Genesis 22

THUTHLUNGHLUI   Genesis   Bung 22
22:1	Tin, heti hi a ni a, chung thil hnuah chuan Pathianin Abrahama chu a fiah a, a hnenah, "Abraham," a ti a; tin, ani chuan, "Heta hi ka awm," a ti a.
22:2	Tin, ani chuan "I fapa, i fapa neih chhun, i hmangaih tak, Isaaka ngei kha hruai la, Moria ramah chuan kal la, chutah chuan ka hrilh tur che tlang pakhatah chuan halral thilhlanah hlan rawh," a ti a.
22:3	Tin, Abrahama chu zing takah a tho va, a sabengtung a siam a, a hnenah a chhiahhlawh tlangval pahnih a hruai a, a fapa Isaaka nen, tin, halral thilhlan atan thing a ek a, a tho va, Pathianin a hrilhna hmun lamah chuan a kal ta a.
22:4	Tin, ni thum niah chuan Abrahama chu a han dak a, a hmun chu hla takah a han hmu a.
22:5	Tichuan Abrahaman a chhiahhlawh tlangvalte hnenah chuan, "Hetah sabengtung nen hian lo awm rawh u, kei leh naupang hi sawtah sawn kan va kal ang a; tin, Pathian kan va bia ang a, in hnenah kan lo kir leh ang," a ti a.
22:6	Tin, Abrahama chuan halral thilhlanna thing chu a la a, a fapa Isaaka chu a puttir a; ani chuan mei leh chemt?a keng a; tichuan an pahnihin an kal dun ta a.
22:7	Tin, Isaaka chuan a pa Abrahama chu a bia a, "Ka pa," a ti a: tin, ani chuan, "Ka fapa, heta hi ka awm," a ti a. Tin, ani chuan, "En teh, mei leh thing chu a awm a; nimahsela halral thilhlan tur beram no chu khawiah nge a awm?" a ti a.
22:8	Tin, Abrahama chuan, "Ka fapa, Pathianin ama tana halral thilhlan tur beram no chu a ngaihtuah chawp mai ang chu," a ti a: chutichuan an pahnih chuan an kal dun ta zel a.
22:9	Tin, Pathianin a hrilh hmun chu an va thleng ta a; tin, Abrahama chuan chutah chuan maicham a siam a, thing chu a chhep khawm a, a fapa Isaaka chu a phuar a, maichama thing chungah chuan a muttir a.
22:10	Tin, Abrahaman a kutin a ban a, a fapa tihhlum nan chemtechu a la a.
22:11	Tin, LALPA vantirhkoh chuan van atangin amah chu a zuk au va, "Abrahama, Abrahama," a zuk ti a: tin, ani chuan, "Heta hi ka awm," a ti a.
22:12	Tin, ani chuan, "Naupang chungah khan i kut thlak suh la, amah kha engmah tih hek suh: i fapa, i neih chhun tak pawh mi pek i ui loh avangin Pathian i tih tih tunah ka hre ta a ni," a ti a.
22:13	Tin, Abrahama chu a han dak a, a en a, tin, ngai teh, a hnung lamah chuan berampa a ki thing hnawka lo tang tlat a awm a: tichuan Abrahama chuan berampa chu a va man a, chu mi chu a fapa aiah halral thilhlanah chuan a hlan ta zawk a.
22:14	Tichuan Abrahaman chu mi hmun hmingah chuan Jehova-jire a vuah a: vawiin thlenga, "LALPA tlangah ngaihtuah a ni ang chu," an ti thin ang hian.
22:15	Tin, LALPA vantirhkoh chuan a vawi hnihnaah van atangin Abrahama chu a zuk au leh a,
22:16	" 'He thil hi i tih tak avang leh i fapa, i neih chhun tak pawh i ui loh avangin, mal ka sawmsak ngei ngei ang chia,'
22:17	Vana arsi zat leh tuifinriat kama tiau vaivut zatin i thlahte chu ka la tipung ngei ngei ang tih leh i thlahte chuan an dote kulh kawngkhar chu an la neihsak ang tih leh,
22:18	ka thu i awih tak avangin i thlahah chuan khawvela chitin an la thawveng ang tih, mahni leh mahni inchhalin chhia ka chham ta, LALPAN a ti," a zuk ti a.
22:19	Chutichuan Abrahama chu a chhiahhlawh tlangvalte hnenah chuan a kir leh a, tin an tho va, Beer-seba-ah chuan an kal za ta hlawm a; tin, Abrahama chu Beer-seba-ah a awm ta reng a.
22:20	Tin, heti hi a ni a, chung thil hnuah chuan miin Abrahama hnenah chuan, "Ngai teh, Milkaii pawh khan i nau Nahora chu fate a hrinsak ta a sin," tiin an hrilh a.
22:21	A fa tir chu Uza a ni a; a nau chu Buza a ni a, Kemuela, Arama pa nen;
22:22	Cheseda te, Hazova te, Pildasa te, Jidlapha te, Bethuela te pawh an ni a.
22:23	Tin, Bethuela chuan fanu Rebeki a nei a: chung pariatte chu Milkaii chuan Abrahama nau Nahora chu a hrinsak a ni.
22:24	A hmei, a hming Reumaii pawhin Teba te, Gahama te, Tahasa te, Maaka te a hring bawk a.