Exodus 32

THUTHLUNGHLUI   Exodus   Bung 32
32:1	Tin, mipuite chuan Mosia chu tlang ata lo chhuk thla har ta emin an hria a, mipuite chu Arona hnenah an kal khawm a, a hnenah chuan, "Khai, kan hma hruai turin pathiante min siamsak rawh; he Mosia, Aigupta ram ata min hruai chhuaktu lah hi a chanchin kan hre ta si lova," an ti a.
32:2	Tichuan Aronan an hnenah, "In nupui te, in fapate leh in fanute beh lai, rangkachak bengbehte kha han thlawn ula, ka hnenah han la rawh u," a ti a.
32:3	Chutichuan mipuiho zawng zawngte chuan rangkachak bengbeh an beh laite chu an thlawn vek a, Arona hnenah chuan an rawn la a.
32:4	Tin, ani chuan an kut a ta chu a lo la a, thir zumin a han din a, bawng no lemah a chhung ta a; tin, anni chuan "Aw Israelte u, hengte hi Aigupta ram ata rawn hruai chhuaktu che u in pathiante an nih hi," an ti a.
32:5	Tin, chu chu Aronan a han hmuhin, a hmaah chuan maicham a siam ta a; tin, Arona chu a tlangau va, "Naktuk hian LALPA tan kut awm rawh se," a ti a.
32:6	Tichuan a tuk zing takah an tho va, halral thilhlante an hlan a; remna thilhlante an rawn la a; tichuan mipui chu ei leh in turin an thu khawm a, infiam turin an tho leh a.
32:7	Tin, LALPAN Mosia chu a bia a, "Zu chhuk tawh khai, i mite Aigupta ram ata i rawn hruai chhuahte khu an intichhe zo ta vek mai:
32:8	ka thupekte chu an hawisan hma zet mai, bawng no lem an insiam a, an bia a, a hnenah chuan an inthawi a, 'Aw Israelte u, hengte hi Aigupta ram ata rawn hruai chhuaktu che u in pathiante an nih hi,' an ti e," a ti a.
32:9	Tin, LALPAN Mosia hnenah, "He miteho hi ka enthla reng a, ngai teh, hnam luhlul tak an lo nih hi:
32:10	tichuan lo ngawi rawh, anmahni kangral zo vek khawpin an chungah ka thinur chu ling teh se: tin, nang hi chi ropui takah ka siam ang che," a ti a.
32:11	Tin, Mosian LALPA a PATHIAN hnenah, "LALPA, thiltihtheihna nasa tak leh, kut chak taka i mi, Aigupta ram ata i rawn hruai chhuahte chuah hian engah nge i thinurna chu a lin hle le?
32:12	Aigupta miten engah tehlul nge, 'An tana tha lo tur tlangahte thah tur leh lei chung ata kangral vek turin a hruai chhuak alo nih hi,' an la rawn tih ang le? I thinur nasa tak hi han tireh la, i mite chunga he thil tha lo tih i tum hi han lamlet leh ang che.
32:13	i chhiahhlawh Abrahama te, Isaaka te, Israela te hnena, 'Vana arsi zatin i thlahte chu ka la tipung ang a, he ram ka lo sawi tawh zawng zawng hi i thlahte ka la pe bawk ang a, tichuan kumkhuain an luah hlen tawh ang,' tia nangmah ngei inchhala chhia i lo chham tawhnate kha hre reng ang che," tiin a ngen chiam a.
32:14	Tichuan LALPAN, "Ka mite chuah thil tha lo ka ti ang," a tih chu a lamlet ta a.
32:15	Tin, Mosia chu tlang ata thuhriattirna lung phek pahnih kengin a let thla leh ta a; lung phek a lehlam lehlam panga ziak chuan ve venate chu; a lehlam ve veahte chuan ziak a ni.
32:16	Tin, Lung phekte chu PATHIAN kutchhuak a ni a, tin, a ziakte pawh chu PATHIAN ziak ngei, lung phekte chua ziak a ni.
32:17	Tin, Josuan mipui au thawm a han hriat chuan Mosia hnenah, "Riah hmun lamah indo thawm ri a awm ka ti!" a ti a.
32:18	Tin, ani chuan, "Hnehtu au thawm a nih loh chu, hnehate au thawm pawh a ni hek lo; hla sa thawm a ni ka hriat zawk ni," a ti a.
32:19	Tin, heti hi a ni a, riahhmun kiang a va thlen chuan, sebawng no lem leh lam chu a han hmu ta a: tichuan Mosia thinrim chu a ling ta phut mai a, a lung phek kente chu a paih ta thuai a, tlang hnuaiah chuan a paih keh ta a.
32:20	Tin, sebawng no lem an siam chu a la a, meiah a rawh a, a rawt dip derh a, tuiah a phul chiam a, Israela thlahte chu a int顁 ta a.
32:21	Tin, Mosian Arona hnenah huan, "Henghote hian i chungah engnge maw an tih a, hetiang thil sual nasa tak mai an chunga i thlentir le?" a ti a.
32:22	tin, Arona chuan, "Ka pu thinrim hi ling teh thut mai suh se a: heng mipuiho hi sual lam awn tlat mi an ni tih i hria alawm.
32:23	Ka hnenah, 'Kan hma hruai turin pathiante min siamsak rawh: he Mosia Aigupta ram ata min hruai chhuaktu lah hi a chanchin kan hre ta si lo va,' an rawn ti a.
32:24	Tin, keiin an hnenah, 'Tupawh rangkachak nei apiangin rawn thlawn rawh se,' ka ti a; chutichuan mi rawn pe a: tin, keiin meiah ka lo paih lut a, tichuan he sebawng no lem hi a lo chhuak ta mai alawm maw le," a ti a.
32:25	Tin, mipuite chu an duh duhin an tan tih Mosian a hria a; (Arona chuan an hmelmate laka hmuhsitawma awm khawpin an duh duhin a lo tantir ta si a);
32:26	tichuan Mosia chu riahhmun luhna kawngkaah a ding a, "Tupawh LALPA lama tang apiang chu ka hnenah lo kal rawh se," a ti a. Tichuan Levia fate zawng zawng chu a hnenah an va kal khawm a.
32:27	Tin, an hnenah, "LALPA, Israelte Pathianin, 'Mi tinin in khandaih pai ula, riahhmun chhunngah hian a luhna kawngka atanga kawngka lehlam thlengin vak vel ula, mi tinin in unaupa pawh, mi tinin in thianpa pawh, mi tinin in thenawmpa pawh that zel rawh u,' a ti a ni," a ti a.
32:28	Tin, Levia fate chuan Mosia thu ang chuan an ti a: tin, chu mi n?chuan mi sangthum an thi a.
32:29	Tin, Mosian, "Vawiinah hian LALPA hnenah intihrang rawh u, a ni, mi tinin mahni fapa te, mahni unaupa te an lo do ta si a; tichuan vawiinah hian malsawmnain a rawn vur thei dawn che u nia," a ti a.
32:30	Tin, heti hi a ni a, a tukah chuan Mosian mipuite hnenah chuan, "Thil sual nasa tak mai in lo ti ta a, chutichuan LALPA hnenah ka han chho vang e; in sualnaah hian inremna ka siam thei mahna," a ti a.
32:31	Tichuan Mosia chu LALPA hnenah a han kal leh a, "Aw, henghote hian thil sual nasa tak mai an lo ti ta a, rangkachak pathiante chu an lo insiam ta.
32:32	Amaherawhchu an sual i ngaidam thei ang emaw chu? i theih loh zawngin, i lehkhabua i lo ziak tawh ata kha mi thai bo turin ka ngen a che," a ti a.
32:33	Tin, LALPAN Mosia hnenah, "Tupawh ka chua thil tisual apiang chu ka lehkhabu ata ka thai bo vang.
32:34	Tichuan kal la, kalna tur ka hrilh tawh che hmunah khan mipuihote hi va hruai phawt rawh: ngai teh, ka vantirhkohvin i hma a hruai zel ang: amaherawhchu ka rawn hrem hunah chuan an sualna ngeiah chuan ka rawn hrem dawn a ni," a ti a. Tin, Arona din sebawng no lem chu an siam avangin LALPAN mipuite chu a hrem ta a.