Leviticus 2

THUTHLUNGHLUI   Leviticus   Bung 2
2:1	Tupawhin thilhlan, chhangphut thilhlan LALPA hnena a hlan hunin, a thilhlan chu chhangphut dip tak a ni tur a ni; hriak a leih ang a, a chungah beraw a dah bawk ang:
2:2	tin, Arona fapa puithiamte hnenah a kalpui ang a: tin, anin a vei khatin chuta chhangphut dip tak chu, a hriak nen a beraw zawng zawng nen chuan a la chhuak ang a; tin, puithiam chuan maicham chungah chuan hriat rengna, LALPA tana rimtui tak, meia thilhlan atan a hal ang:
2:3	tin, chhangphut thilhlan lak bangte chu Arona leh a fapate ta tur a ni ang: chu chu LALPA tana meia thilhlantea thil thianghlim tak pakhat a ni.
2:4	Tin, chhangphut thilhlan, a urnaa ur thilhlan i hlan chuan chhangphut dip tak, hriaka hmeh dawidim telh loh chhang emaw, hriaka chulh dawidim telh loh chhangper pan emaw a ni tur a ni.
2:5	Tin, i thilhlan chu thlenga ur chhangphut thilhlan a nih chuan dawidim telh loh, hriaka hmeh, chhangphut dip tak a ni tur a ni.
2:6	I phel ang a, hriakin i leih tur a ni: chu chu chhangphut thilhlan a ni e.
2:7	Tin, i thillan chu kanbela kan, chhangphut thilhlan a nih chuan changphut dip tak leh hriaka siam a ni tur a ni.
2:8	Tin, chung thila siam chhangphut thilhlan chu LALPA hnenah i rawn la ang a: chu chu puithiam hnena hlan a ni ang a, anin maichamah a rawn kalpui tur a ni.
2:9	Tin, puithiamin chhangphut thilhlan ata hriatrengna chu a la chhuak ang a, maichamah chuan a hal ang: chu chu LALPA tana rimtui tak, meia thilhlan a ni.
2:10	Tin, chhangphut thilhlan la bangte chu Arona leh a fapa te pual tur a ni ang: chu chu LALPA tana meia thilhlantea thil thianghlim ber a ni.
2:11	Chhangphut thilhlan reng reng, LALPA hnena in hlan tur chu dawidim tela siam tur a ni lo: LALPA tana meia thilhlanah chuan dawidim emaw khawizu emaw reng reng in hal tur a ni lo.
2:12	Siam hmasak ber thilhlan ang zawngin LALPA hnenah in hlan ang a; nimahsela rimtui atana maichamah chuan dah tur a ni lo.
2:13	I chhangphut thilhlan zawng zawng chu Pathian thuthlung entirna chi i al tur a ni; I thilhlan zawng zawng chu chi i al zel tur a ni: i thil hlan zawng zawngah chuan chi i hlan tel tur a ni.
2:14	Tin, rah hmasa ber chhangphut thilhlan LALPA hnena i hlan chuan buh thar hmasa bera mi, changphut thilhlan atan chhangper I hlan tur a ni.
2:15	Tin, hriak i leih ang a, a chhunga beraw i dah tur a ni; chu chu chhangphut thilhlan a ni.
2:16	Tin, puithiamin chhang per leh hriak then chu hriat reng nan beraw zawng zawng nen chuan a hal tur a ni: chu chu LALPA tana meia thilhlan a ni.