Ruthi 1

THUTHLUNGHLUI   Ruthi   Bung 1
1:1	Roreltute chuan ro an rel laiin heti hi a ni a, chu mi ramah chuan tam a lo tla a.
1:2	Tin, Bethlehem-Juda-a mi pakhat Moab rama awm turin amah leh a nupui leh a fapate pahnih nen an kal a. Chu mi hming chu Emimeleka a ni a, a nupui hming chu Naomi a ni a, a fapate pahniha hming chu Mahlona leh Kiliona, Bethlehem-Juda-a Ephrath mi an ni. Moab ramah chuan an kal a, chuta chuan an awm ta reng a.
1:3	Tin, Elimeleka, Naomi pasal chu a thi a, ama leh a fapate pahnih chauh an ni ta a.
1:4	Tin, Moab ram hmeichhia nupuiah an nei a, a pakhata hming chu Orpi a ni a, a pakhata hming chu Ruthi a ni: Chutah chuan kum sawm emaw lai an awm a.
1:5	Tin, Mahlona leh Kilona chu an thi ta ve ve a; tichuan chu hmeichhia chu a fate pahnih leh a pasal chuan an thihsan ta a.
1:6	Chuti chuan a mote nen chuan Moab ram ata chu haw leh turin an tho va, LALPAN ei tur pein a mite chu a kan dan te Moab ram atanga a lo riat avangin.
1:7	Tichuan a awmna ata chu a mote pahnih nen chuan an chuak a; Judai rama haw leh turin an kal ta a.
1:8	Tin, Naomi chuan a mote pahnih hnenah chuan, "In nu in lam ve vea haw leh turin kal rawh u khai; mitthi chung leh ka chunga in tih ang hian LALPA chuan in chungah ngilnei takin ti ve rawh se.
1:9	LALPA chuan in pahnihin pasalte ina khawsakna in tawn theih nan khawngaih che u rawh se," a ti a. Tichuan a fawp a, tin, aw chuah meuhvin a tap ta chiam mai a.
1:10	Tin, a hnenah, "Kan kal lo vang, i chite hnena i hawnnaah chuan kan tel ve zawk ang,"an ti a.
1:11	Tin, Naomi chuan, "Ka fanute u, haw leh zawk rawh u; engah nge ka hnenah chuan in kal ve tehlul ang le? In pasal tur fapa ka pai leh thei dawn em ni?
1:12	Ka fanute u, haw leh ula kal raw u khai; pasal han nei turin ka upa lutuk tawh si a. Tin, ka bei a la sei reng e ti mah ila, zaninah mai pawh hian pasal neiin fapate pawh nei mah ila,
1:13	an puitlin thlengin in awm dawn em ni ang? Ni kawng lo ve a, ka fanute u, nangmahni avang hian ka lungngaihna a zualkai zawk a ni, LALPA kut chu ka chungah a tla ta a nih hi," a ti a.
1:14	Tin, an aw chhuahin an tap leh ta chiam mai a; tin, Orpi chuan a pi chu a fawp a; Ruthi erawh chuan a vuan tlat a.
1:15	Tin, ani chuan, "Ngai teh, i mopuinu chu a chite nen leh a Pathian hnen lamah chuan a kir leh ta a; nang pawh i mopuinu umin haw ve taw aw," a ti a.
1:16	Tin, Ruthi chuan, "Nangmah then tur leh nangmah zui lova haw leh tur chuan min thlem lo hram hram rawh: i kalna apiangah ka kal ang a; i riahna apianga ka riak ang a, i chite chu ka chite an ni ang a, i Pathian chu ka Pathian a ni ang.:
1:17	i thihna apiangah chuan ka thi ang a, chutah chuan min phum ve mai tur a ni: nang leh kei hi thihna chauh lo chuan thil dangina min then dawn chuan LALPAN a tih tihin min ti mawi sela, chu aia nasa pawhin," a ti a.
1:18	Chutichuan a hnena kal a tum tlat tih a lo hriat chuan a ngawihsan ta a.
1:19	Tichuan Bethlehem thlengin an kal dun ta a. Tin, heti hi a ni a, Bethlehem an thlen chuan a khuain an phu ta mur mur mai a, hmeichhiate chuan, "Hei, Naomi kha ni maw?" an ti a.
1:20	Ani chuan an hnenah, "Naomi min ti suh u, Maraii min ti zawk rawh u. Engkimtitheia chuan lungchiatthlak takin min ti ta si a.
1:21	Muk takin ka chhuak a, LALPA chuan kutbengin mi hruai hawng leh a ni: LALPA chuan ka chungah a lungnih lohna a tilang a, Engkimtitheia chuan min tihreawm te hre reng siin angati nge Naomi min la tih cheu ni le?" a ti a.
1:22	Chutichuan Naomi chu a lo kir a, a monu Moab mi Ruthi nen Moab ram atang chuan an lo kir a ni: barli seng tan tirh laiin Bethlehem chu an thleng a ni.