Genesis 5

THUTHLUNGHLUI   Genesis   Bung 5
5:1	Hei hi Adama thlahte chuanna lehkha bu chu a ni. Pathianin thu ngawta mihring a siam nikhan Pathian anpuiin amah chu a siam a;
5:2	thu ngawtin mipa leh hmeichhiaah anmahni chu a siam a ni; thu ngawta siama an awm nikhan mal a sawmsak a, an hmingah chuan "Mihring" a vuah a.
5:3	Tin, Adama chuan kum 130 a nihin amah ang tak, ama anpui ngei fapa a nei a; a hmingah Setha a sa a:
5:4	Tin, Setha a neih hnu chuan Adama chu kum 800 a la dam a: fanu leh fapate a nei leh hlawm a.
5:5	Tichuan Adama dam chhung zawng zawng chu kum 930 a ni a: tin, a thi ta a.
5:6	Tin, Setha chuan kum 105 a nihin fapa Enosa a nei a:
5:7	tin, Enosa a neih hnu chuan Setha chu kum 807 a la dam a, fanu leh fapate a nei leh hlawm a:
5:8	tichuan Setha dam chhung zawng zawng chu kum 912 a ni a: tin, a thi ta a.
5:9	Tin, Enosa chuan kum 90 a nihin fapa Kenana a nei a:
5:10	tin, Kenana a neih hnu chuan Enosa chu kum 815 a la dam a, fanu leh fapate a nei leh hlam a:
5:11	tichuan Enosa dam chhung zawng zawng chu kum 905 a ni a: tin, a thi ta a.
5:12	Tin, Kenana chuan kum 70 a nihin fapa Mahalalela a nei a:
5:13	tin, Mahalalela a neih hnu chuan Kenana chu kum 840 a la dam a, fanu leh fapate a nei leh hlawm a:
5:14	tichuan Kenana dam chhung zawng zawng chu kum 910 a ni a: tin, a thi ta a.
5:15	Tin, Mahalalela chuan kum 65 a nihin fapa Jareda a nei a:
5:16	tin, Jareda a neih hnu chuan Mahalalela kum 830 a la dam a, fanu leh fapate a nei leh hlawm a:
5:17	tichuan Mahalalela dam chhung zawng zawng chu kum 895 a ni a, tin, a thi ta a.
5:18	Tin, Jareda chuan kum 162 a nihin fapa Enoka a nei a:
5:19	tin, Enoka a neih hnu chuan Jareda chu kum 800 a la dam a, fanu leh fapate a nei leh hlawm a:
5:20	tichuan Jareda dam chhung zawng zawng chu kum 962 a ni a: tin, a thi ta a.
5:21	Tin, Enoka chuan kum 65 a nihin fapa Methusela a nei a:
5:22	tin, Methusela a neih hnu chuan Enoka chu kum 300 chhung zawng Pathian nen an leng dun thin a, fanu leh fapate a nei leh hlawm a:
5:23	tichuan Enoka dam chhung zawng zawng chu kum 365 a ni a:
5:24	tin, Enoka chu Pathian nen an leng dun thin a: tin, a awm ta lo va; Pathianin a la bo ta a ni.
5:25	Tin, Methusela chuan kum 187 a nihin fapa Lameka a nei a:
5:26	tin, Lameka a neih hnu chuan Methusela chu kum 782 a la dam a, fanu leh fapate a nei leh hlawm a:
5:27	tichuan Methusela dam chhung zawng zawng chu kum 969 a ni a: tin, a thi ta a.
5:28	Tin, Lameka chuan kum 182 a nihin fapa a nei a:
5:29	tin, "He mi ngei hian Lalpa anchhe lawh lei avanga kan hnathawhna leh kuta kan thawh rimnaah hian min thlamuan tawh ang," tiin. a hmingah Nova a sa a.
5:30	tin, Nova a neih hnu chuan Lameka chu kum 595 a la dam a, fanu leh fapate a nei leh hlawm a:
5:31	tin, Lameka dam chhung zawng zawng chu kum 777 a ni a: tin, a thi ta a.
5:32	Tin, Nova chu kum 500 mi a ni a: Nova chuan fapa Sema te, Hama te, Japhetha te a nei a.