Exodus 2

THUTHLUNGHLUI   Exodus   Bung 2
2:1	Tin, mi pakhat, Levia chhûngte zînga mi a va chhuak a, Levia fanu nupuiah a va nei a.
2:2	Tin, hmeichhia chu a rai a, tin, fapa a hring a: tin ani chuan nautê chu hmêl tha a ti êm a, thla thum a thukru a.
2:3	Tin, a lo thukru reng thei ta lo va, a tân luang lawng a la a, chu chu chirh leh alkatra-in a châr a, tin, nautê chu chutah chuan a muttîr a, tichuan lui kama phairuang zîngah chuan a dah ta a.
2:4	Tin, a chûngah eng tak la thleng ang maw tia hriat tumin a farnu chu hla feah a ding a.
2:5	Tin, Pharaoa fanu chu luia inbual tûrin a zu kal a; tin, a bâwihnute chu lui kamah chuan an kal ve a; tin, phairuang zînga bâwm a han hmuh chuan a bâwihnu a va lâktîr a.
2:6	Tin, a han hawn chuan nautê chu a hmu ta a: tin, ngai teh, nausên chu a tap ta a. Tin, a khawngaih ta êm êm a, "Hei Hebrai fa a nih hi le," a ti a.
2:7	Tichuan a farnu chuan Pharaoa fanu hnênah chuan, "He nautê awmsaktu tûr che Hebrai hmeichhia nau awmtu ka kohsak ang che chu?" a ti a.
2:8	Tin, Pharaoa fanu chuan a hnênah, "Kal rawh," a ti a. Tin, nula chu a kal a, chu nausên nu chu a ko ta a.
2:9	Tin, Pharaoa fanu chuan a hnênah, "He nautê hi kalpui ta la, mi awmsak ang che, tichuan i hlawh ka pe ang che," a ti a. Chutichuan hmeichhia chuan nautê chu a la a, a pawm ta a.
2:10	Tin, nautê chu a lo thang lian a, Pharaoa fanu hnênah a hruai a, tichuan a fapaah a awm ta a. Tin, "Tui ata ka lâk chhuah avângin," a ti a, a hmingah chuan Mosia a sa a.
2:11	Tin, heti hi a ni a, chûng laia Mosia a lo puitlin chuan, a unautê a va kan a, an phurritte chu a va hmu a: tin, Aigupta mi pakhat hian a unau pakhat Hebrai mi hi a vaw lai a han hmu a.
2:12	Tin, Mosia chu a hawi vêl ruai a, tin, tumah an awm lo tih a hriat veleh, Aigupta mi chu a vawhlum a, leiah a phûm ta a.
2:13	Tin, atûkah a va chhuak leh a, tin, ngai teh, Hebrai mi pahnih an lo insual a: tin, a thiam lo zâwka hnênah chuan, "Engati nge i thian i vuak le?" a ti a.
2:14	Tin, ani chuan, "Kan chûngah hotuah leh rorêltuah tuin nge siam che? Aigupta mi i tihhlum ang khân mi tihhlum i tum elo?" a ti a. Tin, Mosia chuan a hlau ta a, "An hre ta ngei zuk nia le" a ti a.
2:15	Tichuan Pharaoan chu chu a lo hriat veleh, Mosia chu thah a tum ta a. Nimahsela Mosia chu Pharaoa hnên ata a tlân bo va, Midian ramah a awm ta a: tin, tuichhunchhuah sîrah hian a thu a.
2:16	Tin, Midian rama puithiam chuan fanu pasarih a nei a: tin, anni chuan tui an rawn chawi a, an pa berâm rual in tûrin tui inna thlêngte chu an tikhat a.
2:17	Tin, berâm vêngtute an lo kal a, an rawn hnawt darh a: nimahsela Mosia chu a tho va, anmahni chu a rawn tanpui a, an berâm rual chu tui a intîr ta a.
2:18	Tin, an pa Reuela hnên an va thlenin ani chuan, "Engtizia nge vawiin chu in va lo haw hma ve le?" a ti a.
2:19	Tin, anni chuan, "Aigupta mi pakhatin berâm vêngtute lak ata min chhanhim a ni, tin, chu chang ni lovin, tui te min thâlsak a, berâm rual tui a intîr a ni," an ti a.
2:20	Tin, ani chuan a fanute hnênah chuan, "Chu, khawiah nge a awm le? Eng tizia nge in rawn hâwnsan mai ni le? Va ko ta che u, chaw te rawn ei ang hmiang," a ti a.
2:21	Tin, Mosia chuan chu mi hnêna awm chu rem a ti a: tin, a fanu Zipori chu Mosia a pe a.
2:22	Tin, fapa a hring a, tin, Mosian a hmingah Gersoma a sa a; "Mi rama pêm ka nih avângin," a ti a ni.
2:23	Tin, heti hi a ni a, ni rei fe chinah chuan Aigupta lal chu a thi ta a: tin, Israela thlahte chu an hnathawh hautak avâng chuan an rûm a, tin, an au va, tichuan an hnathawh hautak avânga an au thâwm chu Pathian hnêna a han thleng ta a.
2:24	Tin, Pathianin an rûm chu a hria a, tin, Pathianin Abrahama te, Isaaka te leh Jakoba te hnêna a thuthlun kha a hre reng a.
2:25	Tin, Pathian chuan Israela thlahte chu a thlîr reng a, tichuan Pathian chuan anmahni chu a zuk ngaihsak reng bawk a.