Exodus 26

THUTHLUNGHLUI   Exodus   Bung 26
26:1	"Tin, biak buk, puanzeh sawm neiin i siam bawk tur a ni; la zai sin tak kawp, dum pawl te, sen duk te, sen lar te hmangin cherub lemte thiam taka siam chuantirin i siam tur a ni.
26:2	Puanzeh chu a sei lam tawng sawm hnih leh tawng riat theuh a ni ang a, puanzai chu a hlai lam tawng li theuh a ni ang: puanzeh zawng zawng chu inchen vek tur a ni.
26:3	Puanzeh pangate chu inzawm tur a ni a; tin, puanzeh panga vekte pawh chu inzawm bawk tur a ni.
26:4	Tin, puanzeh zawm khat hmawrtawng ber tlangah chuan a beng a dum pawlin i siam tur a ni a, chutiang bawkin puanzeh zawm lehlam hmawrtawng ber tlangah chuan i siam bawk tur a ni.
26:5	Puanzeh pakhatah chuan beng sawmnga i siam tur a ni a, tin, zawm khat puanzeh tlangah pawh chuan beng sawmnga i siam bawk tur a ni a; chung bengte chu a inep thiah tur a ni.
26:6	Tin, rangkachak chilhbehnate sawmnga i siam tur a ni a, a chilhbehnate chuan puanzehte chu i chilh bet tur a ni a: tichuan biak buk chu pindan pakhat a lo ni tur a ni.
26:7	Tin, biak buk chung khuh nan kel hmul puanzehte i siam tur a ni: puanzeh sawm leh pakhat i siam tur a ni.
26:8	Puanzeh chu a sei lam tawng sawmthum theuh a ni tur a ni a, tin, puanzeh chu a hlai lam tawng li theuh a ni tur a ni: puanzeh sawm leh pakhatte chu inchen vek tur a ni.
26:9	Tin, puanzeh pangate chu i thui zawm vek tur a ni a, tin, puanzeh paruk pawh chu thui zawm bawk tur a ni a, puan in hma lama puanzeh a parukna chuan a khuh tur a ni.
26:10	Tin, puanzeh zawm khat tlangah chuan beng sawmnga i siam tur a ni a, tin, puanzeh zawm lehlam tlangah pawh chuan beng sawmnga siam bawk tur a ni
26:11	Tin, dar chilhbehna sawmnga i siam tur a ni a, tin, chu mi chilhbehna chu puan tlanga a bengah chuan vuah tur a ni a, puan in chu chilh zawm vek tur a ni; pindan pakhat a lo nih theih nan.
26:12	Puan in puanzeh uai thla la chuang, a zatve la chuang chu biak buk kawmcharah a uai thla tur a ni.
26:13	Tin, puan in puanzeh a dung lam hmawr tuak ve vea tawng khat ve ve la chuanga chu biak buk bang lehlam lehlam khuh nan a uai thla tur a ni.
26:14	Tin, berampa vun chhum senin puan in chung khuhna te, savun tha chi vunin a chunga khuh lehnate i siam tur a ni.
26:15	Tin, biak buk ban rem khawm turte chu ngil taka dingin thingri thingin i siam tur a ni.
26:16	Tin, ban rem khawm sei lam chu tawng sawm ni sela, tin, a vang lam chu tawng khat leh a chanve ni theuh rawh se.
26:17	Ban rem khawm tinah chuan ke pahnih inzawmin a awm tur a ni: chutiang chuan biak buk ban rem khawm zawng zawng chu i siam tur a ni.
26:18	Tin, biak buk atan ban rem khawm chhim chhawng chhim lampang atan chuan ban rem khawm sawmhnih i siam tur a ni.
26:19	Tin, chu mi ban rem khawm sawmhnih nghahchhan atan chuan tangkaraw tlang kerkuak sawmli i siam tur a ni; a ke pahnih atan ban rem khawm pakhat nghahchhan kerkuak pahnih i siam tur a ni:
26:20	tin, biak buk sir lehlam hmun chhawng lam atan ban rem khawm sawmhnih i siam tur a ni:
26:21	Chung atan chuan tangkaraw tlang sawmli kerkuak nen, ban rem khawm pakhat atan nghahchhan kerkuak pahnih keh, ban rem khawm dang pakhat atan nghahchhan kerkuak pahnih i siam bawk tur a ni.
26:22	Tin, biak buk kawmchar khawtlang chhawng lam atan chuan ban rem khawm paruk i siam tur a ni.
26:23	Tin, biak buk kawmchar kil ve ve atan chuan ban rem khawm pahnih i siam tur a ni.
26:24	Tin, a hnuai lamah chuan thlawp tur a ni, chutiang bawkin a chhip lam khang hmasa ber thlengin tih vek tur a ni: chutiang chuan a pahnih chuan tih ve ve tur a ni; chung chu a kil pahnih atan a ni tur a ni.
26:25	Tin, ban rem khawm pariat, a nghahchhan tur tangkaraw tlang kerkuak sawm leh paruk nen a awm tur a ni; ban rem khawm pakhat atan nghahchhan kerkuak pahnih zel.
26:26	Tin, thingri thingin bangrel, biak buk bang lehlam ban remkhawm atan panga, biak buk bang lehlam ban rem khawm atan panga,
26:27	tin, biak buk kawmchar khawthlang chhawng lam ban rem khawm atan pawh panga i siam tur a ni.
26:28	Tin, bangrel laita, ban rem khawm lai taka mi chuan ban rem khawm hmawrtawng ber atangin a lehlam hmawrtawng ber thlengin a thil tlang tur a ni.
26:29	Tin, ban rem khawmte chu rangkachak tuiin i luan tur a ni a, tin, bangrelte thil nan rangkachak khangte i siam tur a ni: tin, chung bangrelte chu rangkachak tuiin i luan bawk tur a ni.
26:30	Chutichuan tlanga ka entir dan ang chiah che khan biak buk chu i sa tur a ni.
26:31	Tin, puanzeh tur la zai sin tak kawp te, a dum pawl te, a sen duk te, a sen larte hmangin cherub lemte mi thiam tak siam chuantirin i siam tur a ni.
26:32	Chu chu thingri ban pali rangkachak tui luanah chuan i zat tur a ni, a banna chu rangkachaka siam tur a ni, tin, tangkaraw tlang kerkuak palia inphun tur a ni.
26:33	Tin, chu mi puanzeh chu puanzeh chilhbehnate hnuai lamah chuan i zep a ni a, tin, chu mi puanzeh chhung lamah chuan thuthlunna bawm chu i dah lut tur a ni: tichuan puanzeh chuan hmun thianghlim leh hmun thianghlim ber chu a daidansak dawn che u nia.
26:34	Tin, zahngaihna thutphah chu hmun thianghlim berah thuthlunna bawm chhungah chuan i dah tur a ni.
26:35	Tin, puanzeh pawn lamah chuan dawhkan i hung tur a ni a, tin, biak buk chhim chhawng lam dawhkan epah chuan khawnvar dahna i hung tur a ni: tichuan dawhkan chu hmar lampangah chuan i dah tur a ni.
26:36	Tin, Puan in kawngkhar zeh tur la zai sin tak kawp te, a dum pawl te, a sen duk te, a sen lar te hmangin, puan zeh mawi thiam taka zeh nen i siam tur a ni.
26:37	Tin, puanzeh zarna tur chuan thingri ban panga i siam tur a ni a, chung chu rangkachak tuiin i luan tur a ni; a bannate chu rangkachaka siam tur a ni: chung hunna atan chuan dar tlang kerkuak panga i chhung tur a ni.