Exodus 3

THUTHLUNGHLUI   Exodus   Bung 3
3:1	Tin, Mosia chuan a pu Jethroa, Midian ram puithiam beram rual a veng a: tin, beram rual chu thlaler thlang lampangah chuan a khalh a, tin, Pathian tlang, Horeb chu a va thleng a.
3:2	Tin, hnim bukah LALPA vantirhkoh, meialhin a hnenah a rawn inlar a: tin, a han en a, tin, ngai teh, hnim buk chu meiin a kang a, a hnim buka erawh chu a kang ral si lo.
3:3	Tin, Mosia chuan, "Ka va peng teh reng ang, eng tizia nge ni hnim buk saw a kan ral loh, he thil mak tak hi ka va en teh ang e," a ti a.
3:4	Tin, LALPA chuan en tira a va peng chu a hmuhin, Pathianin hnim buk zing atang chuan a han ko va, "Mosi, Mosi," a han ti a. Tin, ani chuan, "Heta hi ka awm," a ti a.
3:5	Tin, ani chuan, "Rawn hnaih suh khai: i kephah ata i pheikhawkte kha phelh rawh, i dinna hmun kha lei thianghlim a ni e," a ti a.
3:6	Tin, "Kei hi i pa Pathian, Abrahama Pathian, Isaaka Pathian, Jakoba Pathian chu ka nih hi," a ti leh a. Tin, Mosia chuan a hmai a khuh ta a; Pathian a en ngam si lo va.
3:7	Tin, LALPA chuan, "Aigupta rama ka mi awmte chu an hreawmzia ka hmu reg asin, anmahni vengtute avanga an au thawmte chu ka lo hria a; an lungngaihnate chu ka hre reng si a;
3:8	tichuan Aigupta-ho lak ata chhanhim tur leh chu mi ram ata chu hruai chhuaka Kanaan-hote, Hit-hote, Amor-hote Periz-hote, Hiv-hote, Jebus-hote awmna ram tha tak leh zau tak, hnutetui leh khawizu luanna rama hruai lut turin ka lo chhuak ta a ni.
3:9	Tin, ngai teh, Israela thlahte au thawm chu ka hnen a lo thleng e: chu chang a ni lo va, Aigupta-hovin anmahni an hnehchhiahziate chu ka hmu reng a ni.
3:10	Chuvangin hawh teh, ka mi Israela thlahte chu Aigupta ram ata hruai chhuak turin Pharaoa hnenah ka tir ang che," a ti a.
3:11	Tin, Mosia chuan Pathian hnenah, "Kei Pharaoa hnena kala, Israela thlahte Aigupta ram ata zuk hruai chhuaktu atan chuan tunge maw ka nih le?" a ti a.
3:12	Tin, ani chuan, "I hnenah ka awm dawn alawm; tichuan keima tirh ngei i ni tih hei hi i tan chhinchhiahna a ni ang: Aigupta ram ata mite chu i rawn hruai chhuah hunah chuan, he tlang ngeiah hian Pathian rawng in la bawl ang," a ti a.
3:13	Tin, Mosian Pathian hnenah, "Ngai teh, Israela thlahte hnenah chuan zuk kalin an hnenah, 'In thlahtute Pathianin in hnenah hian mi rawn tir a ni e,' zuk ti ila; tin, anni chuan ka hnenah, 'Tunge ni a hming chu?' lo ti ang sela, an hnenah chuan engtin nge ka sawi ang?" a ti a.
3:14	Tin, Pathianin Mosia hnenah, "AWMA KA NI," a ti a; tin, a hnenah chuan, "Nangin Israela thlahte hnenah chuan, 'AWMA chuan in hnenah mi rawn tir a ni e,' i ti tur a ni," a ti a.
3:15	Tin, Pathian vekin Mosia hnenah chuan, "Nangin Israela thlahte hnenah chuan, 'LALPA in thlahtute Pathian, Abrahama Pathian, Isaaka Pathian leh Jakoba Pathian chuan in hnenah hian mi rawn tir a ni e: hei hi kumkhuaa ka hming chu a ni a, tin, hei hi chhuan zawng zawng thlenga mi hriat rengna chu a ni,' ti ang che.
3:16	Kal langin Israela upaho ko khawm ang che, tichuan an hnenah, 'LALPA in thlahtute Pathian, Abrahama Pathian, Isaaka Pathian leh Jakoba Pathian chuan ka rawn kan ta ngei che u a, Aigupta rama in chunga an tihzia te hi ka hmu ta ngei mai;
3:17	Aigupta rama tihhreawmna lak ata chu ka hruai chhuak ang che u a, Kanaan-hote, Hit-hote, Amor-hote, Periz-hote, Hiv-hote, Hit-hote ram, hnutetui leh khawizu luanna ramah chuan ka hruai lut ang che u ka tih tawh kha tiin ka hnenah a rawn inlar ta a ni,' ti ang che.
3:18	Chutichuan i thu an lo ngaithla ang: tin, nang leh Israel upaho chu Aigupta lal hnenah in kal ang a, tin, a hnenah, 'LALPA, Hebraite Pathianin min rawn tlawh ta mai a; chuvangin thlaler ni thum kalah LALPA kan Pathian hnena kan va inthawi theihna turin khawngaih takin min kalt卯r ang che,' ti ang che u.
3:19	Tin, Aigupta lal zawngin kut chak tak ngawt lo chuan a chhuahtir hlei lo vang che u tih ka hria e.
3:20	tin, ka kut ka phar ang a, tin, Aigupta-ho chu an zinga thil mak tak ka la tih tur zawng zawngte chuan ka la hrem ang: tin, chu mi hnuah zawng a chhuahtir tawh ang che u.
3:21	Tin, he mite hi Aigupta-ho ka khawngaihtir ang a: tin, heti hi a ni ang a, in kal hunah chuan ruakin in kal lo vang a,
3:22	hmeichhe tinin an vengte leh an ina chengte chu tangkaraw incheinate leh rangkachak incheinate leh silhfente an la dun zawk ang a; tichuan in fapate leh in fanute chu in la bei ang; tin, Aigupta mite chu in rawk a ni ang," a ti a.