Exodus 33

THUTHLUNGHLUI   Exodus   Bung 33
33:1	'Tichuan LALPAN Mosia chu a bia a, "Chhuak ula, Abrahama te, Isaaka te, Jakoba te hnena, 'I thlahte tan ka la pe ang che,' tia chhia ka lo chham tak ramah chuan nang leh Aigupta ram atanga i rawn hruai chhuahte nen hian heta ta hi han chho tawh u,
33:2	,3 hnutetui leh khawizu luanna ramah chuan: tin, in hmaah vantirhkoh ka rawn tir ang a; tichuan Kanaan-ho te, Amor-ho te, Hit-ho te, Periz-ho te, Hiv-ho te, Jebus-ho te chu ka hnawt chhuak ang a: kei zawng in zingah ka han chho ve dawn lo ve: hnam luhlul tak in lo ni si a: kawng lakah ka tiboral nghe nghe dah ang che u," a ti a.
33:4	Tin, mipuiten chu thu lawmawm lo tak chu an hriat chuan an tap hlawm a: tumah reng reng an inchei duh ta lo va.
33:5	Tin, LALPAN Mosia hnenah, "Israela thlahte hnenah, 'Hnam luhlul tak in ni e: in zingah rei lo te pawh ka han tel ve zawngin ka tiboral ngei ang che u: chuvangin in incheinate kha hlip vek rawh u, tichuan ka tih dan tur che u ka hre thei ang, a ti,' ti ang che," a ti a.
33:6	Tin, Israela thlahte chuan an incheinate chu Horeb tlang atang chuan an hlip thla hlen ta a.
33:7	Tin, Mosian puan in kha a chhawm zel a, riah hmun pawn lam hla deuh takah a zar thin a; chu chu inbiakna puan in a ti a. Tin, heti hi a ni a, tupawh LALPA zawng duh apiang chu riahhmun pawn lama inbiakna puan inah chuan an va kal thin a.
33:8	Tin, heti hi a ni a, Mosia chu Puan in pana a chhuah hunin mipui zawng zawng hu an tho vek a, mi tin, mahni puan in kawngkaah an ding theuh va. Mosia, Puan ina a luh thlengin an thlir reng thin.
33:9	Tin, heti hi a ni a, Mosia chu Puan ina a luh veleh, chhum ding chu a lo chhuk a, Puan in kawngkaah chuan a lo ding thin a: tin, LALPAN Mosia chu a rawn be thin.
33:10	Tin, mipui zawng zawngin chhum ding chu puan in kawngkaa ding an hmu a: tichuan mipui zawng zawng chu an tho va, mahni puan in kawngka theuhvah chuan chibai an lo buk thin a.
33:11	Tin, miin a thian a bia ang mai hian LALPAN Mosia chu inhmatawnin a be thin a, Tin,riahhmun lamah chuan a lo kir leh thin a: a rawngbawltu Nuna fapa Josua tlangval erawh chu puan in chhung ata chu a lo chhuak leh ve thin lo.
33:12	'Tin, Mosian LALPA hnenah chuan, "Ngai teh, nangin ka hnenah, 'He mite hi han hruai chho rawh,' i ti a ni a: tunge ni ka hnena i rawn tirh ve dawn mi la hrilh si lo. Nang lah chua, 'I hmingah ka hre chiang che alawm, tin, ka mittlungin i awm tih ka hre bawk che a lawm,' i ti a.
33:13	Chuvangin i mit ka tlun si chuan, nangma ka hriat chian theih nan che leh i mittlunga ka awm theih nan tunah hian i kawngte hi khawngaih takin mi hriattir ang che: tin, he hnam hi i mite ngei an ni tih ngaihtuah ang che," a ti a.
33:14	Tin, ani chuan, "In zingah ka tel ve zel ang a, tichuan ka chawlhtir ang che u," a ti a.
33:15	Tin, ani chuan a hnenah, kan zinga i tel ve zel si loh chuan heta ta hi min hruai chhuak ma ta che.
33:16	Kei leh i mite hi i mittlungin kan awm a ni tih hi engtin nge hriatna a awm theih tak ang: Lei chunga mihring zawng zawngte hi kei leh i mite nen kan inthliar hranna tur chuan nang kan hnena i kal thin hi a ni lo vem ni?" a ti a.
33:17	Tin, LALPAN Mosia hnenah, "Chu pawh chu i sawi ang chuan ka ti ang e: ka mit i tlung si a, i hmingah ka hre chiang bawk si chia,' a ti a.
33:18	Tin, ani chuan, "I ropuina chu khawngaih takin mi han entir teh," a ti a.
33:19	Tin, ani chuan, "Ka thatna zawng zawng chu i hmaah ka lantir ang a, LALPA hming chu i hmaah ka puang zel ang; tichuan ka khawngaih apiang chu ka khawngaih ang a, zah ka ngaihna chung apiangah chuan zah ka ngai ang," a ti a.
33:20	Tin, ani chuan, "Ka hmel zawng i hmu thei lo vang: mi hmua nung reng thei tumah reng reng an awm si lo va," a ti a.
33:21	Tin, LALPAN, "En teh, ka kianga hi hmun pakhat a awm hi, lungpui chhungah hian i ding ang a:
33:22	tin, heti hi a ni ang a, ka ropuinain a rawn kal pelh chu che chuan, lungpui khi chuah hian ka dah ang chia, ka kal pelh hma loh che chuan ka kutin ka han khuh ang chia:
33:23	tin, ka kut chu ka han la leh ang a, tichuan ka hnung lam chu i hmu ang: ka hmel erawh chu hmuh tur a ni lo ve," a ti a.