Pathianin thu a pek che u kawng in zawn tluan chhuak tur a ni.