Genesis 6

THUTHLUNGHLUI   Genesis   Bung 6
6:1	Tin, heti hi a ni a, lei chungah mihring an lo puna fanute an lo neih hlawm chuan,
6:2	Pathian fapate chuan mihring fanute chu hmuh tha takin an hmu a; tichuan an duhzawng apiangte chu nupuiahte an lo nei ta thin a.
6:3	Tichuan LALPA chuan, "Ka Thlarau chuan mihring chu kumkhuain a bei fo lo vang, anni pawh chu tisa an ni si a: nimahsela kum za leh kum sawmhnih chu an la dam ang," a ti a.
6:4	Chung lai chuan Milianho chu leiah hian an awm a; chu mi hnuah pawh Pathian fapaten mihring fanute chu an pawl a, an laka fate an neih thin lai khan an awm bawk a: chungte chu hmasanga mi chak, mi hmingthangte kha an ni.
6:5	Tin, LALPA chuan leiah hian mihring sualzia chu nasa tak a ni tih leh, an rilru suangtuahzia reng reng chu sual hlir a ni fo mai tih a lo hria a.
6:6	Tichuan leiah hian mihring a lo siam tak avangin LALPA chu a inchhir a, rilru nat nan a hman phah ta a.
6:7	Tichuan LALPA chuan, "Ka mihring siam hi lei chung ata ka tiboral teh mai ang; mihring te, sa te, rannung te, chungleng sava te nen lam hian; ka siam tak avangin ka inchhir a ni," a ti a.
6:8	Nova erawh chuan LALPA mit a tlung a.
6:9	Heng hi Nova thlahte chu an ni. Nova chu mi fel tak a ni a, a dam rualpuite zingah chuan sawiselbo a ni: Nova chu Pathian nen an leng dun thin a.
6:10	Tin, Nova chuan fapa pathum Sema te, Hama te, Japhetha te a nei a.
6:11	Tin, lei hi Pathian mithmuhin a chhe zo tawh a, lei hi inpawngneknain a khat zo ta bawk a.
6:12	Tin, Pathianin lei hi a en a, tin ngai teh, a chhe zo tawh a, tisa zawng zawngin leiah hian an awm dan an tichhe zo tawh si a.
6:13	Tin, Pathianin Nova hnenah, "Tisa zawng zawng tawpna chu ka hmaah a lo thleng ta a ni; anmahni avangin lei hi inpawngneknain a khat zo ta si a; tichuan ngai teh, a lei chawpin ka tiboral dawn e.
6:14	I tan far thingin lawng siam rawh; lawngah chuan pindante i siam tur a ni a, a chhung lam leh a pawn lam tur chu far hnai i hnawih vek bawk tur a ni.
6:15	Tin, hei hi i siam dan tur chu a ni: lawng dung lam chu tawng zathum ni sela, a vang lam chu tawng sawmnga ni sela, a sei lam chu tawng sawmthum ni rawh se.
6:16	Lawngah chuan tukverh i siam tur a ni a, a chung lam tawng khat chinah chuan i zo tur a ni; tin, lawng kawngka chu a pangah i siam tur a ni a: chhawng hnuaihnung leh chhawng hnihna leh chhawng thumna neiin i siam tur a ni.
6:17	Tin, ngai teh, keimah ngeiin tisa zawng zawng, nunna thaw pai reng reng chu van hnuai ata tiboral turin leiah hian tui ka tilet dawn a ni; leia thil tinreng awm hi an thi vek ang.
6:18	Amaherawhchu ka thuthlun chu i chungah ka tinghet zawk ang a; lawngah chuan i lut tur a ni; nang i lut tur a ni a, i fapate leh i nupui leh i fapate nupuite pawh i hnenah an lut ve tur a ni.
6:19	Tin, tisa zawng zawnga thil nung tinreng zinga mi, chi tin pahnih zelin i hnenah tihnun ve turin lawngah chuan i hruai lut tur a ni; a nu leh a pa zel an ni tur a ni.
6:20	Savate anmahni chi awm dan ang theuhvin, rante anmahni chi awm dan ang theuhvin, lei a rannung tinreng anmahni chi awm dan ang theuhvin, chi tin pahnih zelin, i tihnun turin i hnenah an lo kal tur a ni.
6:21	Tin, chaw, in ei mi zawng zawng la la, i hnenah dah khawm rawh; tichuan nang leh anni tan chaw a ni ang," a ti a.
6:22	Chutiang chuan Novan a ti a; Pathiangin a hnena thu a pek zawng zawng ang ngei chuan a ti ta a.