Exodus 25

THUTHLUNGHLUI   Exodus   Bung 25
25:1	Tin, LALPAN Mosia chu a bia a,
25:2	"Israela thlahte hnenah thu va sawi la, ka hnenah thil rawn hlan rawh se: an thinlunga chak taka pe apiangte pek chu ka tana thilhlanah in la tur a ni.
25:3	Hengte hi a ni an hnen atanga hlan tura in lak turte chu: rangkachak te, tangka te, dar te,
25:4	la dum pawl te, sen duk te, sen lar te, la zai sin te, kel hmul te,
25:5	tin, berampa vun chhum sen te, savun tha chi vun te, thingri thing te;
25:6	khawnvar atan hriak te, hriak thih mi atan leh hal tur rimtui tak atan englo rimtui te;
25:7	puithiam kawr leh kawr awma zeh turin onukion-te leh lunghlute nen.
25:8	Tin, hmun thianghlim mi siamsak rawh se, an zinga ka chen ve theih nan.
25:9	Biak buk lem leh a chhunga bungrua tur zawng zawng lem ka entir ang chiah che hian in siam tur a ni.
25:10	Tin, thingri thingin bawm siam sela: a dung lam chu tawng hnih leh a chanve ni sela, a vang lam chu tawng khat leh a chenve ni sela, a san lam chu tawng khat leh a chanve ni rawh se.
25:11	Tin, rangkachak hlir hlak tuiin I luan tur a ni a, a chhung leh a pawn I luan tur a ni a, tin, rangkachakin a tlang I kawm tur a ni.
25:12	Chu mi atan chuan rangkachak khang pali I chhung t1r a ni a, a ke paliah chuan vuah vek tur a ni; chu mi khang pahnih chu a lehlamah vuah tur a ni a, tin, khang pahnih chu a lehlamah vuah tur a ni.
25:13	Tin, thingri thing zawnfungahte I siam tur a ni a, rangkachak tuiin luan tur a ni.
25:14	Tin, bawm chu zawn theih turin a panga khangah chuan zawnfungte chu I rawlh tur a ni.
25:15	Chu bawma khangah chuan zawnfungte chu a invuah reng tur a ni: phawi chhuah hlek tur a ni lo ve.
25:16	Tin, bawm chhungah chuan thuhriattirna ka la pek tur che chu I dah tur a ni.
25:17	Tin, rangkachak hlir hlakin zahngaihna thutphah I siam tur a ni: a dung lam chu tawng hnih leh a chanve ni sela, a vang lam chu tawng khat leh a chanve ni rawh se.
25:18	Tin, cherub pahnih rangkachakin I siam tur a ni; zahngaihna thutphah hmawr ve vea mi chu a chherin I chher tur a ni.
25:19	A hmawr lehlamah cherub pakhat siam la, a hmawr lehlamah cherub pakhat siam bawk ang che: zahngaihna thutphah nena inbelhbawm khawm vekin a hmawr ve ve a cherub pahnih chu in siam tur a ni.
25:20	Tin, cherub-te chu inhmatawna zangaihna thutphah chu an thlaa hliapin, an thlate chu zar duai tur a ni; zangaihna thutphah lam chu cherub-te chuan an hawi ve ve tur a ni.
25:21	Tin, bawm chungah zahngaihna thutphah chu I dah tur ani a, tin, bawm chhungah chuan thuhriattirna ka la pek tur che chu I dah tur a ni.
25:22	Chutah chuan I hnenah ka lo kal ang a, tin, thuhriattirna bawm chunga cherub pahnih inkar, zangaihna thutphah chung lam atangin Israel mite thu ka pek tur apiang chungchang thuah chuan ka rawn be thin ang che.
25:23	Tin, thingri thingin dawhkan I siam tur a ni: a dung lam chu tawng hnih ni sela, a vang lam chu tawng khat ni sela, a san lam chu tawng khat leh a chanve ni rawh se.
25:24	Tin, chu chu rangkachak hlir hlak tuiin luan tur a ni a, tin, rangkachakin a tlang I kawm tur a ni.
25:25	Tin, kutphah bawka hlaiin a kawm I siam tur a ni a, tin, a kawm chu rangkachakin a tlang I kawm leh tur a ni.
25:26	Tin, chu mi atan chuan rangkachak khang chu dawhkan pali I siam tur ani a, tin, chu mi khang chu dawhkan ke pali kil theuhvah chuan vuah tur a ni.
25:27	Dawhkan chu zatna, a zawnfung chu rawlh theih turin khangte chu dawhkan a kawm sia vuah tur a ni.
25:28	Tin, dawhkan chu zawn theih nan zawnfungte chu thingri thingin I siam tur a ni.
25:29	Tin, chu mi atan chuan thlengte, note, a uain thawlte, a bun chhuahna tur berhbute I siam tur a ni: chung chu rangkachak hlir hlakin I siam tur a ni.
25:30	Tin, dawhkanah chuan ka hmaah chhangdah I hlui fo tur a ni.
25:31	Tin, khawnvar dahna rangkachak hlir hlakin I siam tur a ni: chu mi khawnvar dahna chu a ngul bul leh angul chu chher tur ani; a note, a parfungte, a parte nen chuan inzawm vek tur a ni:
25:32	tin, a sirahte chuan peng paruk lo peng chhuak sela; khawnvar dahna ngul sir lehlamah chuan peng pathum awm sela, tin, khawnvar dahna ngul sir lehlamah chuan peng pathum awm bawk rawh se:
25:33	a leh lampang pengah chuan vai umkhal kuhmum ang no pathum, a parfung leh a par I siam tur a ni; tin, a leh lampang pengah pawh vai umkhal kuhmum ang no pathum, a parfung leh a par I siam tur a ni: chutiang chuan khawnvar dahna peng paruk atan I siam tur a ni;
25:34	tin, khawnvar dahna ngulah chuan no pali, vai umkhal kuhmum anga siam, a parfung leh a parte a awm tur a ni;
25:35	tin, chu mi inzawm vek peng pahnih hnuaiah chuan parfung awm sela, tin, chu mi inzawn vek peng pahnih hnuaiah chuan parfung awm sela, khawnvar dahna ngula peng parukah chuan awm vek tur a ni.
25:36	Chung a parfungte leh a pengte chuan a zawm vek tur a ni a: apum chuan rangkachak hlir hlaka chher tur a ni.
25:37	Tin, chu mi atan khawnvar pasarih I siam tur a ni: tichuan khawnvarte chu an dah ang a, a hma zawnte chu a en theih nan.
25:38	Tin, chu mi atuka hman tur chaichehte leh meivap dahnate chu rangkachak hlir hlak a ni tur a ni.
25:39	Chu mi khawnvar dahna leh a hmanrua tur zawng zawng siam nan chuan rangkachak hlir hlak talent khat I hmang tur a ni.
25:40	Tichuan tlanga a lem ka entir ang chiah che khan engkim I siam tur a ni tih hre reng rawh khai.