Ruthi 2

THUTHLUNGHLUI   Ruthi   Bung 2
2:1	Tin, Naoami chuan a pasala laichin, Elimeleka thlah, mi neinung tak laichin a nei a; a hming chu Boaza a ni.
2:2	Tin, Moab mi Ruthi chuan Naomi hnenah, "Lo lamah ka kal ang a, mi lo khawngaihtu apiang buhto ka va zawng ang e aw," a ti a. Tin, a hnenah, "Kal ta che, ka fanu," a ti a.
2:3	Tichuan, a kal ta a, buh sengtute seng hmaih chu a va zawng ta a: tichuan Elimeleka thlah Boaza lovah ngei chuan a va kal fu hlauh mai a.
2:4	Tichuan, ngai teh, Bethlehem atangin Boaza chu a va kal a, buh sengtute hnenah chuan,"In hnenah LALPA awm rawh se," a ti a. Tin, anni chuan, "LALPAN malsawm che rawh se," tiin an chhang a.
2:5	Chutichuan Boaza chuan a chhiahhlawh, buhsengtute chunga hotu hnenah chuan, "Hei khawi lam nula nge ni le?" a ti a.
2:6	Tin, a buh sengtute chunga hotu a chiahhlawh chuan, "Moab nula, Moab ram ata Naomi hnena lo kal ve a ni:
2:8	Chutichuan Boaza chuan Ruthi hnenah chuan, "Ka fanu, ngai teh aw; lo dangah chuan buhto zawngin kal suh la, heta ta hi kal sawn suh, ka chhiahhlawh nulate hnenah hian awm reng rawh.
2:9	An buh seng hi en reng la, an hnu chhui zel rawh; tlangvalte chu engmah tih loh tur chein thu ka pe tawh diam e; tin, i tui a hal apiangin tui bela tlangvalte ti chawi sa va in thin ang che," a ti a.
2:10	Chutichuan a kun a, lei siin a bawkkhup a, a hnenah, "Hnam dang ka ni si a, nangin hetianga min hriat duha min lo khawngaih hi eng tizia nge ni?" a ti a.
2:11	Tin, Boaza huan a chhang a, a hnenah, "I pasal thih achina i pi chunga i thiltih dan zawng zawngte miin mi hril vek a; tin, i nu leh i pa leh i pianna ram kalsana tun hma lama i mi hriat ngai lohte hnena i lo kal dante pawh hi.
2:12	LALPA chuan i thiltih chu rul sela, LALPA, Israelte Pathian, inhumhim nana a thlahnuai i rawn chuha chuan i that man pe teuh che u rawh se," a ti a.
2:13	Tin, ani chuan, "Ka pu, min khawngaih ang che; nangin mithlamuan a, i chhiahhlawh ulate zinga mi ni mah suh ila, i chhiahhlawhnu hi tha takin mi be ta si a," a ti a.
2:14	Tin, chaw ei hun chuan Boazan a hnenah, "Lo haw teh khai, chhangte hi han ei ve la, chhang themte chu uain thurah chiah ve rawh," a ti a. Chutichuan buh sengtue kiangah chuan a thu a; tin, chhangper chu a pe a, a ei a, a kham hnu pawhin a la ei bang ta cheu va.
2:15	Tin, buhto zawng tura a thawh leh chuan, Boaza chuan a tlangvalte hnenah, "Buhphal zinga mite pawh hi char zel sela, hau suh ang che u.
2:16	Tin, a tela mite pawh, pawh chuahsak ula, hnutchiah zel ula, chhar sela, hau suh u," tiin thu a pe a.
2:17	Chutichuan a zawng a; tin, a zawn sa chu a vua a, barli epha khat emaw lai a ni.
2:18	Tin, a phur a, khuaah chuan a haw ta a: tin, a pi chuan a buto zawng chu alo hmu a; tin, ani chuan a kham hnuah a ei bang chu a phawrh a, a pe a.
2:19	Tin, api chuan a hnenah, "Vawiinah hian khawi lama buhto nge i zawn? A lo hre duhtu che chu malsawmin awm rawh se," a ti a. Tin, ani chuan, tu hnenah nge a va thawh tih a pi chu a hrilh a. "Vawiina ka va thawhnpa chu a ming Boaza a ni," a ti a.
2:20	Tin, Naomi chuan a monu hnenah chuan, "LALPA, mi nung leh mitthi chunga a khawngaihna bang chuang ngai lova chuan amah chu malsawm rawh se," a ti a. Tin, Naomi chuan a hnenah, "chu mi chu, kan lamhnai, kan laichin bul a ni asin," a ti a.
2:21	Tin, Moab mi Ruthi chuan, "A nih tak chu, ka hnenah pawh, 'Ka buh hi a seng zawh vek hma loh chuan ka tlangvalho hnenah hian tel reng ang che,' mi ti nghe nghe asin," a ti a.
2:22	Tin, Naomi chuan a monu Ruthi hnenah chuan, "Ka fanu, lo danga an hmuh hauh lohna tur chein a chhiahhlawh nulaho zingah hlir chuan kal la a tha ang," a ti a.
2:23	Chutichuan barli leh huit seng zawh thlengin Boaza chhiahhlawhnulaho zingah hlir chuan buhto zawngin a kal a; tin, a pi hnenah chuan a awm a.