Genesis 21

THUTHLUNGHLUI   Genesis   Bung 21
21:1	Tin, LALPA chuan a sawi tawh angin Sari chu a zuk kan a, LALPA chuan a sawi tawh angin Sari chungah a tihsak ta bawk a.
21:2	Tichuan Sari chu a rai a, Pathianin a hnena a sawi hun ruat takah chuan Abrahama chu a tar hnuin fapa a hrinsak ta a.
21:3	Tin, Abrahaman a fapa neih, Sarin a hrinsaka chu a hmingah Isaaka a sa a.
21:4	Tin, Abrahaman Pathianin thu a pek ang khan, a fapa Isaaka chu ni riat a tlinin a serh a tansak a.
21:5	Tin, Abrahama chu a fapa Isaaka a neih lai chuan kum 100 mi a ni a.
21:6	Tin, Sari chuan, "Pathianin mi tinui ta; mi tin a hria apiangin mi nuihpui ang," a ti a.
21:7	Tin, amah vekin, "Sarin nautete a la pawm ang,' tih, tuin nge Abrahama hnenah sawi ngaihna hria ang? A tar hnu hian fapa ka hrinsak tak hi," a ti a,
21:8	Tin, nautechu a lo thang lian a, a hnutehnek an bantir ta a: tin, Isaaka chu a hnutehnek an bantir nichuan Abrahaman ruai ropui tak a theh a.
21:9	Tin, Aigupta mi Hagari fapa, Abrahama tana a hrina chuan, a nuihsan lai Sarin a hmu a.
21:10	Chu mi avangin Abrahama hnenah chuan "He bawihnu leh a fapa hi hnawt chhuak rawh: he bawihnu fapa hi ka fapa Isaaka ro luahpuitu tur a ni thei lo vang," a ti a.
21:11	Tin, chu thu chu a fapa avangin Abrahama ngaih chuan thil tha lo tak a ni.
21:12	Nimahsela Pathianin Abrahama hnenah chuan, "Naupang chungchang thu leh i bawihnu chungchang thu hi i ngaihin thil tha lo tak ni suh se; Sarin i hnena thu a sawi zawng zawng chu zawm rawh; Isaakaah hian i thlahte an la ti dawn si a
21:13	Tin, bawihnu fapaah pawh hian i thlah a nih avangin chi tihtham zet ka la siam ang," a ti a.
21:14	Tichuan Abrahama chu zing takah a tho va, chhang leh tuithawl tuia khatin a la a, Hagari a pe a, a kokiah a chhuansak a, naupang pawh chu a kaltir ta a; tichuan a kal a, Beer-seba thlalerah chuan a vak a vak ta a.
21:15	Tin, tuithawla tui chu a lo awm ta lo va, tichuan naupang chu hnimbuk pakhat hnuaiah a dah ta mai a.
21:16	Tin, "Naupang thi tur chu ka en ngam lo ve," a tih avangin a kal a, hla fe thal kah phak tawk angah hian a hma zawnah chuan a va thu ta chawt a. Tichuan a hma zawnah chuan a thu a, ring takin a tap ta a.
21:17	Tin, Pathianin naupang aw chu a hria a; tin, Pathian vantirhkohvin van atangin Hagari chu a zuk au va, a hnenah, "Hagar, eng i ti nge ni le? Hlau suh; a awmnaa naupang aw kha Pathianin a hria asin.
21:18	Tho la, naupang kha kai tho la, i kutin chelh rawh, amah chu chi ropui takah ka siam dawn asin," a ti a.
21:19	Tin, Pathianin a mit a tihvarsak a, tuichhunchhuah a hmu ta a; tichuan a va kal a, tuithawlah chuan tui chu a thun khat a, naupang chu a intir ta a.
21:20	Tin, Pathian chu naupang hnenah chuan a awm thin a, a lo thang lian zel a, thlalerah a awm thin a, thal kah thiam mi a lo ni ta a.
21:21	Paran thlalerah chuan a awm a; tin, a nu chuan Aigupta ram ata nupui a neihsak a.
21:22	Tin, heti hi a ni a, chu mi lai vek chuan Abimeleka leh a sipai pawl hotu Phikola chuan Abrahama hnenah, "I thil tih apiangah chuan Pathian i hnenah a awm zel thin a:
21:23	chutichuan tunah hetah hian Pathian hming chhalin, kei leh ka fapa leh ka fapaa fapa pawh tihder lovin, ka lo khawngaih tir che ang khan kei leh i awmna ram hi khawngaih ve thung zawk turin ka hnenah chhia chham rawh khai!" tiin a sawi a.
21:24	Tin, Abrahama chuan, "Ka chham ang chu," a ti a.
21:25	Tin, Abimeleka chhiahhlawhten tuichhunchhuah an chhuhsak avang chuan Abrahaman Abimeleka chu a zilh a.
21:26	Tin, Abimeleka chuan "Chu mi thil titu chu tunge ni, ka hre hauh lo mai: nang lahin mi hrilh si lo va, vawiinah chauh lo chuan ka la hre ve hauh lo mai," a ti a.
21:27	Tichuan Abrahama chuan beramte leh bawngpate a hruai a, Abimeleka hnenah a pe a; tin, an pahnih chuan thu an thlung ta a.
21:28	Tin, Abrahaman a beram rual zinga mi beram no a nu pasarih a dah hrang a.
21:29	Tin, Abimaleka chuan Abrahama hnenah,"Beram rual zinga mi beram no a nu pasarih a hranga i dah hi eng tizia nge ni?" a ti a.
21:30	Tin, ani chuan, "He tuichhunchhuah hi keimahin ka laih a ni tih mi hriatpuina turin heng beram no a nu pasarih hi ka kut ata i la tur a ni," a ti a.
21:31	Chu mi avang chuan chu mi hmun chu Beer-seba a vuah a; chutah chuan an pahniha chhia an chham dun avangin.
21:32	Chutichuan Beer-seba-ah chuan thu an thlung ta a: tin, Abimeleka chu a tho va, a sipai pawl hotu Phikola nen Philistin-ho ramah chuan an hawng leh ta a.
21:33	Tin, Abrahama chuan Beer-seba-ah chuan far thing a phun a, chutah chuan LALPA, Chatuan Pathian hming chu a lam a.
21:34	Tichuan Abrahama chu Philistin-ho ramah chuan rei tak a awm a.