Leviticus 3

THUTHLUNGHLUI   Leviticus   Bung 3
3:1	Tin, a thilhlan chu remna thilhlan inthawi a niha, bawng rual zinga mi a hlan chuan, a nu emaw a pa emaw pawh ni sela, LALPA hmaah sawiselbo a hlan tur a ni.
3:2	A thilhlan lu chungah chuan a kut a nghat ang a, inbiakna puan in kawngka bulah a talh ang a: tin, Arona fapa puithiamte chuan maicham chu thisen chuan an theh vel tur a ni.
3:3	Tin, remna thilhlan inthawinaa mi LALPA tana meia thilhlan a hlan ang a; a kawchhung a thau leh rilbawh zawng zawng
3:4	leh a kal pahnih leh a bawhtu thau a nema mi leh a tin tuamtu rang,a kalte chawpin a phawrh tur a ni.
3:5	Tin, Arona fapaten maichamah, meia thing awm chunga halral thilhlan chunga chuan an hal tur a ni: chu chu LALPA tana rimtui tak, meia thilhlan a ni.
3:6	Tin, remna thilhlan inthawinaa LALPA tana thilhlan chu beram rual zinga mi a ni chuan a nu pawh ni sela, a pa pawh nisela, sawiselbo a hlan tur a ni.
3:7	A thilhlana beram no a hlan chuan LALPA hmaah an hlan ang a:
3:8	a thil hlan lu chungah chuan a kut a nghat ang a, inbiakna puan in kawtah a talh ang a: tin, Arona fapaten maicham chu thisen chuan an theh vel tur a ni..
3:9	Tichuan remna thilhlan inthawinaa mi, LALPA tana meia thilhlan a hlan ang. A thau te, a mei thau tak a tluanin, a kawngruh thlengin a la vek ang a; a kawchhung thau te, a rilbawh zawng zawng te,
3:10	a kal pahnih leh a bawhtu thau a nema mi leh a thin tuamtu rang, a kalte chawpin a phawrh tur a ni.
3:11	Tin, puithiamin chu chu maichamah a hal tur a ni: chu chu LALPA tana meia thilhlan ei tur chhiah a ni.
3:12	A thilhlan chu kel anih chuan LALPA hmaah a hlan ang a:
3:13	tin, a lu chungah a kut a nghat ang a, tin, a lu chungah a kut a nghat ang a, inbiakna puan in kawtah a talh ang a: tin, Arona fapaten maicham chu thisen chuan an theh vel tur a ni.
3:14	Tin, chu mia a thil hlan chu a hlan ang a, LALPA tana meia thilhlan chu; a kawchhung thau leh a rilbawh zawng zawng
3:15	leh a kal pahnih leh abawhtu thau a nema mi leh a thin tuamtu rang, a kalte chawpin a phawt tur a ni.
3:16	Tin, chung chu puithiamin maichamah a hal tur a ni: rimtui atana meia thilhlan ei tur chhiah a ni a; a thau zawng zawng chu LALPA pual a ni.
3:17	Thau emaw thisen emaw ei loh tur tih hi in thlahte zel tan pawh in awmna apiangah zawm tura thupek ding reng a ni ang,' ti rawh," tiin.